Gusto Lang Nako nga Matapos ang Akong Kasakit. Nganong Dili Man Ko Mahimong Maayo?

Hinumdumi ang saad sa Manluluwas nga “dinhi sa kalibutan aduna kamoy kagul-anan; apan sumalig kamo, gidaug ko na ang kalibutan” (Juan 16:33). Pagkuha og kahupayan gikan niini nga mga pulong ni Presidente Thomas S. Monson:

“Ang pipila kaninyo tingali dunay mga panahon nga nakahilak diha sa inyong pag-antus, naghunahuna nganong ang atong Langitnong Amahan motugot nga mag-antus mo niana nga mga pagsulay. … Ang atong mortal nga kinabuhi, hinoon, wala himoa nga sayon o kanunay nga makahimuot. … Matag usa kanato makasinati og sakit nga panahon kon mamatyan kita og minahal, kasakit kon mawagtangan kita sa kahimsog, mga pagbati nga biniyaan kon ingon og napasagdan na kita sa atong mga gimahal. Kini ug ubang mga pagsulay naghatag kanato og tinuoray nga pagsulay sa atong abilidad sa paglahutay. …

“Ang Magtutudlo lang ang nasayud sa kagrabehon sa atong mga pagsulay, sa atong kasakit ug pag-antus. Siya lang ang makahatag kanato og mahangturong kalinaw panahon sa kalisdanan. Siya lang ang makatandog sa atong gisakit nga mga kalag pinaagi sa Iyang makahupay nga mga pulong: ‘Umari kanako, kamong tanan nga nabudlay ug nabug-atan, ug papahulayon ko kamo. Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing, ug makakaplag kamog pahulay alang sa inyong mga kalag. Kay masayon ang akong yugo, ug magaan ang akong luwan’ [Mateo 11:28–30]” (“Joy in the Journey,” Brigham Young University Women’s Conference, Mayo 2, 2008).

Dangup sa Dios sa panahon sa imong panginahanglan. Tinguhaa ang makaayo nga mga panalangin sa Manluluwas, maghinumdom nga “usahay ang ‘pag-ayo’ nagtambal sa atong mga sakit o nagtangtang sa atong palas-anon. Apan usahay kita ‘nangaayo’ kay gihatagan kitag kalig-on o pagsabut o pagpailub sa pagpas-an sa mga palas-anon nga gisangon kanato” (Dallin H. Oaks, “Iyang Papahulayon ang Nag-antus,” Liahona, Nob. 2006, 7–8).

Mga Kapanguhaan sa Simbahan ug sa Komunidad

(Ang ubang mga kapanguhaan nga gilista sa ubos wala gihimo, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Kini nga mga materyal gituyo aron magsilbing dugang nga makatabang nga mga kapanguhaan samtang magtuon ka niini nga hilisgutan. Ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

• Juan 16:33.

• 2 Mga Taga-Tesalonica 2:16–17.

• “Ang Walay Kinutoban nga Gahum sa Paglaum,” Dieter F. Uchtdorf, Liahona, Nob. 2008, 21–24.

• “Unsaon sa Paghimo og Suicide-Prevention Safety Plan,” Doug Thomas, Liahona, Sept. 2016, 33.

• “Mental Health [Kahimsog sa Pangisip],” ChurchofJesusChrist.org.