Nganong Mopadayon Man Ko sa Pagpanlimbasug Kon Lisud Kaayo ang Kinabuhi?

Ang mortal nga kinabuhi usa ka bililhon nga gasa gikan sa Dios—usa ka gasa nga kinahanglang hatagan og bili ug panalipdan (tan-awa sa Doktrina ug mga Pakigsaad 18:10). Gihatagan ka og mortal nga mga kasinatian aron sa pagtabang kanimo nga makat-on ug sa pagtabang kanimo nga mosalig sa imong Langitnong Amahan ug sa Iyang Anak, si Jesukristo.

Si Elder Jeffrey R. Holland miingon: “Bisan unsa pa ang inyong panlimbasug, akong mga kaigsoonan—mental o emosyonal o pisikal o bisan unsa pa—ayaw ibaliwala ang kabililhon sa kinabuhi pinaagi sa pagtapos niini! Salig sa Dios. Hupti ang Iyang gugma. Sayri nga moabut ang adlaw nga ang mga kasakit sa mortalidad mawala” (“Sama sa Usa ka Sudlanan nga Nabuak,” Liahona, Nob. 2013, 42).

Si Elder Orson F. Whitney mitudlo: “Walay kasakit nga atong giantus, walay pagsulay nga atong nasinati ang makawang. Modugang kini sa atong edukasyon, sa pagpalambo niana nga mga kalidad sama sa pasensya, hugot nga pagtuo, kalig-on ug pagkamapainubsanon. Ang tanan natong giantus ug gilahutay, ilabi na kon kini atong giantus nga may pasensya, makapalig-on sa atong mga kinaiya, molimpyo sa atong mga kasingkasing, mopadako sa atong mga kalag, ug mohimo kanatong mas malumo ug mahigugmaon, mas angayan nga pagatawgong mga anak sa Dios … ug kini pinaagi sa kasub-anan ug pag-antus, paghago ug kalisdanan, aron makaangkon sa edukasyon nga maoy usa sa atong gianhi dinhi ug diin kita mahimong mas mahisama sa atong Amahan ug Inahan sa langit” (gikutlo diha sa Mga Pagtulun-an sa mga Presidente sa Simbahan: Spencer W. Kimball [2006], 19).

Kon ang imong kalisdanan bug-at ra kaayo, pangayo og tabang. Ang tanan nagkinahanglan og tabang gikan sa uban, bisan unsa pa sila ka matinud-anon. Bisan si Jesus nagkinahanglan og kahupayan ug kalig-on gikan sa Iyang Amahan. Ang Ginoo makalig-on kanimo o mopadala og uban sa pagtabang ug paghupay kanimo (tan-awa sa Mosiah 18:8; 24:15). Pagkuha og propesyonal nga tabang o pakigsulti sa imong bishop o sa laing tawo nga imong gisaligan. Pagtinguha og panalangin sa pagkapari. Pag-ampo alang sa tabang, ug tuohi nga imo kining madawat. Ang Dios wala makalimot kanimo.

Mga Kapanguhaan sa Simbahan ug sa Komunidad

• “Ang Walay Kinutoban nga Gahum sa Paglaum,” Dieter F. Uchtdorf, Liahona, Nob. 2008, 21–24.

• “Apan Kon Dili,” Lance B. Wickman, Liahona, Nob. 2002, 30–32.

• “Ang Gamhanan nga Tig-ayo,” Carole M. Stephens, Liahona, Nob. 2016, 9–12.