“Lesen 4: Ol Komanmen,” Prijim Gospel Blong Mi: Wan Gaed blong Misinari Seves (2018), 74–85
“Lesen 4,” Prijim Gospel Blong Mi, 74–85
Lesen 4
Olgeta Komanmen
Stap Tijim Lesen Ia
I gat plante wei blong tijim ol komanmen we oli faenem long lesen ia. Eksampol, yu save tijim sam pat blong ol komanmen long lesen ia olsem pat blong ol fas tri lesen, o yu save tijim sam moa komanmen olsem wan lesen nomo. Ol nid blong olgeta we yu stap tijim mo daereksen blong Spirit nao, i sud talemaot wanem we yu mas mekem.
Rere blong Tij
Stamba tingting blong yu blong stap tijim ol komanmen i blong helpem ol pipol blong oli laef folem gospel taem oli yusum fet blong olgeta long Jisas Kraes mo taem oli stap sakem sin taem oli stap rere blong kasem baptaes mo konfemesen mo blong helpem olgeta blong stap fetful afta we oli baptaes. Helpem olgeta we yu tijim blong andastanem se blong stap strong kasem en, i tekem tu, fasin blong obei long ol komanmen blong God. Taem oli obei long ol komanmen, bae testemoni blong ol pipol long saed blong gospel bae i gro, bae oli soem se oli “gat ol hat we i fulap long sore mo ol spirit we i wantem sakem sin,” mo bae oli stat blong sakem evri sin blong olgeta (luk long Moronae 6:1–4; Doktrin mo Ol Kavenan).
Lesen ia oli oganaesem long wan defren wei long ol fas tri lesen. Ol fas tri lesen i eksplenem doktrin fandesen blong gospel blong Jisas Kraes. Lesen ia i eksplenem ol stret komanmen we God i bin givim we bae i helpem yumi blong yusum ol gospel prinsipol insaed long ol laef blong yumi.
I gat plante wei blong tijim lesen ia. Wei we bae yu yusum blong tijim lesen ia, bae yu luksave tru long ol nid, ol intres mo situesen blong ol pipol we yu tijim mo wanem Spirit i lidim yu blong talem. Oltaem tingting mo prea abaot olsem wanem yu save helpem ol investigeta blong laef folem gospel. Tingting plante long ol kwestin mo level blong andastaning blong olgeta we yu tijim.
Oltaem tingting mo prea abaot olsem wanem yu save helpem ol investigeta blong laef folem gospel. Ol aedia i tekem tu:
-
Blong stap tijim wan o moa long wan komanmen olsem pat blong wan narafala lesen. Taem yu mekem olsem, tingting long ol prinsipol we oli tijim long Alma 12:32: “God i givim ol komanmen, afta we hem i mekem olgeta oli save plan blong fasin blong pemaot man, ” (oli ademap italik). Sam long ol komanmen ia, olsem prea, mo skripja stadi, i moa gud blong tijim olgeta olsem pat blong ol fas tri lesen. Ol narafala komanmen, i moa gud blong tijim afta we yu tijim ol doktrin fandesen blong gospel insaed long ol fas tri lesen.
-
Stap tijim tu (2) o tri (3) komanmen insaed long wan lesen nomo.
-
Stap tijim wan komanmen nomo olsem wan lesen.
-
Stap tijim ol komanmen folem topik insaed long gospel. Luklukbak smol long taem blong lesen abaot gospel blong Jisas Kraes bifo yu tijim wan o moa long ol komanmen ia. Taem yu stap mekem olsem, yu save helpem ol investigeta blong luk olsem wanem ol komanmen oli save go insaed long wan bigfala pikja blong stap yusum fet long Sevya mo stap sakem sin blong stap rere from baptaes mo konfemesen. Laef blong olgeta i save gat blesing taem bae oli luk long gospel blong Jisas Kraes olsem wan paten blong laef blong olgeta.
Ating bae yu save tijim sam investigeta long sam visit nomo; sam bae i nidim moa visit. Yu save tijim ol lesen ia long wei we i save helpem ol pipol moa blong oli rere long baptaes mo konfemesen blong olgeta. Stamba tingting blong yu i no blong tokbaot evri samting we i stap insaed long buk ia; hem i blong helpem ol narawan blong kam long Kraes tru long fet long Jisas Kraes, fasin blong sakem sin, baptaes, mo kasem presen we i Tabu Spirit, mo stap strong kasem en.
Bae lesen i no save ova long 45 minit. Yu save faenem se taem bae letem yu blong mekem ol sot visit nomo blong tij. Long taem olsem, bae yu nid blong stap go lukluk olgeta moa, mo mekem moa sot visit mo tokbaot ol smol pat nomo blong lesen.
