Nabalaka Ko nga Basin Akong Mapasakitan ang Akong Kaugalingon. Unsaon Nako nga Magpabiling Luwas?

Kon anaa ka sa krisis ug nagtuo nga basin imong mapasakitan ang imong kaugalingon, pangayo og tabang diha-diha dayon. Pagtawag og tighatag og serbisyong pang-emerhensya o libreng tawagan nga help line panahon sa krisis diha sa inyong dapit.

Kon wala ka sa dinalian nga krisis, pakigsulti sa usa ka tawo nga imong gisaligan, sama sa usa ka sakop sa pamilya, higala, bishop, o propesyonal sa pag-atiman sa panglawas. Ang pagpaambit sa imong mga hunahuna ngadto sa usa ka tawo makahupay sa daghang kalisud. Ayaw tuguti ang mga pagbati sa kaulaw o kahadlok nga makapakgang kanimo. Ania ang dugang nga mga ideya nga tingali makatabang kanimo:

• Paghimo og plano sa kasiguroan. Ang usa ka suicide prevention safety plan [plano sa kasiguroan alang sa pagpakgang sa paghikog] makatabang kanimo sa pag-ila sa imong personal nga mga kalig-on, positibo nga mga relasyon, ug mga kahanas sa himsog nga paglahutay nga mahimo nimong gamiton panahon sa krisis (tan-awa sa “Unsaon sa Paghimo og Suicide-Prevention Safety Plan,” Doug Thomas, Liahona, Sept. 2016, 33).

• Paghimo og gagmay nga mga tumong. Matag gabii, pagsulat og dili mominos sa usa ka tahas o tumong nga matuman nimo sa sunod nga adlaw. Himoang yano ug makab-ot ra kini nga mga tahas. Ang paghimo og gagmay nga mga tumong ug pagpaningkamot sa pagkab-ut niini makatabang kanimo nga makakaplag og pagbati nga makakontrolar kon ang tanan ingon og dili madumala.

• Salig sa Manluluwas. Hinumdumi nga si Jesukristo anaa alang kanimo (tan-awa sa Alma 7:11–13). Mas hingpit Siya nga nakasabut sa kasakit nga imong nasinati kay sa imong mahunahuna. Ipakita ang imong kaandam sa pagsalig Kaniya pinaagi sa mga buhat nga sama sa pagluhod aron mag-ampo, pagpangayo og panalangin sa pagkapari, ug pakigsulti sa imong bishop.

Mga Kapanguhaan sa Simbahan ug sa Komunidad

(Ang ubang mga kapanguhaan nga gilista sa ubos wala gihimo, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Kini nga mga materyal gituyo aron magsilbing dugang nga makatabang nga mga kapanguhaan samtang magtuon ka niini nga hilisgutan. Ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

• “Mga Awit nga Naawit ug Wala Maawit,” Jeffrey R. Holland, Liahona, Mayo 2017, 49–51.

• “Pagpili nga Mabuhi: Pagbuntog sa mga Hunahuna nga Maghikog,” Liahona, Sept. 2016, 30–32.

• “Help Yourself” National Suicide Prevention Lifeline.

• “Coping and support,” diha sa “Suicide and Suicidal Thoughts,” Mayo Clinic.

• “Safety Plan” (printable template), TherapistAid.com.