Institiut
Lesen 1: Mesej blong Restoresen blong Gospel blong Jisas Kraes

“Lesen 1: Mesej blong Restoresen blong Gospel blong Jisas Kraes,” Prijim Gospel blong Mi: Wan Gaed long Misinari Seves (2018), 31–46

“Lesen 1,” Prijim Gospel blong Mi, 31–46

Lesen 1

Mesej blong Restoresen blong Gospel blong Jisas Kraes

Tabu Bus

© 1991 Greg K. Olsen. No mekem kopi

Stamba Tingting blong Yu

Taem yu tij, helpem ol pipol blong rere from baptaes mo Konfemesen. Tingting long ol samting we wan i nidim blong gat blong baptaes we oli tijim insaed long Doktrin mo Ol Kavenan 20:37 mo we i go wetem ol intaviu kwestin blong baptaes. Wetem prea, jusum wanem blong tijim mo wijwan long ol invitesen bae yu talem i go long wan, folem ol nid, intres, o situesen blong hem. Tingting plante long ol kwestin mo level blong andastaning blong olgeta we yu tijim.

Baptaes Intaviu Kwestin

  • ?Yu yu biliv se God i Papa blong yumi we I No Save Finis?

  • ?Yu yu biliv se Jisas Kraes i Pikinini blong God mo Hem i Sevya mo i Ridima blong wol ia?

  • ?Yu yu biliv se Jos mo gospel blong Jisas Kraes i bin kambak tru long Profet Josef Smit?

  • ?Yu yu biliv se [nem blong Presiden blong Jos we i laef i stap naoia] hem i wan profet blong God? ?Hemia i minim wanem long yu?

Ol Invitesen

  • ?Bae yu ridim Buk blong Momon mo askem God tru long prea blong save se hem i toktok blong God?

  • ?Bae yu askem God tru long prea blong save se Josef Smit i wan profet?

  • ?Bae yu kam long Jos wetem mifala long Sandei ia?

  • Bae mifala save putum wan taem blong nekis visit blong mifala?

  • Ol komanmen long lesen 4 we yu jusum blong i stap tu.

God I Papa blong Yumi long Heven we I Lavem Yumi

God hem i Papa blong yumi long Heven. Yumi ol Pikinini blong hem. Hem i gat wan bodi blong mit mo bun we oli leftemap nem blong Hem mo we Hem i stret gud evriwan. Hem i lavem yumi. Hem i andastanem mo filim ol harem nogud blong yumi mo glad long progres blong yumi. Hem i wantem blong toktok wetem yumi, mo yumi save toktok wetem Hem tru long prea we i kam long wan tru hat.

Hem i bin givim eksperiens ia long yumi long wol ia mekem se yumi save lanem samting mo gro. Yumi save soem lav blong yumi long Hem tru long ol joes blong yumi mo fasin blong yumi blong stap obei long ol komanmen blong hem.

Papa long Heven i bin givim long yumi, ol pikinini blong Hem, wan wei blong gat sakses long laef ia mo blong gobak laef wetem Hem blong ples we hem i stap long hem. Be, yumi mas stap klin mo klin tru fasin blong stap obei, blong yumi save kasem. Fasin blong no obei i muvum yumi i go longwe long Hem. Long medel blong plan blong Papa blong yumi, hem i Atonmen blong Jisas Kraes. Atonmen blong Jisas Kraes we i tekem tu safaring blong Hem insaed long garen blong Getsemane, mo tu, safaring blong Hem mo ded long kros. Tru long atonmen blong Kraes, yumi save kam fri aot long ol sin blong yumi we oli hevi mo bildimap fet mo paoa blong fesem ol tes blong laef blong yumi long wol ia.

Bilif abaot God

Faenemaot wanem wanwan long olgeta we yu stap tijim oli andastanem kristin bilif blong olgeta long God. Plante pipol long wol tedei oli nogat eni save abaot God o oli gat wan wei we defren tumas blong luksave ol Fasin blong God.

Tu misinari blong Buk blong Momon, Amon mo Eron, tufala i bin tijim ol pipol we oli no bin gat wan kristin bakgraon. Tufala i bin tijim simpol trutok mo invaetem ol pipol blong prea. Lamonae mo papa blong hem tufala i bin konvet. Ridim Alma 18:24–40 mo 22:4–23, mo ansarem ol kwestin andanit ia:

  • ?Wanem nao tufala misinari ia i bin tijim abaot fasin blong God?

  • ?Olsem wanem nao yu save folem eksampol blong olgeta?

Stadi long Ol Skripja

?Wanem fasin blong God, Papa mo Jisas Kraes?

God I Blesem Ol Famli

Gospel blong Jisas Kraes we i bin kambak, i blesem wanwan man mo woman mo ol famli. Hem i helpem ol hasban mo ol waef, ol papa mo mama mo ol pikinini taem oli traehad blong developem ol strong rilesensip paoa long saed blong spirit insaed long ol famli blong olgeta. Ol blesing ia oli stap naoia mo long taem we i no save finis. Gospel blong Jisas Kraes i stap givim help long taem blong ol wari mo ol jalenj we oli stap hapen naoia.

Mesej blong gospel blong Jisas Kraes i blong i we wanwan man mo woman oli pat blong famli blong God mo we ol famli oli save kam wan naoia mo blong taem we i no save finis. From se God i odenem famli, olgeta oli moa impoten sosol yunit long taem ia mo taem we i no save finis. God i oganaesem famli blong givim glad long ol pikinini blong Hem, letem olgeta blong lanem ol stret prinsipol long wan ples we i gat lav mo mekem rere olgeta blong kasem laef we i no save finis. Hom i nambawan ples blong tij, lanem samting, mo yusum ol prinsipol blong gospel blong Jisas Kraes. Wan hom we oli bildim antap long ol prinsipol blong gospel bae i kam wan ples blong ol rifuji mo wan sef ples. Bae i kam wan ples we Spirit blong Lod i save stap, stap blesem ol memba blong famli wetem pis, glad mo hapines. Tru long ol profet blong evri yia, we i tekem tu, wanwan long yumi, Papa God i stap talemaot plan blong hapines blong Hem long wanwan man mo woman mo ol famli.

Papa long Heven I Talemaot Gospel blong Hem long Evri Dispensesen

Wan impoten wei we God i stap soem lav blong hem long yumi, hem i tru long taem Hem i singaotem ol profet blong Hem, we oli givim prishud long olgeta—paoa mo atoriti we oli givim long man blong mekem wok long nem blong God blong sevem ol pikinini blong Hem. Ol profet oli lanem gospel blong Jisas Kraes tru long revelesen. Olgeta oli mekem pat blong olgeta blong tijim gospel long ol narafala man mo testifae abaot Jisas Kraes olsem Sevya mo Ridima. Ol tijing blong ol profet oli stap insaed long ol tabu buk we oli singaotem ol skripja.

