O a ni auala aupito sili e faaali atu ai le alofa faaKeriso?

Siitiaina o Isi

E ui o le tosina atu i le itupa e tasi e le o se agasala, ae e mafai ona avea ma se luitau. E ui e mafai e se tasi ona le filifili e maua nei lagona, ae e mafai ona ia tuuto atu e tausi ia poloaiga a le Atua. O matua o se tamaitiiti ua lagonaina le tosina atu i le itupa e tasi pe ua faailogaina foi o se tane e tosina atu i se tane (gay) e tatau ona filifili e alolofa ma taliaina lena tamaitiiti. I le avea ai ma se faapotopotoga o tagata o le Ekalesia, e tatau ona tatou filifili e fatua’i se faalapotopotoga faaleuo.

“E matua taua tele lo tatou malamalama, muamua, e eseese uma nofoaga o loo i ai tagata uma i le ala ma e tatou te atina’eina se silafia i tagata o loo vagaia i tatou.

“Ou te iloa ni tagata e o mai i le lotu i Aso Sa uma ina ia mafai ona musuia ma faagaeetia, ma e na o le savavali ese atu ma lagona ua faamasinoina ma le le alofaina. E le manaomia. E pei e leai se avanoa mo i latou i le lotu. E tatau ona ese lo tatou faia o lenei mea. E manaomia ona tatou matua o’oo’o lo tatou iloa o le faamoemoega e o mai ai i le lotu i le Aso Sa ma ia mautinoa o tagata uma e o mai, e lagona le alofaina, manaomia, taliaina, ma le faagaeetiaina. E tofu tagata uma ma luitau tatou te le iloaina. Ma e taua ia tatou iloa e alofagia e le Atua i latou uma e vagaia i tatou, ma e tatau ona tatou vaai atu ia i latou e ala i mata faapei o Keriso. Ma e le mafai ona tatou faatagaina le faamasino atu e faaaafia ai le ala e tatou te fegalegaleai ai ma tagata. O se mea e matua le sa’o lava. Ou te manatu ua tuuina i tatou e le Alii i le mea ua tatou i ai ma faafesootai i tatou i tagata o loo vagaia i tatou mo se faamoemoega. Ona e le gata e mo lo tatou lava agaigai i luma ae e uiga foi i le fesoasoani i isi ina ia agai i luma. Ma ua oo ina ou iloaina ua tuu i tatou i le mea ua tatou i ai ina ia mafai ai ona tatou alolofa ma siitia isi.

“E matua le mafai lava pe ta’ua foi i tatou lava o se soo o Keriso pe afai tatou te le fesoasoani i isi i luga o lena ala. E le taufaatauvaaina e le talalelei a Iesu Keriso ia tagata. O tagata lava latou e taufaatauvaaina tagata. Ma e tatau ona tatou faasa’oina lena mea E manaomia ona tatou nofouta ma alolofa ia i latou ma tuu atu ia i latou le avanoa e tuputupu a’e ai ma fuga mai ma avea ma e pito sili o i latou lava. E i ai a latou taleni ma tomai ma uiga e manaomia i le malo o le Atua. Ma afai o le a tatou fauina le malo o le Atua i le lalolagi, tatou te manaomia tagata uma e o mai ia o mai e fai la latou vaega. Ma e tatau ona tatou aloaia lena mea Pe a paologia le faitotoa o se falelotu i le ata lafoia o se tagata, e tatau ona latou lagonaina i le taimi lava lena le taliaina ma le alofaina ma le siitiaina ma le musuia, ma a oo ina latou savavali atu i fafo o le faitotoa, e o ua sili atu. Aua ua latou iloa e alofa le Alii ia i latou. Ma ona ua i ai ni a latou uo i lo latou faatuatuaga” (Carol F. McConkie, “Lifting Others,” ChurchofJesusChrist.org).

Auauna Atu ma Alofa i Lou Tuaoi

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37–39).