I gat plante wei we yu save statem blong tijim lesen ia. Wijwan komanmen yu tijim, wanem taem yu tijim, mo hamas taem yu givim, bae yu save faenemaot folem ol nid blong ol pipol we yu tijim mo folem wanem Spirit i talemaot long yu.
Lanem abaot Ol Komanmen mo Ol Komitmen
Taem yu stap stadi long lesen ia, folem paten ia we i stap daon ia:
-
Stadi long seksen we i tokbaot komanmen ia mo raetem wan simpol plan blong lesen wetem tri (3) o faef stamba poen.
-
Tijim kompanion blong yu blong tu (2) o tri (3) minit. Praktis long olsem wanem bae yu givimaot invitesen mo olsem wanem bae yu stretem ol wari.
-
Toktok raon long ol wei blong folemap wanwan komitmen we yu bin invaetem ol narawan blong oli akseptem.
Fasin blong Stap Obei
God i bin givim yumi ol komanmen blong gud blong yumi. Oli ol toksave we i kam long wan Papa long Heven we i lavem yumi, blong helpem yumi gat ol hapi laef. Hem i givim tu fridom blong jus, o janis blong save jusum bitwin gud mo ivel. Taem yumi obei long God, yumi stap folem Spirit mo yumi stap jus blong folem wil blong Hem. Fasin blong obei long ol komanmen i tekem pis i kam long yumi long laef ia mo long laef we i no save finis long wol we bae i kam. Fasin blong stap obei i soem lav blong yumi long God. Fasin blong no stap obei i mekem yumi harem nogud.
Papa long Heven i save ol samting we yumi no stap strong long olgeta mo Hem i save wet longtaem wetem yumi. Hem i blesem yumi taem yumi dipen long Pikinini blong Hem mo traehad blong obei ol komanmen blong Hem. Hem i wantem yumi blong obei long Hem blong mekem se Hem i save blesem yumi.
Stadi long Ol Skripja
Fridom blong Mekem Joes
Fasin blong Stap Obei
Invitesen
-
?Bae yu save obei ol loa blong God?
Prea Oltaem
God i givim komanmen long yumi blong prea long Hem. Yu save prea eni taem mo long eni ples. Lod i bin tijim yumi blong yumi nildaon mo prea long moning mo long naet, yumi wanwan mo wetem ol famli blong yumi. Papa blong yumi long Heven i stap harem mo i stap givim ansa long ol prea blong yumi. Tru long prea evri dei, yumi kasem spirit we bae i lidim yumi mo ol blesing. Oltaem yumi mas prea wetem tru hat. Yumi mas prea tu wetem “strong tingting”, we i minim se yumi komitim yumi blong mekem aksen folem ansa we yumi kasem.
Yumi prea wetem fet long Papa blong yumi long Heven long nem blong Jisas Kraes (luk long Moses 5:8). From se Hem i Papa blong yumi, mo yumi ol pikinini blong Hem, bae Hem i ansa long ol prea blong yumi. Yumi statem ol prea blong yumi taem yumi toktok long Papa blong yumi long Heven. Yumi endem ol prea blong yumi wetem toktok ia, “Long nem blong Jisas Kraes, amen.”
Long prea, yumi toktok fri mo wetem tru tingting long Papa long Heven we i lavem yumi. Yumi talemaot glad mo tangkyu blong yumi from ol blesing blong yumi. Yumi save talemaot lav blong yumi long Hem. Yumi askem tu blong kasem help, proteksen, mo blong Hem i lidim yumi folem ol nid blong yumi.
Taem yumi stap prea wetem fet, tru tingting, mo strong tingting, bae yumi luk God i lidim ol laef blong yumi. Bae Hem i lidim yumi long evri dei laef blong yumi mo bae Hem i helpem yumi blong mekem ol tingting blong yumi. Bae Hem i blesem yumi wetem ol gudfala filing, mo ol filing blong pis. Bae Hem i wonem yumi long ol denja mo bae Hem i mekem yumi strong blong stanap strong agensem temtesen. Bae Hem i fogivim ol sin blong yumi. Bae yumi filim se yumi stap kolosap long Hem. Yumi mas lan blong stap luksave we Hem i stap lidim ol laef blong yumi. Yumi mas lanem blong lisin long kwaet, smol voes blong Spirit.
Yumi save luksave taem Tabu Spirit i stap tijim yumi long trutok. Maen blong yumi bae i fulap long ol tingting we i kam long God mo oli stap leftemap yumi. Bae yumi kasem moa laet, o kasem niufala save. Ol hat blong yumi bae oli gat ol filing blong pis, glad, mo lav. Bae yumi wantem blong mekem gud mo bae yumi wantem helpem ol narawan. Ol filing ia oli had blong tokbaot be yumi save luksave olgeta taem yumi go tru long olgeta.
Stadi long Ol Skripja
Invitesen
-
?Bae yu nildaon mo prea evri dei yuwan mo olsem wan famli?
