ʻOku fakasōtoma hoku ʻofaʻangá. Ko e hā ʻa e meʻa ʻoku totonu ke u faí?

Kamata ʻAki ʻa e ʻOfá

ʻOku malava ke fakailifia mo fakapuputuʻu ʻa e talanoa fekauʻaki mo e femanakoʻaki ʻa e tangata mo e tangatá pe fefine mo e fefiné. Mahalo ʻoku ʻikai ke kei ʻilo ʻe hoʻo fānaú, malí, pe mēmipa ʻo e fāmilí pe te nau talanoa fēfē atu kiate koe fekauʻaki mo e meʻá ni. Mahalo te ke ongoʻi taʻefeʻunga he taimi ʻe niʻihi. Neongo he ʻikai te ke faʻa ʻilo maʻu pē ʻa e founga ke tali ʻaki ʻa e ngaahi faingataʻa ʻoku fehangahangai mo ha mēmipa ʻo ho fāmilí, he ʻikai ʻaupito te ke fakameʻapangoʻia ʻi hoʻo ala atu ʻo tokoni ʻi he ʻofa mo e loto-mahinó.

He ʻikai te ke teitei fakaʻiseʻisa ʻi haʻo pehē “ʻOku ou ʻofa ʻiate koe.”

He ʻikai te ke teitei fakaʻiseʻisa ʻi haʻo fāʻofua ki ho ʻofaʻangá. He ʻikai te ke teitei fakaʻiseʻisa ʻi he fakafanongó. He ʻikai te ke teitei fakaʻiseʻisa ʻi he feinga ke maʻu ha loto-mahinó.

Kapau ʻe fuʻu tōtuʻa hoʻo loto-hohaʻá, ʻitá pe lea ʻaki ha ngaahi meʻa te ke fakaʻiseʻisa aí, ʻoua naʻá ke loto-foʻi. Ko ha kiʻi miniti siʻi pē ʻeni ʻi ha fealeaʻaki ʻi he toenga ʻo e moʻuí. ʻOku ʻikai teitei tōmui ke kole fakamolemole.

Kapau te ke ʻilo mei ha taha kehe ʻa e fetokangaʻaki fakahomosekisuale ʻa ho ʻofaʻangá, ʻoua naʻá ke toʻo fakafoʻituitui ia. ʻOku malava ke fakailifia mo fakapuputuʻu ʻa e talanoa fekauʻaki mo e femanakoʻaki ʻa e tangata mo e tangatá pe fefine mo e fefiné. Mahalo ʻoku ʻikai ʻilo ho ʻofaʻangá pe te ne talanoa fēfē mo koe fekauʻaki mo e meʻá ni.

ʻOku fakanatula pē ke ke loto-mamahi. ʻOkú ke ongoʻi nai ʻa e mōlia atu ʻa hoʻo fakaʻānaua ki ha fāmili “haohaoá”? ʻOkú ke manavasiʻi nai naʻa mole hoʻo feohi vāofi mo ha taha? ʻOkú ke tailiili nai naʻa ʻikai fai ha angaʻofa ki ho ʻofaʻangá? ʻOku fakanatula pē ʻa e ngaahi ongo ko ʻení. ʻOku ʻikai ha meʻa ʻe fakamā ʻi he loto-mamahí.

ʻOua naʻá ke tukuakiʻi koe ki he fetokangaʻaki fakahomosekisuale ʻa ha taha ʻokú ke ʻofa ai. ʻOku ʻikai ko ha foʻui ʻeni ʻo ha taha. ʻOku ʻikai teitei ʻaonga pe tokoni ʻa e fetukuakiʻiʻakí.