Plan blong Papa blong yumi from yumi i blong gat sakses long laef ia mo blong gobak laef wetem Hem, oli singaotem gospel blong Jisas Kraes, wetem Atonmen blong Jisas Kraes we i stap long medel blong plan ia. Tru long Atonmen blong Jisas Kraes, yumi save kasem laef we i no save finis sapos yumi praktisim fet long Jisas Kraes, sakem sin, oli kasem baptaes andanit long wota blong kam klin aot long ol sin, kasem presen ia blong Tabu Spirit, mo stanap strong kasem en. “Hemia nao rod; mo i nogat wan narafala rod o nem we oli givim andanit long heven we tru long hem ol man i save sef long kingdom blong God. Mo nao, luk, hemia i doktrin blong Kraes” (2 Nifae 31:21). Evri pipol oli oli gat fridom blong mekem joes, we tekem tu, fridom blong akseptem o no akseptem gospel olsem we ol profet mo ol aposol oli bin tijim. Olgeta we oli jusum blong obei, oli kasem blesing, be olgeta we oli sakemaot, no akseptem o no biliv long gospel, oli no kasem ol promes blesing blong God.

Taem ol pipol oli jusum blong no lukluk, no obei, o tantanem eni prinsipol o odinens blong gospel, eni taem oli sakemaot ol profet blong Lod, o taem oli no stap strong kasem en, oli stap mekem olgeta i stap longwe moa long God mo oli stat blong laef long wan laef blong tudak long saed blong spirit. Long en, bae i gat wan taem we rod ia bae i lidim olgeta long wantaem we oli singaotem apostasi. Taem bigfala apostasi i tekem ples, God bae i tekemaot prishud atoriti blong Hem blong tijim mo givimaot ol odinens blong gospel

Noa i stap prij

Baebol histri i bin rekodem plante eksampol blong God we i stap toktok long ol profet, mo i tokbaot tu plante eksampol blong apostasi. Blong endem wanwan apostasi we i stap hapen long defdefren taem, God i bin soem lav blong hem long ol pikinini blong Hem taem Hem i singaotem wan narafala profet mo givim prishud atoriti long hem blong putumbak mo tijim gospel blong Jisas Kraes i kam niu bakegen. Blong mekem hemia, ol profet oli wok olsem wan wokman blong lukluk ova long wan famli blong God long wol ia. Ol taem ia, ol profet nao oli stap rulum tru responsabiliti blong olgeta olsem wan profet mo oltaem ia oli singaotem ol dispensesen.

Go i talemaot long revelesen gospel blong Jisas Kraes mo givim prishud atoriti long hem. Adam i bin fas profet long wol ia. Tru long revelesen, Adam i lanem stret rilesensip blong man wetem God, Papa, Pikinini blong Hem, Jisas Kraes, mo Tabu Spirit; blong Atonmen mo Laef Bakegen long Ded blong Jisas Kraes, mo long ol fas prinsipol mo odinens blong gospel. Adam mo Iv, tufala i tijim ol pikinini blong tufala abaot trutok ia mo leftemap tingting blong olgeta blong bildimap fet mo blong laef folem gospel long evri samting we oli wantem long laef blong olgeta. I gat ol narafala profet we oli kam afta long Adam, be afta, ol laen blong Adam oli no akseptem gospel blong mo oli foldaon long apostasi, from oli jusum blong no stap stret mo gud.

Taswe, i gat paten ia i blong gat ol profet long ol defdefren dispensesen we i mekem plante long ol histri we oli rekodem we i mekemap OlTesteman. Papa long Heven i talemaot long revelesen gospel blong Hem tru long daerek komunikesen i go long ol profet olsem Noa, Ebraham mo Moses. God i singaotem wanwan profet blong statem wan niufala dispensesen blong gospel. God i givim prishud atoriti mo talemaot long revelesen ol trutok we oli no save finis. Sore tumas from long wanwan dispensesen, long en, ol pipol oli yusum fridom blong mekem joes blong olgeta blong no akseptem gospel mo afta, oli foldaon long apostasi.

Ol Profet

Faenemaot wanem man ia o woman we yu stap tijim oli andastanem abaot ol profet. Long plante kalja, i gat ol pipol we oli biliv se ol tabu o ol pipol we oli stap kasem insperesen tru long sam fom blong spirit we i lidim mo givim daereksen we i kam tru long paoa God. Be, i no evri man we i kasem insperesen oli ol profet blong God olsem we gospel we i bin kambak i tokbaot. Eksplenem i klia se, God i bildimap kingdom blong Hem long wol ia, taem Hem i singaotem wan profet blong bildimap wan niufala dispensesen. Hem i givim long profet ia prishud atoriti. Afta, ol profet oli stap helpem ol pipol blong andastanem rilesensip blong olgeta wetem God, we i tekem tu, fasin blong olsem wanem blong kasem laef we i no save finis tru long gospel blong Jisas Kraes.

Bae yu save tingting long olsem wanem nao ol dispensesen blong gospel oli impoten long taem blong stap tijim ol pipol we oli nogat wan kristin bakgraon o kalja. Be bae yu fanemaot se taem bae yu tokbaot sot stori we i go wetem histri blong ol dispensesen blong gospel, yu save helpem ol pipol blong andastanem se God i lavem ol pikinini blong Hem mo we Hem i semmak yestedei, tedei, mo blong oltaem.

Stadi long Ol Skripja

Ol Profet

Dispensesen, Ol

Ministri blong Sevya long Wol

Sam handred yia i pas bifo taem we Jisas Kraes i bon i kam long wol ia, bakegen, ol pipol oli foldaon long apostasi. Be taem we Sevya i statem seves blong Hem long wol ia, Hem i stanemap Jos blong Hem bakegen long wol ia.

Papa long Heven i sendem Pikinini blong Hem i kam long wol ia blong ded from ol sin blong evri wan mo blong winim ded: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis” (Jon 3:16–17). Papa blong yumi long Heven i sendem Pikinini blong Hem, Jisas Kraes, blong tekem long Hem, tru long safaring, ol sin blong evri wan we bae oli laef long wol ia mo blong winim ded long saed blong bodi. Sevya i bin mekem wan atonmen sakrifaes, mekem se se taem yumi gat fet long Hem, sakem sin mo kasem baptaes, kasem presen ia we i Tabu Spirit, yumi save kasem fogivnes from ol sin blong yumi mo kam insaed mo folem rod ia we i lidim yumi i go long laef we i no save finis long ples wanem God i stap long hem (luk long 2 Nifae 31:13–21).

