O le e pele ia te au o se faafafine. O le a le mea e tatau ona ou faia?

Amata i le Alofa

O le talanoa e uiga i le tosina i le itupa e-tasi e mafai ona taufaafefe ma faaluafesasi. Atonu e le iloa e lou atalii/afafine, toalua, po o se tagata o le aiga pe faapefea ona talanoa atu ia te oe i lenei mea. Atonu e te lagona i nisi taimi lou le gafataulimaina. E ui atonu e te le iloa i taimi uma pe faapefea ona tali atu i tauiviga e feagai ma tagata o lou aiga, ae o le a e le tu’itino lava i lou aapa atu ma le alofa ma le malamalama.

O le a e le tu’itino lava i lou fai atu “Ou te alofa ia te oe.”

O le a e le tu’itino lava i le sisii ae o ou lima ma opo mai ai se e pele ia te oe ma fusi mai ia te oe. O le a e le tu’itino lava i lou faalogo atu. O le a e le tu’itino lava i lou taumafai ia malamalama.

Afai e te soona mateletele, ita, pe fai atu ni mea e te toe salamo ai, aua ne’i faavaivaia oe. O se tasi lenei o taimi i se talatalanoaga mo le olaga atoa. E le tuai lava ona e faatoese

Afai e te iloa mai se isi e uiga i le tosinaga i le itupa e-tasi o se e pele ia te oe, aua e te oso i lou ita. O le talanoa e uiga i le tosina i le itupa e-tasi e mafai ona taufaafefe ma fenumiai. Atonu e le iloa e le e pele ia te oe pe faapefea ona talanoa atu ia te oe i lenei mea.

O se uiga lava faalenatura le faavauvau. Pe ua e manatu ua se’e ese atu lau miti i se aiga e “atoatoa”? Pe o e fefe ne’i i’uvale se sootaga vavalalata? Pe o e fefe ne’i le taulimaina ma le agalelei se ua pele ia te oe? O nei lagona o ni uiga lava faalenatura. E leai se maasiasi i le faavauvau.

Aua e te tu’ua’ia oe lava ona o le tosinaga i le itupa e-tasi o se e pele ia te oe. E le o se mea e tuua’ia ai se tasi. O le tuua’ia e le o se mea e tatau ai pe o se mea foi e fesoasoani.

Saili le Taitaiga Faaleagaga

I le avea ai o se tagata o le aiga, o se tatalo aupito le aoga o le “pe aisea?” O le lona lua e pito atu i ai o le “faamolemole aveese nei loa lava lenei mea.” O le fesili e aupito sili ona fesoasoani e mafai ona e fesili ai o le “pe faapefea?” E mafai faapefea ona ou fesoasoani? E mafai faapefea ona mafai ona avea au ma se lagolago o loo manaomia e le ua pele ia te au? E mafai faapefea ona tatou aoao mai lenei mea?

Saili le malamalama ma aoaoina mea uma e te mafaia. Talanoa ma lou epikopo po o le peresitene o le paranesi ma ia maua mai se fautuaga mai se auauna ua faatagaina a le Alii. Afai e uunaia oe, fesili atu ia te ia mo se faamanuiaga faaleperisitua e fesoasoani ai ia te oe e taulima ia manaoga o lau pele. O nisi tagata e maua manatu mai vaega lagolagosua pe ala mai foi i le o i le malumalu. O le mea moni, e leai se nofoaga e sili atu e maua ai le filemu ma manatu nai lo totonu o le malumalu.

Fausia le Malamalama

Ia siosiomia oe lava e tagata o le a atiina ae oe. O ni isi tagata e manatu atu. O ni isi tagata e fia iloa. O le taliina o fesili e mafai ona fesoasoani e atiina a’e ai le malamalama ae e mafai foi ona faavaivaia ai. Ia mautinoa e tului lau ma’a faaleagaga e ala i le faaalu o se taimi taua i nofoaga paia. Ma e leai lava se isi e sili ona manatu atu nai lo lou Tama o i le Lagi.

O le aoaoina e avea o se matua i lenei faigamalaga, o le a faalauteleina ai oe. A o e sailia le mafutaga mai a le Agaga, o le a e latalata atili atu i le Atua, o lou atalii/afafine, ma, afai e tatau ai, o lou toalua. Manatua ia faatauaina le faitalia. Afai e le ioe lou toalua i le ala e te manao e taulima ai mea, ia galueaiina ma le faaaloalo. Afai e fai e lou atalii/afafine ia filifiliga e te le ioeina, ia ta’u atu i ai ma le agalelei ou lagona. Aua lava nei e taumafai e pulea pe faatogafitia i latou. Tuu atu lou taimi ia i latou, ma faamautinoa atu ia i latou lou alofa.

Faapaleniina o le Alofa ma le Tulafono

“I le avea ai ma Au Paia o Aso e Gata Ai, o le toatele o i tatou—e le o tatou uma, ae o le toatele o i tatou—e lilifa atu e tulituli le tulafono ma e faia i se ala e le alofa.

