ʻE mahino fēfē kiate au peá u fakaʻaongaʻi ʻa e ngaahi foʻi lea ʻoku fekauʻaki mo e kakai LGBTQ?”

Ngaahi Foʻi Leá

ʻOku malava ke ʻuhinga ʻa e tuʻunga fakasekisualé ki he fetokangaʻaki pe feʻofaʻaki fakaeloto pe fakasekisuale kae pehē foki ki ha ongoʻi ʻoku ʻi ha tuʻunga makehe. ʻOku ʻaonga ki ha niʻihi ke fakafaikehekeheʻi a e fetokangaʻaki fakasekisualé, fetokangaʻaki fakaelotó, mo e tuʻungá kae ʻoua ʻe fakakulupu kotoa pē kinautolu ko e “tuʻunga fakasekisualé.”

Ko e ngaahi hingoa angamaheni tahá ko e lesbian (tokanga ha fefine ki he kakai fefiné), gay (tokanga ha tangata ki he kakai tangatá), mo e bisexual (tangata pe fefine ʻoku manako fakatouʻosi pē he ongo tuʻungá). ʻOku fakaʻaongaʻi foki ʻe ha kakai fefine ʻe niʻihi ʻa e foʻi lea gay ke fakamatalaʻi ʻaki kinautolu. ʻOku malava ke fakaʻaongaʻi ʻe he kakaí ha ngaahi hingoa kehe, pea ko e niʻihi ʻoku nau aʻusia ʻa e fetokangaʻaki fakahomosekisualé ʻoku nau fili ke ʻoua naʻa fakahingoa ʻaki ia kinautolu. ʻOku malava pē ke liliu ʻa e founga ʻoku fili ai ʻe he kakaí ke fakahaaʻi ʻaki kinautolú, ʻi he hili ha ngaahi taimi.

Ko e fetokangaʻakí ʻoku ʻikai ko ha tuʻunga ia ke fakamatalaʻi ʻaki ha taha. ʻOku fili pē ʻe he kakaí ʻa e founga ke fakahaaʻi ʻaki kinautolú. ʻOku ʻi ai ha kāingalotu ʻoku nau mālohi ʻi he Siasí, maʻu lekomeni temipale– mo tauhi e fono ʻo e angamaʻá ka ʻoku hā meiate kinautolu ʻoku nau fetokangaʻaki ʻa tangata mo tangata, fefine mo fefine, pe fakatou fefine mo tangata. ʻOku ʻi ai ha kāingalotu ʻoku nau mālohi ʻi he Siasí ʻoku nau foua ʻa e femanakoʻaki fakahomosekisualé ka ʻoku ʻikai ʻaupito ke nau fili ke fakahingoa kinautolu. Ko hotau tefitoʻi tuʻungá ʻe hoko maʻu pē ko e fānau ʻa e ʻOtuá. Ki ha toe fakamatala lahi ange fekauʻaki mo e tuʻunga tangata pe fefiné pe taʻefiemālie ki hoto tuʻunga tangata pe fefiné (gender dysphoria), vakai, Transgender: Understanding Yourself mo e Transgender: Supporting Others, ChurchofJesusChrist.org.

Tuʻunga Fakasekisualé mo e Tuʻunga Tangata pe Fefiné

ʻOku ʻuhinga e fetokangaʻaki ʻa e tangata mo e tangatá pe fefine mo e fefiné (SSA), ki he fetokangaʻaki fakaeloto, fakaesino, feʻofaʻaki pe fakasekisuale ʻa ha tangata mo e tangata pe fefine mo e fefine. Kapau ʻokú ke foua ʻa e fetokangaʻaki ʻa e tangata mo e tangatá pe fefine mo e fefiné, te ke lava ʻo fili pe ʻikai fili ʻa e tuʻunga fakasekisuale ke ui ʻaki koé. Neongo pē ko e hā ʻa e tūkungá, ko e fetokangaʻaki ʻa e tangata mo e tangatá pe fefine mo e fefiné, ko ha foʻi lea fakatekinikale ʻokú ne fakamatalaʻi ʻa e aʻusia ʻo ʻikai fakakau ha fakamatala. ʻOku fakaʻaongaʻi ʻe he uepisaití ni ʻa e foʻi leá ni ke fakakau mai ki ai ʻa e kakai ʻoku ʻikai ke nau ongoʻi fiemālie hono ui ʻaki kinautolu ha hingoá (label), ka ʻoku ʻikai ko hano fakaʻikaiʻi ʻa e hoko ʻo e fetokangaʻaki ʻa e tangata mo e tangata, fefine mo e fefine, pe fakatouʻosi.

ʻOku kehekehe ʻaupito ʻa e fetokangaʻaki ʻa e tangata mo e tangatá pe fefine mo e fefiné mei he taʻefiemālie ki hoto tuʻunga tangata pe fefiné (gender dysphoria). Hangē ko ʻení, ko e niʻihi ʻoku taʻefiemālie ki honau tuʻunga tangata pe fefiné, tenau ala aʻusia ʻa e fetokangaʻaki ʻa e tangata mo e tangatá pe fefine mo e fefiné, pea mo e konga lahi ʻo kinautolu ʻoku nau aʻusia ʻa e fetokangaʻaki ʻa e tangata mo e tangatá pe fefine mo e fefiné, ʻoku ʻikai ke nau loto ke liliu honau tuʻunga tangata pe fefiné. Mei he tafaʻaki fakaeʻatamaí mo e tokoni fakalotú, ʻoku kehekehe pē ʻa e ongo meʻá ni.