Kraes I Stap Odenem Ol Twelef Aposol

Long taem blong seves blong Hem long wol ia, Sevya i bin tijim gospel mo mekem plante merikel. Hem i singaotem twelef man blong kam ol Aposol blong Hem mo putum han antap long hed blong olgeta blong givim prishud atoriti. Hem i oganaesem Jos blong Hem, mekem i hapen ol profesi, mo oli bin no akseptem Hem mo hangem Hem long kros. Wanem we i moa impoten i we Hem i komplitim Atonmen. Pikinini blong God, Lod, Jisas Kraes i komplitim evri samting we Papa blong Hem long Heven i sendem Hem i kam blong mekem.

Bifo long ded mo laef bakegen long ded blong Sevya, Hem i givim atoriti long Ol Aposol blong Hem blong tijim gospel, mekem ol odinens blong sevem man, mo stanemap Jos blong Hem long wol.

Stadi long Ol Skripja

Bigfala Apostasi

Afta long ded blong Jisas Kraes, ol rabis man oli toktok agensem Ol Aposol mo ol memba blong Jos mo oli bin kilimded plante long olgeta. Taem Ol Aposol oli bin ded, ol prishud ki mo prisaeding prishud atoriti i bin lus long wol. Ol Aposol oli bin kipim ol doktrin blong gospel i klin stret i stap mo oli bin holem taet oda mo standet blong ol memba blong Jos oli stap klin inaf. From se i no bin gat eni Aposol, mo wetem taem ol doktrin ia oli bin jenis, mo oli bin ol jenis long olgeta we man i no bin kasem raet blong mekem long saed blong oganaesesen blong Jos mo ol odinens blong prishud, olsem baptaes mo givim presen we i Tabu Spirit.

From se i no gat revelesen mo prishud atoriti, ol pipol oli bin dipen long waes blong man nomo blong tokbaot ol skripja mo ol prinsipol mo odinens blong gospel blong Jisas Kraes. Oli bin tijim ol aedia we oli no tru oli bin tijim olsem we oli tru. Plante samting abaot fasin mo huia God Papa mo Pikinini blong Hem Jisas mo Tabu Spirit, i bin lus. Oli bin tantanem o oli bin fogetem ol doktrin long saed blong fet long Jisas Kraes, fasin blong sakem sin, baptaes, mo presen we i Tabu Spirit. Prishud atoriti we oli bin givim long Ol Aposol blong Kraes i nomo bin stap long wol ia. Apostasi ia i bin mekem se plante Jos i bin stanap.

Afta plante handred yia blong tudak blong spirit, ol man mo woman we oli bin stap lukaotem trutok oli bin tok agensem ol fasin blong ol relijin we i bin stap. Oli bin luksave se plante doktrin mo odinens blong gospel oli bin jenis o oli bin lus. Oli bin lukaotem wan laet blong spirit we i moa bigwan, mo plante i bin toktok se bae i gat nid blong trutok i mas kambak. Be, oli no bin klemem se God i bin singaotem olgeta olsem wan profet. Be, oli bin traem blong mekem bakegen o putum bak ol tijing mo praktis we oli bin biliv se oli bin jenis mo oli bin kam nogud. Ol hadwok blong olgeta i mekem se plante Protestan Jos oli bin stanap. Rifomesen ia i mekem se oli tokbaot plante fridom blong relijin, we i bin openem doa blong las Restoresen.

Ol Aposol blong Sevya oli bin talem bifo finis abaot apostasi ia blong ful wol. Oli bin talem bifo finis se bae gospel blong Jisas Kraes mo Jos blong Hem bae i kambak bakegen wan moa taem long wol ia.

Stadi long Ol Skripja

Bigfala Apostasi

Taem yu tij, helpem ol pipol oli andastanem se wan apostasi blong ful wol i bin tekem ples afta long ded blong Jisas Kraes mo Ol Aposol blong Hem. Sapos i no bin gat eni apostasi, bae i no gat nid blong gat wan Restoresen. Semmak olsem taem wan daeman we i stap antap long wan blak sopsop kaliko i saen moa, Restoresen tu i saenaot stret wetem dak bakgraon blong Bigfala Apostasi. Olsem we Spirit i lidim yu, tijim ol pipol long saed blong Bigfala Apostasi wetem ol ditel we i stret long ol nid mo tol situesen blong olgeta. Stamba tingting blong yu i blong helpem olgeta blong andastanem from wanem i nidim blong gat Restoresen blong gospel blong Jisas Kraes.

Ol Ki Poen

  • Jos blong Jisas Kraes blong ol Lata-dei Sent i stanap antap long fandesen blong ol aposol mo ol profet (luk long Efesas 2:19–20; 4:11–14). Ol lida ia oli gat hae prishud atoriti. Tru long revelesen oli lidim ol bisnis blong Jos. Oli holem taet ol doktrin oli klin i stap, oli givim raet blong mekem ol odinens, mo oli singaotem mo givim long ol narawan, prishud atoriti ia.

  • Ol pipol oli bin sakemaot mo kilim ded Jisas Kraes mo Ol Aposol (luk long Matiu 24:9; 1 Nifae 11:32–34; 2 Nifae 27:5). From se Ol Aposol oli bin ded, prisaeding prishud atoriti i bin lus long Jos. Mekem se, i nomo gat raet ia blong givim Tabu Spirit mo blong mekem ol narafala odinens blong sevem man. Revelesen i bin stop, mo oli bin spolem ol doktrin.

  • Iven bifo Ol Aposol oli bin ded, plante raorao long saed blong doktrin bin stat. Ol man Rom, we oli faswan blong go agensem ol Kristin man, afta, oli bin akseptem Kristianiti. Oli stap stretem ol impoten kwestin long saed blong relijin tru long ol kaonsel. Ol simpol doktrin mo odinens we Sevya i bin tijim, oli bin tokbaot mo oli bin jenisim blong hem i go wetem ol tingting blong wol (luk long Aesea 24:5). Long ol han blong olgeta, oli bin jenisim ol skripja, mo oli bin karemaot ol stret impoten doktrin we i stap long olgeta (luk long 1 Nifae 13:26–40). Oli bin raetem ol toktok, o stetmen blong bilif, we oli stanap long ol doktrin we oli no tru mo oli bin jenisim (luk long Josef Smit—Histri 1:19). From se oli gat hae tingting, sam oli wantem tumas ol hae posisen (luk long 3 Jon 1:9–10). Ol pipol oli bin akseptem ol aedia ia we oli no tru mo oli bin givim ona long ol giaman tija we oli bin tijim ol doktrin we i mekem man i glad be oli no bin tijim ol tabu trutok (luk long 2 Timoti 4:3–4).

  • Truaot long histri, plante pipol oli bin biliv tru long ol giaman toktok o ol doktrin ia. Oli bin wosip folem laet we oli bin gat mo oli bin kasem ansa long ol prea blong olgeta. Yet, oli “no bin save trutok from se oli no bin save wea ples blong faenem” (Doktrin mo Ol Kavenan 123:12).

