“ແນວຄິດເພື່ອປັບປຸງການສຶກສາພຣະຄຳພີເປັນສ່ວນຕົວຂອງທ່ານ,” ແນວຄິດການສຶກສາພຣະຄຳພີ (2021)
“ແນວຄິດເພື່ອປັບປຸງການສຶກສາພຣະຄຳພີເປັນສ່ວນຕົວຂອງທ່ານ,” ແນວຄິດການສຶກສາພຣະຄຳພີ
ແນວຄິດເພື່ອປັບປຸງການສຶກສາພຣະຄຳພີເປັນສ່ວນຕົວຂອງທ່ານ
ຕໍ່ໄປນີ້ແມ່ນວິທີທີ່ລຽບງ່າຍ ເພື່ອສົ່ງເສີມການສຶກສາຂອງທ່ານກ່ຽວກັບພຣະຄຳຂອງພຣະເຈົ້າ ຢູ່ໃນພຣະຄຳພີ.
ອະທິຖານເພື່ອການດົນໃຈ
ພຣະຄຳພີບັນຈຸພຣະຄຳຂອງພຣະເຈົ້າ. ເມື່ອທ່ານສຶກສາມັນ, ໃຫ້ທູນຂໍການຊີ້ນຳຈາກພຣະບິດາເທິງສະຫວັນຂອງທ່ານ ແລະ ຮັບເອົາພຣະວິນຍານຂອງພຣະອົງເພື່ອຊ່ວຍທ່ານໃຫ້ເຂົ້າໃຈ.
ຊອກຫາຄວາມຈິງກ່ຽວກັບພຣະເຢຊູຄຣິດ
ພຣະຄຳພີສິດສອນເຮົາວ່າ ທຸກສິ່ງເປັນພະຍານເຖິງພຣະຄຣິດ (ເບິ່ງ 2 ນີໄຟ 11:4; ໂມເຊ 6:63), ສະນັ້ນ ຈົ່ງຊອກຫາພຣະອົງຢູ່ໃນເຫດການ, ເລື່ອງລາວ, ແລະ ຄຳສອນຕ່າງໆຈາກພຣະຄຳພີ. ໃຫ້ຄິດທີ່ຈະໝາຍເຫດ ຫລື ໝາຍຂໍ້ທີ່ສິດສອນກ່ຽວກັບພຣະຜູ້ຊ່ວຍໃຫ້ລອດ ແລະ ວິທີທີ່ຈະຕິດຕາມພຣະອົງ.
ຊອກຫາຖ້ອຍຄຳ ແລະ ວະລີທີ່ດົນໃຈ
ທ່ານອາດພົບເຫັນຖ້ອຍຄຳ ແລະ ວະລີບາງຢ່າງຢູ່ໃນພຣະຄຳພີ ທີ່ປະທັບໃຈທ່ານ, ຄືກັບວ່າມັນຖືກຂຽນໄວ້ສຳລັບທ່ານໂດຍສະເພາະ. ທ່ານອາດຮູ້ສຶກວ່າ ມັນກ່ຽວຂ້ອງກັບທ່ານ ແລະ ດົນໃຈ ແລະ ກະຕຸ້ນທ່ານ. ໃຫ້ຄິດທີ່ຈະໝາຍມັນຢູ່ໃນພຣະຄຳພີຂອງທ່ານ ຫລື ຂຽນກ່ຽວກັບມັນໄວ້ຢູ່ໃນປຶ້ມບັນທຶກການສຶກສາສ່ວນຕົວຂອງທ່ານ.
ຊອກຫາຄວາມຈິງຂອງພຣະກິດຕິຄຸນ
ບາງເທື່ອຄວາມຈິງຂອງພຣະກິດຕິຄຸນ (ສ່ວນຫລາຍແລ້ວຖືກເອີ້ນວ່າ ຄຳສອນ ຫລື ຫລັກທຳ) ກ່າວກົງໄປກົງມາ, ແລະ ບາງເທື່ອມັນກ່າວຜ່ານທາງຕົວຢ່າງ ຫລື ເລື່ອງລາວ. ໃຫ້ຖາມຕົວເອງວ່າ, “ຄວາມຈິງຂອງພຣະກິດຕິຄຸນຢ່າງໃດແດ່ທີ່ສິດສອນຢູ່ໃນຂໍ້ເຫລົ່ານີ້?”
