Ko e hā ʻa e ngaahi founga lelei taha ke fakahaaʻi ai ʻa e ʻofa faka-Kalaisí?

Ko Hono Hiki Hake ʻo e Niʻihi Kehé

Neongo ʻoku ʻikai ko ha angahala ʻa e fetokangaʻaki ʻa e tangata mo e tangatá pe fefine mo e fefiné, ka ʻe ala faingataʻa. Neongo ʻe ala ʻikai fili ha taha ia ke maʻu ʻa e ngaahi ongo ko ʻení, ka te ne lava ʻo tukupā ke tauhi ʻa e ngaahi fekau ʻa e ʻOtuá. ʻOku totonu ke fili ʻa e mātuʻa ʻa ha fānau ʻoku fetokangaʻaki fakahomosekisualé pe ui ko ha fakafāfine/fakatangatá, ke ʻofa mo tali lelei ʻa e fānau ko iá. ʻI heʻetau hoko ko ha kāingalotu ʻo e Siasí ʻi he koló, ʻoku totonu ke tau fili ke fokotuʻu ha ʻātakai ʻoku talitali lelei ai kinautolú.

“ʻOku mātuʻaki mahuʻinga ke mahino kiate kitautolu, ʻoku kehekehe ʻa e tokotaha kotoa pē ʻi he hala fonongá pea ke fakatupulaki ʻetau tokanga ki he kakai ʻoku tau feohí.

“ʻOku ou ʻiloʻi ʻoku ʻi ai ʻa e kakai ʻoku nau omi ki he lotú he Sāpate kotoa ke fakalotoa mo langaki fakalaumālie kinautolu pea ʻoku nau foki mo ha ongo kuo fakamaauʻi mo ʻikai ʻofaʻi kinautolu. ʻIkai fiemaʻua. Hangē ʻoku ʻikai ke totonu ke nau ʻi he lotú. ʻOku fie maʻu ke tau liliu ʻa e foungá ni. ʻOku fie maʻu ke tau ʻiloʻi moʻoni ʻa e taumuʻa ʻo e ʻalu ki he lotú he Sāpaté pea fakapapauʻi ʻoku ongoʻi ʻe he tokotaha kotoa pē ʻoku haʻu ki he lotú ʻoku ʻofaʻi, fiemaʻua, tali lelei, pea langaki [fakalaumālie] kinautolu. ʻOku foua ʻe he tokotaha kotoa pē ha ngaahi faingataʻa ʻoku ʻikai ke tau teitei ʻilo ki ai. Pea ʻoku mātuʻaki mahuʻinga ke tau ʻiloʻi ʻoku ʻofaʻi ʻe he ʻOtuá ʻa e tokotaha kotoa pē pea ʻoku fie maʻu ke faka-Kalaisi ʻetau mamata kiate kinautolú. Pea ʻoua naʻa tau tuku ke hanga ʻe he loto-fakamāú ʻo puleʻi ʻa e founga ʻoku tau feohi ai mo e kakaí. ʻOku ʻikai pē ko ha meʻa ia ʻoku totonu. ʻOku ou tui ʻoku ʻi ai ha taumuʻa ʻoku tuku ai kitautolu ʻe he ʻEikí ʻi he ngaahi feituʻu ʻoku tau ʻi aí pea fakafehokotaki kitautolu mo e kakai ʻoku tau feohí. Koeʻuhí ʻoku ʻikai ʻuhinga pē ki heʻetau fakalakalaká ka ʻoku kau foki ai mo hono tokoniʻi ʻo e niʻihi kehé ke nau fakalakalaká. Pea kuó u fakatokangaʻi ʻoku tuku kitautolu ki he feituʻu ʻoku tau ʻi aí koeʻuhí ke tau lava ʻo ʻofa mo hiki hake ʻa e niʻihi kehé.