  • Mekem se i bin gat nid blong wan restoresen i tekem ples be i no wan rifomesen (blong mekem bakegen wan samting). Prishud atoriti i no bin gohed afta we laen i brok afta long Aposol Pita. Blong mekem rifomesen i minim blong jenisim wanem we i bin stap finis; blong gat wan restoresen i minim blong putumbak wan samting olsem we i bin stap fastaem. Nao, restoresen blong prishud atoriti tru long ol mesenja we i kam antap long heven, i wan wei ia nomo we i posibol blong winim Bigfala Apostasi ia.

Restoresen blong Gospel blong Jisas Kraes tru long Josef Smit

Taem taem i bin stret, Papa long Heven i bin kamaot bakegen long ol pikinini blong Hem wetem lav. Hem i bin singaotem wan yangfala man we nem blong hem Josef Smit olsem wan profet. Tru long hem, fulnes blong gospel blong Jisas Kraes i bin kambak long wol ia.

Josef Smit i bin laef long Yunaeted Stet, we hem i wan kantri ia nomo we i bin stap gat fridom blong relijin long taem ia. Hem i bin wan taem we relijin i impoten tumas long Is pat blong Yunaeted Stet. Ol memba blong famli blong hem oli bin stap insaed long relijin mo oli bin stap lukaotem trutok oltaem. Be plante minista oli bin klemem se oli gat tru gospel. Josef i bin wantem “blong save wijwan long ol grup blong relijin ia i stret” (Josef Smit—Histri 1:18). Baebol i bin tijim se i gat “wan Masta nomo, wan tok nomo blong bilif long hem, mo wan baptaes nomo” (Efesas 4:5). Josef i bin go long ol defren jos, be tingting blong hem i bin stap fasfas yet long wijwan jos hem i mas joenem. Afta hem i bin raetem:

“Be i bin gat bigfala tingting we i fasfas mo hadwok long medel blong ol grup blong relijin, mekem se i no posibol blong wan we i yangfala olsem mi, … blong kam blong mekem wan stret tingting long huia i raet, mo huia i rong. Long medel blong wo ia blong ol toktok mo raorao blong ol tingting, plante taem, mi bin askem long miwan: ?Wanem nao i nid blong mekem? ?Huia long ol grup ia i raet; o, ?olsem wanem? ?Ating evriwan long olgeta oli rong? Sapos i gat eniwan long olgeta we i raet, ?wijwan ia nao long olgeta, mo olsem wanem nao bambae mi save?” (Josef Smit—Histri 1:8, 10).

Taem Josef i stap lukaotem trutok long medel blong ol defren fet, hem i tanem hem i go long Baebol blong kasem moa save. Hem i bin ridim, “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem” (Jemes 1:5) From toktok ia, Josef i mekem tingting blong hem blong askem God wanem nao hem i mas mekem. Long spring blong 1820 hem i bin go long wan bus blong ol tri we i stap kolosap mo hem i bin nildaon long prea. Yumi gat fo defren stori blong wanem we i hapen, we hem i raetemdaon o ol man blong raet anda long daereksen blong hem (luk long sot stori blong Gospel Topics, “First Vision Accounts”). Long wan stori, hem i tokbaot eksperiens ia olsem:

“Mi bin luk wan laet, i saen antap i kamdaon, stret antap long hed blong mi, mo laet blong hem i saen bitim laet blong san, mo hem i saen i kamdaon gogo, i kasem mi. Taem laet i bin stap antap long mi, mi i bin luk tu Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi. Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan—Hem, Hem i Pikinini blong Mi we Mi Lavem Tumas. !Lisin gud long hem!” (Luk longJosef Smit—Histri 1:16–17

Fas Visen

Long visen ia, God Papa mo Pikinini blong Hem, Jisas Kraes i bin kamaot long Josef Smit. Sevya i bin talem long Josef blong no joenem eni long ol jos, from se, “olgeta evriwan oli rong” mo “evri toktok blong bilif blong olgeta, oli olsem doti long fes blong hem.” Hem i talem, “oli stap kam kolosap long mi wetem maot blong olgeta, be hat blong olgeta i stap longwe long mi; oli tijim olsem doktrin, ol komanmen we oli kam long man, blong mekem se oli olsem hemia we i kam long God, be oli no luksave paoa blong hem.” (Josef Smit—Histri 1:19). Nomata se plante gudfala pipol oli bin biliv long Kraes mo oli bin traem blong andastanem mo tijim gospel blong Hem, oli no bin gat fulnes blong trutok o prishud raet blong mekem ol baptaes mo mekem ol odinens blong sevem man. Oli bin kasem wan level blong apostasi from se wanwan jeneresen i stap folem wanem we jeneresen bifo long hem i bin pasem i kam, mo hemia i tekem tu ol jenis insaed long ol doktrin mo long ol odinens olsem ol baptaes. Olsem we God i bin mekem wetem Adam, Noa, Ebraham, Moses, mo ol narafala profet, Hem i bin singaotem Josef Smit blong stap olsem wan profet we tru long hem fulnes blong gospel i bin kambak long wol ia.

Afta we Papa mo Pikinini i bin kamaot, ol narafala mesenja blong heven, o enjel i bin kam long Josef Smit mo fren blong hem, Oliva Kowdri. Jon Baptaes i bin kamaot mo i bin givim long Josef Smit mo Oliva Kowdri, Aronik Prishud, we i tekem atoriti blong mekem odinens blong baptaes. Pita, Jemes, mo Jon (olgeta tri fas Aposol blong Kraes) oli bin kamaot mo oli bin givim Melkesedek Prishud long Josef Smit mo Oliva Kowdri, mo long fasin ia oli bin putumbak sem atoriti we Kraes i bin givim long Ol Aposol blong Hem long taem bifo. Wetem prishud atoriti ia, Josef Smit i bin kasem toktok blong oganaesem Jos blong Jisas Kraes bakegen long wol ia. Tru long hem, Jisas Kraes i bin singaotem twelef Aposol.

Taem ia we yumi stap laef long hem naoia, ol profet blong Baebol oli tokbaot olsem ol las dei, ol lata dei, o dispensesen blong fulnes blong ol taem. Hem i taem ia we i kam stret bifo Seken Kaming blong Jisas Kraes. Hemia i las dispensesen. From hemia nao Jos i tekem nem ia Jos Ia blong Jisas Kraes blong ol Lata-dei Sent.

Wan profet we i laef i lidim Jos tedei. Profet ia, Presiden blong Jos Ia blong Jisas Kraes blong ol Lata-dei Sent, i man we i gat raet blong tekem wanem we Josef Smit i bin livim. Hem mo Ol Aposol we oli stap tedei oli save folem atoriti laen blong olgeta i gobak long Jisas Kraes tru long Josef Smit.

