« សង្កត់ធ្ងន់លើគំរូរបស់ព្រះយេស៊ូវគ្រីស្ទ » ជំនាញអភិវឌ្ឍន៍គ្រូបង្រៀន ( ឆ្នាំ២០២២ )

« សង្កត់ធ្ងន់លើគំរូរបស់ព្រះយេស៊ូវគ្រីស្ទ » ជំនាញអភិវឌ្ឍន៍គ្រូបង្រៀន ៖ ផ្តោតលើព្រះយេស៊ូវគ្រីស្ទ

ផ្តោតលើព្រះយេស៊ូវគ្រីស្ទ ៖ បង្រៀនអំពីព្រះយេស៊ូវគ្រីស្ទមិនថាអ្នកកំពុងបង្រៀនអ្វីនោះទេ

សង្កត់ធ្ងន់លើគំរូរបស់ព្រះយេស៊ូវគ្រីស្ទ ។

ជំនាញ

ជួយសិស្សឲ្យភ្ជាប់អ្វីដែលពួកគេកំពុងរៀនសូត្រទៅនឹងរបៀបដែលព្រះគ្រីស្ទធ្វើជាគំរូអំពីគោលការណ៍នោះ ។

កំណត់និយមន័យ

ការជួយសិស្សឲ្យដាក់ព្រះយេស៊ូវគ្រីស្ទជាចំណុចសំខាន់នៃការរៀនសូត្ររបស់ពួកគេ នឹងជួយពួកគេឲ្យមានបទពិសោធន៍រៀនសូត្រកាន់តែផ្ទាល់ខ្លួន និងពោរពេញដោយអានុភាព ។ របៀបមួយដែលយើងអាចធ្វើកិច្ចការនេះបាន គឺតាមរយៈការជួយសិស្សឲ្យភ្ជាប់អ្វីដែលពួកគេកំពុងរៀនសូត្រ ទៅនឹងព្រះជន្ម និងគំរូរបស់ព្រះយេស៊ូវគ្រីស្ទ ។ អ្នកអាចធ្វើកិច្ចការនេះបាន តាមរយៈការប្រើប្រាស់សំណួរភ្ជាប់នៅក្នុងមេរៀនទាំងមូល ។ សំណួរទាំងនេះជួយសិស្សឲ្យភ្ជាប់ព្រះជន្ម និងគំរូរបស់ព្រះយេស៊ូវគ្រីស្ទទៅនឹង

សេចក្តីលម្អិតនៃដំណើររឿងមួយក្នុងព្រះគម្ពីរ
គោលការណ៍ទាំងឡាយនៅក្នុងព្រះគម្ពីរ និង
បទពិសោធន៍នៅក្នុងជីវិតផ្ទាល់ខ្លួនរបស់ពួកគេ ។

គំរូ និងការអនុវត្តខាងក្រោមនេះគឺជាឧទាហរណ៍ទូទៅ ។ ការបំពាក់បំប៉ននឹងកាន់តែមានប្រសិទ្ធភាព ប្រសិនបើគំរូ និងឱកាសអនុវត្តត្រូវបានផ្សារភ្ជាប់ទៅនឹងមេរៀនបន្ទាប់ ដែលនឹងត្រូវបានបង្រៀននៅក្នុងកម្មវិធីសិក្សា ។

គំរូ

នេះជាឧទាហរណ៍មួយចំនួនអំពីរបៀបដែលអ្នកអាចជួយសិស្សឲ្យភ្ជាប់ទៅនឹងព្រះជន្ម និងគំរូរបស់ព្រះយេស៊ូវគ្រីស្ទ ។

