“ເປັນຫຍັງຈຶ່ງຕ້ອງສຶກສາພຣະຄຳພີ?” ແນວຄິດການສຶກສາພຣະຄຳພີ (2021)
“ເປັນຫຍັງຈຶ່ງຕ້ອງສຶກສາພຣະຄຳພີ?” ແນວຄິດການສຶກສາພຣະຄຳພີ
ເປັນຫຍັງຈຶ່ງຕ້ອງສຶກສາພຣະຄຳພີ?
ເມື່ອເຮົາສຶກສາພຣະຄຳພີຢ່າງພາກພຽນ, ເຮົາສາມາດເຂົ້າໃກ້ຊິດກັບພຣະເຢຊູຄຣິດຫລາຍຂຶ້ນ ແລະ ເຂົ້າໃຈພຣະກິດຕິຄຸນ ແລະ ການເສຍສະລະຊົດໃຊ້ຂອງພຣະອົງດີກວ່າເກົ່າ. ສາດສະດານີໄຟໄດ້ຊຸກຍູ້ເຮົາໃນທາງນີ້:
“ດັ່ງນັ້ນ, ພວກທ່ານຕ້ອງມຸ້ງໜ້າດ້ວຍຄວາມໝັ້ນຄົງໃນພຣະຄຣິດ, ໂດຍມີຄວາມສະຫວ່າງຢ່າງບໍລິບູນຂອງຄວາມຫວັງ, ແລະ ຄວາມຮັກຂອງພຣະເຈົ້າ ແລະ ຂອງມະນຸດທັງປວງ. ດັ່ງນັ້ນ, ຖ້າຫາກພວກທ່ານຈະມຸ້ງໜ້າ, ຊື່ນຊົມດ້ວຍພຣະຄຳຂອງພຣະຄຣິດ, ແລະ ອົດທົນຈົນເຖິງທີ່ສຸດແລ້ວ, ຈົ່ງເບິ່ງ, ພຣະບິດາໄດ້ກ່າວໄວ້ດັ່ງນີ້: ເຈົ້າຈະມີຊີວິດນິລັນດອນ” (2 ນີໄຟ 31:20).
ຄຳສອນຈາກພຣະຄຳພີຈະຊ່ວຍເຮົາໃຫ້ກັບຄືນຫາພຣະບິດາເທິງສະຫວັນຂອງເຮົາ. ສາດສະດາໃນຍຸກສຸດທ້າຍຂອງເຮົາໄດ້ຂໍຮ້ອງເຮົາໃຫ້ສຶກສາມັນເປັນສ່ວນຕົວ ແລະ, ເມື່ອເປັນໄປໄດ້, ເປັນຄອບຄົວເປັນປະຈຳ. ພວກເພິ່ນໄດ້ເຊື້ອເຊີນເຮົາໃຫ້ຮຽນຮູ້ຈາກປະສົບການຂອງຜູ້ຄົນໃນພຣະຄຳພີ ແລະ ນຳໃຊ້ເລື່ອງລາວ ແລະ ຄຳສອນໃນພຣະຄຳພີ ກັບຊີວິດປະຈຳວັນຂອງເຮົາ, ດັ່ງທີ່ນີໄຟແນະນຳໃນ 1 ນີໄຟ 19:23. ສາດສະດາທັງໃນສະໄໝກ່ອນ ແລະ ສະໄໝໃໝ່ ໄດ້ເຊື້ອເຊີນເຮົາໃຫ້ສຶກສາພຣະຄຳພີ ແລະ ໃຫ້ “ຊື່ນຊົມດ້ວຍພຣະຄຳຂອງພຣະຄຣິດ” (2 ນີໄຟ 32:3).
ປະທານຣະໂຊ ເອັມ ແນວສັນ ກໍໄດ້ສິດສອນຄວາມຈິງທີ່ສຳຄັນນີ້ກ່ຽວກັບ “ການຊື່ນຊົມ” ດ້ວຍພຣະຄຳພີ ດັ່ງນີ້:
“ຄຳວ່າຊື່ນຊົມໝາຍເຖິງຫລາຍກວ່າການຊີມ. ຊື່ນຊົມໝາຍເຖິງການກິນຢ່າງແຊບຊ້ອຍ. ເຮົາຮັບສ່ວນພຣະຄຳພີຢ່າງແຊບຊ້ອຍໂດຍການສຶກສາມັນ ໃນຄວາມຮູ້ສຶກຂອງການຄົ້ນຄວ້າດ້ວຍຄວາມເບີກບານໃຈ ແລະ ດ້ວຍການເຊື່ອຟັງທີ່ຊື່ສັດ. ເມື່ອເຮົາຊື່ນຊົມດ້ວຍພຣະຄຳຂອງພຣະຄຣິດ, ມັນຈະ ‘ຂຽນໃສ່ຫົວໃຈ’ [2 ໂກຣິນໂທ 3:3]. ມັນໄດ້ກາຍເປັນພາກສ່ວນທີ່ສຳຄັນຂອງທຳມະຊາດຂອງເຮົາ” (“Living by Scriptural Guidance,” Ensign, Nov. 2000, 17).
ເມື່ອເຮົາມີພາກສ່ວນໃນການສຶກສາພຣະຄຳພີເປັນສ່ວນຕົວ ແລະ ເປັນຄອບຄົວຢ່າງສະໝ່ຳສະເໝີ, ເຮົາ ແລະ ຄອບຄົວຂອງເຮົາຈະສາມາດໄດ້ຮັບການນຳພາ, ປົກປ້ອງ, ເສີມກຳລັງ ຕ້ານກັບການທ້າທາຍຢ່າງຫລວງຫລາຍໃນວັນເວລາຂອງເຮົາ.