“Lōmņak ko n̄an Kōkm̧anm̧anļo̧k an Baam̧le eo Am̧ Ekkatak Jeje ko Rekwojarjar,” Lōmņak ko n̄an Ekkatak Jeje ko Rekwojarjar (2021)
“Lōmņak ko n̄an Kōkm̧anm̧anļo̧k an Baam̧le eo Am̧ Ekkatak Jeje ko Rekwojarjar,” Lōmņak ko n̄an Ekkatak Jeje ko Rekwojarjar
Ļōmņak ko n̄an Kōkm̧anm̧anļo̧k an Baam̧le eo Am̧ Ekkatak Jeje ko Rekwojarjar
Katak jān Jeje ko Rekwojarjar kajjojo raan āinwōt juon baam̧le ej juon wāween ekajoor n̄an jipan̄ baam̧le eo am̧ ekkatak gospel eo. Ewi jon̄an im ewi aitokan am̧ riit āinwōt juon baam̧le ejjab lukkuun aorōk jān am̧ niknik ilo kijejeto ko am̧. Ilo am̧ kōm̧m̧an bwe ekkatak jeje ko rekwojarjar ej juon m̧ōttan mour eo an baam̧le eo am̧ eaorōk, kwonaaj jipan̄ ro uwaan baam̧le eo am̧ epaakeļo̧k Jisōs Kraist im kalōk naan in kam̧ool ko aer ioon pedped in naan eo An.
Ļōmņak kōn kajjitōk kein:
-
Ekōjkan am̧ kōketak ro uwaan baam̧le eo am̧ n̄an ekkatak jān jeje ko rekwojarjar ippāer make?
-
Ta eo kwomaron̄ kōm̧m̧ane n̄an kōketak ro uwaan baam̧le eo am̧ n̄an kwaļo̧k ta eo rej ekkatak?
-
Ekōjkan am̧ maron̄ kōmejajaik pedped in katak ko kwoj ekkatak ilo Jeje ko Rekwojarjar iien katakin ko aolep raan?
Keememej bwe m̧weo ej jikin eo em̧m̧an n̄an ekkatak gospel eo im n̄an katakin. Kwomaron̄ ekkatak im katakin gospel eo ilo m̧weo ilo wāween ko me rejjab maron̄ kōm̧m̧an ilo juon kūlaaj. Kwon mejādik n̄e kwoj ļōmņak kōn wāween ko n̄an jipan̄ baam̧le eo am̧ ekkatak jān jeje ko rekwojarjar. Ļōmņak kōn jet iaan ļōmņak kein n̄an kōkm̧anm̧anļo̧k wāween an baam̧le eo ekkatak jeje ko rekwojarjar.
Kōjerbal Al
Al jet al ko me rej kōkajoorļo̧k pedped in katak ko kar katakin ilo jeje ko rekwojarjar.
Kwaļo̧k Ippān Ro Jet Jeje Ko Rekwojarjar Eļļap Meļeļeier
Leļo̧k n̄an ro uwaan baam̧le eo iien n̄an kwaļo̧k eoon ko ilo jeje ko rekwojarjar me raar loi eļap meļeļeier ilo iien aer ekkatak jeje ko rekwojarjar.
Kōjerbal Naan ko Am̧ Make
Kūr ro uwaan baam̧le eo n̄an ba ilo tukadu in ilo naan ko aer make ta eo rej ekkatak jān jeje ko rekwojarjar.
Kōjerbale Jeje ko Rekwojarjar n̄an Mour eo Am̧
Ālkin riiti juon eoon ilo jeje ko rekwojarjar, kajjitōk ippān ro uwaan baam̧le eo n̄an kwaļo̧k wāween ko eoon eo ej jerbal ilo mour ko aer.
Kajjitōk juon Kajjitōk
Kūr ro uwaan baam̧le eo n̄an kajjitōk juon kajjtōk kōn gospel eo, innām joļo̧k jet iien n̄an kappukot eoon ko me remaron̄ jipan̄ uwaake kajjitōk eo.
Kwaļo̧k juon Pija
Kālet juon eoon kwoj lo eļap meļeļein, im likūt ijo ro uwaan baam̧le eo enaaj emakijkij aer loe. Kūr ro jet uwaan baam̧le eo n̄an kajjojo kālet juon eoon n̄an kwaļo̧ke.
Kōm̧m̧ane juon Laajrak in Ioon ko
Āinwōt juon baam̧le, kālet jet eoon ko me kwoj kōņaan ekōnono kaki ilo wiik eo ej itok.
Kakilōklōki Eoon Ko
Kālet juon eoon ilo jeje ko rekwojarjar me eļap meļeļein n̄an baam̧le eo am̧, im kūr ro uwaan baam̧le eo n̄an kakilōklōk e ilo am̧ āliji raan otemjej ak kōm̧m̧ane juon ikkure n̄an kakilōklōk.
Kwaļo̧k Mennin Katak ko
Pukot men ko me rej iookļo̧k jebta ko im eoon ko me kwoj riiti āinwōt juon baam̧le. Kūr ro uwaan baam̧le eo n̄an kōnono kōn ekōjkan an kajjojo men ko rej iookļo̧k katak ko ilo eoon ko.
Kālet juon Unin Kōnono
Kōm̧m̧an bwe ro uwaan baam̧le eo ren kajjojo kālet juon unin kōnono me baam̧le eo enaaj katak ippān doon kake. Kōjerbal Topical Guide, Bible Dictionary eo, ak Unin Tōl eo n̄an Jeje Ko Rekwojarjar (scriptures.ChurchofJesusChrist.org) n̄an pukot eoon ko jān jeje ko rekwojarjar kōn unin kōnono eo.
Jin̄aik juon Pija
Riiti jet eoon ko āinwōt juon baam̧le, innām leļo̧k iien n̄an ro uwaan baam̧le eo n̄an jin̄aik juon men me ej iookļo̧k ta eo kwoj riiti. Joļo̧k iien n̄an ekōnono kōn jin̄n̄a ko an doon.
Kōm̧m̧an Arin Kōn Bwebwenato eo
Ālkin riiti juon bwebwenato, kūr ro uwaan baam̧le eo n̄an kōm̧m̧an arin. Ālkin wōt, kōnono kōn ekōjkan an bwebwenato eo iookļo̧k men ko me kwoj en̄jaki ippam̧ make im āinwōt juon baam̧le.
Elder David A. Bednar: “Kajjojo jar an baam̧le, kajjojo iien an baam̧le ekkatak jeje ko rekwōjarjar, im kajjojo nokon in jota an baam̧le ej juon jipan̄ kōn wōn kōj. Juon makūtkūt ej makeļo̧k ejjab kabwilōn̄lōn̄ im ejjab kein ememļo̧kjeņ. Ak āinwōt ilo an ialo im gold im būruwōn annan̄in uno ko kaibojooj doon im kwaļo̧k juon jerbal elikio eaibojooj, im jej wōnm̧aanļo̧k wōt n̄an kōm̧m̧ane men eo edik emaron̄ tōl ļo̧k n̄an eddōkļo̧k in jetōb āliktata” (“More Diligent and Concerned at Home,” Liahona, Nov. 2009, 19–20).