Lanem baehat Josef Smit—Histri 1:16–17

Lanem baehat toktok ia blong Josef Smit we i tokbaot taem ia we hem i bin luk Papa mo Pikinini (Josef Smit —Histri 1:16–17), mo oltaem, rere blong tokbaot Fas Visen long toktok blong yuwan nomo. Serem tru testemoni blong yu se yu save se hemia i tru. Yu no mas gat tu tingting long taem blong eksplenem olsem wanem yu kam blong save trutok ia. Invaetem kompanion blong yu blong mekem olsem tu.

Serem Testemoni

Wan impoten pat blong misinari wok i blong serem testemoni blong yu abaot profet we i laef i stap mo we i presiden blong Jos.

Stadi long Ol Skripja

Buk blong Momon: Wan Narafala Testeman blong Jisas Kraes

Blong save se fasin blong gat tu tingting, fasin blong nomo bilif, mo rong infomesen bae i stap blong plante handred ia blong tudak, Papa blong yumi long Heven we i lavem yumi, i tekem i kam wan olfala tabu skripja we i semmak long Baebol, we i gat insaed fulnes blong gospel we i no save finis blong Jisas Kraes. Buk ia blong tabu skripja i givim pruf we i save winim tingting blong man se Josef Smit i wan tru profet blong God. Rekod ia i Buk blong Momon: Wan Narafala Testeman blong Jisas Kraes.

Wan mesenja blong heven we nem blong hem Moronae i lidim Josef Smit long wan hil we ol buk we oli wokem long gol i bin stap slip haed blong plante handred yia. Olgeta plet ia oli tekem ol raeting blong ol profet we oli talemaot stori blong wanem we God i bin mekem wetem ol fas man we i bin stap long Amerika. Josef Smit i bin transletem wanem we i bin stap insaed long ol buk ia tru long paoa blong God. Ol profet insaed long Buk blong Momon oli bin save abaot misin blong Sevya mo oli bin tijim gospel blong Hem. Taem Hem i Laef Bakegen long Ded, Kraes i bin kamaot long ol pipol ia. Hem i bin tijim olgeta gospel blong Hem mo Hem i bin stanemap Jos blong Hem. Buk blong Momon i pruvum se “God i toktok long man mo i stap singaotem olgeta blong mekem tabu wok blong hem long taem tedei mo jeneresen ia semmak olsem wetem ol jeneresen bifo” (Doktrin mo Ol Kavenan 20:11). Blong save sapos Buk blong Momon i tru, wan man i mas ridim, tingting hevi mo prea abaot hem. Man we i ones blong lukaotem trutok bae i save filim se Buk blong Momon i toktok blong God.

Blong stap ridim, tingting hevi, mo prea abaot Buk blong Momon from i impoten blong mekem se man i save jenisim laef blong hem kasem en. Olgeta we oli stap ridim Buk blong Momon blong fas taem, oli tekem wan impoten step blong kam blong save se Josef Smit i wan profet blong God mo tru Jos i bin kambak long wol ia.

Yusum Buk blong Momon blong Konfemem se Restoresen i Tru

Hemia wan eksampol blong wanem yu save talem blong stat blong tokbaot Buk blong Momon:

“God i lavem ol pikinini blong Hem, mekem se Hem i givim wan stret rod blong konfemem ol trutok we Hem i bin talem. Hem i Buk blong Momon. Bae yu save ridim ol las tu paragraf insaed long fas toktok blong buk ia?”

Lukaot gud mo eksplenem mining blong wanwan aedia we i stap long tufala paragraf mo invaetem olgeta we yu tijim blong ridim sam pat blong Buk blong Momon mo yusum ol prinsipol we i stap insaed long ol tufala paragraf ia.

Taem yu wantem stat blong tokbaot Buk blong Momon long wan man, hem i save help blong soem wan kopi blong buk ia long hem, mo lukluk tru long ol samting we i stap insaed, mo serem wan o tu sentens we i gat mining long yu o i save gat mining long hem.

Stadi long Ol Skripja

Prea blong Save Trutok tru long Tabu Spirit

Mesej ia blong Restoresen blong gospel blong Jisas Kraes hem i tru o hem i no tru. Yumi save se hem i tru, hemia tru long Tabu Spirit, olsem we oli bin promesem insaed long Moronae 10:3–5. Blong stadi long ol skripja oltaem (speseli Buk blong Momon), go long jos evri wik, mo prea wetem trutok hat bae i helpem yumi blong filim paoa blong Tabu Spirit mo faenemaot ol trutok. Afta we yu ridim mo ting hevi long mesej blong Buk blong Momon, eniwan we i wantem blong save trutok i mas askem tru long prea long Papa blong yumi long Heven long nem blong Jisas Kraes sapos hem i tru.

From se God i Papa blong yumi mo yumi ol pikinini blong Hem, Hem bae i helpem yumi blong luksave trutok. Taem yumi prea wetem fet, wetem tru hat, wetem wan tru tingting blong wanem save—mekem wan komitmen blong tekem aksen folem ol ansa we yumi kasem—g bae i ansarem ol kwestin blong yumi, lidim laef blong yumi, mo helpem yumi mekem ol gudfala desisen.

Taem yumi prea, yumi talem nem blong Papa long Heven. Yumi talem tangkyu long Hem from ol blesing blong yumi mo yumi askem blong save se mesej ia blong Buk blong Momon i tru o nogat. I no gat wan i save trutok long saed blong spirit, be tru long prea nomo.

Olsem ansa long ol prea blong yumi, Tabu Spirit bae i tijim yumi trutok tru long ol filing mo ol tingting blong yumi. Ol filing we i kam long Tabu Spirit oli gat paoa, be tu oli kwaet mo oli naes. Taem yumi stat blong filim hemia, yumi stap lanem se hem i tru, bae yumi wantem blong save evri samting we yumi wantem save abaot Restoresen.

Taem wan i save se Buk blong Momon i tru, hemia i lidim hem blong save se God i bin singaotem Josef Smit olsem wan profet, mo se gospel blong Jisas Kraes i bin kambak tru long hem.

Prea

Nomata se prea i gat wan pat insaed long plante relijin mo kalja, i no oltaem we man i tekem se prea i wan tu-wei komunikesen bitwin God mo man. Helpem olgeta we yu stap tijim blong oli andastanem se oli save talemaot ol filing blong hat blong olgeta long taem blong prea. Soemaot hemia long taem we yu stap prea long stat o long en blong wan lesen. Yusum wan simpol lanwis we olgeta tu oli save yusum taem oli prea. Helpem olgeta blong oli andastanem se Papa blong yumi long Heven bae i ansarem ol prea blong olgeta, hemia tru long ol filing blong ol hat blong olgeta mo tru long ol tingting insaed long ol maen blong olgeta. Sapos oli stap tru long prea blong olgeta mo oli wantem save tru sapos God i stap o no, bae Hem i ansa long olgeta. Invaetem hed blong haos blong nildaon mo talem wan prea long en blong lesen.