“He ʻikai lava ke tau hoko ko ha ākonga ʻa Kalaisi pe te tau ui kitautolu ko ha taha pehē ʻo kapau ʻoku ʻikai ke tau tokoniʻi ʻa e niʻihi kehé ʻi he hala ko iá. ʻOku ʻikai ke tukuhifo ʻe he ongoongolelei ʻo Sīsū Kalaisí ʻa e kakaí. Ko e kakaí pē ʻoku nau tukuhifo ʻa e kakaí. Pea kuo pau ke tau fakaleleiʻi ia. ʻOku fie maʻu ke tau ongoʻingofua pea ʻofa ʻiate kinautolu pea tuku ha faingamālie ke nau tupulaki pea aʻusia honau tuʻunga lelei tahá. ʻOku ʻi ai honau talēniti mo e ivi malava mo e ʻulungaanga ʻoku fie maʻu ʻi he puleʻanga ʻo e ʻOtuá. Pea kapau te tau langa hake ʻa e puleʻanga ʻo e ʻOtuá ʻi māmani, ʻe fie maʻu ʻa e tokotaha kotoa pē ke kau mai, ke nau omi ʻo fai honau fatongiá. Pea ʻoku fie maʻu ke tau ʻiloʻi ia. Ko e taimi ʻoku hū ai ha taha ʻi he matapā ʻo e falelotú, ʻoku totonu ke nau ongoʻi he taimi pē ko iá ʻoku talitali lelei, ʻofaʻi, hiki hake pea ueʻi fakalaumālie kinautolu, pea toe lelei ange ʻi he taimi ʻoku nau hū ai ki tuʻa he matapaá, ke nau fokí. Koeʻuhí ʻoku nau ʻiloʻi ʻoku ʻofa ʻa e ʻEikí ʻiate kinautolu. Pea koeʻuhí ʻoku ʻi ai hanau ngaahi kaungāmeʻa ʻoku nau tui tatau” (Carol F. McConkie, “Lifting Others,” ChurchofJesusChrist.org).

Tokoni pea ʻOfa ki Ho Kaungāʻapí

“Ke ke ʻofa ki [he ʻEiki] ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa. Ko e ʻuluaki pea ko e lahi ia ʻo e fekaú. Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pē ko koé” (Mātiu 22:37–39).

“Ko ʻeku fekaú ʻeni, Ke mou feʻofaʻaki kiate kimoutolu, ʻo hangē ko ʻeku ʻofa kiate kimoutolú” (Sione 15:12).

ʻOku tau fakahaaʻi ʻetau ʻofa ki he ʻOtuá ʻi heʻetau tauhi ʻEne ngaahi fekaú (vakai, Sione 14:15) pea mo ʻetau feʻofaʻakí (vakai, Sione 13:34). Kapau ʻoku ʻi ai haʻo fāmili pe kaungāmeʻa ʻokú ne foua ʻa e fetokangaʻaki ʻa e tangata mo e tangatá pe fefine mo e fefiné pe ui ko ha fakafāfine/fakatangata, ʻofaʻi kinautolu. Naʻe pehē ʻe Palesiteni Henelī B. ʻAealingi:

“Kapau ʻokú ke loto ke vāofi mo ha taha naʻá ke ʻofa ai, ka kuó mo vāmamaʻo, ʻokú ke ʻiloʻi ʻa e founga ke fai ai iá. Te ke kumi ha founga ke ke talanoa mo kinautolu, te ke fakafanongo kiate kinautolu, pea te ke ʻiloʻi ʻa e ngaahi founga ke mou fetokoniʻaki aí. Ko e lahi ange ʻene hokó, mo ʻene fuoloa angé, ko e loloto ange ia ʻa e fehokotaki ʻa e ʻofá. Kapau ʻe ʻosi atu ha taimi lahi ʻoku ʻikai ha feleaʻaki, fakafanongo, mo fai ha meʻa, ʻe vaivai leva ʻa e fehokotakí.