Fekumi ki ha Tataki Fakalaumālie

ʻI hoʻo hoko ko ha mēmipa ʻo e fāmilí, ʻoku ʻikai ʻaonga ʻa e lotu ʻo fehuʻi “ko e hā hono ʻuhingá?” Ko ha lotu ʻe taha ʻoku tatau mo iá ko e “kātaki ʻo toʻo ange ʻeni meiate au he taimí ni.” Ko e fehuʻi ʻaonga taha te ke lava ʻo ʻeké ko e “ʻe founga fēfē?” Te u tokoni fēfē nai? Te u hoko fēfē nai ko e poupou ʻoku fie maʻu ʻe he taha ʻoku ou ʻofa aí? Te tau ako fēfē mei hení?

Fekumi ki he ʻiló pea ako ʻa e meʻa kotoa pē te ke ala lavá. Talanoa mo hoʻo pīsopé pe palesiteni fakakoló pea maʻu ha faleʻi mei ha tamaioʻeiki kuo fakamafaiʻi ʻe he ʻEikí. Kapau ʻokú ke ongoʻi ʻoku ueʻi koe [ʻe he Laumālié], kole kiate ia ha tāpuaki lakanga fakataulaʻeiki ke tokoniʻi koe ke ke feau ʻa e ngaahi fiemaʻu ʻa e taha ʻokú ke ʻofa aí. ʻOku maʻu ʻe ha kakai ʻe niʻihi ha fakakaukau ʻi he ngaahi kulupu tokoní pe ko e ʻalu ki he temipalé. Ko hono moʻoní, ʻoku ʻikai mo ha toe feituʻu te ke maʻu ai ʻa e nongá mo e fakakaukau leleí ka ko e temipalé.

Fakatupulaki ha Mahino

Feohi mo e kakai ʻoku nau poupouʻi koé. Ko e kakai ʻe niʻihi te nau poupou. Ko e kakai ʻe niʻihi ʻoku nau fie ʻilo. ʻE ala tokoni ʻa hono tali ʻo e ngaahi fehuʻí ke fakatupulaki ai ʻa e mahinó ka ʻe malava pē foki ke fakaongosia ia. Fakapapauʻi ke fakalahi hoʻo ivi fakalaumālié ʻaki haʻo fakaʻaongaʻi ha taimi lelei ʻi he ngaahi potu māʻoniʻoní. Pea ʻoku ʻikai ha taha ʻe toe poupou lahi ange ka ko hoʻo Tamai ʻi Hēvaní.

Ko e ako ko ia ke hoko ko ha mātuʻa ʻi he fonongaʻanga ko ʻení te ne liliu koe ki he leleí. ʻI hoʻo fekumi ki he takaua ʻa e Laumālié, te ke ofi ange ai ki he ʻOtuá, ki hoʻo fānaú, pea mo hoʻo malí, ʻo ka kaunga ki ai. Manatuʻi ke ke fakaʻapaʻapaʻi ʻa e tauʻatāina ke filí. Kapau ʻoku ʻikai fiemālie hoʻo malí ki hoʻo founga fakahoko ha ngaahi meʻá, mo fengāueʻaki ʻi he fefakaʻapaʻapaʻaki ke fakaleleiʻi ia. Kapau ʻe fakahoko ʻe hoʻo fānaú ha ngaahi fili ʻokú ke taʻefiemālie ki ai, fakahā ʻi he loto-ʻofa ke nau ʻiloʻi ho lotó. ʻOua ʻaupito ʻe feinga ke puleʻi pe fakamālohiʻi kinautolu. Tuku taimi ke feohi mo kinautolu, pea fakapapauʻi ange ʻokú ke ʻofa ʻiate kinautolu.

Ko Hono Fakapotupotutatau ʻa e ʻOfá mo e Fonó

“Ko e tokolahi ʻo kitautolu—ʻo ʻikai ko kitautolu kotoa, ka ko e tokolahi ʻo kitautolu—Kāingalotu ʻo e Siasí, ʻoku tau fakahehema ke fakamālohiʻi ʻa e laó pea ʻoku tau fakahoko ia ʻi ha founga taʻe-angaʻofa.