Stadi Ol Skripja
Ol skripja oli ol rekod we oli raetem abaot wanem God we i bin mekem long ol pikinini blong Hem olsem we ol profet oli rekodem taem Tabu Spirit i bin talem long olgeta. Yumi stap soem fet blong yumi taem yumi stap stadi, biliv, mo stap obei long toktok we i kam long God. Yumi luklukgud long ol skripja blong andastanem trutok. Yumi stap kakae long olgeta from se oli stap openem ol doa blong revelesen mo oli stap soem yumi wanem yumi nid blong mekem mo wanem man yumi nid blong kam. Yumi stap lukluk long ol skripja blong lanem abaot Jisas Kraes mo gospel blong Hem. Fet long Jisas Kraes i wan presen we i kam long God mo i kam tru long stadi mo laef folem toktok blong Hem mo gospel blong Hem. Ol skripja we Jos i letem, oli singaotem tu ol tabu standet wok, oli, Tabu Baebol, Buk blong Momon, Doktrin mo Ol Kavenan, mo Perel we I Gat Bigfala Praes. Yumi mas stadi long ol tabu buk ia evri dei, speseli Buk blong Momon. Buk blong Momon i testifae abaot Jisas Kraes mo trutok we i fulwan blong doktrin blong hem.
Stadi long Ol Skripja
Invitesen
-
?Bae yu ridim ol skripja evri dei yuwan mo olsem wan famli?
Kipim Sabat Dei I Tabu
Blong stap kipim Sabat dei i tabu, i wan komanmen. God i talemaot se, “Tingbaot sabat dei, blong holem i tabu.” (Eksodas 20:8). Fasin blong yumi long Sabat dei i soemaot komitmen blong yumi blong givim ona mo wosip long God. Taem yumi kipim Sabat dei i tabu, yumi soem long God tingting blong yumi blong wantem kipim ol kavenan blong yumi. Long wanwan Sabat dei, yumi go long haos blong Lod blong wosipim Hem. Long ples ia, ol memba blong Jos oli tekem sakramen blong tingbaot Jisas Kraes mo Atonmen blong Hem. Taem yumi stap tekpat long sakramen i mekem yumi riniu ol kavenan blong yumi mo yumi soem se yumi wantem blong sakem ol sin mo ol rong blong yumi.
Long Sabat dei, yumi stap glad blong spel long ol wok blong yumi. Taem yumi stap atendem ol Jos seves mo stap wosip tugeta, yumi mekem wanwan long yumi i kam strong moa. Yumi joen tugeta bakegen wetem ol fren mo ol famli. Fet blong yumi i kam strong moa taem yumi stap stadi long ol skripja mo yumi stap lanem moa abaot gospel ia we i kambak.
Taem wan komuniti o wan nesen i no stap lukaot gud long ol aktiviti blong hem long Sabat, laef long saed blong relijin i stap go roten, mo evri nara samting long laef i go nogud. Ol blesing we i kam wetem fasin blong stap kipim Sabat dei i tabu oli stop. Yumi mas stop blong go long stoa long Sabat mo stop blong stap tekpat long ol aktiviti blong spot we i mekem Sabat i olsem wan nomol dei nomo.
Be, yumi mas putum tabu dei ia i stap mo no tekpat long ol aktiviti blong wol ia; oli mas kam long wan spirit blong wosip, tangkyu, seves, mo yusum ol aktiviti we i blong famli mo ol fren we i stret long Sabat. Taem ol memba blong Jos oli stap traehad blong mekem ol aktiviti blong olgeta long Sabat i go stret wetem tingting mo Spirit blong Lod, bae laef blong olgeta i fulap long glad mo pis. Taem yumi kipim Sabat dei i tabu, hem bae i kam “wan glad” (luk long Aesea 58:13–14), wan taem blong mekem yumi wekap long saed blong spirit (luk long Eksodas 31:17), mo i wan saen blong lav blong yumi mo divosen blong yumi i go long Papa long Heven mo Jisas Kraes, Sevya mo Ridima blong yumi.
Stadi long Ol Skripja
Sidaon wetem Ol Pipol we Yu Stap Tijim o Ol Memba long Jos
Taem yu stap atendem ol sakramen miting o ol stek konfrens, ol misinari kompanionsip oli mas sidaon wetem ol pipol we oli stap tijim, ol niu memba, o ol memba. Oli no mas sidaon wetem ol narafala misinari.
Ol Invitesen
-
?Bae yu kipim Sabat dei i tabu?
-
?Bae yu rere yuwan blong stap klin inaf mo tekem sakramen?