“O la’u poloaiga lenei, ia outou fealofani, pei ona ou alofa atu ia te outou” (Ioane 15:12).

Tatou te faaalia lo tatou alolofa mo le Atua e ala i le tausia o Ana poloaiga (tagai i le Ioane 14:15) ma e ala i le alofa atu i le tasi ma le isi (tagai i le Ioane 13:34). Afai e i ai se tagata o lou aiga po o se uo ua lagona le tosina atu i le itupa e tasi pe ua faailogaina o se tane e tosina atu i se tane (gay), alolofa i ai. Sa matauina e Peresitene Henry B. Eyring e faapea:

“Afai e te fia faalatalata pea i se tasi e pele ia te oe, ae o loo mamao ese mai ia te oe, e te iloa lava le ala e fai ai. O le a e sailia se ala e te talanoa atu ai ia te i latou, o le a e faalogo atu ia te i latou, ma o le a e iloa foi ni ala e faia ai ni mea mo i latou taitoatasi. O le faateleina o le tupu soo o lena mea, o le umi atu foi lena e faaauau ai, o le loloto atili foi lena o le sootaga o le alofa [i le va ma i latou]. Afai e tele se taimi e alu e aunoa ma se toe talanoa atu i ai, faalogo atu i ai, ma faia se mea mo i latou, o le a faavaivaia lea sootaga.

“E atoatoa ma mamana le Atua, a o oe ma a’ u o ni tagata faaletino. Peitai o Ia o lo tatou Tama, e alofa o ia ia i tatou, ma ua ia ofoina mai lea lava avanoa e faalatalata atu ai ia te ia e pei ona faia i se uo pele. Ma o le a e faia foi i lea lava ala e tasi: talanoa, faalogo, ma faia” (“To Draw Closer to God,” Ensign, May 1991, 66).

E te faaalia lou alofa mo le Atua e ala i le alofa atu ma le auauna atu i isi.

“Ma faauta foi, ua ou ta’u atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).

O le a le uiga o le alofa i le tasi ma le isi? O le alofa e popole. O le alofa e faalogo. O le alofa e faaaofia mai. O le alofa e musuiaina. O le alofa o loo i ai i le fatu o mea o loo fausia ai tatou o ni tagata soifua, aua o i tatou o fanau a le Atua, ma o le “Atua o le alofa lava ia” (1 Ioane 4:8). I le tausamaaga mulimuli, sa aoao mai ai le Faaola, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35).

Faaaloalo i Eseesega

Afai e i ai se tagata o lou aiga po o se uo ua lagona le tosina atu i le itupa e tasi pe ua faailogaina o se tane e tosina atu i se tane (gay), alolofa i ai. O le poloaiga ia alofa le tasi i le isi [po o le fealofani] ua aofia ai ma i latou e le o vaai atu i le lalolagi i le ala lava e tasi o loo tatou vaaia ai.

Na faamalamalama mai e Peresiten Dallin H. Oaks:

“I le tele o mafutaga ma tulaga i le olaga, e tatau lava ona tatou ola faatasi ma nei eseesega. I tulaga e taua ai, o lo tatou itu o nei eseesega e le tatau ona teenaina pe lafoaia, ae i le avea ai ma soo o Keriso e tatau ona tatou ola filemu faatasi ma isi e le tutusa o tatou tulaga faatauaina pe talia ia aoaoga ia o loo faavaeina ai. O le ata o le faaolataga a le Tama, lea ua tatou iloaina i faaaliga faaperofeta, ua tuu ai i tatou i se tulaga faaletino lea e ao ai ona tatou tausia Ana poloaiga. E aofia ai i lena mea le alofa i o tatou tuaoi e eseese aganuu ma talitonuga e pei ona Ia alofa mai ia i tatou. E pei ona aoao mai se perofeta o le Tusi a Mamona, e tatau ona tatou fetaomi atu i luma, ma ‘se alofa i le Atua ma tagata uma’ (2 Nifae 31:20)” (“Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 28).