“E tele tusi ua ou maua mai le tele o tagata o e ua pagatia i filifiliga e faia e se tasi i o latou aiga. Ma ua latou fai mai, ‘O le a la se mea matou te faia?’ Ma o le mea muamua, ou te fautua atu pea i ai o le alolofa pea i ai. I le faaiuga, o se mea lena e mafai ona e faia e le aunoa. E tatau lava ona tatou manatua ia poloaiga a le Alii, lea o le a ou faasino i ai o le tulafono, ma o le tulafono sili foi lea ia fealofani. Ma o i latou e feteenai pe a le tausia e se tasi o tatou fegalegaleai ia poloaiga, pe tausia le tulafono. Ma o le mea lena e atili faigata ai ona tatou fegalegaleai ma i latou ma alofa i ai. Ae peitai, afai tatou te alolofa i le tagata ma tausisia foi i le taimi lava lea se pipiimau i mea ua tatou iloa o o tatou tiutetauave i le tulafono, e mafai lava ona fai. …

“E le tatau ona tatou tamuaina a tatou fegalegaleina ma tagata o e faia filifiliga e ese mai le mea tatou te mananao ai e ala i le finauina o a latou filifiliga. E silii atu ona tatou tamua i le talanoa e uiga i le: O fea le itu na e te sau ai? A o ou tulaga faatauaina autu? O le a le mea e te manao e ausiaina? Ona mafai lea i le matalalaga lena ona tatou faamalamalama atu faapea ua tatou popole e uiga i poloaiga a le Alii ona o le mea e taua ia i tatou o le tumau i luga o le ala i le ola e faavavau.

“Ua tuuina mai ia i tatou poloaiga. Pe a tatou usiusitai i na poloaiga, ua tatou usita’ia. O le taunuuga o le usiusitai i poloaiga o le tuu atu lea o i tatou lava ia ogatusa ma le tulafono e faavavau lea e faataga ai ona tatou tuputupu ae ma agaigai i luma i le ola e faavavau. “Na poloaiina e le Faaola Ona soo, ‘ia outou fealofani; faapei ona ou alofa atu ia te outou’ (Ioane 13:34). O lea tatou te vaai atu i auala sa Ia alofaina ai i tatou.  Sa Ia taulagaina Ia lava mo i tatou. Sa popole pea lava o ia i tagata taitoatasi. Sa matagofie lona aapa atu mo tagata. Ou te manatu o faailo uma na o le ala e mafai ai ona tatou fealofani e faapei ona Ia alofa mai ia i tatou. Afai tatou te faia o Ia ma o tatou faataitaiga, e tatau ona tatou taumafai e le aunoa e aapa atu ia faaaofia ai tagata uma” (Dallin H. Oaks, “Alofa ma le Tulafono,” ChurchofJesusChrist.org).

O le alofa faalelagi na te le faatagaina le agasala—“O A’u o le Alii e le mafai ona Ou vaai i luga o le agasala ma sina tikeri itiiti o le faatagaina”—ae naunau e faamagalo: “E ui i lea, o ia o le e salamo ma faia poloaiga a le Alii o le a faamagaloina” (Mataupu Faavae ma Feagaiga 1:31–32). I lea lava tulaga e tasi, e le tatau ai ona tatou fetuutuunaia le auala tatou te ola ai ma le puipuia o poloaiga a le Atua, ae ia faataitai atoatoa le alofa o le Atua, e tatau foi ona tatou alolofa i le tasi ma le isi ma le lotomatala ma le atoatoa ina ia le lagona ai e se tasi le tuulafoaiina pe tuuatoatasi pe leai se faamoemoe.

Talanoa e uiga i le Atuatuvale ma le Pule i le Ola

O lagona o le atuatuvale e moni lava ma e mafai ona lofituina ma faavaivaia ai. E tele taimi, e mafai ai e faufautua faapolofesa ma faafomai ona fesoasoani i tagata e taulima le atuatuvale. Pe a oo ina liliu atu lagona o le atuatuvale i mafaufauga e pule i le ola, e taua tele ona i ai se tasi e talanoa i ai. O tagata e mafaufau i le pule i le ola ua i ai i ni tiga ogaoga faaletino, faalemafaufau pe faalelagona, ma e tele lava ina faaesea; ma e ono lagona ua leai so latou faamoemoe mo le lumanai. Latou te ono lagonaina foi faapea ua leai se isi auala e faamuta ai le tiga matautia sei vagana ai o le pule i o latou lava ola. O mafaufauga o le oti e ala i le pule i le ola e tele ina manatunatu i ai, mafaufauina, ma toemafaufauina a o lei faia se taumafaiga. I lenei vaitau o le manatunatu loloto, o le faasalaveia e mafai ona sefe ai se ola.

O le puipuia o le pule i le ola e amata i le faailoa aloaia o faailoilo lapatai. Mo se lisi o faailoilo lapata’i, faamolemole asiasi ane i le American Foundation of Suicide Prevention.

Afai e alia’e mai ua i ai se tasi ua lamatia, o le mea aupito sili e mafai e se tasi ona fai o le talanoa ia i latou e uiga i lea mea. Atonu e foliga mai e le manaia pe faafiapoto, ae o tagata o loo atuatuvale e tele ina matua manaomia lava se tasi e talanoa i ai, se tasi e fesoasoani ia i latou e tuumatamaga o latou mafaufauga ma lagona. Atonu e faigata nei talatalanoaga, ae e matua taua i le tuuitiitia o lagona o le faaesea ma le leai o se faamoemoe lea e mafai ona taitai atu ai i le pule i le ola. Afai e aliae mai o se tagata ua i ai nei i se tulaga lamatia ua taumafai e pule i le ola, vili le laina a le atunuu mo le puipuiga o le pule i le ola i le 1-800-273-TALK (8255).

Crisis Help Lines, ChurchofJesusChrist.org