Boech Wo’en i Mon’og nag Rogon e Tabinaw Rom nibe Fil e Chep nib Thothup

Fil e chep nib thothup u tabinaw ni gubin e rran e rogon nib gel nira ayuweg e tabinaw rom nge fil fare gospel. Dariy fan fa’an e tabinaw ma bi’eg bo’or fa bu’chuw ma kemus nib mangil fa’an ni ngam rrin’ gubin e rran. Napan ni ngam fal’eg e fil ko pi chep ni thothup nib ba’ e yang ko yafos rom, rangam ayuweg fapi gathon e tabinaw rom nge chuchugur ngak Yesus Kristus nge fal’eg e mich rorad u dakean e daf ko thin Rok.

Mu lemnag e pi duwer ney:

• Urogon ni ngam pi athamgil ngorad ni ngar filed e pi chep nib thothup ni go’yaed roraed?

• Mang e rayog ni ngam rin’ ni ma pi athamgil ngorad ningar weliy e pi n’en be filed?

• Urogon ni ngam dag pi kenggin e yalen nima fil ulan fare pi chep nib thothup ulan e ningyal ko fil gubin e rran?

Mu tay u wun’um ni tabinaw e gin ni th’abi fel’ tafen ningam fil min machib nag e gospel riy. Rayag ni ngam fil mag machib nag e gospel ulan e tabinaw nib thil rogon ulan e singil ko Galasia. Mu lemnag bo’or napan ni ngam fal’eg bochi miit e rogon ningam ayuweg e tabinaw rom filed ko pi chep nib thothup. Ngam lemnag bochi rogon ney nira gelnag e fil rom ko pi chep nib thothup u tabinaw.

Uneg e Musik ngay

Yin’ed e tang nibe yip fan ko fapi kenggin e yalen u lane pi chep nib thothup.

Weliy fapi Chep nib thothup ni Gaba’adag

Pii’ e rogon ngak e chon ko tabinaw ni ngar pii’ fapi Chep nib thothup ni Gaba’adag.

Fanay ni Woed Rogon e Thin Rom

Pinning ngak e chon ko tabinaw ni ngar weliy u thin rorad e tin ni kar filed ulan e fil rorad ko pi chep ni thothup.

Fek ngalan e Yafos rom e pi Chep ney nib Thothup

Tomur nikan bi’eg reb e thin nib thothup, fith ngak gathon e tabinaw rom ko rogon nike buch e biney ulan e yafos rorad.

Fith e Duwer

Pinning gathon e tabinaw ni ngar fithed e duwer ni marunga’agen e gospel, nge fal’eg bochi ngiyal’ ni ngam piryeged e pi guruy ni ra fulweg e duwer ney.

Dag e Chep nib Thothup

Mel’eg e guruy ni gaba’adag, nge tay ngalang ere tabinaw rayog ni ngar guy ni gubin ngiyal’. Pinning gathon e tabinaw ni ngar mukun e mel’eg e chep nib thothup nge tay ngalang.

Sunmiy e Babyor ko pi Chep nib Thothup

U tabinaw, mel’eg boch e pi chep nib thothup ni gamed ba’adag ni ngam filed ulan fare wiik ni ra yib.

Mu Tay u Wun’um e pi Chep nib Thothup

Mel’eg e pi chep nib thothup ni ba’adag e tabinaw rom, nge pinning gathon e tabinaw ni ngar tay u wun’rad e tiney napan ni ngar yoged gubin e rran fa yog ulan e gosgos ko puguran.

Fil Ufithik e Pi’nen

Piryeg e pi n’en ni boed rogon ko pi chapter nge pi guruy gamed be bi’eg ulan e tabinaw. Pinning gathon e tabinaw ni ngar weliy urogon e piney ma boed rogon e machib ulan e pi chep nib thothup.

Mel’eg e Ban’an ni ra Fil

Pii’ e rogon ngak e tabinaw nira mel’eg e ban’an e tabinaw ra filed u ta’abang. Mu fanay e Topical Guide, fare Bible Dictionary, fa Guide to the Scriptures (scriptures.ChurchofJesusChrist.org) ni ngam piryeged e pi chep nib thothup nifan e ban’an.

Junga’ e Sasing

Bi’eg bochi pi chep nib thothup u tabinaw, nge tomur pii’ e ngiyal’ ngak e tabinaw ni ngar junga’ e sasing marunga’agen e tin ni kam bi’eged. Ngam weliy marunga’agen gubin e pi sasing romed.

Yaen e Ya’an e Yat

Tomur ni kam bi’eg e yat, pinning gathon e tabinaw rom ni ngar yaen e ya’an ko biney. Ma tomuren, non’ed marunga’agen e ya’at ney ni ir boed rogon ko e pi’nen ni ngam thapeged ko gur nge ko tabinaw .

Elder David A. Bednar ke fil: “Gubin e meybil u tabinaw, gubin e yay ni ngam fil ko pi chep ni thothup u tabinaw, nge urngin e family home evening ir e yang ko junga’ nga dakean e babyor ko ya’el rodad. Dariy ni ta’areb e ngongol ra m’ug nib thabi fel’. Machane woed rogon e raen nib maaguchoel nge gol nge but’but’ ra ayuwegrad nge fal’eg e sasing ni rib mangil, ta’ab rogon e athamgil rodad napan ni ngad rrin e pi’nen nib achigchig ra powi’iydad i yaen nge tin nib ga’ ko ya’el” (“More Diligent and Concerned at Home,” Liahona, Nov. 2009, 19–20).