Stadi long Ol Skripja

Invitesen blong Kasem Baptaes

Long taem blong lesen ia o eni narafala lesen, yu no mas fraet blong invaetem ol pipol blong oli kasem baptaes mo konfemesen.

Blong mekem ol pipol oli rere blong kasem wan invitesen blong baptaes mo konfemesen, tijim doktrin blong baptaes mo testifae plante long olsem wanem hem i impoten blong evri pipol oli mas baptaes tru long atoriti, mo tru long fasin blong kam klin long ol sin, mo tru long naesfala presen we i Tabu Spirit. Yu save talem, “Olsem we Lod i bin ansa long ol prea blong yu, mo yu filim se mesej ia i tru, ?bae yu save folem eksampol blong Jisas Kraes mo kasem baptaes?”

Yu mas mekem invitesen blong kasem baptaes mo konfemesen long wan fasin we yu mas tok stret: “?Bae yu folem eksampol blong Jisas Kraes mo kasem baptaes long wan we i holem prishud atoriti blong God? Bae yumi gat wan baptaes seves long (deit). ?Bae yu save mekem yuwan yu rere blong kasem baptaes long deit ia?”

Sam Aedia blong Tij

Seksen ia i gat ol aedia blong yu yusum blong yu stap rere mo blong yu stap tijim lesen ia. Wetem prea, folem Spirit taem yu mekem tingting blong yu blong olsem wanem bae yu yusum ol aedia ia. Ademap ol aedia ia we yu jusum long plan blong lesen blong yu. Kipim i stap long tingting blong yu se ol aedia ia oli ol tingting nomo—oli no ol samting we yu mas yusum—blong helpem yu blong lukluk long ol nid blong olgeta we yu stap tijim.

Sot Plan blong Lesen (3–5 minit)

Afta long plante senturi we hem i bin lus, Papa long Heven i lavem yumi i bin putumbak gospel blong Jisas Kraes tru long wan profet we i laef. Buk blong Momon i wan pruf blong samting ia. Yu save holem long ol han blong yu. Yu save ridim, tingting hevi long olsem wanem mesej we i stap insaed long buk ia i save mekem laef blong yu i kam gud moa, mo prea blong save sapos mesej ia i tok blong God.

  • God I Papa blong Yumi Long Heven we i Lavem Yumi

  • God i Blesem Ol Famli

  • Papa long Heven i talemaot Gospel blong Hem long Evri Dispensesen

  • Ministri blong Sevya long Wol

  • Bigfala Apostasi

  • Restoresen blong Gospel blong Jisas Kraes tru long Josef Smit

  • Buk blong Momon: Wan Narafala Testeman blong Jisas Kraes

  • Prea blong Save Trutok tru long Tabu Spirit

Ol Invitesen

  • ?Bae yu ridim Buk blong Momon mo askem God tru long prea blong save se hem i toktok blong God?

  • ?Bae yu askem God tru long prea blong save se Josef Smit i wan profet?

  • ?Bae yu kam long Jos wetem mifala long Sandei ia?

  • Bae mifala save putum wan taem blong nekis visit blong mifala?

  • Ol komanmen long lesen 4 we yu jusum blong i stap tu.

Haf Plan blong Lesen (10–15 minit)

Mesej blong yumi i wan gudwan mo hem i simpol God i Papa blong yumi Yumi ol Pikinini blong hem. Yumi pat blong famli blong Hem. Hem i lavem yumi. Stat long stat blong wol ia, Hem i bin folem wan rod blong lav mo wari from yumi. Plante taem Hem i bin kamaot, wetem lav, blong givimaot gospel blong Jisas Kraes blong mekem se ol pikinini blong hem oli save gobak long Hem. Hem i bin talemaot long ol profet olsem Adam, Noa mo Ebraham mo Moses. Be ol pipol oli bin gohed blong sakemaot gospel ia. Tu taosen yia i pas, Jisas Kraes Hemwan i bin tijim gospel blong Hem mo i bin stanemap Jos blong Hem, mo i bin mekem Atonmen i kamtru. Be nating long hemia, ol pipol oli no bin sakemaot Jisas. Eni taem we ol pipol oli no bin wantem save o oli bin tantanem ol tru doktrin mo odinens, God i bin tekemaot atoriti blong Hem blong lukaot long Jos.

Invitesen blong mifala long yufala mo long evri pipol i blong ademap long ol trutok we yufala i holem finis i stap. Lukluk long pruf blong mifala se Papa long Heven mo Pikinini blong Hem, Jisas Kraes i kamaot bakegen long ol pikinini blong God wetem lav mo Tufala i bin givimaot fulnes blong gospel long wan profet. Nem blong profet ia i Josef Smit. Pruf blong trutok ia we i fulap long glori i stap insaed long buk ia Buk blong Momon—we yu save ridim, tingting hevi mo prea from. Sapos yu prea wetem wan tru hat, wetem wan tru tingting mo fet long Kraes, bae God i talemaot long yu tru long paoa blong Tabu Spirit se hemia i tru.

Ol Invitesen

  • ?Bae yu ridim Buk blong Momon mo askem God tru long prea blong save se hem i toktok blong God?

  • ?Bae yu askem God tru long prea blong save se Josef Smit i wan profet?

  • ?Bae yu kam long Jos wetem mifala long Sandei ia?

  • Bae mifala save putum wan taem blong nekis visit blong mifala?

  • Ol komanmen long lesen 4 we yu jusum blong i stap tu.

Ful Plan blong Lesen (30–45 minit)

  • God I Papa blong Yumi Long Heven we i Lavem Yumi

    • Yumi Ol Pikinini blong God (luk long Ol Wok 17:29).

    • God i lavem yumi mo bae Hem i helpem yumi blong mekem ol raet joes.

    • Tru long Jisas Kraes, yumi save stap wetem God bakegen (luk long Jon 3:16–17).

  • God i Blesem Ol Famli

    • Gospel blong Jisas Kraes i blesem wanwan man mo helpem ol famli blong developem ol rilesensip we i strong moa.

    • God i odenem ol famli; oli sosol yunit long taem tedei mo taem we i no save finis we oli moa impoten bitim ol narafala wan (luk long Doktrin mo Ol Kavenan 49:15–16).

    • Famli i nambawan ples blong tij, lanem mo yusum ol gospel prinsipol (luk long Doktrin mo Ol Kavenan 68:25; Jenesis18:19; Dutronome 6:7).

    • Famli i save stap olsem wan ples blong sefti, pis, mo glad.