Ol Kwestin blong Intaviu blong Baptaes We i Go Stret Wetem Topik
-
?Wanem nao yu andastanem abaot Sabat dei, hemia i tekem tu blong tekem sakramen evri wik mo givim seves long ol narawan? ?Bae yu wantem blong stap obei long ol loa ia [bifo mo afta long baptaes blong yu]?
Baptaes mo Konfemesen
Wei we yumi soem we yumi wantem blong folem wei blong God i tru long baptaes mo konfemesen. Taem yumi kasem baptaes mo kasem konfemesen, yumi mekem wan kavenan wetem God se bae yumi tekem long yumi nem blong Jisas Kraes mo bae yumi save tingbaot Hem oltaem mo stap obei ol komanmen blong Hem. Yumi bin promes tu se bae yumi stap stanap olsem ol witnes blong God long eni taem blong helpem olgeta long nid (luk long Mosaea 18:8–9). Long narasaed, God i promes se bae yumi gat Tabu Spirit i stap wetem yumi, yumi save kam klin long ol sin, mo yumi save bon bakegen.
Ol Invitesen
-
?Bae yu save kasem baptaes mo konfemesen?
-
?Bae yu save invaetem ol fren mo famli blong yu blong kam long baptaes seves blong yu?
Sapos i posibol, invaetem ol olgeta we yu stap tijim blong kam long wan baptaes seves mo wan sakramen miting taem wan i kasem konfemesen.
Ol Kwestin blong Intaviu blong Baptaes We i Go Stret Wetem Topik
-
Evri kwestin blong intaviu blong baptaes.
Invitesen blong Kasem Baptaes
Olsem we Spirit bae i lidim, invitesen blong kasem baptaes mo konfemesen long wan fasin we yu mas tok stret: “?Bae yu folem eksampol blong Jisas Kraes mo kasem baptaes long wan we i holem prishud atoriti blong God? Bae yumi gat wan baptaes seves long [deit]. ?Bae yu save mekem yuwan yu rere blong kasem baptaes long deit ia?”
Folem Profet
Trutok i wan save blong ol samting olsem we oli stap, oli bin stap, mo bae oli stap. Hem i no jenis wetem ol kondisen o taem. Trutok ia i stap semmak long eni taem, mo long eni kalja. God i stamba blong evri trutok. Yumi save gat fet long Hem from se yumi save se bae Hem i tijim trutok nomo long yumi. God i wantem evri pikinini blong Hem blong save trutok. Nao, Hem i talemaot ol trutok we i nid blong man i save stap sef, tru long ol profet mo ol aposol. Hem i talemaot trutok long yumi wanwan tru long ol skripja mo revelesen blong yumiwan.
God i singaotem mo i jusum wan profet mo Hem i wan man we i stret mo i gat bigfala fet. Lod i talemaot trutok blong Hem tru long Tabu Spirit. Hem i givim komanmen long profet blong Hem blong tijim trutok long evri pipol. Olgeta we oli biliv long ol toktok blong God olsem we Hem i talemaot long profet blong Hem, oli kasem blesing.
Jos Ia blong Kraes i stanap long fandesen blong ol aposol mo ol profet, we oli lidim Jos tru long revelesen. Lod i bin singaotem Josef Smit olsem fas profet mo hed blong las dispensesen ia. Olgeta we oli kam afta long hem, we bae oli lidim Jos blong Jisas Kraes blong ol Lata-dei Sent tedei, olgeta tu oli ol profet mo ol aposol. Presiden blong Jos tedei i wan profet we i stap laef. Yumi mas gat fet long profet we God i jusum, yumi mas kasem blong save stret abaot tabu koling blong hem, mo folem ol tijing blong hem.
Yumi gat plante janis blong sastenem ol lida blong Jos long pablik. Blong sastenem i minim blong sapotem wetem tingting, toktok mo ol aksen. Yumi mas mekem yumiwan i rere blong mekem se taem ol profet mo ol aposol oli toktok, Tabu Spirit i save konfemem long yumi long ol trutok we oli stap tijim, mo yumi save mekem tingting blong yumi blong folem kaonsel we oli stap givim long yumi.
Olgeta we oli lisin mo oli folem kaonsel blong ol profet mo ol aposol we oli laef, bae oli no save gowe. Ol tijing blong ol profet we oli laef oli stap olsem wan angka long trutok we i no save finis long wan wol we ol tingting oli save jenis mo oli helpem yumi blong stap longwe long nogud fasin mo fasin blong harem nogud. Ol tu tingting mo ol trabol blong wol ia bae oli no go ova long paoa blong yumi, mo bae yumi save stap glad se yumi stap gud wetem tingting blong God.
Stadi long Ol Skripja
Ol Invitesen
-
?Bae yu kam wetem mifala blong mit wetem bisop blong lokol kongregesen blong mifala?
-
?Bae yu sastenem mo folem kaonsel blong ol lida blong Jos?
