Kinahanglan Ba Gyud nga Mosulti Ko sa Usa ka Tawo nga Naghunahuna Ko sa Paghikog?

Ang mga hunahuna sa paghikog naghulagway sa mental ug emosyonal nga kadaut, dili kahuyang sa kinaiya. Bisan ang matarung nga mga tawo, sama ni Pablo ug sa ubang karaang mga propeta, mibati nga nabug-atan ug naguol sa hilabihan (tan-awa sa Numeros 11:14–15; 1 Mga Hari 19:4; Mga Taga-Filipos 1:21–24). Dili kinahanglan nga mosagubang ka niini nga mag-inusara.

Nasayud kita nga adunay gahum sa pagpakitambag sa uban. Sa dihang si Moises hilabihan nga nabug-atan, ang iyang ugangan nga si Jethro miadto kaniya ug mihatag kaniya ug maalamon nga tambag, nag-ingon, “Sa pagkamatuod, abuton ka og kaluya, … kay ang hulosayon mabug-at da kaayo alang kanimo; dili ka arang makahimo sa pagbuhat niini nga ikaw lamang usara” (Exodo 18:18). Sa samang paagi, kon makigsulti ka sa usa ka tawo nga imong gisaligan mahitungod sa imong mga hunahuna sa paghikog, makakaplag ka og kalig-on, kahupayan, ug dugang nga panglantaw. Salig nga ang Langitnong Amahan mogiya sa tawo nga gipili nimong istoryahan.

Mahimo nimong sugdan ang panag-istorya pinaagi sa paghisgot sa mosunod:

• Unsa ang imong gibati karon?

• Unsa na kadugay nga naghunahuna ka sa paghikog?

• Sa unsang paagi ikaw unang nakabantay niini nga mga pagbati?

• Magwala-wala ba kini nga mga pagbati, o mas kanunay kining anaa?

• Aduna ka bay gitomar nga bisan unsang tambal o naggamitan og droga o alcohol?

Kon dili ka sigurado kinsa ang istoryahon, panawag sa libreng helpline alang sa suporta. Bisitaha ang Befrienders Worldwide (befrienders.org) aron makakita og helpline sa inyong dapit.

Mga Kapanguhaan sa Simbahan ug sa Komunidad

(Ang ubang mga kapanguhaan nga gilista sa ubos wala gihimo, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Kini nga mga materyal gituyo aron magsilbing dugang nga makatabang nga mga kapanguhaan samtang magtuon ka niini nga hilisgutan. Ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

• Mosiah 18:8.

• “Pagsabut sa Hikog: Mga Timailhan ug Pagpakgang,” Liahona, Okt. 2016, 19–23.