Auala e Fesoasoani ai i se Tagata o i ai se Faafitauli

Ia manatu mamafa e le aunoa i faailoga lapatai o le pule i le ola ma soo se tulaga taufaamatau o le taumafai e pule i le ola, e tusa lava pe e te manatu e le o manatu mamafa i ai le tagata e uiga i le pule i le ola pe na o le taumafai e saili lou gauai atu. Mulimuli i laasaga nei e tolu e tuuina atu ai le lagolago—Fesili, Tausiga, Ta’u.

Laasaga 1: Fesili. Fesili sao i le tagata pe o latou mafaufau e uiga i le pule i le ola. E mafai ona e fesili atu, “O e mafaufau e uiga i le faamutaina o lou ola?” Afai latou te fai mai o loo latou mafaufau e uiga i le pule i le ola, fesili i ai pe o i ai sa latou fuafuaga. E mafai ona e fesili atu, “Ua i ai sau fuafuaga e faatiga ia te oe lava?” Afai ua i ai sa latou fuafuaga, ia vave fesoasoani e ave i latou i se falemai po o se fale tausi soifua, pe valaau le tautua mo faalavelave faafuasei po o se laina fesoasoani mo faalavelave i la outou eria. (Tagai “Crisis Help Lines” mo sootaga i laina fesoasoani i le salafa o le lalolagi.) Afai e leai sa latou fuafuaga, see atu i le laasaga 2.

Laasaga 2: Gauai Atu. Faaalia lou popole e ala i le faalogologo i mea o loo latou fai mai ai. Tuu atu se taimi ia i latou e faamatala mai ai o latou lagona. Ia faaaloalogia o latou lagona i le fai atu o se tala e pei o le, “Faamalie atu ua e matuā tiga tele” po o le “Ou te lei iloa le faigata o feagai ma oe.” E mafai ona e ofo atu e fesoasoani ia i latou e fatu se fuafuaga saogalemu o le puipuia mai le pule i le ola (tagai “O Le Ala e Fatu ai se Fuafuaga Saogalemu Mai le Pule i le Ola,” Doug Thomas, Liahona, Sete. 2016, 63). O se fuafuaga o le saogalemu e mafai ona fesoasoani i tagata ia iloa o latou lava malosiaga, fegalegaleaiga lelei, ma tomai gafatia faalesoifua maloloina. E mafai foi ona faaitiitia ai lo latou faaaogaina o vaega o le faatamaia o ia lava, e pei o auupega po o fuaalau. Afai latou te fai atu ia te oe e aua nei tauina i se tasi o latou lagona, faamalamalama atu i ai o le a e faaaloalo i lo latou tulaga o le lē faalauaiteleina i le tulaga e mafai ai peitai latou te manaomia se fesoasoani e sili atu nai lo le mea e mafai ona e tuuina atu. Aua lava nei tautino atu o le a tausia faalilolilo ni o latou manatu o le pule i le ola.

Laasaga 3: Ta’u. Uunaia le tagata e ta’u atu i se tasi o le e mafai ona tuuina atu le lagolago sili atu. Faasoa atu se faamatalaga o se tagata e faafesootai mo punaoa fesoasoani i la outou eria. O punaoa e ono aofia ai ni falema’i o le itumalo, fale tausimai mo faalavelave faafuasei, po o laina fesoasoani mo faalavelave e leai se totogi. Afai latou te le sailia se fesoasoani, e tatau ona e ta’uina atu i se tasi mo i latou. Atonu e te manao e fai atu se tala faapea, “Ou te popole mo oe ma ou te manao ia e saogalemu. O le a ou tauina i se tasi e mafai ona ofoina atu ia te oe le fesoasoani e te manaomia.” Ia faaaloalo i lo latou tulaga o le lē faalauaiteleina e ala i le tauina atu i na o le tagata lava e te manatu e mafai ona fesoasoani i ai, e pei o se tagata o le aiga e vavalalata ma ia, epikopo a le tagata, faufautua a le aoga, se foma’i, po o se isi tagata tomai faapitoa i le tausiga faalesoifua maloloina. Afai e te le o mautinoa po o ai e ta’u i ai, talanoa i lou epikopo pe valaau i se laina fesoasoani e leai se totogi mo faalavelave i la outou eria. Manatua, e le o faamoemoe e te lagolagoina pe fesoasoani atu i le tagata na o oe.

Manatua: Afai o e taitaia se talanoaga, mafaufau e talosaga atu i tagata auai e faataitai laasaga nei. Tuu atu ia i latou se tulaga lea e sau ai se tasi ia i latou ma faailoa mai ni manatu o le pule i le ola ma fai atu ia i latou e faataitai mai le auala o le a latou tali atu ai.

Punaoa Faaopoopo

• Mosaea 4:27; Moronae 7:45–47; Mataupu Faavae ma Feagaiga 81:5.

• Laina Fesoasoani mo le Manuia [Welfare Helpline] (mo peresitene o siteki, epikopo, ma peresitene o paranesi).

• “Faaavanoaina o le Taimi e Talanoa ma Faalogo Ai,” Rosemary M. Wixom, Liahona, Ape. 2012, 10–13.

• Puipuia Mai le Pule i le Ola,” Carol F. McConkie, (vitio i le suicide.ChurchofJesusChrist.org).

• “Ua Ou Popole e uiga i Se Tasi,” suicide.ChurchofJesusChrist.org.

• “Pule i le Ola,” Punaoa Faufautua, ChurchofJesusChrist.org (mo tagata o aufono a le siteki ma le uarota).