ເຊື່ອຟັງພຣະວິນຍານ
ໃຫ້ເອົາໃຈໃສ່ຕໍ່ຄວາມນຶກຄິດ ແລະ ຄວາມຮູ້ສຶກຂອງທ່ານ, ເຖິງແມ່ນວ່າມັນເບິ່ງຄືບໍ່ກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ກໍຕາມ. ການກະຕຸ້ນເຫລົ່ານັ້ນອາດເປັນສິ່ງທີ່ພຣະບິດາເທິງສະຫວັນຂອງທ່ານປະສົງໃຫ້ທ່ານຮຽນຮູ້ ແລະ ຮູ້ສຶກ.
ປຽບທຽບພຣະຄຳພີໃສ່ກັບຊີວິດຂອງທ່ານ
ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນທີ່ທ່ານກຳລັງອ່ານຢູ່ ກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ທ່ານສາມາດຖາມຕົວເອງວ່າ, “ປະສົບການໃດແດ່ທີ່ເຮົາເຄີຍມີ ທີ່ຄ້າຍຄືກັນກັບສິ່ງທີ່ເຮົາກຳລັງອ່ານຢູ່ນີ້?” ຫລື “ເຮັດແນວໃດເຮົາຈຶ່ງຈະສາມາດເຮັດຕາມຕົວຢ່າງຂອງບຸກຄົນນີ້ ຢູ່ໃນພຣະຄຳພີໄດ້?”
ຖາມຄຳຖາມ
ການຖາມຄຳຖາມກ່ຽວກັບພຣະກິດຕິຄຸນ ສາມາດຊ່ວຍທ່ານໃຫ້ຕັດສິນໃຈວ່າຈະສຶກສາສິ່ງໃດ. ຂະນະທີ່ທ່ານສຶກສາພຣະຄຳພີ, ອາດມີຄຳຖາມທີ່ເຂົ້າມາສູ່ຈິດໃຈຂອງທ່ານນຳອີກ. ຄຳຖາມເຫລົ່ານີ້ອາດກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ ຫລື ກັບຊີວິດຂອງທ່ານໂດຍທົ່ວໄປ. ໃຫ້ໄຕ່ຕອງຄຳຖາມເຫລົ່ານີ້, ແລະ ຊອກຫາຄຳຕອບ ຂະນະທີ່ທ່ານສຶກສາພຣະຄຳພີຕໍ່ໄປ. ຫລັງຈາກການສຶກສາຂອງທ່ານ, ໃຫ້ທູນຖາມວ່າພຣະເຈົ້າປະສົງໃຫ້ທ່ານຮຽນຮູ້ຫຍັງຕື່ມອີກ, ແລະ ໃຫ້ລໍຖ້າຮັບຄຳຕອບລະຫວ່າງຊົ່ວໂມງຕໍ່ໄປ ແລະ ມື້ຕໍ່ໄປ.
ໃຊ້ແຫລ່ງຊ່ວຍເຫລືອການສຶກສາພຣະຄຳພີ
ເພື່ອຈະໄດ້ຄວາມຮູ້ເພີ່ມເຕີມຈາກຂໍ້ທີ່ທ່ານອ່ານ, ໃຫ້ໃຊ້ໝາຍເຫດຢູ່ທາງລຸ່ມໜ້າປຶ້ມ, Topical Guide, Bible Dictionary, ຄູ່ມືພຣະຄຳພີ (scriptures.ChurchofJesusChrist.org), ແລະ ແຫລ່ງຊ່ວຍເຫລືອການສຶກສາຢ່າງອື່ນໆ.
ໃຫ້ພິຈາລະນາສະພາບການຂອງພຣະຄຳພີ
ທ່ານສາມາດພົບເຫັນຄວາມຮູ້ທີ່ມີຄວາມໝາຍ ກ່ຽວກັບຂໍ້ພຣະຄຳພີ ຖ້າຫາກທ່ານພິຈາລະນາສະພາບການ—ສະຖານະການ ຫລື ສະຖານທີ່ຂອງຂໍ້ພຣະຄຳພີ. ຍົກຕົວຢ່າງ, ການຮູ້ຈັກເບື້ອງຫລັງ ແລະ ຄວາມເຊື່ອຖືຂອງຜູ້ຄົນ ທີ່ສາດສະດາໄດ້ກ່າວກັບ ສາມາດຊ່ວຍທ່ານໃຫ້ເຂົ້າໃຈເຈດຕະນາຂອງຂ່າວສານຂອງເພິ່ນໄດ້.
