Auala e Tali Atu ai pe a mavae le Pule i le Ola

E ui i a tatou taumafaiga sili, e le o pule i ola uma e mafai ona puipuia. O se mea masani ai mo i latou ua tuua pe a mavae se pule i le ola o le mauaina o ni lagona o le faafitia, faateia, tausalaina, ita, ma le lē mautonu. Na saunoa Peresitene M. Russell Ballard, “O le pule o se tasi i lona ola, e moni lava o se mala lea mea aua ua mafatia ai loto o le tele o tagata i lea amioga: muamua ua mafatia ai le tagata ua oti, faapea ma le tele o isi—o tagata o le aiga ma uo—o e ua tuua, o nisi ua tuua e feagai ma tiga loloto ma le fenumiai i tausaga e tele” (“Pule i le Ola: O Nisi Mea Ua Tatou Iloa, A O Nisi Mea Tatou Te Le Iloa,” Liahona, Mati. 1988, 16). Mo nei tagata taitoatasi, o le faamalologa e sau mai le Faaola, o lē na “afio ifo … i lalo o mea uma” ina ia mafai ona Ia silafia “e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Mataupu Faavae ma Feagaiga 88:6; Alema 7:12). E mafai foi ona aoga punaoa faapolofesa ma fautuaga.

Atonu e mananao aufono a le siteki ma uarota e talanoa i se auala e mafai ai ona latou lagolagoina se tagata po o le aiga pe a mavae se pule i le ola. O fesili e talanoaina e mafai ona aofia ai fesili nei:

• E mafai faapefea e aoaoga ma le Togiola a Iesu Keriso ona aumaia le faamalologa i le tagata po o le aiga?

• O a ni manaoga na matauina e uso ma tuafafine o le auaunaga i le tagata po o le aiga? O le a se auaunaga sa latou tuuina atu?

• O le a se lagolago faifaipea faalelagona pe faaleagaga o le a manaomia e le tagata po o le aiga? O ai e mafai ona tuuina atu lenei lagolagosua?

• O i ai ni manaoga faaletino o le tagata po o le aiga, e pei o femalagaaiga i taavale po o meaai?

• E mafai faapefea ona lagolagoina e taitai o ausilali a le uarota tamaiti ma le autalavou o e na toesea pe ua maliu se tasi e pele ia i latou?

O le faagasologa o le faavauvau pe a mavae se pule i le ola e mafai ona alu ai se taimi umi. Afai e faaauau pea ona lagona e se tasi le tiga po o le faanoanoa, fefautuaai ma isi o e alolofa i le tagata. Mafaufau ma le agaga tatalo po o le a se auala sili ona lelei e ofo atu ai le lagolagosua. Atonu e te manao e fesoasoani i le tagata ia maua se faamanuiaga faaleperisitua po o le fesootai ma punaoa i la outou eria. Atonu e mafai ona fesoasoani vaega lagolago o le faavauvau, foma’i, po o isi tagata tomai faapitoa o le tausiga o le soifua maloloina.

Manatua: Afai o e taitaia se talanoaga, aua e te talanoa e uiga i le auala na pule ai se tagata i lo latou ola. Atonu e ono uunaia faafuasei ai se tasi i le vaega e faataitai le amio o loo famatalaina. Afai e amata ona faasoa atu e se tasi nei faamatalaga i se nofoaga faalevaega, toe fetuunai le talanoaga i se auala agalelei.

Punaoa Faaopoopo

• “Grieving after a Suicide,” Dale G. Renlund, (vitio i le suicide.ChurchofJesusChrist.org).

• “To Parents Who Have Lost a Child by Suicide,” Dale G. Renlund (vitio, suicide.ChurchofJesusChrist.org).

• “Comfort after a Suicide,” Carol F. McConkie (vitio, suicide.ChurchofJesusChrist.org).

• “I Have Lost Someone by Suicide,” suicide.ChurchofJesusChrist.org.

• “O Le Ala e Malolo ai Tagata e Faasaoina Mai [le Pule i le Ola],” Tautua a le AAG mo Aiga, Liahona, Sete. 2017, 69