Mifantoha amin’i Jesoa Kristy: Ampio ny mpianatra hanatona an’i Jesoa Kristy

Ampio ny mpianatra hanamafy orina ny fifandraisan’izy ireo amin’ny Ray any An-danitra sy i Jesoa Kristy.

Fahaiza-manao

Teny nambara izay manampy ny mpianatra hahafantatra sy hahatsapa ny fitiavan’ny Ray any An-danitra sy i Jesoa Kristy.

Mamaritra

Ao amin’ny lesona rehetra dia ahitana fahafahana maro hanampy ny mpianatra hanamafy orina ny fifandraisan’izy ireo amin’ny Ray any An-danitra sy i Jesoa Kristy. Ny sasany amin’ireo fahafahana tsara indrindra dia tonga ho azy rehefa avy mizara ny heviny na ny fahatsapany ny mpianatra. Amin’izay fotoana izay dia afaka mamorona teny ambara izay mifantoka amin’ny fitiavana sy ireo toetran’ny Ray any An-danitra sy i Jesoa Kristy ny mpampianatra.

Ireo karazana teny ambara ireo dia hanampy ny mpianatra hamantatra ny zavatra tsapan’ny Ray any An-danitra sy i Jesoa Kristy momba azy ireo, na ny zavatra tsapan’izy ireo momba ny Ray any An-danitra sy i Jesoa Kristy, na izy roa. Azonao atao ao amin’ilay teny nambara ny manasongadina, mijoro ho vavolombelona, na mampifandray ny zavatra vao avy nozarain’ny mpianatra amin’ny toetra na fahamarinana iray momba ny fitiavan’ Andriamanitra sy ny toetrany ary ny zavatra tsapany ho an’ireo zanany. Ireo teny nambara ireo dia mamorona fahafahana fanampiny ho an’ny Fanahy Masina mba hijoro ho vavolombelona amin’ny mpianatra momba ny lanjan’izy ireo manokana amin’ny Rain’izy ireo any An-danitra sy ilay Zanany.

Ireo lamina hakan-tahaka

• Nozarain’i Maggie fa nahazo ny valin’ny vavaka nataony izy. Dia mamaly amin’ny alalan’ity teny ambara ity ny mpampianatra hoe: “Izany zavatra niainana izany dia porofo fa mahafantatra ny Ray any An-danitra hoe iza ianao.”

• Mitantara i Jade fa nahatsapa ny Fanahy niteny azy mafy izy nandritra ny fihaonambe noho izy tsy dia mamaky firy ny soratra masina. Dia izao avy eo no valiny omen’ny mpampianatra: “Misaotra anao nampahatsiahy anay rehetra fa te hirotsaka an-tsehatra eo amin’ny fiainantsika Izy.”

• Mizara hevitra azony teo am-pamakiana ny soratra masiny i Hae Soo. Mamaly ny mpampianatra hoe: “Nampianatra anay ny hevitra azonao fa tena tsara fanahy sy malemy fanahy Andriamanitra.”

• Milaza ny fahasorenany noho ny tsy fananany fotoana ampy hamakiana ny soratra masiny i Brigham. Dia mamaly avy eo ny mpampianatra hoe: “Afaka milaza izahay hoe lehibe tokoa ny fitiavanao Azy amin’ny alalan’ny fanirianao hanara-dia Azy.”

• Mizara ny zavatra tsapany i Adaline taorian’ny namakiany ny Fotopampianarana sy Fanekempihavanana 18:10. Dia miteny avy eo ny mpampianatra hoe: “Fantatro ihany koa fa sarobidy ho Azy ny fanahinao.”

Manazatra tena

Mamoròna teny ambara izay afaka manampy ny mpianatra tsirairay hahatsapa ny fitiavan’ny Ray any An-danitra sy i Jesoa Kristy.

• Mizara i Brooklyn fa isan’ny andalana tiany indrindra ao amin’ny “Velona ilay Mpanavotra ahy” ny hoe “Velona Izy hampionona ahy.”

• Mitantara i Thomas fa talohan’ny nisarahan’ny ray aman-dreniny dia nisy ady foana tao an-tokantranon’izy ireo. Ny fotoana nivavahany no hany fotoana nahatsapany fiadanana sy fampiononana.

• Rehefa avy namaky momba ny fampisarahana ny Ranomasina Mena i Priscilla dia niteny hoe: “Mieritreritra fotsiny aho hoe tena mahatalanjona tokoa ny nanaovan’ Andriamanitra izany ho an’i Mosesy sy ny Zanak’ Isiraely.”

Mifanakalo hevitra na misaintsaina

• Fa nahoana no manan-danja ny famoronana teny ambara izay manampy ny mpianatra hahatsapa ny fitiavan’ny Ray Any an-danitra sy i Jesoa Kristy?

• Nahoana isika no tian’ny Ray any An-danitra hilaza ireo karazana teny ambara ireo ao anatin’ny fianarana?

Mampiditra fahalalana

• Makà 5 minitra aorian’ny fotoam-pianarana tsirairay izay ampianarinao amin’ny herinandro ho avy dia manorata teny ambara izay azonao nolazaina miainga avy amin’ny zavatra nozarain’ny mpianatra. Ho an’ny herinandro manaraka dia miezaha mamorona teny ambara mitovy amin’izany mandritra ny lesona.

