“3: Wanem Bae Mi Stadi mo Tijim?” Prijim Gospel blong Mi: Wan Gaed blong Misinari Seves (2018), 29–94
“3 Stadi mo Tij,” Prijim Gospel blong Mi, 29–94
3
Wanem Bae Mi Stadi mo Tijim?
Toktok Antap long Hil, i kam long Carl Bloch. I kam long Japel blong Frederiksborg Castle, Denmak. Frederiksborgmuseum i givim raet blong yusum. No mekem kopi
Ol lesen long japta ia i gat insaed ol stamba doktrin, ol prinsipol, ol komanmen we yu mas stadi long olgeta, biliv, lav mo tij. Oli ol samting we ol profet mo ol aposol we oli stap laef oli talem blong yu tijim. Oli oganaesem olgeta mekem se yu save helpem ol narafala man blong oli andastanem doktrin blong Kraes mo klia.
Ol lesen insaed long lesen ia oli:
Tijim evri lesen bifo baptaes. Mekem sua se olgeta we yu tijim oli mas kwalifae blong baptaes mo konfemesen taem oli stap mekem mo folem evri komitmen long ol lesen ia.
Wanwan lesen i gat wan lis blong ol invitesen blong ol narafala man blong mekem mo folem sam komitmen. Helpem olgeta we yu tijim blong andastanem se blong stap akseptem wan invitesen blong mekem mo folem wan komitmen i save mekem olgeta oli rere blong mekem mo kipim ol kavenan wetem Lod.
Ol fultaem misinari oli stat blong tijim evri lesen bifo baptaes mo afta long baptaes bakegen, wetem help blong ol wod misinari mo ol narafala memba. Afta long baptaes, leftemap tingting blong wanwan niu memba blong folem evri komitmen long ol lesen ia.
Yu mas yusum tu ol lesen ia insaed long ol stadi blong yuwan mo kompanion stadi, ol distrik miting, mo ol narafala trening. Taem yu stap stadi long ol skripja ia mo lukaotem gud ol doktrin we i stap insaed long ol lesen ia insaed long maen blong yu, bae Spirit bae i givim yu long stret taem wanem bae yu mas talem mo mekem blong helpem ol narafala blong oli kasem wan witnes se ol tijing ia oli tru.
Olsem wan misinari, yu gat bigfala responsabiliti blong tij wetem hat blong yu mo wetem Spirit. Fas Presidensi mo Kworom blong olgeta Twelef Aposol i bin talem: “Stamba tingting blong yumi i blong tijim mesej blong gospel we i bin kambak long wan wei we i letem Spirit i lidim tugeta, ol misinari mo olgeta we oli tijim olgeta. Hem i impoten blong lanem ol tingting blong ol [lesen], be oli no mas tijim folem wan kaen presentesen nomo. Misinari i mas filim se hem i mas fri blong yusum ol toktok blong hemwan olsem we Spirit i stap talem long hem. Hem i no mas givim wan toktok we hem i bin lanem baehat, be hem i mas toktok wetem wanem we i stap kamaot long hat blong hem, wetem ol toktok blong hemwan. Hem i save kamaot long oda blong ol lesen, mo givim wanem we hem i kasem insperesen blong givimaot, folem ol intres mo ol nid blong hem we oli stap tijim [man o woman]. Hem i mas toktok folem wanem we hem i save se hem i tru mo wetem ol toktok blong hemwan, hem i mas serem testemoni blong hem se ol tijing we hem i givimaot oli tru” (“Statement on Missionary Work,” First Presidency letter, Dec. 11, 2002). Taem yu mo kompanion blong yu i stadi long ol lesen ia mo stap mekem rere blong tijim olgeta, holemtaet strong ol toksave ia insaed long maen blong yufala. Mekemsua se yu tijim evri doktrin insaed long ol lesen.
Letem Spirit i lidim yu long oda we bae yu soem fas tri lesen folem nid, intres mo situesen blong man o woman we yu tijim. Sam long ol komanmen bae i stap tu we i stret blong tijim o blong tijim olsem ol lesen blong olgetawan. Wetem prea, jusum wanem blong tijim mo wijwan invitesen blong givimaot. Tingting gud long ol kwestin blong man o woman ia mo hamas hem i save andastanem.
Wanwan lesen i givim aotlaen blong ol kwestin blong intaviu blong baptaes, ol komitmen, mo ol doktrin we yu mas tijim. Lanem gud evriwan ol doktrin ia. Oltaem, lukluk nomo blong helpem olgeta we yu stap tijim blong mekem mo folem ol komitmen. Yusum ol kwestin blong intaviu blong baptaes blong mekem rere olgeta we yu tijim blong kasem baptaes mo konfemesen. Ol lesen oli gat tu ol aedia blong tij. Yusum ol tingting ia blong mekem yu kam strong long olsem wanem yu stap mekem yuwan yu rere mo tij.
Wok blong Lanem Samting Baehat
Lanem ol skripja baehat blong yusum long tijing blong yu. Mekem tingting blong yu blong yu mas lanem baehat sam poen blong doktrin we i stap long wanwan misinari lesen. Ol misinari we oli stap lanem wan nambatu lanwis oli mas luklukgud long lanwis stadi blong olgeta taem oli stap rere blong tijim ol misinari lesen. Oli mas lanem baehat ol toktok, ol sentens, fasin blong mekem sentens, mo sam sot toktok abaot doktrin olsem we oli stap insaed long lesen, be hemia oli mekem nomo, afta we ol samting ia i gat wan mining long olgetawan. No lanem lesen we i fulwan baehat.
Tij long Klia Fasin
Long en blong ol fas tri (3) lesen, i gat wan lis blong ol toktok we olgeta we yu stap tijim bae oli no save gud. Lanem olsem wanem blong eksplenem ol toktok ia long wan simpol fasin. Taem yu stap tij, mekem evri samting we yu save mekem, blong mekem mesej ia i isi blong andastanem.
Stadi long Ol Skripja
Wanem nao oli talem long yu blong yu tijim?
?From wanem yu mas stadi long ol doktrin we oli stap insaed long ol lesen?