E Aera Ti Kamatebwaii Koroboki aika Tabu?

Ngkana ti botumwaaka ni kamatebwaii koroboki aika tabu, ti kaaniiaki nakon Iesu Kristo ao ni mataata raoi n Ana euangkerio ao te mwakuri n anganano. Te burabeti Nibwaai e kaungaira n te kawai aei:

“Ngaia ae kam waaki nako man teimatoa inanon Kristo, ma te kaantaninga ae tamaroa man kororaoi, ma tangiran te Atua ma aomata ni kabane. Ma ngaia ae kam na waaki nako, ni kanuaingkami n ana taeka Kristo, ao n teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina” (2 Nibwaai 31:20).

Reirei man koroboki aika tabu a na buokiira n okira Tamara are i Karawa. Ara burabeti n taai aikai a tia n tuangiira bwa ti na kamatebwaii ni katoa tai ibon iroura ao, ngkana e konaa, ma ara utu. A kaoira bwa ti na reirei man aia taneiai te koraki ake ni koroboki aika a tabu ao ni maiuakin rongorongo ao reirei akanne inanon maiura n te bong aei, n aron are e reirei Nibwaai n 1 Nibwaai 19:23. Burabeti ake ngkoa ao ngkai a kaoira bwa ti na kamatebwai koroboki aika tabu ao ni “kanuaira n ana taeka Kristo” (2 Nibwaai 32:3).

E reirei naba Beretitenti Russell M. Nelson iaon kakaawakin te koaua ni “kanuaiakira” ni koroboki aika a tabu:

“N amwarake e nano riki nakon katoonga. N amwarake e nanonaki nakon nora raoi kangkangina. Ti katongii booki aika tabu man kamatebwaiana inanon karekean te tamnei n ukori ma te kukurei ao te kakaonimaki n ongotaeka. Ngkana ti kanuaira n ana taeka Kristo, a koreaki ‘inanon baaba aika iriko inanomi’ [2 I-Korinto 3:3]. A riki bwa mwakoron kateira aika a kakawaki” (“Living by Scriptural Guidance,” Ensign, Nob. 2000, 17).

Ngkana ti katoatai ni karaoa te kamatebwai ibon iroura ao n ara utu, ngaira ao ara utu ti na kona ni kairaki, ni kamanoaki, ao ni kamatoatoaaki ni kaitarai kakaewenako aika a mwaiti inanon ara bong.