Ngaa Tun-an ang Balaan nga mga Kasulatan?

Kon matutum naton nga ginatun-an ang balaan nga mga kasulatan, mas nagalapit kita kay Jesucristo kag mahangpan naton sing mas maayo ang Iya ebanghelyo kag nagabayad-sala nga sakripisyo. Ang propetang si Nefi nagpaisog sa aton sa sini nga paagi:

“Gani, kinahanglan gid nga magdutdot kamo pasulong upod ang isa ka kalig-on kay Cristo, nga may isa ka himpit nga kasanagan sang paglaum, kag isa ka gugma sang Dios kag sang tanan nga mga tawo. Gani, kon magdutdot kamo pasulong, nga nagapaayaw sa pulong ni Cristo, kag magapadayon tubtob sa katapusan, yari karon, amo ini ang ginasiling sang Amay: Inyo maangkon ang kabuhi nga walay katapusan” (2 Nefi 31:20).

Ang mga panudlo sang balaan nga mga kasulatan magabulig sa aton nga makabalik sa aton Amay nga Langitnon. Ang aton mga propeta sa ulihing mga adlaw nagpangabay sa aton nga basahon ang mga ini sing masunson bilang mga indibidwal kag, kon nagakaigo, bilang mga pamilya. Ginaagda nila kita nga magtuon halin sa mga eksperiyensya sadtong mga tawo sa balaan nga mga kasulatan kag idapat ang mga pagsaysay kag mga pinanudlo sa balaan nga mga kasulatan sa aton mga kabuhi, pareho sang laygay ni Nefi sa 1 Nefi 19:23. Ang dumaan kag moderno nga mga propeta nag-agda sa aton nga tun-an ang balaan nga mga kasulatan kag “magpaayaw sa pulong ni Cristo” (2 Nefi 32:3).

Si Pangulong Russell M. Nelson nagtudlo man sining importante nga kamatuoran parte sa “pagpaayaw” sa balaan nga mga kasulatan:

“Ang pagpaayaw nagahakahulugan sang labaw pa sa tilawan. Ang pagpaayaw nagahakahulugan nga saboran. Ginasaboran naton ang balaan nga mga kasulatan paagi sa pagtuon sang mga ini sa espiritu sang masinadyahon nga pagdiskubre kag matinuohon nga pagtuman. Kon nagapaayaw kita sa mga pulong ni Cristo, nagadulot ang mga ini sa ‘mga tapi-tapi nga unod sang mga tagipusuon’ [2 Mga Taga-Corinto 3:3]. Mahimo sila nga importante nga bahin sang aton kinaugali” (“Living by Scriptural Guidance,” Ensign, Nob. 2000, 17).

Kon tayuyon kita nga nagapakigbahin sa personal kag pang-pamilya nga pagtuon sang balaan nga mga kasulatan, kita kag ang aton pamilya magiyahan, maprotektahan kag mapabakod batok sa madamo nga mga hangkat sang aton panahon.