“Vim Li Cas Yuav Kawm Vaj Lug Kub?” Tej lub Tswv Yim Pab Kawm Vaj Lug Kub (2021)
“Vim Li Cas Yuav Kawm Vaj Lug Kub?” Tej lub Tswv Yim Pab Kawm Vaj Lug Kub
Vim Li Cas Yuav Kawm Vaj Lug Kub?
Thaum peb rau siab kawm cov vaj lug kub, peb los nyob ze Yexus Khetos thiab to taub Nws txoj moo zoo thiab Nws txoj kev txi theej txhoj zoo dua. Tus yaj saub Nifais tau hais li no:
“Yog li ntawd, nej yuav tsum txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus. Yog li ntawd, yog tias nej yuav thawb lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis” (2 Nifais 31:20).
Tej lus qhia hauv cov vaj lug kub yuav pab peb rov qab mus cuag peb Leej Txiv Saum Ntuj Ceeb Tsheej. Peb cov yaj saub hauv hnub nyoog kawg no tau hais kom peb kawm vaj lug kub tsis tu tsis tseg thaum nyob ib leeg xwb, thiab nrog peb tsev neeg, yog tias ua taus. Lawv tau caw kom peb kawm los ntawm cov neeg nyob hauv cov vaj lug kub thiab siv tej zaj thiab tej lus qhia los ntawm cov vaj lug kub hauv peb lub neej niaj hnub no, raws li Nifais hais nyob hauv 1 Nifais 19:23. Cov yaj saub puag thaum ub thiab niaj hnub nim no tau caw peb kom kawm cov vaj lug kub thiab “mloog ntsoov Khetos tej lus” (2 Nifais 32:3).
Thawj Tswj Hwm Russell M. Nelson kuj tau qhia qhov tseeb tseem ceeb no txog kev “mloog ntsoov” cov vaj lug kub:
“Mloog ntsoov tsis txhais tias yus lam mloog xwb. Mloog ntsoov txhais tias yus nyiam heev. Peb nyiam cov vaj lug kub heev yog peb kawm vaj lug kub los ntawm kev zoo siab xav nrhiav thiab kev rau siab mloog lus. Thaum peb mloog ntsoov Khetos tej lus, ces peb muab tej lus ntawd sau rau hauv peb lub siab [2 Kauleethaus 3:3]. Tej lus ntawd yeej los ua ib feem ntawm peb lub siab lub ntsws” (“Living by Scriptural Guidance,” Ensign, Kaum Ib Hlis Ntuj 2000, 17).
Thaum peb kawm vaj lug kub peb tus kheej thiab nrog peb tsev neeg tsis tu tsis tseg, Vajtswv yuav coj, pov hwm, thiab txhawb nqa peb thiab peb tsev neeg thaum raug tej teeb meem ntau hauv lub neej no.