Mifantoha amin’i Jesoa Kristy: Ampio ny mpianatra hanatona an’i Jesoa Kristy

Ampio ny mpianatra hiezaka an-tsitrapo ny hitovy kokoa amin’i Jesoa Kristy.

Fahaiza-manao

Diniho ireo toetra tahaka ny an’i Kristy ananan’ireo mpianatra ary zarao ny zavatra tsikaritrao mba hitaomana azy ireo hanohy hitovy Aminy.

Mamaritra

Ny fankasitrahana ireo asa na toetra tahaka ny an’i Jesoa Kristy izay ananan’ny hafa sy ny fizarana izany fankasitrahana izany amin’izy ireo dia manasa ny Fanahy Masina hijoro ho vavolombelona ny amin’ny Ray sy ny Zanaka ary mitaona antsika hanohy hiaina tahaka Azy Ireo. Mandritra ny fotoam-pianarana, dia diniho ny mpianatra ary manontania tena hoe: “Inona no toetoetra na toetran’i Jesoa Kristy hitako ao amin’ity olona ity?” Zarao ny zavatra tsikaritrao mba hanampy azy ireo hahafantatra fa hitanao izy ireo miezaka ny ho tonga tahaka an’i Jesoa Kristy kokoa.

Lamina hakan-tahaka

• Rehefa hitan’ny mpampianatra fa nihazona ny varavarana hivoha mba hidiran’ny mpianatra i Julio, dia nanontany tena mangina izy hoe: “Inona no toetoetra na toetran’i Jesoa Kristy hitako ao amin’ity olona ity?” Dia mizara izao manaraka izao izy avy eo: “Julio a! Misaotra anao nihazona ny varavarana hivoha ho an’ireo mpianatra rehetra ireo. Mampahatsiahy ahy ny fomba nitadiavan’ny Mpamonjy fomba hanompoana sy hitahiana ny hafa ianao.”

• Nahazo vaovao momba ny fahafatesan’olona ao amin’ny fianakaviany i Kai, dia nijery an’i Kalani nampionona azy ny mpampianatra. Manontany tena ilay mpampianatra hoe: “Inona no toetoetra na toetran’i Jesoa Kristy hitako ao amin’i Kalani?” Avy eo ilay mpampianatra dia miteny aminy hoe: “Kalani a! Rehefa nahita anao niresaka tamin’i Kai sy nanampy azy aho androany, dia nampahatsiahy ahy ny fomba nanokanan’i Jesoa Kristy fotoana hiarahana tamin’ny hafa tsirairay aho. Misaotra anao nanao ny zavatra izay ho nataony.”

Manazatra tena

1. Misafidiana mpianatra iray ao amin’ny kilasinao dia manontania hoe: “Inona no toetoetra na toetran’i Jesoa Kristy hitako ao amin’io olona io?” Omano ny zavatra holazainao amin’ilay mpianatra dia zarao aminy avy eo ilay toetoetra na toetra tsara ananany.

2. Misafidiana mpianatra iray hafa dia manontania hoe: “Inona no toetoetra na toetran’i Jesoa Kristy hitako ao amin’io olona io?” Omano ny zavatra holazainao amin’ilay mpianatra dia zarao aminy avy eo ilay toetoetra na toetra tsara ananany.

Mifanakalo hevitra na misaintsaina

• Rehefa mandinika ireo toetra tahaka ny an’i Kristy ananan’ny mpianatra sy mizara ny hevitrao amin’izy ireo ianao dia ahoana no hanasan’izany ireo mpianatra hanohy hiezaka an-tsitra-po ny ho tonga tahaka an’i Jesoa Kristy?

Mampiditra fahalalana

• Atombohy amin’ny fisafidianana mpianatra iray na roa isan’andro. Diniho ary zarao amin’izy ireo ny fomba hahitanao azy ireo mihalasa kokoa tahaka an’i Kristy. Tohizo izany mandra-pahatonga izany ho toy ny zavatra mandeha ho azy.