បន្ទាប់ពីអានដំណើររឿងមួយមកពីព្រះគម្ពីរ និងពិភាក្សាសេចក្តីលម្អិតហើយ នោះអ្នកអាចសួរថា « តើមានអ្វីខ្លះនៅក្នុងដំណើររឿងនេះ ដែលរំឭកអ្នកអំពីព្រះជន្ម និងគំរូរបស់ព្រះយេស៊ូវគ្រីស្ទ ? »
បន្ទាប់ពីរកឃើញគោលការណ៍មួយ អ្នកអាចសួរថា « តើនៅត្រង់ណាក្នុងព្រះគម្ពីរដែលព្រះយេស៊ូវបានធ្វើជាគំរូអំពីគោលការណ៍នេះ ? »
បន្ទាប់ពីវិភាគគោលការណ៍មួយរួច អ្នកអាចសួរថា « តើអ្នកបានឃើញព្រះយេស៊ូវធ្វើជាគំរូអំពីគោលការណ៍នេះនៅក្នុងជីវិតរបស់អ្នក ឬជំនួសឲ្យអ្នកនៅពេលណាដែរ ? »
នៅពេលពិភាក្សាអំពីការអនុវត្តគោលការណ៍មួយរួច អ្នកអាចសួរថា « តើគំរូអ្វីខ្លះមកពីព្រះយេស៊ូវ ដែលជួយអ្នកឲ្យរស់នៅតាមគោលការណ៍នេះកាន់តែពេញលេញ ? »
អ្នកក៏អាចសួរផងដែរថា « តើការស់នៅតាមគោលការណ៍នេះជួយអ្នកឲ្យធ្វើតាមគំរូរបស់ព្រះយេស៊ូវគ្រីស្ទ ហើយកាន់តែប្រែក្លាយដូចជាទ្រង់ដោយរបៀបណា ? »

សូមចុចនៅត្រង់នេះដើម្បីមើលវីដេអូអំពីគំរូនេះ ។

3:40

អនុវត្ត

សូមប្រើការអនុវត្តមួយ ឬច្រើននៃការអនុវត្តខាងក្រោមនេះ ដើម្បីកែលម្អសមត្ថភាពរបស់អ្នកក្នុងការជួយសិស្សភ្ជាប់ទៅនឹងព្រះជន្ម និងគំរូរបស់ព្រះយេស៊ូវគ្រីស្ទ ៖

សូមពិចារណាអំពីគោលការណ៍នេះ ៖ « ប្រសិនបើយើងគោរពប្រតិបត្តិ ទោះបីមានការសាកល្បងក្តី នោះព្រះនឹងជួយយើង » ។ នៅក្នុងការរៀបចំរបស់អ្នក សូមហាត់ភ្ជាប់គោលការណ៍នេះទៅនឹងគំរូមួយ ឬពីរអំពីព្រះជន្មរបស់ព្រះយេស៊ូវនៅក្នុងបទគម្ពីរ ។
សូមមើលផែនការមេរៀនបន្ទាប់ ។ សូមជ្រើសរើសគោលការណ៍មួយដែលអ្នកនឹងដាក់ផែនការជួយសិស្សឲ្យស្វែងរក ។ សូមរៀនសរសេរសំណួរសាមញ្ញពីរបី ដើម្បីជួយសិស្សឲ្យភ្ជាប់គោលការណ៍នោះទៅនឹងគំរូរបស់ព្រះយេស៊ូវគ្រីស្ទ ។
សូមស្វែងរកកន្លែងមួយនៅក្នុងផែនការមេរៀនបន្ទាប់ ជាកន្លែងដែលអ្នកនឹងផ្តោតលើការអនុវត្ត ។ សូមហាត់រៀនសរសេរការអញ្ជើញពីរបី ដែលជួយសិស្សពិចារណាអំពីរបៀបដែលគំរូរបស់ព្រះយេស៊ូវគ្រីស្ទអាចជួយពួកគេឲ្យអនុវត្តគោលការណ៍មួយ ។