ບັນທຶກຄວາມຄິດ ແລະ ຄວາມຮູ້ສຶກຂອງທ່ານ
ມັນມີຫລາຍວິທີທາງທີ່ຈະບັນທຶກຄວາມປະທັບໃຈ ທີ່ມາສູ່ທ່ານ ຂະນະທີ່ທ່ານສຶກສາ. ຍົກຕົວຢ່າງ, ທ່ານສາມາດໝາຍຂໍ້ຄວາມ ຫລື ວະລີທີ່ມີຄວາມໝາຍ ແລະ ບັນທຶກຄວາມຄິດຂອງທ່ານໄວ້ ເປັນຄຳໝາຍເຫດຢູ່ໃນພຣະຄຳພີຂອງທ່ານ. ທ່ານກໍສາມາດບັນທຶກຄວາມຮູ້, ຄວາມຮູ້ສຶກ, ແລະ ຄວາມປະທັບໃຈ ທີ່ທ່ານໄດ້ຮັບ ໄວ້ໃນປຶ້ມບັນທຶກສ່ວນຕົວນຳອີກ. ຫລື ທ່ານສາມາດບັນທຶກຄຳຖາມທີ່ທ່ານໄດ້ທູນຖາມ ກ່ອນເລີ່ມຕົ້ນການສຶກສາຂອງທ່ານ, ຕິດຕາມດ້ວຍຄຳຕອບທີ່ທ່ານຖືກນຳພາໄປຫາ.
ສຶກສາຖ້ອຍຄຳຂອງບັນດາສາດສະດາ ແລະ ອັກຄະສາວົກຂອງຍຸກສຸດທ້າຍ
ອ່ານສິ່ງທີ່ບັນດາສາດສະດາ ແລະ ອັກຄະສາວົກຂອງຍຸກສຸດທ້າຍ ໄດ້ສິດສອນກ່ຽວກັບຫລັກທຳທີ່ທ່ານພົບເຫັນຢູ່ໃນພຣະຄຳພີ. ຂ່າວສານຂອງພວກເພິ່ນມີຢູ່ໃນ “ກອງປະຊຸມໃຫຍ່ສາມັນ,” “ວາລະສານ,” ແລະ ໃນບ່ອນເກັບຂໍ້ມູນອື່ນໆ ໃນຫ້ອງສະໝຸດພຣະກິດຕິຄຸນ.
ອ່ານເລື່ອງລາວ
ໃຫ້ອ່ານເລື່ອງລາວໃນພຣະຄຳພີ, ສະແຫວງຫາທີ່ຈະເຂົ້າໃຈເນື້ອຫາຂອງມັນ (ເວລາ, ສະຖານທີ່, ຜູ້ກ່າວ, ແລະ ຜູ້ຟັງ). ຮູບພາບປະກອບເລື່ອງລາວກໍເປັນແຫລ່ງທີ່ດີເລີດສຳລັບສິ່ງນີ້, ໂດຍສະເພາະສຳລັບເດັກນ້ອຍ ແລະ ສະມາຊິກທີ່ບໍ່ຄຸ້ນເຄີຍກັບພຣະຄຳພີ.
ແບ່ງປັນຄວາມຮູ້
ການສົນທະນາຄວາມຮູ້ຈາກການສຶກສາສ່ວນຕົວຂອງທ່ານ ເປັນວິທີທີ່ດີ ໃນການສິດສອນຄົນອື່ນ ແລະ ຈະຊ່ວຍໃຫ້ທ່ານເຂົ້າໃຈສິ່ງທີ່ທ່ານໄດ້ອ່ານນຳອີກ.
ດຳລົງຊີວິດຕາມສິ່ງທີ່ທ່ານຮຽນຮູ້
ການສຶກສາພຣະຄຳພີສາມາດດົນໃຈເຮົາ ແລະ ນຳພາເຮົາໃຫ້ປ່ຽນວິທີທີ່ເຮົາດຳລົງຊີວິດນຳອີກ. ໃຫ້ເຊື່ອຟັງຕາມສິ່ງທີ່ພຣະວິນຍານກະຕຸ້ນທ່ານໃຫ້ເຮັດ ຂະນະທີ່ທ່ານອ່ານ, ແລະ ແລ້ວໃຫ້ຕັ້ງໃຈເຮັດຕາມການກະຕຸ້ນເຫລົ່ານັ້ນ.