fefin a annea kewe pukefel

Ekkoch Kokkot ne Aeochueno Om Pwisin Kaeo Pukefel

Ikkei ekkoch mecheresin aanen om kopwe anapano om kaeo ewe kpaasen Kot non ekkewe pukefel.

Iotek fan itan Ourour

Ekkewe pukefel ra masoweni ewe kapasen Kot. Nupwen ka kaeo kewe pukefel, eisini Semom non Nang ren An emwen me Ngunun pwe epwe anisuk ne weweitir.

Kutta ekkewe Ennet usun Jises Kraist

Ekkewe pukefel ra aiti kich pwe mettoch meinisin ra pwarata usun Kraist (nengeni 2 Nifai 11:4; Moses 6:63) iwe kutta I non mettoch a fis, tutunap, me afanafanen ekkewe pukefel. Ekieki om kopwe makkei ika esisina uwokisin minne ra aitikich usun ewe Chon Amanau me ifa usun sipwe tapweno mwirin I.

Kutta ekkewe Ourouren Kapas me Mwichen kapas

En mi tongeni kuna pwe ekkoch foun kapas me mwichen kapas non ekkewe pukefel repwe amwasangaok, ika ita ra fen makketiw chok fan itom. Meni kopwe mefi pwe ir mi wewe ngonuk me anisuk me peseok. Ekieki om kopwe makkei ir me non noum kewe pukefel ika makkei usur non ew puken porousen kaeo.

Kutta ekkewe Ennetin Kapas Allim

Fan ekkoch kewe ennetin kapas allim (fan chommong ra iteni annuk ika nongonong) ra affatetiw me fan ekkoch ra ekis pwa non ew awewe ika tutunap. Eisinuk pwisin, “Met kewe ennetin kapas allim ra keit me non ekkei uwokisin?”

Ausening ngeni Ngun

Ewungeni ochu om ekiek me memef, ika mwo rese wewe ngeni met ka anneani. Meni ekkena memef ir ekkewe mettoch Semom non Nang a mochen kopwe kaeo me mefi.

fefin a annea kewe pukefel 2

Anonnou ekkewe Pukefel ngeni Manauom

Ekieki ifa usun ekkewe tutunap me afanafan ka anneanir ra wewe ngeni manauom. Ren awewe, ka tongeni eisinuk pwisin, “Met kewe mettoch a fis ngeniei ir mi nonno ngeni met ua anneani?” ika “Ifa usun ua tongeni tapweno mwirin appiruen ei aramas non ekkewe pukefel?”

Eis Kapaseis

Om eis ekkewe kapaseis usun ewe kapas allim ra tongeni anisuk ne finata met kopwe kaeo. Nupwen ka kaeo ekkewe pukefel, ekkoch kapaseis repwe pichita non om ekiek. Ekkei kapaseis meni repwe wewe ngeni met ka anneani ika ngeni manauom. Ekipwichi ekkei kapaseis, me kutta ponuwer nupwen ka sopweno ne kaeo ekkewe pukefel. Mwirin om kaeo, eis pwan met Kot a mochen kopwe kaeo, me ewitiwiti ponuwer non ekkewe awa me ran repwe feito.

Aea Aninisin Kaeo Pukefel

Ne angei pwan ekkoch mirit usun ekkewe uwokisin ka anneani, aea ekkewe esinesin fan ekkewe peich, ewe Topical Guide, ewe Bible Dictionary, ewe Guide to the Scriptures (scriptures.ChurchofJesusChrist.org), me ekkoch aninisin kaeo.

Ekieki Masowan ekkewe Pukefel

Ka tongeni kuna ekkoch mirit mi murino usun ew uwokisin ka ekieki usun masowan—ekkewe nonnomun ika neni ian ewe uwokisin a fis ie. Ren awewe, om sinei nonnomun me nuku an ekkewe aramas emon soufos a kapas ngenir a tongeni anisuk ne weweiti popun an kewe porous.

mwan a kaeo kewe pukefel.

Rekotuni Om Ekiek me Memef

Mi chommong aanen om kopwe rekotuni ekkewe ekiek ra fis nupwen ka kaeo pukefel. Ren awewe, ka tongeni esisina ew kapas mi auchea ika ekkoch mwichen kapas me rekotuni om ekiek pwe ew esinesin non noum pukefel. Ka pwan tongeni annomu ew puken porousen mirit, memmef, me ekiek ka angei. Ika en mi tongeni rekotuni ewe kapaseis ka eis me mwen om poputani om kaeo, atapwa ren ponuwan kewe en mi emwen ngeir.

Kaeo ekkewe Kapasen Soufos me Aposel non Fansoun Soponon

Anneani met soufosun non fansoun soponon me aposel ra fen aiti kich usun ekkewe nongonong ka kuna me non ekkewe pukefel. Ar kewe porous ra nom non ewe “General Conference,” “Magazines,” me pwan ekkoch tettenin puk non Gospel Library.

Annea ekkewe Tutunap

Anneani ekkewe tutunap non ekkewe pukefel, kutta om kopwe weweiti masower (fansoun, neni, chon kapas, me chon annea). Ekkewe tutunapen pukefel mi chungatiw ir pisekin kaeo ra men murino ren ei, akkaewin fan iten semirit me chon mwichefen rese kon sineochu ekkewe pukefel.

Aporousa Mirit ka sinei

Aporousa ekkewe mirit ka angei seni om pwisin kaeo a ew mettoch mi murino ne aiti ekkoch me epwe anisi ne apochokuna om weweiti met ka fen anneani.

Manaueni Met Ka Kaeo

Kaeo pukefel a tongeni pesei kich me emweni kich ne siwini napanapen manauach. Ausening ngeni met ewe Ngun a echimwok kopwe fori nupwen ka annea, iwe mwirin finata ne fori ekkena pesepes.