Ol Kwestin blong Intaviu blong Baptaes We i Go Stret Wetem Topik
-
?Yu yu biliv se [nem blong Presiden blong Jos we i laef i stap naoia] hem i wan profet blong God? ?Hemia i minim wanem long yu?
Obei Ol Ten Komanmen
Papa long Heven i givim yumi ol komanmen blong mekem se bae yumi save wanem blong mekem mo wanem blong no mekem blong save kasem ol blesing we Hem i wantem givim long yumi olsem (glad, pis long tingting, hapines we i stap oltaem). God i talemaot Ol Ten Komanmen long Moses blong lidim ol pipol blong Hem:
-
“Bambae yufala i no mas mekem wosip long ol narafala god, yufala i mas mekem wosip long mi nomo” (Eksodas 20:3). Ol narafala “god” i save tekem tu ol samting we yumi gat, paoa o blong gat wan popula nem.
-
“Bae yufala i no mas mekem pikja blong wan samting blong wosip long hem” (Eksodas 20:4).
-
“Bambae yufala i no yusum nem blong mi long fasin we i no ona long mi, from we mi mi Hae God, mi God blong yufala” (Eksodas 20:7).
-
“Tingbaot Sabat dei blong holem i tabu” (Eksodas 20:8).
-
“Oltaem bambae yu i mas ona long papa mo mama blong yu” (Eksodas 20:12).
-
“Yu yu no mas kilim man i ded” (Eksodas 20:13).
-
“Yu yu no mas mekem adaltri” (Eksodas 20:14).
-
“Yu yu no mas stil” (Eksodas 20:15; Mosaea 13:22
-
“Yu yu no mas mekem giaman toktok agensem ol man we i stap raonabaot long yu” (Eksodas 20:16).
-
“Bambae yu i no mas letem tingting blong yu i stap long ol samting blong narafala man blong tekem i blong yu” (Eksodas 20:17).
Ol Ten Komanmen ia, oli laef yet tedei. Oli tijim yumi blong wosip mo soem respek long God. Oli tijim yumi tu olsem wanem blong tritim ol narafala man.
I No Gat Ol Narafala God
Ol pipol long plante kalja oli gat o oli gat respek long ol samting we i stap mekem olgeta oli tingbaot God o ol bubu blong olgeta. Samtaem ol samting ia, olsem ol aedol, ol saen blong relijin, o ol smol tabu ples, i save mekem wosip blong olgeta i lukluk long wan samting nomo. Helpem olgeta blong oli andastanem se Lod i bin givim komanmen long yumi blong no stap wosipim ol aedol. Leftemap tingting blong olgeta blong oli tekemaot ol samting ia long ol haos blong olgeta we oli stap prea long hem. Helpem olgeta blong oli mekem fet mo wosip blong olgeta i stap nomo long Papa long Heven mo Jisas Kraes. Tijim olgeta se gospel blong Jisas Kraes we i bin kambak i lukluk nomo long Kraes we i laef.
Long gospel we i kambak, Lod i bin tijim yumi olsem wanem blong tingbaot Hem. Yumi tingbaot Hem tru long prea, fasin blong livim kaekae, kam long Jos, stap tekpat long sakramen, mo stap go long tempol. Misin presiden blong yu bae i lidim yu long ol spesel eria ia.
Stadi long Ol Skripja
Invitesen
-
?Bae yu obei long Ol Ten Komanmen?
Laef folem Loa blong Jastiti
God i stap glad long jastiti. Jastiti i minim tu se bae wan i no save slip nating wetem man o woman bifo mared, mo afta long mared, wan bae i mas fetful nomo long hasban o waef blong hem. Hemia i minim tu se bae wan i no save slip nating wetem man o woman bifo mared, mo afta long mared, wan bae i mas fetful nomo long hasban o waef blong hem. Olgeta we oli laef folem loa blong jastiti, oli stap glad long paoa we i kam blong stap kontrolem olgetawan. Oli stap glad long tras long olgetawan mo tras insaed long famli rilesensip. Oli save stap glad moa long Tabu Spirit insaed long ol laef blong olgeta. Olgeta we oli brekem loa ia oli filim wan sem mo rong we i no gat en, we bae i hang long ful laef blong olgeta.
Jastiti i minim tu blong stap fetful long tingting mo long aksen. Yumi mas mekem ol tingting blong yumi oli klin, mo yumi mas stap dresap gud, gat klin lanwis mo fasin o aksen. Yumi mas stap longwe long ponografi long eni kaen (rabis pikja mo vidio kaset mo ol narawan). Yumi mas tekem paoa we God i givim long yumi blong mekem pikinini olsem wan tabu samting. Ol rilesensip long saed blong seks oli wan paoa we God i givim blong mekem pikinini mo mekem i kam strong rilesen blong mared kapol.