Te hianatra misimisy kokoa ve ianao?

• “Mifantoha amin’i Jesoa Kristy,” Mampianatra araka ny fomban’ny Mpamonjy (2022), 5–9

• Chad H. Webb, “Ambonin’ny zava-drehetra” (Fampitana fivoriam-piofanana fanao isan-taona an’ny Seminera sy Institiotra fianarana ny Filazantsara, 12 jona 2019), broadcasts.ChurchofJesusChrist.org.

Fahaiza-manao

Mametraha fanontaniana izay manampy ireo mpianatra hahita ohatra amin’ny fitiavan’ny Ray any An-danitra ao amin’ilay andinin-tsoratra masina.

Mamaritra

Tamin’ny fihaonamben’ny Fiangonana maneran-tany tamin’ny ôktôbra 2021 dia nilaza ny Loholona D. Todd Christofferson hoe: “Tia antsika amin’ny fitiavana lalina sy tanteraka ny Raintsika any An-danitra. … Fitiavana madion’ny Ray ny Azy, mananika izao rehetra izao izany, kanefa koa ho an’ny tsirairay manokana.” (“Ny fitiavan’ Andriamanitra,” Liahona, nôv. 2021, 16). Fomba iray hanampiana ireo mpianatra hamantatra sy hahatsapa ny fitiavan’ny Ray any An-danitra ny fanasana azy ireo hitady ohatra amin’izany ao amin’ireo andinin-tsoratra masina nohalalinina. Afaka manao izany ianao amin’ny alalan’ny fametrahana fanontaniana toy ireto manaraka ireto mialoha na aorian’ny famakiana andinin-tsoratra masina iray ao an-dakilasy.

• Inona no ohatra amin’ny fitiavan’ Andriamanitra hitanao ao amin’ireo andinin-tsoratra masina ireo?

• Tamin’ny fomba ahoana no nitahiana [io olona io] tamin’ny alalan’ny fitiavan’ny Ray any An-danitra?

• Inona no ampianarin’io tantara na trangan-javatra io anao mikasika ny fitiavan’ny Ray any An-danitra ny zanany?

Ny fangatahana ny mpianatra hamantatra ohatra momba ny fitiavan’ny Ray any An-danitra amin’izany fomba izany dia afaka manampy azy ireo hamantatra kokoa ny fitiavany eo amin’ny fiainan’izy ireo, hahatsapa lalina kokoa ny fitiavany azy ireo manokana sy tonga lafatra ho azy ireo, ary hampitombo ny fahatokian-tenan’izy ireo amin’ny fitodihany Aminy ao anatin’ny fotoanan’ny fitsapana.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

• Rehefa avy nifanakalo hevitra momba ny Fotopampianarana sy Fanekempihavanana 19:16–19, izay hamariparitan’ny Mpamonjy ny fijaliany rehefa nanatanteraka ny Sorompanavotana Izy, dia nanontany ny mpianany Rahavavy Abara hoe: “Noho ny fahafantaranao fa navelan’ny Ray any An-danitra hijaly ho antsika ny Zanany, dia inona no ianaranao momba ny fitiavany ny zanany rehetra?”

Tsindrio eto raha hijery horonan-tsary maneho io lamina hakan-tahaka io.

Manazatra tena

Ho an’ny tsirairay amin’ireto manaraka ireto dia manorata fanontaniana iray azonao apetraka amin’ny mpianatrao izay hanampy azy ireo hamantatra ohatra momba ny fitiavan’ny Ray any An-danitra ao amin’io andinin-tsoratra masina io:

• Eksodosy 20:3–17 (Ny Didy Folo)

• Andinin-tsoratra masina iray ao amin’ny lesonao manaraka na ampahany hafa amin’ny lesonao manaraka

Mifanakalo hevitra na misaintsaina

• Inona araka ny eritreritrao no ho tsapan’ny mpianatrao na ho takatr’izy ireo rehefa avy mametraka amin’izy ireo ireo fanontaniana nosoratanao ianao?

Mampiditra fahalalana

• Ho an’ny lesona tsirairay izay omaninao amin’ny herinandro ho avy dia mitadiava toerana iray izay ahafahanao mametraka fanontaniana amin’ny mpianatra izay hanampy azy ireo hahita ohatra amin’ny fitiavan’ny Ray any An-danitra. Manorata fanontaniana iray izay hanampy azy ireo hanao izany.

• Inona amin’ireo lesona ho avy no eritreretinao fa hanome fahafahana tsara indrindra hanampiana ny mpianatrao hahita ohatra amin’ny fitiavan’ny Ray any An-danitra?

Te hianatra misimisy kokoa ve ianao?

• D. Todd Christofferson, “Ny fitiavan’ Andriamanitra,” Liahona, nôv. 2021, 16–18.

• “Ampio ny mpianatra hanamafy orina ny fifandraisan’izy ireo amin’ny Ray any An-danitra sy i Jesoa Kristy,” ao amin’ny “Ampio ny mpianatra hanatona an’i Jesoa Kristy,” Mampianatra araka ny fomban’ny Mpamonjy (2022), Médiathèque de l’Évangile