‘Oku Ou Fuʻu Fie Maʻu Moʻoni Nai ke Tala ki ha Taha ʻOku Ou Fakakaukau ki he Taonakitá?

Ko e ngaahi fakakaukau taonakitá ko ha fakahoʻata mai ia ʻo e palopalema fakaeʻatamai mo fakaeloto, kae ʻikai ko ha vaivai fakaeʻulungaanga. Naʻa mo e kakai angatonú, hangē ko Paula mo e kau palōfita kehe ʻo e kuongamuʻá, ne nau ongoʻi mafasia moʻoni mo e loto mamahi lahi (vakai, Nōmipa 11:14–15; 1 Ngaahi Tuʻi 19:4; Filipai 1:21–24). ʻOku ʻikai fie maʻu ke ke fuesia toko taha pē ʻeni.

ʻOku mau ʻiloʻi ʻoku ʻi ai e mālohi ʻi he fealēleaʻaki mo e niʻihi kehé. ‘I he taimi naʻe fuʻu mafasia ai ʻa Mōsesé, naʻe haʻu kiate ia ʻene tamai ʻi he fono ko Seteloó ʻo fai ange ha faleʻi fakapotopoto, ʻo ne pehē, “He te ke fakaʻaʻau ʻo ʻosi moʻoni koe,… he ʻoku mamafa lahi ʻaupito ʻa e meʻá ni kiate koe; ʻoku ʻikai te ke mafai ia ʻe koe toko taha pē” (‘Ekesōtosi 18:18). Ko e me‘a tatau pē, ʻi he taimi te ke talanoa ai ki ha taha ‘okú ke falala ki ai fekauʻaki mo hoʻo ngaahi fakakaukau taonakitá, te ke maʻu ai ha mālohi, fakafiemālie, mo ha toe ngaahi fakakaukau. Falala ʻe tataki ʻe he Tamai Hēvaní ʻa e tokotaha ʻokú ke fili ke talanoa ki aí.

Te ke ala kamata hoʻomo talanoá ʻaki ʻa e ngaahi meʻá ni:

• ʻOku fēfē hoʻo ongó he taimí ni?

• Ko e hā hono fuoloa hoʻo fakakaukau ki he taonakitá?

• Naʻá ke fuofua fakatokangaʻi fēfē nai ʻa e ngaahi ongo ko ʻení?

• ʻOku hoko mai mo mole nai ʻa e ngaahi ongo ko ʻení, pe ʻoku lahi ange ʻenau ʻi ai maʻu peé?

• ʻOkú ke fakaʻaongaʻi nai ha faitoʻo pe faitoʻo kona tapu pe kava mālohi?

Kapau ʻoku ʻikai ke ke fakapapauʻi ʻa e tokotaha ke ke talanoa ki aí, telefoni ki he laine tokoni (helpline) taʻetotongí ki ha tokoni. ʻAlu ki he Befrienders Worldwide (befrienders.org) ke kumi ha laine tokoni ʻi homou feituʻú.

Ngaahi Maʻuʻanga Tokoni ʻa e Siasí mo e Koló

(Ko e niʻihi ʻo e ngaahi maʻuʻanga tokoni ʻoku hiki atu ʻi laló ʻoku ʻikai ke faʻu, tokangaʻi, pe puleʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku fakataumuʻa ʻa e ngaahi naunau ko ʻení ke hoko ko ha toe ngaahi maʻuʻanga tokoni ʻaonga ʻi hoʻo ako ʻa e tefito ko ʻení. ʻOku ʻikai ke poupouʻi ʻe he Siasí ha faʻahinga meʻa ʻoku ʻikai ke fenāpasi mo hono ngaahi tokāteliné mo e ngaahi akonakí.)

• Mōsaia 18:8.