Iango ni Kanakoraoa Am Kamatebwai n Am Utu ni Koroboki Aika Tabu

Kamatebwaian koroboki aika tabu n te utu n tainako bon te kawai ae tamaroa ni buoka am utu n reiakina te euangkerio. Mwaitira ao maanra ae ko warekia ni bootaki ma am utu e aki kakawaki riki nakon ae ko na teimatoa n am kekeiaki. Ngkana ko karika te kamatebwai ni booki aika tabu bwa te bwai ae kakaawaki n am utu, ko na buokiia kaain am utu ni kaaniia Iesu Kristo ao ni karikirakea aia koaua iaon aan Ana taeka.

Iangoi titiraki aikai:

• Ko na kanga ni kaungaia kaain am utu bwa a na kamatebwai booki aika tabu i bon irouia?

• Tera ae ko kona ni karaoia ni kaungaia am utu bwa a na tibwaua te bwai ae a reiakinna?

• Ko na kanga ni katuruturui reirei aika kam reiakin ni koroboki aika a tabu i nanon angaraoina?

Uringnga bwa te mweenga bon te tabo ae tamaroa ibukin reiakinan ao taekinan te euangkerio. Ko kona n reiakina man taekina te euangkerio n te mweenga ni kawai ake a aki kona ni karaoaki inanon te kiraati n te Ekaretia. Bwaina te kakauiango ngkai ko iangoi kawai ake ko na buokiia iai am utu n reirei man booki aika tabu. Tarai iango aikai ni katamaroa am kamatebwai ni booki aika tabu.

Kabongana te Katangitang

Anenei anene aika a na kakorakorai reirei aika a taekinaki n koroboki aika tabu.

Tibwauai Kiibu aika Tamaroa

Anganiia kaain te utu aia tai n tibwauai bota n taeka man kiibu ake a teke nanoia iai n aia kamatebwai.

Kabonganai Oin Am Taeka

Kaoia kaain te utu bwa a na taekinna ni kakimototoa n oin aia taeka te bwai ae a tia n reiakinna man koroboki aika tabu.

Kauaei Kiibu nakon Maium

Imwiin warekan te kibu teuana, tuangiia kaain te utu bwa a na tibwauai kawai ake a na uaana iai kiibu aikai inanon maiuia.

Tabeka te Titiraki

Kaoiia kaain te utu bwa a na tabeka aia titiraki iaon te euangkerio, ao kakaei kiibu ake a na kaeka te titiraki anne.

Kaotii Koroboki aika Tabu

Rinea te kibu ae e teke nanom iai, ao katekea n te tabo are a na kona n nooria kaain te utu. Kaoia kaain te utu bwa a na ikaruoruo n rinea te kibu are a na katekea.

Korean taian Kibu

N te utu, rinei tabeua kiibu ake ko tangiria ni maroroakini n te wiiki ae e na roko.

Kamatenanoi Kiibu

Rinea te kibu are e uaana nakon am utu, ao kaoiia kaain te utu bwa a na kamatenanoa man kaokiokia ni katoabong ke n takakaro n te mwakuri ni kauring.

Tibwauai Reirei man Bwaai ni Kabootau

Kakaei bwaai aika irekereke nakon mwakoro ao kiibu ake ko warekii n te utu. Kaoia kaain te utu bwa ana taekinna bwa a kanga bwaai n tatabeua nako n irekereke ma reirei inanon koroboki aika tabu.

Rinea Atuun te Reirei

Tuangiia kaain te utu bwa ana karekea aia tai n rinei atuun reirei are ana bane ni kamatebwaia kaain te utu. Kabongana te Topical Guide, te Rikitinari n te Baibara, ke te Kairi nakon Koroboki aika Tabu (scriptures.lds.org) ni kakaai kiibu iaon atuun te reirei.

Korea te Tamnei

Wareki tabeua kiibu n te utu, ao imwiina karekea aia tai kaain te utu bwa a na korea te bwai teuana are e irekereke ma te bwai ae ko warekia. Kabanea te tai ni maroroakin aia tamnei temanna imwiin temanna.

Karaoa te Kaotioti n te Karaki

Imwiin warekan te karaki, kaoia kaain te utu bwa ana karaoa kaina. Imwiina, taekinna bwa e kanga te karaki n irekereke ma bwaai aika ko a tia n taneiai ni karaoi n tatabemaniia ao n te utu.

E reirei Unimwaane David A. Bednar: “Te tataro n utu, te waaki ni kamatebwaian koroboki aika tabu n te utu, ao bootaki n te tairiki e kaotiira bwa antai raoi ngaira. Akea te tai teuana ae na tara n rangin ni katekenano ke n ururungaki. Ma n aron taian been n aia kara aika babobo ao ni koora ao ni buraun a kanakoraoia imarenaia ao ni karekea te mwakuri ae moan te anainano, ngaia are teimatoara ni karaoi bwaai aika uarereke a kona ni karekei mwiia n tamnei aika kakawaki” (“More Diligent and Concerned at Home,” Riaona, Nobembwa 2009, 19–20).