Ol pipol we oli gat eksperiens long saed blong man i gat filing long man o woman long narafala woman, olgeta tu oli mas obei long loa blong jastiti mo kipim ol kavenan wetem God. Taem man i wantem stap wetem man o woman i stap wetem narafala woman, o olsem we oli singaotem gay, lesbien, o baeseksuol(man i wantem stap wetem tugeta man mo woman) i no wan sin mo i no stopem wan blong tekpat long Jos, stopem blong holem wan koling o stopem blong no go long tempol.
Olgeta we oli wantem kasem baptaes oli mas laef folem loa blong jastiti, we i blokem man blong slip wetem woman o woman blong slip wetem man aotsaed long mared we loa i luksave. Oli no mas tekpat long abosen (kilimded bebi we i stap long bel blong mama) o oli no mas gat ol lesbien rilesen (taem man i go wetem man o woman wetem woman). From se God i lavem evri pikinini blong Hem mo givhan long olgeta wetem lav tru blong Jisas Kraes (luk long Rom 5:8), olgeta we oli bin komitim sin long saed blong seks, oli save sakem sin, kasem fogivnes mo laef folem fasin blong gat glad (luk long 2 Nifae 5:27).
Ol Kapol we Oli Stap Laef Tugeta
Ol man mo ol woman we oli stap tugeta be oli no mared oli no save kasem baptaes sapos oli no mared o sapos oli bin seperet fastaem. Ol pipol we oli mared o gat rilesensip, olsem man wetem man o woman wetem woman, o olgeta we oli mared long moa long wan woman o man long wan taem, bae oli no save kasem baptaes. Invitesen blong laef folem loa blong jastiti bae i save kam ol had jalenj long ol pipol we yu stap tijim. Stap prea mo luksave situesen blong wanwan man o woman we yu tijim. Lukaot gud mo folem gud ol smol kwaet voes blong Spirit taem yu stap toktok raon long ol fasin blong seks, blong blokem ol strong toktok mo ol raorao. Askem kaonsel blong misin presiden blong yu, we bae i givim yu spesel daereksen blong folem, hemia folem wanwan kes.
Stadi long Ol Skripja
Invitesen
-
?Bae yu stap laef folem loa blong jastiti?
Ol Kwestin blong Intaviu blong Baptaes We i Go Stret Wetem Topik
-
?Wanem nao yu andastanem abaot loa blong jastiti, we i stap blokem blong wan i slip wetem narawan aotsaed long mared bitwin man mo woman, we loa i luksave? ? Yu wantem blong stap obei long loa ia [bifo long baptaes blong yu]??
-
?Yu yu bin tekpat o gat wan abosen finis? ?Yu bin slip wetem wan we i semmak long yu (sem seks)? [Not: Sapos wan i ansa yes long eni long tufala kwestin ia, i mas go intaviu wetem misin presiden bifo hem i kasem baptaes.]
Obei long Tok blong Waes
Lod i bin talemaot long Profet Josef Smit wan loa blong helt we oli singaotem Tok blong Waes. Loa ia i tijim yumi wanem kakae mo samting yumi save o yumi no save tekem blong holemtaet wan gud helt long bodi blong yumi blong yumi stap fri long ol rabis samting. Lod i bin promesem yumi helt, paoa, proteksen agensem ivel, mo bae yumi save lisin moa long ol trutok long saed blong spirit.
Tingbaot se ol bodi blong yumi oli tabu. Yumi mas lukaotem olgeta wetem respek mo gud fasin. Tok blong Waes i tijim se yumi mas kakae ol gudfala kaekae. Hem i tijim se yumi mas stap longwe long ol nogud samting, olsem alkol, tabak, ti mo kofi. Yumi mas stap longwe long eni kaen drag we i save spolem yumi. Blong olgeta we yu stap tijim olgeta oli save kasem baptaes, oli mas livim ol samting ia. Ol pipol we oli obei long Tok blong Waes oli save lisin gud moa long ol trutok long saed blong spirit.
Misin presiden blong yu bae i ansa long ol kwestin abaot ol nara spesel samting long kalja blong yu we oli no stap insaed long Tok blong Waes.
Stap Winim Ol Adiksen
Yu save helpem gud olgeta we oli stap traehad blong winim adiksen taem yu pasem olgeta i go long ol lokol prishud lida mo stap leftemap tingting blong olgeta blong kam blong save program blong Addiction Recovery Program websaet. Yu save leftemap tingting blong ol lokol Jos lida tu blong gat akses long Provident Living websaet blong Jos. Ol tingting ia daon oli blong yusum stret long Tok blong Waes be yu save jenisim tu blong yusum long ol narafala adiksen tu.
-
Givim strong sapot long ol pipol blong oli mekem efot blong kam long Kraes. Helpem olgeta blong luk olsem wanem ol hadwok blong olgeta blong kam gud bakegen mo kam oraet (o i save stap) i kam moa strong tru long Jisas Kraes mo Atonmen blong Hem.