“ʻOku lahi ha ngaahi tohi ʻoku ou maʻu mei ha kakai ʻoku nau mamahi ʻaupito ʻi he ngaahi fili ʻoku fai ʻe ha taha ʻi honau fāmilí. Pea ʻoku nau pehē, ‘Ko e hā ʻoku totonu ke mau faí?’ Pea ko e ʻuluaki meʻa pē ʻoku ou fokotuʻu angé ke kei ʻofa pē ʻiate kinautolu. Ko e meʻa taupotu taha ia te ke lava maʻu pē ke faí. Kuo pau ke tau manatuʻi ʻa e ngaahi fekau ʻa e ʻEikí, ʻa ia te u lave ki ai ko e fonó, kae pehē foki ki he fekau maʻongoʻonga ke mou feʻofaʻakí. Pea ʻe fepaki ia mo e taimi ʻoku ʻikai tauhi ai ʻe ha taha ʻoku tau feohí ʻa e ngaahi fekaú, pe tauhi ʻa e fonó. Pea ʻoku hoko ia ke ʻāsili ai ʻa e faingataʻa ke tau feohi mo ʻofa ʻiate kinautolú. Ka ʻo kapau ʻoku tau ʻofa ʻi he taha ko iá pea hokohoko atu ʻi he taimi tatau ke muimui ki he meʻa ʻoku tau ʻilo ko hotau ngaahi fatongia ki he fonó, ʻoku malava pē ia ke fai pehē. …

“ʻOku ʻikai totonu ke kamata ʻaki ʻetau feohi mo e kakai ʻoku kehe ʻenau filí mei he meʻa ʻoku tau fakaʻamu ki aí ʻaki ʻa hono tālangaʻi ʻenau ngaahi filí. ʻOku sai ange ke tau kamata ʻaki hano talanoaʻi: Ko hoʻo haʻú mei fē? Ko e hā ho ngaahi tuʻunga ʻulungaanga mahuʻingá? Ko e hā ʻa e meʻa ʻokú ke fakaʻamu ke ikunaʻí? Pea ʻi he ʻuhinga pē ko iá ʻe lava leva ke tau fakamatalaʻi ʻoku tau hohaʻa ki he ngaahi fekau ʻa e ʻEikí he ko e meʻa ʻoku tau mahuʻingaʻia aí ke nofomaʻu ʻi he hala ki he moʻui taʻengatá.

“ʻOku foaki mai kiate kitautolu ha ngaahi fekau. Ko e taimi ʻoku tau tauhi ai ʻa e ngaahi fekau ko iá, ʻoku tau talangofua. Ko e ola ʻo e talangofua ki he ngaahi fekaú ko ʻetau taha mo e fono taʻengata ʻokú ne fakaʻatā kitautolu ke tau tupulaki pea fakalakalaka ki he moʻui taʻengatá. Naʻe fekau ʻe he Fakamoʻuí ʻa Hono kau muimuí ke [mou] ‘feʻofaʻaki kiate kimoutolu; pea hangē ko ʻEku ʻofa kiate kimoutolú’ (Sione 13:34). Ko ia tau vakai angé ki he founga ʻo ʻEne ʻofa ʻiate kitautolú. Naʻá Ne feilaulauʻi Ia maʻatautolu. Naʻá Ne tokanga maʻu pē ki he fakafoʻituituí. Naʻe fakaofo ʻEne tokoniʻi ʻa e kakaí. ʻOku ou tui ko e ngaahi fakaʻilonga kotoa ia ʻo e founga ʻe lava ke tau feʻofaʻaki ai ʻo hangē ko ʻEne ʻofa ʻiate kitautolú. Kapau te tau ʻai Ia ke hoko ko hotau faʻifaʻitakiʻangá, ʻoku totonu leva ke tau feinga maʻu pē ke tokoni ki he tokotaha kotoa pē” (Dallin H. Oaks, “Love and Law,” ChurchofJesusChrist.org).

