Christ institutes the sacrament among the Nephites [Fakahoko ʻe Kalaisi ʻa e sākalamēnití ʻi he lotolotonga ʻo e kau Nīfaí], tā ʻe Andrew Bosley

Ko e Hā ʻOku Ako ai ʻa e Folofolá?

ʻI he taimi ʻoku tau ako faivelenga ai ʻa e folofolá, ʻoku tau ofi ange ai kia Sīsū Kalaisi pea mahino lelei ange ʻEne ongoongoleleí mo e feilaulau fakaleleí. Naʻe poupouʻi kitautolu ʻe he palōfita ko Nīfaí ʻi he foungá ni:

“Ko ia kuo pau ke mou vivili atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa, mo ha ʻofa ki he ʻOtuá mo e kakai fulipē. Ko ia, kapau te mou vilitaki atu, pea keinanga ʻi he folofola ʻa Kalaisí, pea kātaki ki he ngataʻangá, vakai, ʻoku folofola ʻe he Tamaí: Te mou maʻu ʻa e moʻui taʻengatá” (2 Nīfai 31:20).

fāmili ʻoku nau lau folofola

ʻE tokoniʻi kitautolu ʻe he ngaahi akonaki mei he folofolá ke tau toe foki ki heʻetau Tamai Hēvaní. Kuo kole mai ʻe hotau kau palōfita ʻi he ngaahi ʻaho kimui ní ke tau ako maʻu pē kinautolu fakafoʻituitui, pea ʻi he ngaahi feituʻu ʻoku kaunga ki aí, mo fakafāmili. Kuo nau fakaafeʻi kitautolu ke tau ako mei he ngaahi aʻusia ʻa kinautolu ʻi he folofolá pea fakaʻaongaʻi ʻa e ngaahi fakamatala mo e akonaki ʻi he folofolá ki heʻetau moʻuí he ʻahó ni, ʻo hangē ko e akonaki ʻa Nīfai ʻi he 1 Nīfai 19:23. Kuo fakaafeʻi kitautolu ʻe he kau palōfita ʻo e kuongamuʻá mo onopōní fakatouʻosi ke tau ako e folofolá pea “keinanga ʻi he ngaahi folofola ʻa Kalaisí” (2 Nīfai 32:3).

tangata ʻokú ne lau ʻa e folofolá

Naʻe toe akoʻi mai ʻe Palesiteni Lāsolo M. Nalesoni ʻa e moʻoni mahuʻinga ko ʻení fekauʻaki mo e “keinanga” ʻi he folofolá:

“ʻOku mahulu ange ʻa e ʻuhinga e keinangá he ʻahiʻahiʻi pē. ʻOku ʻuhinga ʻa e keinangá ke ifoʻia. ʻOku tau ifoʻia ʻi he folofolá ʻi haʻatau ako ia ʻi he laumālie ʻo e ʻilo ha meʻa mo talangofua faivelenga. ʻI heʻetau keinanga he folofola ʻa Kalaisí, ʻoku tohi tongi ia he kakano ʻo e lotó’ [2 Kolinitō 3:3]. ʻOku hoko leva ia ko e konga mahuʻinga ʻo hotau ʻulungāngá” (“Living by Scriptural Guidance,” Ensign, Nov. 2000, 17).

ʻI he taimi ʻoku tau kau maʻu pē ʻi hono ako fakatāutaha mo fakafāmili e folofolá, ʻe lava ke tataki, maluʻi, mo fakamālohia kitautolu mo hotau fāmilí mei he ngaahi faingataʻa lahi ʻi hotau kuongá.