“ʻOku haohaoa mo māfimafi ʻa e ʻOtuá, pea ʻoku tau matelie. Ka ko Ia ʻetau Tamaí, ʻokú Ne ʻofa ʻiate kitautolu, pea ʻokú Ne foaki mai ʻa e faingamālie tatau ke ofi ange ai kiate Ia ʻo hangē pē ha kaungāmeʻa ʻofá. Pea te ke fai ia ʻi he founga tatau pē: ʻi he leá, fakafanongó, mo hono fakahokó” (“To Draw Closer to God,” Ensign, May 1991, 66).

ʻOkú ke fakahaaʻi hoʻo ʻofa ki he ʻOtuá ʻaki hoʻo ʻofa mo tokoni ki he niʻihi kehé.

“Pea vakai, ʻoku ou fakahā kiate kimoutolu ʻa e ngaahi meʻá ni koeʻuhí ke mou ʻiloʻi ʻa e potó; koeʻuhí ke mou ʻiloʻi ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17).

ʻOku ʻuhinga ki he hā ke feʻofaʻakí? ʻOku tokanga ʻa e ʻofá. ʻOku fakafanongo ʻa e ʻofá. ʻOku fakakau mai ʻa e ʻofá. ʻOku ueʻi fakalaumālie ʻa e ʻofá. Ko ʻofa ʻa e uho ʻo e moʻui ʻa e tangatá he ko e fānau kitautolu ʻa e ʻOtuá pea ko e “ʻOtuá ko e ʻofa” (1 Sione 4:8). Naʻe fakamamafaʻi mai ʻe he Fakamoʻuí ʻi he ʻOhomohe Fakaʻosí, “ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu” (Sione 13:35).

Ko Hono Fakaʻapaʻapaʻi ʻo e Ngaahi Faikehekehé

Kapau ʻoku ʻi ai haʻo fāmili pe kaungāmeʻa ʻokú ne foua ʻa e fetokangaʻaki ʻa e tangata mo e tangatá pe fefine mo e fefiné pe ui ko ha fakafāfine/fakatangata, ʻofaʻi kinautolu. ʻOku kau he fekau ke feʻofaʻakí, ʻa e niʻihi ʻoku ʻikai ke tatau ʻetau fakakaukau ki he māmaní.

Hangē ko ia ne fakamatalaʻi ʻe ʻEletā Tāleni H. ʻOakesí:

“ʻI he ngaahi vā fetuʻutaki mo e tūkunga kehekehe ʻo e moʻuí, kuo pau ke tau feʻao mo e ngaahi faikehekehé. ʻO heʻene mahuʻingá, ʻoku ʻikai totonu ke tau fakaʻikaiʻi pe liʻaki ʻa e tafaʻaki ʻoku tau kau ki ai he ngaahi tō kehekehe ko ʻení, ka ʻi heʻetau hoko ko e kau ākonga ʻa Kalaisí ʻoku totonu ke tau nofo melino mo e niʻihi kehe ʻoku ʻikai ke tau tui tataú pe tali ʻa e ngaahi akonaki ʻoku fakatefito aí. ʻOku tau ʻilo ʻi he fakahā fakaepalōfitá ʻoku hanga ʻe he palani ʻo e fakamoʻui ʻa e Tamaí, ʻo fokotuʻu kitautolu ʻi ha ngaahi tuʻunga fakamatelie ke tauhi ʻEne ngaahi fekaú. ʻOku kau ai ʻetau ʻofa ʻi hotau kaungāʻapi ʻoku kehekehe honau anga fakafonuá mo e tui fakalotú, ʻo hangē ko ʻEne ʻofa ʻiate kitautolú. Hangē ko ia ne akoʻi mai ʻe ha palōfita he Tohi ʻa Molomoná, kuo pau ke tau vilitaki atu ki muʻa ʻi he ‘ʻofa ki he ʻOtuá mo e kakai fulipē’ (2 Nīfai 31:20)” (“Ko e ʻOfa mo Feohi mo e Niʻihi Kehé Neongo e Faikehekehé,” Liahona, Nōvema 2014, 28).