ʻOku ʻikai hanga ʻe he ʻofa fakalangí ʻo fakatonuhiaʻi ʻa e faiangahalá—“Ko au ko e ʻEikí ʻoku ʻikai te u lava ke mamata ki he angahalá ʻo momoʻi fakaʻatuʻi ia”—ka ʻoku vēkeveke ke fakamolemoleʻi: “Ka neongo iá, ʻilonga ia ʻoku fakatomala pea fai ki he ngaahi fekau ʻa e ʻEikí ʻe fakamolemoleʻi ia” (Tokāteline mo e Ngaahi Fuakava 1:31–32). ʻI he founga tatau pē, ʻoku ʻikai totonu ke tuku ʻetau moʻui ʻaki mo taukapoʻi ʻa e ngaahi fekau ʻa e ʻOtuá, ka ke tau fakahaaʻi kakato ʻa e ʻofa ʻa e ʻOtuá, kuo pau foki ke tau feʻofaʻaki tauʻatāina mo kakato ke ʻoua naʻa ongoʻi ʻe ha taha ʻoku liʻekina pe tuenoa pe taumuʻavalea.

Talanoa kau ki he Kulukiatamakí mo e Taonakitá

ʻOku moʻoni ʻa e ngaahi ongoʻi kulukiatamakí pea ʻoku malava pē ke fakamafasia mo holoki moʻui ia. ʻOku faʻa lava ʻe he faleʻi fakapalōfesinalé mo e tokoni fakafaitoʻó ʻo tokoniʻi ʻa e kakaí ke nau matatali ʻa e kulukiatamakí. Ko e taimi ʻoku liliu ai ʻa e ngaahi ongoʻi kulukiatamakí ki ha ngaahi fakakaukau ke taonakitá, ʻoku mātuʻaki mahuʻinga ke talanoa ki ha taha. Ko e kakai ʻoku nau fakakaukau taonakitá ʻoku nau mātuʻaki mamahi fakatuʻasino, fakaeʻatamai, pe fakaeloto; ʻoku faʻa liʻekina kinautolu; pea mahalo ʻoku nau ongoʻi kuo siva ʻenau ʻamanaki ki he kahaʻú. Mahalo ʻoku nau ongoʻi ʻoku ʻikai pē ha toe founga ke fakangata ai ʻa e mamahi fakatuʻutāmakí ka ko hono toʻo pē ʻenau moʻuí. Ko e ngaahi fakakaukau ke mate ʻi he taonakitá ʻoku faʻa tomuʻa vakavakaiʻi, fakakaukauʻi pea toutou fakakaukauʻi ia kimuʻa pea toki feinga ke fakahoko iá. ʻI he lolotonga ʻa e vahaʻataimi ʻo e vakavakaiʻi ko ʻení, ʻe lava ke fakahoko ai ha tokoni ke fakahaofi ha moʻui.

ʻOku kamata ʻa hono taʻofi ʻo e taonakitá ʻi hono fakatokangaʻi ʻa e ngaahi fakaʻilonga fakatokangá.

Kapau ʻoku hangē ka ʻi ha tuʻunga fakatuʻutāmakí ha taha, ko e meʻa lelei taha pē ʻe lava ke faí ko e talanoa kiate ia. Mahalo ʻe hā ngali kehe pe fie-matamuʻa, ka ko e kakai ʻoku kulukiatamakí ʻoku nau faʻa fie maʻu vivili ha taha ke nau talanoa ki ai, ko ha taha ke tokoniʻi kinautolu ke nau mākupusi ʻa e ngaahi fakakaukaú mo e ngaahi ongó. Mahalo ʻe faingataʻa ʻa e ngaahi fepōtalanoaʻaki ko ʻení, ka ʻoku mahuʻinga ia ki hono fakasiʻisiʻi ʻa e ngaahi ongoʻi liʻekiná mo e siva ʻa e ʻamanakí ʻa ia ʻe lava ʻo iku ki he taonakitá.

Crisis Help Lines,ChurchofJesusChrist.org