Te hianatra misimisy kokoa ve ianao?

• 2 Nefia 25:26

• Chad H Webb, “Miresaka an’i Kristy isika, mifaly amin’i Kristy isika” (Fampitana ny fivoriam-piofanana fanao isan-taona ho an’ny Seminera sy Institiota Fianarana ny Filazantsara, ny 12 jona 2018), broadcasts.ChurchofJesusChrist.org

Fahaiza-manao

Asao ny mpianatra hitady ireo fomba hanarahana ny ohatra nasehon’i Jesoa Kristy eo amin’ny fiainan’izy ireo manokana.

Mamaritra

Rehefa avy mamantatra ireo asa na toetran’i Jesoa Kristy, ianao dia afaka manampy ny mpianatrao hiezaka hanaraka ny ohatra nasehony eo amin’ny fiainan’izy ireo manokana. Fomba iray ahafahanao manampy ny mpianatrao ny fangatahana azy ireo handinika ireto zavatra telo manaraka ireto:

1. Olona iray azon’izy ireo tahiana amin’ny alalan’ny asa na toetra tahaka ny an’i Kristy.

2. Zavatra azon’izy ireo atao mba hitahiana izany olona izany amin’ny asa na toetra tahaka ny an’i Kristy.

3. Fotoana iray nahafahan’izy ireo nanao izany.

Rehefa mandinika ireo fitaomam-panahy ireo ny mpianatrao, dia afaka manampy azy ireo hiezaka amin-tsitrapo kokoa ny hanaraka ny ohatra nasehon’i Jesoa Kristy sy hampitombo ny faniriany hanao zavatra ny Fanahy Masina.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

Ny mpampianatra dia manasa ny mpianatra hisaintsaina sy hanoratra ny valin-tenin’izy ireo amin’ireto fanontaniana manaraka ireto, rehefa avy mamantatra ilay toetra tahaka ny an’i Kristy momba ny hatsaram-panahy sy mifanakalo hevitra momba izany:

1. Iza no fantatrao fa mila mahatsapa ny hatsaram-panahin’i Jesoa Kristy?

2. Inona no azonao atao mba hanampiana azy ireo hahatsapa ny hatsaram-panahin’ny Mpamonjy?

3. Rahoviana no hanaovanao izany?

Tsindrio eto raha hijery horonan-tsary maneho io lamina hakan-tahaka io.

Manazatra tena

Ho an’ny tsirairay amin’ireto toetra na asa tahaka ny an’i Kristy manaraka ireto, dia manorata fanontaniana iray azonao apetraka amin’ireo mpianatrao izay hanasa azy ireo hanaraka ny ohatra nasehon’ny Mpamonjy:

• Mitia

• Rehefa niteny ny Mpamonjy hoe, “Raiko ô, mamelà ny helony, fa tsy fantany izay ataony” (Lioka 23:34)

• Asa iray na toetran’ny Mpamonjy ao anatin’ny lesona iray manaraka

Mifanakalo hevitra na misaintsaina

• Inona no nianaranao rehefa nampihatra ny fanasana ny mpianatra hitady fomba hanarahana ny ohatra nasehon’i Jesoa Kristy ianao?

• Inona no hitranga amin’ny mpianatrao rehefa manasa azy ireo tsy tapaka ianao mba hamantatra ireo fomba ahafahan’izy ireo manaraka ny ohatra nasehon’ny Mpamonjy?

Mampiditra fahalalana

• Makà fotoana mandritra ny fanomanana ny lesona manaraka mba hamoronana fanontaniana izay mamporisika ireo mpianatra hanaraka ny ohatra nasehon’i Jesoa Kristy isaky ny mamantatra ny iray amin’ireo toetrany na ny asany ianao.

Te hianatra misimisy kokoa ve ianao?

• Gerrit W. Gong, “Fanompoana,” Liahona, mey 2023, 16–19