  • Papa long Heven i talemaot Gospel blong Hem long Evri Dispensesen

    • God i singaotem ol profet blong tijim gospel blong Hem (luk long Amos 3:7).

    • Apostasi i minim blong sakemaot ol profet mo gospel.

    • Ol Dispensesen oli ol taem we ol profet oli bin tijim gospel. Ol dispensesen blong bifo oli bin en wetem apostasi (luk long Doktrin mo Ol Kavenan 136:36–38).

    • Adam, Noa, Ebraham, Moses, mo ol narafala profet blong bifo oli bin tijim gospel (luk long Moses 5:4–12).

  • Ministri blong Sevya long Wol

    • Pikinini blong God i bin putumbak mo i bin tijim gospel. Hem i bin mekem plante merikel (luk long Bible Dictionary, “Miracles”).

    • Hem i bin singaotem Ol Aposol mo i bin givim prishud atoriti long olgeta blong prijim gospel mo mekem ol odinens blong sevem man olsem baptaes (luk long Jon 15:16).

    • Kraes i bin stanemap Jos blong Hem.

    • Oli bin hangem Kraes long kros, mo oli bin sakemaot mo kilimded Ol Aposol blong Hem (luk long Matiu 27:35; Mak 15:25).

    • Kraes i bin komplitim Atonmen (luk long Bible Dictionary, “Atonement”).

  • Bigfala Apostasi

    • Sapos i no gat revelesen tru long wan profet, ol pipol i foldaon long tudak blong spirit (luk long Amos 8:11–12).

    • Ol Profet mo Ol Aposol oli bin talemaot bifo abaot Bigfala Apostasi (luk long 2 Tesalonaeka 2:1–3).

  • Restoresen blong Gospel blong Jisas Kraes tru long Josef Smit

  • Buk blong Momon: Wan Narafala Testeman blong Jisas Kraes

  • Prea blong Save Trutok tru long Tabu Spirit

Ol Invitesen

  • ?Bae yu ridim Buk blong Momon mo askem God tru long prea blong save se hem i toktok blong God?

  • ?Bae yu askem God tru long prea blong save se Josef Smit i wan profet?

  • ?Bae yu kam long Jos wetem mifala long Sandei ia?

  • Bae mifala save putum wan taem blong nekis visit blong mifala?

  • Ol komanmen long lesen 4 we yu jusum blong i stap tu.

Ol Kwestin blong Askem afta we Yu Tij

  • ?Wanem kwestin yu gat abaot wanem we mifala i bin tijim yu?

  • Sapos i gat wan profet long wol tedei, ?wanem nao bae yu askem long hem?

  • ?Yu stap filim se God i stap givim ansa long ol prea blong yu? ?From wanem?

  • ?Bae yu wantem faenemaot sapos Buk blong Momon i tru? ?From wanem?

Ol Ki Mining blong Ol Toktok

  • Fridom blong mekem joes: Hem i wan janis mo presen we God givim long pipol blong mekem joes mo blong tekem aksen olgetawan.

  • Apostasi: Taem man, Jos o ful nesen i tanem baksaed blong hem long trutok. Hemia i tekem fasin blong toktok agensem atoriti mo fasin blong sakemaot ol profet. Ol pruf blong apostasi i taem wan i go agensem ol loa blong God, i jenisim ol gospel odinens mo i brekem ol kavenan (luk long Aesea 24:5).

  • Dispensesen: Wan taem we Lod i gat wan wokman blong Hem we i givim atoriti long hem long wol ia we i holem ol ki blong tabu prishud. Wetem Jisas Kraes, ol profet olsem Adam, Inok, Noa, Ebraham, Moses, mo Josef Smit oli bin statem wan niu gospel dispensesen. Taem Lod i oganaesem wan dispensesen, gospel i kamaot niu blong mekem se ol pipol blong dispensesen ia oli no nid blong dipen long ol dispensesen blong bifo blong kasem save long saed blong plan ia blong sevem man. Dispensesen we i stat wetem Josef Smit, oli save long hem olsem “dispensesen blong fulnes blong ol taem.”

  • Prishud: Hem i raet mo paoa we God i givim long man blong mekem olgeta wok long nem blong Jisas Kraes long evri samting we i go wetem fasin blong sevem ol man.

  • Profet: Wan man we God i singaotem mo hem i toktok long bihaf blong God Olsem wan mesenja blong God, wan profet i kasem prishud atoriti, ol komanmen, ol profesi, mo ol revelesen we i kam long God. Responsabiliti blong hem i blong hem i talemaot tingting blong God mo fasin blong God long evri man mo blong soem mining blong ol samting we Hem i stap mekem wetem olgeta. Wan profet i talemaot wanem i sin, mo i talemaot fastaem wanem nao risal blong hem. Hem i wan man blong prijim stret mo gud fasin. Long sam taem, wan profet i save kasem toktok blong talemaot wanem bae i tekem ples long fiuja blong mekem se ol man oli save stap gud. Be, fas responsabiliti blong Hem, i blong stap olsem wan witnes blong Kraes.

  • Ridima: Jisas Kraes i bigfala Ridima blong ol man, from se Hem, tru long Atonmen blong Hem, i bin pemaot praes blong ol sin blong evri man mo i mekem se ol pipol oli save Laef Bakegen long Ded. Blong pemaot i blong mekem olgeta oli fri,semmak olsem blong mekem wan i fri long kalabus taem wan i pem wan mane. Fasin blong pemaot sin i tokbaot Atonmen blong Jisas Kraes mo blong kam fri long ol sin. Atonmen blong Jisas i pemaot ol man long ded blong bodi. Tru long Atonmen blong Hem, we i tekem taem ia we Hem i bin safa long Getsemane mo long kros mo tu taem Hem i bin Laef Bakegen long Ded, olgeta we oli gat fet long Hem mo oli sakem sin oli save winim ded blong spirit.

  • Rifoma: Blong mekem rifomesen i minim blong mekem ol jenis long wan samting blong mekem se hem i kam moa gud. Toktok ia ol rifoma i stap tokbaot ol man mo woman (olsem Martin Luther, William Tyndale, mo John Wycliffe) we oli bin go agensem ol praktis blong ol jos we oli bin stap, we oli bin filim se i bin gat nid blong mekemgud bakegen.

  • Restoresen: Blong mekem restoresen i minim blong gobak long wan ples we i bin stap bifo, o blong tekembak wan samting olsem i bin stap bifo. Restoresen, olsem we ol Lata-dei Sent oli yusum, i minim se tru Jos blong Jisas Kraes, we i bin lus tru long apostasi, oli bin tekembak olsem we i bin stap fastaem taem Jisas Kraes i bin oganaesem. I no semmak long Rifomesen; Restoresen i bin kambak wetem tabu atoriti we i kam antap tru long revelesen.