-
Helpem ol pipol blong putum ol gol abaot wetaem mo olsem wanem nao bae oli laef folem Tok blong Waes.
-
Prea from olgeta long taem blong prea blong yuwan mo taem yu stap wetem olgeta.
-
Lukluk fored nomo mo givim sapot—iven sapos oli foldaon bakegen.
-
Gohed blong stap tijim olgeta abaot gospel. Tijim olgeta olsem wanem blong yusum prea mo fet olsem ol ples blong kasem paoa.
-
Helpem olgeta blong kam oltaem long evri aktiviti long jos mo developem frensip wetem ol pipol we oli laef folem Tok blong Waes mo oli bin winim semmak adiksen.
-
Olsem we i stret, askem blong givim prishud blesing long olgeta.
-
Leftemap tingting blong olgeta blong karemaot ol nogud samting we oli stap long hom blong olgeta.
Luk long japta 10 blong kasem mo instraksen long fasin blong helpem ol pipol blong winim ol adiksen.
Stadi long Ol Skripja
Invitesen
-
?Bae yu obei long Tok blong Waes?
Ol Kwestin blong Intaviu blong Baptaes We i Go Stret Wetem Topik
-
?Wanem tingting blong yu abaot fasin blong stap laef folem Tok blong Waes? ?Yu glad blong obei long Tok blong Waes (bifo mo afta long baptaes)?
Obei long Loa blong Taeting
Wan long ol bigfala blesing blong membasip insaed long Jos blong Jisas Kraes blong ol Lata-dei Sent i janis blong stap help blong mekem kingdom blong God i gro taem wan i pem taeting. Taeting i wan olfala loa we i hae tumas. Eksampol, profet Ebraham blong OlTesteman i bin pem ol taeting long evri samting we hem i bin gat (luk long Alma 13:15).
Olgeta we oli pem taeting, Lod i bin promesem olgeta se bae Hem “i openem skae, i letem olgeta gudgudfala samting i kam long yufala we i plante we i plante” (Malakae 3:10). Ol blesing ia oli ol blesing long saed blong bodi o ol blesing long saed blong spirit, be bae oli kam long olgeta we oli obei long hae loa ia.
Taeting i minim wan aot long ten, mo Lod i bin givim komanmen long yumi blong yumi givim wan aot long ten long ol mane blong yumi, blong yumi save kasem blesing. Loa blong taeting i givim yumi janis blong help blong bildim kingdom blong Hem. Ol taeting blong yumi oli tabu long Lod, mo yumi ona long Hem taem yumi pem taeting. God i promes blong blesem bigwan olgeta we oli stap pem wan stret taeting. Olgeta we oli no pem taeting oli stap stilim God (luk long Malakae 3:8). Oli holemtaet long olgetawan wan samting we i blong God. Yumi mas lukaotem fastaem kingdom blong God, mo taeting i wan impoten wei blong mekem samting ia. Taem yumi pem taeting blong yumi i wan wei blong soemaot fet blong yumi. Hem i wan saen we man i save luk blong bilif blong yumi long God mo wok blong hem.
Oli yusum ol mane blong taeting blong sapotem ol aktiviti long Jos, olsem bildim mo riperem ol tempol mo ol mitinghaos, tekem gospel raon long wol, mekem wok blong tempol mo famli histri, mo plante nara moa aktiviti raon long wol. Taeting i no pem ol lokol lida blong Jos, we oli stap givim seves fri nomo we oli no kasem eni kaen peimen.
Ol lokol lida blong Jos oli sendem taeting we oli kasem evri wik i go stret long ol hed kwota blong Jos. Wan kaonsel we i gat insaed Fas Presidensi, Kworom blong olgeta Twelef, mo Prisaeding Bisoprik i talemaot ol stret wei blong yusum ol tabu mane ia blong taeting.
Stadi long Ol Skripja
Taeting
Fet
Invitesen
-
?Bae yu laef folem loa blong taeting taem bae yu kasem baptaes?
Ol Kwestin blong Intaviu blong Baptaes We i Go Stret Wetem Topik
-
?Wanem nao yu andastanem abaot loa blong taeting? ?Yu glad blong stap obei long loa ia
Obei long Loa blong Livim kaekae [Fast]
Ol bigfala blesing oli stap long olgeta we oli obei long komanmen blong God blong livim kakae. Blong livim kakae i minim blong no kakae mo no dring blong wan amaon blong taem. Plante taem, fas Sandei blong evri manis nao oli jusum olsem wan spesel dei blong livim kaekae blong tu taem blong kaekae, prea mo serem testemoni. Blong livim kakae mo prea i go tugeta. Taem yumi livim kakae mo prea wetem fet, yumi save kasem moa ol ansa blong ol prea blong yumi mo ol blesing we i kam long Lod. Hem i bin promesem yumi se bae Hem i lidim yumi oltaem. Yumi mas livim kakae mo prea from ol spesel samting. Fasin blong livim kakae i blong yuwan mo i long saed blong Spirit, mo yumi no mas soemaot se yumi stap livim kakae.
