tus poj niam kawm vaj lug kub

Tej lub Tswv Yim Pab Koj Kawm Vaj Lug Kub

Nov yog tej lub tswv yim yooj yim kom pab koj kawm Vajtswv txoj lus hauv vaj lug kub.

Thov Kom Txais Kev Tshoov Siab

Cov vaj lug kub muaj Khetos cov lus. Thaum koj kawm cov lus ntawd, thov koj Leej Txiv Saum Ntuj Ceeb Tsheej kom Nws coj koj kev thiab txais Nws tus Ntsuj Plig kom pab koj to taub.

Nrhiav tej Yam Tseeb txog Yexus Khetos

Cov vaj lug kub qhia peb tias txhua yam ua tim khawv txog Khetos (saib 2 Nifais 11:4; Mauxes 6:63), yog li ntawd nrhiav Nws nyob hauv tej zaj thiab tej lus qhia hauv cov vaj lug kub. Cia li xav seb puas sau lub cim los sis sau ntawv txog tej nqe uas qhia txog tus Cawm Seej thiab tej yam peb yuav tsum ua kom coj raws li Nws.

Nrhiav tej Lus uas Tshoov Koj lub Siab

Tej zaum koj yuav nrhiav tau tej lus thiab tej kab lus hauv cov vaj lug kub uas tshoov koj lub siab, zoo li lawv twb sau ntawv rau koj ib leeg nyeem xwb. Tej zaum tej nqe no yuav muaj nqis rau koj thiab ua rau koj xav ua zoo. Cia li xav seb puas sau lub cim rau tej nqe no hauv koj phau vaj lug kub los sis sau ntawv txog tej no hauv ib phau ntawv kawm vaj lug kub.

Nrhiav tej Yam Tseeb ntawm txoj Moo Zoo

Tej lub sij hawm tej yam tseeb ntawm txoj moo zoo (feem ntau hu ua cov lus qhuab qhia los sis tej ntsiab cai) los lawv hais ncaj, thiab tej lub sij hawm lawv hais los ntawm ib zaj lus piv txwv los sis zaj dab neeg. Nug koj tus kheej hais tias, “Tej nqe no qhia tej yam tseeb twg txog txoj moo zoo?”

Mloog tus Ntsuj Plig

Tsom ntsoov rau koj tej kev xav, txawm yog koj xav tias tsis yog raws li tej yam uas koj nyeem. Tej zaum tej kev tshoov siab ntawd yog tej yam uas koj Leej Txiv Saum Ntuj Ceeb Tsheej xav kom koj kawm thiab xav hauv koj lub siab.

tus poj niam kawm vaj lug kub 2

Ua Neej Raws Li cov Vaj Lug Kub Qhia

Cia li xav seb tej dab neeg thiab tej lus qhia uas koj nyeem los yuav siv li cas hauv koj lub neej. Piv txwv hais tias, koj nug tau koj tus kheej hais tias, “Kuv twb raug xwm txheej dab tsi uas zoo li tej yam uas kuv nyeem?” los sis “Kuv yuav ua li cas kom coj raws li tus neeg hauv phau vaj lug kub tus yam ntxwv?”

Hais tej Lus Nug

Qhov uas koj nug txog txoj moo zoo thaum koj kawm cov vaj lug kub yuav pab koj txiav txim siab tias koj yuav kawm dab tsi. Thaum koj kawm vaj lug kub, tej zaum yuav ua rau koj xav txog tej lus nug. Tej lus nug no tej zaum yuav raws tej yam uas koj nyeem los sis yuav muaj nqis rau koj lub neej. Cia li xav txog tej lus nug no thiab nrhiav tej lus teb thaum koj kawm vaj lug kub ntxiv. Tom qab koj kawm cov vaj lug kub, cia li thov Vajtswv seb Nws xav kom koj kawm dab tsi, thiab tos ntsoov seb Nws yuav teb li cas thaum yav tom ntej.

Siv tej Yam Pab Kawm Vaj Lug Kub

Xwv kom tau tswv yim ntxiv txog tej nqe uas koj nyeem, cia li siv tej lub cim nram qab, Topical Guide, Bible Dictionary, Phau Qhia txog Vaj Lug Kub (scriptures.ChurchofJesusChrist.org), thiab lwm yam kev pab.

Xav txog Xwm Txheej uas Muaj Thaum Sau Vaj Lug Kub

Koj nrhiav tau tej lub tswv yim uas muaj nqis txog ib nqe vaj lug kub yog tias koj xav txog tej xwm txheej uas muaj thaum tau muab sau—tej zwj ceeb los sis qhov chaw uas tib neeg nyob thaum sau vaj lug kub. Piv txwv hais tias, qhov uas koj paub tias cov neeg zoo li cas thiab ntseeg li cas thaum ib tug yaj saub hais lus rau lawv yuav pab koj to taub vim li cas nws tau hais tej lus ntawd.

txiv neej kawm vaj lug kub

Sau Ntawv txog Koj tej Kev Xav

Muaj ntau txoj kev sau ntawv txog tej kev tshoov siab uas koj txais thaum koj kawm vaj lug kub. Piv txwv hais tias, tej zaum koj yuav xav sau lub cim rau ib lo lus los sis kab lus uas muaj nqis thiab sau ntawv txog koj tej kev xav hauv koj phau vaj lug kub. Tej zaum koj kuj sau ntawv hauv ib phau ceev xwm txheej los tau hais txog koj tej lub tswv yim, tej kev xav, thiab kev tshoov siab uas koj txais. Los sis tej zaum koj yuav xav sau ntawv txog ib lo lus nug uas koj nug ua ntej koj pib kawm, es tom qab ntawd sau txog tej lus teb uas koj tau kawm.

Kawm cov Yaj Saub thiab cov Thwj Tim tej Lus hauv Hnub Nyoog Kawg

Cia li nyeem txog tej yam uas cov yaj saub thiab cov tim thawj hauv hnub nyoog kawg tau qhia txog tej ntsiab cai uas koj nrhiav tau hauv cov vaj lug kub. Muaj lawv tej zaj lus hais nyob hauv “Lub Tuam Rooj Sab Laj” “Phau Xov Xwm,” thiab lwm pawg ntawv nyob hauv Txoj Moo Zoo cov Ntawv.

Nyeem tej Zaj Lus

Nyeem tej zaj lus hauv cov vaj lug kub, cia li xav to taub tau muaj li cas (thaum twg, qhov twg, tus twg yog tus hais lus, thiab nws hais rau leej twg). Cov vaj lug kub uas tau kos duab txog yeej pab tau koj ua li no, qhov tseem ceeb yuav pab cov me nyuam thiab cov mej zeej uas tsis tshua paub cov vaj lug kub.

Qhia txog Koj tej lub Tswv Yim

Kev sib tham txog koj tej lub tswv yim los ntawm koj txoj kev kawm vaj lug kub yeej yog ib txoj kev zoo qhia lwm tus thiab kuj yog ib txoj kev txhawb nqa koj txoj kev to taub txog tej yam uas koj twb nyeem lawm.

Ua Neej Raws Li tej Yam uas Koj Kawm

Kev kawm vaj lug kub yeej yuav tshoov peb lub siab thiab ua rau peb xav hloov peb txoj kev ua neej. Cia li mloog seb tus Ntsuj Plig tshoov koj lub siab ua dab tsi thaum koj nyeem, ces cia li cog lus tias koj yuav ua raws li tej kev tshoov siab ntawd.