Mga Ideya sa Pagpauswag sang Imo Personal nga Pagtuon sang Balaan nga mga Kasulatan

Ari ang pila ka simple nga mga paagi para pauswagon ang imo pagtuon sang pulong sang Dios sa balaan nga mga kasulatan.

Magpangamuyo para sa Inspirasyon

Ang balaan nga mga kasulatan mga pulong sang Dios. Samtang ginatun-an mo ang mga ini, magpangamuyo sa imo Amay nga Langitnon para sa Iya giya kag batunon ang Iya Espiritu agud mabuligan ka nga mahangpan ang mga ini.

Magpangita sang mga Kamatuoran parte kay Jesucristo

Ang balaan nga mga kasulatan nagatudlo sa aton nga ang tanan nga butang nagamapatuod kay Cristo (tan-awa sa 2 Nefi 11:4; Moises 6:63), gani pangitaa Sia sa mga kahiwatan, mga istorya, kag mga pinanudlo sa balaan nga mga kasulatan. Pamensara ang pagbutang sang tanda ukon marka sa mga bersikulo nga nagatudlo parte sa Manluluwas kag kon paano Sia sundon.

Magpangita sang Nagainspirar nga mga Tinaga kag mga Dinalan

Mahimo nga makakita ka sang mga tinaga kag mga dinalan sa balaan nga mga kasulatan nga manamian mo, nga daw ginsulat gid para sa imo. Mahimo nga personal nga mapuslanon ini sa imo kag magainspirar kag magapapagsik sa imo. Pamensara nga markahan ang mga ini sa imo balaan nga mga kasulatan ukon isulat ang mga ini sa isa ka sululatan sang mga tinun-an.

Pangitaa ang mga Kamatuoran sang Ebanghelyo

Kon kaisa ang mga kamatuoran sang ebanghelyo (masami ginatawag nga doktrina ukon mga prinsipyo) ginahambal sing direkta, kag kon kaisa ginapahangop paagi sa halimbawa ukon istorya. Pamangkuta ang imo kaugalingon, “Ano nga wala katapusan nga mga kamatuoran ang gintudlo sa sining mga bersikulo?”

Pamatii ang Espiritu

Bantayi ang imo panghunahuna kag mga balatyagon, bisan pa nga wala ini sing kaangtanan sa imo ginabasa. Basi inang mga pagpabatyag amo mismo ang mga butang nga gusto sang imo Amay nga Langitnon nga imo matun-an.

Ipaanggid ang Balaan nga mga Kasulatan sa Imo Kabuhi

Pamensara kon paano ang mga istorya kag pinanudlo nga imo ginabasa magamit sa imo kabuhi. Halimbawa, pwede mo pamangkuton ang imo kaugalingon, “Ano ang akon mga eksperiyensya nga pareho sa akon ginabasa?” ukon “Paano ko sundon ang ehemplo sining tawo sa balaan nga mga kasulatan?”

Magpamangkot

Ang pagpamangkot parte sa ebanghelyo makabulig sa imo sa pagdesisyon kon ano ang tun-an. Sa imo pagtuon sang balaan nga mga kasulatan, mahimo nga may mapamensaran ka nga mga pamangkot. Ining mga pamangkot mahimo nga may labot sa imo ginabasa ukon sa imo kabuhi sa kabilogan. Binag-binaga ining mga pamangkot kag pangitaa ang mga sabat samtang padayon ka nga nagatuon sang balaan nga mga kasulatan. Pagkatapos nimo tuon, magpamangkot kon ano pa gid ang luyag sang Dios nga imo matun-an, kag magbantay sang mga sabat sa maabot nga mga inoras kag mga inadlaw.

Maggamit sang mga Bulig sa Pagtuon sang Balaan nga mga Kasulatan

Agud makaangkon sang dugang nga paghangop sang mga bersikulo nga imo ginabasa, gamita ang mga footnote, ang (scriptures.ChurchofJesusChrist.org), kag iban pa nga mga bulig sa pagtuon.

Hunahunaa ang Konteksto sang Balaan nga mga Kasulatan

Makakita ka sang makahulugan nga mga ideya parte sa balaan nga mga kasulatan kon hunahunaon mo ang iya konteksto—ang sirkumstansya ukon ang kahimtangan sa balaan nga mga kasulatan. Halimbawa, ang paghibalo sang palibot kag pagpati sang mga tawo nga ginatumod sang propeta makabulig sa imo nga maintiendihan ang katuyuan sang iya mga mensahe.

Isulat ang Imo mga Panghunahuna kag Balatyagon

May madamo nga paagi para isulat ang mga pagpabatyag nga nagaabot sa imo samtang nagatuon ka. Halimbawa, pwede mo markahan ang makahulugan nga tinaga ukon dinalan kag isulat ang imo panghunahuna bilang tanda sa imo balaan nga mga kasulatan. Mahimo ka man magtipig sang sululatan sang mga ideya, mga balatyagon, kag mga impresyon nga imo mabaton. Ukon mahimo mo isulat ang imo pamangkot antes mo ginsugdan ang imo pagtuon, nga ginasundan sang mga sabat nga gingiyahan ka nga mabaton.

Tun-i ang mga Pulong sang mga Propeta kag Apostoles sa Ulihing mga Adlaw

Basaha ang mga pinanudlo sang mga propeta kag apostoles sa ulihing mga adlaw parte sa mga prinsipyo nga imo makita sa balaan nga mga kasulatan. Ang ila mga mensahe ara sa “Pangkabilogan nga Komperensya,” “Mga Magasin,” kag iban pa nga mga koleksyon sa Librarya sang Ebanghelyo.

Magbasa sang mga Istorya

Magbasa sang mga istorya sa balaan nga mga kasulatan, nga nagatinguha sa paghangop sang ila konteksto (panahon, lugar, manughambal, kag tagpalamati). Ang gin-ilustrar nga mga istorya sa balaan nga kasulatan maayo nga kuluhaan para sini, labi na gid para sa kabataan kag mga miyembro nga indi gid gawa pamilyar sa balaan nga mga kasulatan.

Magpaambit sang mga Ideya

Ang paghambalanay parte sa mga ideya halin sa imo personal nga pagtuon maayo nga paagi sa pagtudlo sa iban kag pagbulig pabakod sang imo pag-intiendi sang imo ginbasa.

Ipangabuhi ang Imo Natun-an

Ang pagtuon sang balaan nga mga kasulatan makainspirar kag magatulod sa aton nga bag-uhon ang aton pagpangabuhi. Pamatii ang ginapabatyag sa imo sang Espiritu nga imo himuon samtang nagabasa, kag dayon magpangako nga aktuhan inang mga pagpabatyag.