Stret relijin i minim blong stap lukaot long ol pua man. Yumi mas helpem olgeta blong lukluk long ol nid blong olgeta long saed blong bodi mo tu long saed blong spirit. Taem yumi livim kakae, yumi givim mane long Jos blong lukaot long ol pua mo olgeta we oli stap long nid. Yumi singaotem hemia fas ofring. Yumi givim mane ia we yumi sevem taem yumi livim kakae blong tu taem blong kaekae. Be, yumi no mas givim hemia nomo we yu sevem blong tu taem blong kaekae. Oli leftemap tingting blong yumi blong givim moa olsem we yumi save givim. Taem yumi lukaot long ol pua ia, yumi help blong fulfilim kavenan blong yumi blong baptaes mo save stap klin long ol sin blong yumi.
Stadi long Ol Skripja
Livim Kaekae
Lukaot long Ol Pua
Ol Invitesen
-
?Bae yu save livim kakae mo prea long nekis fas Sandei from sam spesel nid?
-
Bae yu save givim wan gud ofring [afta we yu baptaes])?
Olsem wanem blong Donetem ol Taeting mo Ofring
Wanwan i pem taeting mo ofring long tingting blong hem nomo mo long praevet. Ol memba oli pem taeting mo ofring eni taem, be hem i moa gud blong pem taeting taem yu winim mane, mo pem fast ofring long dei blong livim kakae. Be, ol memba we oli wantem pem evri yia, oli save mekem tu. Ol memba oli fulumap pepa blong donesen blong mekem ol donesen blong olgeta, we oli stap tekem long bisoprik o long wan Aronik prishud we oli asaenem hem blong karem ol ofring donesen. Ol memba oli mekem ol donesen taem ol komplitim wan donesen fom, we oli kasem long bisoprik. (Ol donesen blong taeting, we i go wetem ol ofring, oli mas givim nomo long wan memba blong bisoprik.) Memba i holemtaet yelo kopi mo i putum waet kopi donesen we hem i putum long envlop we oli givim. Oli givim envlop long wan memba blong bisoprik. Ol memba oli save mekem ol donesen blong olgeta tru long onlaen, taem oli yusum praevet akaon blong olgeta. Ol donesen ia oli tabu mo oli blong Lod. Wan memba blong bisoprik mo wan klak oli lukaotem ol donesen ia mo oli stap konfidensiol o sikret.
Ol memba oli go long wan taeting setelmen wetem bisop long en blong wanwan yia blong talemaot se oli bin pem gud taeting blong olgeta. Long praevet miting ia, ol memba oli kasem wan yia ripot abaot evri donesen blong olgeta. Evri infomesen ia blong faenens oli sikret evriwan.
Tijim Olsem Wanem blong Donetem Ol Taeting mo Ol Ofring
Soem wan donesen fom mo eksplenem olsem wanem blong yusum. Afta we ol konvet oli baptaes, ating bae i gat nid blong yu helpem olgeta blong fulumap fom ia mo soem long olgeta olsem wanem blong mekem wan donesen onlaen.
Obei mo Ona long Ol Loa
Ol Lata-dei Sent long evri ples oli biliv se oli mas obei long ol loa blong kantri we oli stap laef long hem. Ol memba blong Jos oli kasem gud toktok blong oli mas stap olsem ol gudfala sitisen, blong oli mas tekem pat long sivil gavman mo long ol rod blong politik, mo blong oli givimaot komuniti seves. Oli mekem olsem, olsem ol sitisen blong kantri, be i no olsem ol ripresentativ blong Jos.
Stadi long Ol Skripja
Invitesen
-
?Bae yu obei long ol loa blong kantri we yu stap laef long hem?
Ol Kwestin blong Intaviu blong Baptaes We i Go Stret Wetem Topik
-
?Yu yu bin mekem wan bigfala kraem bifo? Sapos yes, ?Yu yu stap folem sam probesen blong loa o yu aot long kalabus folem kondisen we Kot i putum yu long hem? [Not: wan we i ansa yes long eni long tufala kwestin ia i mas go tru long intaviu wetem misin presiden bifo hem i baptaes.]
Aktiviti
Long wanwan komanmen insaed long lesen ia, mekem wan lis blong ol promes we i stap long skripja we Lod i mekem long olgeta we oli stap obei komanmen ia. Raetemdaon long stadi jenol blong yu ol promes we oli bin kam tru long laef blong yu.