  • Revelesen: Toktok we i kam long God we i go long ol pikinini blong Hem long wol ia. Revelesen i save kam tru long Laet blong Kraes mo Tabu Spirit tru long rod blong insperesen, visen, ol drim, o ol visit blong ol enjel. Revelesen i givim toktok we i lidim ol fetful blong save sef blong taem we i no save finis long selestial kingdom. Lod i talemaot wok blong Hem long ol profet blong Hem mo i konfemem long ol man we oli biliv se ol revelesen we i go long ol profet oli tru (luk long Amos 3:7). Tru long revelesen, Lod i lidim wanwan man we i lukaotem rod mo evriwan we i gat fet, i sakem sin mo i obei long gospel blong Jisas Kraes.

Ol Narafala Toktok we I Save Gat Nid blong Eksplenem long Olgeta we Yu Tijim

  • Aposol

  • Atonmen blong Jisas Kraes

  • Baebol

  • Stanap strong kasem en

  • Presen we I Tabu Spirit

  • Gospel

  • Fasin blong obei mo no obei long ol komanmen

  • Ol odinens blong sevem man

  • Prea

  • Fasin blong Sakem Sin

  • Laef Bakegen long Ded

  • Gobak laef long ples we Hem i stap long hem

  • Fasin blong Sevem Man

  • Sevya

  • Ol Skripja

  • Sin

  • Wok we Wan I Gat blong Lukaotem

Eksampol blong Ol Rifoma mo Ol Lida blong Relijin long Wol

Hemia wan bakgraon infomesen we yu save yusum nomo sapos yu nidim.

John Wycliffe:I bon long namba 14 senturi long Inglan. Man blong skul long teoloji long Yunivesiti blong Oksfod. Hem i bin tijim se Katolik Jos i no bin gat ol prishud ki, se Tabu Komuniong (o sakramen) i no stret bodi blong Kraes, mo se jos i no mas gat paoa blong politik ova long ol pipol. Hem i bin transletem Baebol i kam long Inglis. Hem i ded long 31 Disemba 1384.

Martin Luther:Hem i bin bon long 10 Novemba 1483, long Jemani. Hem i bin stadi long Yunivesiti blong Erfurt mo Witenbeg. Hem i bin nilim 95 stadi we hem i bin raetem long doa blong Kasel Jos blong toktok agensem plante tijing we i stap abaot Roman Katolik Jos, mo hemia i tekem tu praktis blong mekem ol pipol oli pem mane blong mekem se oli kam klin long ol sin blong olgeta. Hem i bin statem Protestan Jos. Hem i bin ded long 18 Febwari 1546.

William Tyndale:Hem i bin bon long Wales long 1494. Hem i bin stadi long Oksfod mo long Cambridge. Hem i bin transletem Niu Testeman i kam long Inglis. Hem i bin mekem se ol pipol olbaot oli save gat raet blong ridim ol skripja blong hemia i talemaot ol giaman doktrin mo ol korapsen blong ol lida blong relijin. Oli bin kilimded hem long 6 Oktoba 1536.

John Knox:Hem i bin bon samples long yia 1513. Hem i wan minista long Skotlan, man blong skul long teoloji, man blong raetem buk, mo wan lida blong Rifomesen blong kantri. Oli save long hem olsem man we i statem Presbiterian Jos long Skotlan. Hem i bin ded long 24 Novemba 1572.

Semmak olsem Kristin wol i bin kasem blesing blong ol strong tingting mo visen blong ol rifoma ia, plante narafala nesen mo kalja i bin kasem blesing pat ia we “[God] i luk se i stret blong olgeta i mas kasem” (Alma 29:8). Ol tijing blong ol narafala lida blong relijin i bin helpem plante pipol blong oli kam moa gud mo oli folem ol prinsipol.

Buddha (Gotama):Hem i bin bon long 563 B.K. long wan laen blong Jif long Nepal. Hem i bin wari long ol safaring raon long hem. Hem i ronwe long rij haos blong papa blong hem, i lego wol ia, mo i laef olsem ol pua man. Hem i bin lukaotem blong kasem moa laet, hem i bin faenem wanem we hem i singaotem “rod blong kam fri” mo Nirvana, wan ples we oli fogetem ol samting, ol soa long bodi, o wol ia. Hem i kam wan tija blong wan komuniti blong ol monk.

Confucius:Hem i bon long 551 B.K. Hem i no bin gat papa o mama taem hem i pikinini. Hem i fas top tija blong yunivesiti long Jaina mo hem i wan gudfala eksampol long ol narawan mo Jaina i save kasem ol gud tingting long hem long saed blong waes tingting. Hem i jampion blong fasin blong stap kaen mo blong gudfala mo tru samting, mo gat respek long ol bubu blong bifo mo famli.

Mohammed:Hem i bin bon long 570 A.D. long Meka. Hem i bin lusum papa mo mama taem hem i smol pikinini. Hem i bin mared taem hem i bin gat 25 yia. Long 610, hem i bin prea mo stap tingting hevi long Maonten Hira. Hem i bin talem se enjel Gabriel i bin kamaot long hem mo i bin givim hem wan mesej we i kam long Allah (God) stat long 620 i go kasem 632. Ol komunikesen ia, we ol disaepol blong hem oli stap talem baehat, oli bin raetem afta, insaed long Koran, tabu buk blong Islam. Ol nomol praktis blong Muslim we i tekem tu, fet, prea, givhan long ol pua, fasin blong livim kaekae, mo tekem ol longfala wokbaot i go long ol tabu ples.

Moses ben Maimonides (Rambam):Hem i bon long laet bifo long Pasova long yia 1135 o 1138, hem i wan man Jiu, i wan tija blong loa blong Jiu, man we i stadi long filosofi. Maimonides i wan nambawan tija long saed blong krietem samting mo i raetem ol Jiu loa blong Jiu long Histri blong Yurop. Oli save long hem olsem wan we i i sapotem kolosap plante long ol Kristin Man we oli stap raetem ol buk, olsem Saint Thomas Aquinas. Hem i bin ded long 12 Disemba 1204.

St. Francis of Assisi:Hem i bin bon long yia 1181 o 1182, hem i wan brata long Rom Katolik, dikon, wan prija we i statem sam long ol oda long saed blong bilif we i tekem tu hemia we i lukaot long plante Kristin tabu websaet long Tabu Graon. St. Francis i wan long ol man we oli laekem hem from kristin histri blong hem. Hem i biliv se neja hemwan i olsem mira blong God mo i singaotem ol samting we oli gat laef olsem “ol brata” mo “ol sista” blong hem. Wan long ol singsing blong hem we i raetem, oli save gud long hem olsem, “All Creatures of Our God and King.” Hem i bin ded long 3 Oktoba 1226.