ពិភាក្សា ឬជញ្ជឹងគិត

សូមពិចារណាអំពីអ្វីដែលអ្នកបានរៀនចេញមកពីបទពិសោធន៍នេះ ។ ប្រហែលអ្នកអាចកត់ត្រាគំនិតមួយចំនួននៅក្នុងសៀវភៅកំណត់ហេតុការសិក្សាបាន ។ សូមពិចារណាសំណួរខាងក្រោម ៖

តើខ្ញុំបានធ្វើអ្វីខ្លះកាលពីមុន ដើម្បីភ្ជាប់អ្វីដែលសិស្សកំពុងរៀននៅក្នុងព្រះគម្ពីរទៅនឹងព្រះជន្ម និងគំរូរបស់ព្រះយេស៊ូវគ្រីស្ទ ?
តើខ្ញុំបានរៀនអ្វីខ្លះមកពីបទពិសោធន៍នេះ ដែលអាចកែលម្អសមត្ថភាពរបស់ខ្ញុំ ដើម្បីជួយសិស្សឲ្យភ្ជាប់ទំនាក់ទំនងទាំងនេះទៅនឹងព្រះយេស៊ូវគ្រីស្ទ ?
តើខ្ញុំនឹងធ្វើអ្វីខ្លះដើម្បីបន្តកែលម្អ ?

រួមបញ្ចូល

សូមរួមបញ្ចូលអ្វីដែលអ្នកបានអនុវត្ត ដើម្បីជួយសិស្សឲ្យភ្ជាប់អ្វីដែលពួកគេកំពុងរៀនសូត្រទៅនឹងព្រះយេស៊ូវគ្រីស្ទ និងសង្កត់ធ្ងន់លើគំរូរបស់ទ្រង់ ។ នៅអំឡុងពេលសប្តាហ៍បន្ទាប់ សូមជ្រើសរើសគោលការណ៍មួយនៅក្នុងមេរៀននីមួយៗដែលអ្នកនឹងប្រើ ដើម្បីជួយសិស្សឲ្យភ្ជាប់អ្វីដែលពួកគេកំពុងរៀនសូត្រទៅនឹងព្រះយេស៊ូវគ្រីស្ទ និងគំរូរបស់ទ្រង់ ។

តើចង់បានបន្ថែមទៀតទេ ?

នែល អិល អាន់ឌើរសិន « We Talk of Christ » Ensign ឬ Liahona ខែវិច្ឆិកា ឆ្នាំ២០២០ ទំព័រ ៨៨–៩១
វគ្គ ៣.១ « Unit 3: Teach the One » Inservice Leaders’ Resources

ជំនាញ

សូមប្រើរូបភាព និងវីដេអូរបស់ព្រះយេស៊ូវគ្រីស្ទដើម្បីបង្ហាញអំពីគោលការណ៍ដំណឹងល្អមួយ ។

កំណត់និយមន័យ

វិធីមួយដើម្បីបញ្ជាក់អំពីគំរូរបស់ព្រះយេស៊ូវគ្រីស្ទ គឺតាមរយៈប្រព័ន្ធផ្សព្វផ្សាយ ។ ឧទាហរណ៍ បន្ទាប់ពីបានរកឃើញគោលការណ៍នៃដំណឹងល្អ គ្រូបង្រៀនអាចអញ្ជើញសិស្សឲ្យងាកទៅរកកម្រង វីដេអូ និងរូបភាព នៅក្នុងបណ្ណាល័យដំណឹងល្អ ហើយស្វែងរកវីដេអូ ឬរូបភាពដែលបង្ហាញពីរបៀបដែលព្រះយេស៊ូវគ្រីស្ទគឺជាគំរូនៃគោលការណ៍នោះ ។ ការអញ្ជើញនេះរួមបញ្ចូលទាំងកន្លែងដែលត្រូវមើល ( បណ្ណាល័យដំណឹងល្អ នៅក្នុងថ្នាក់រៀន និង Google ជាដើម ) និងអ្វីដែលត្រូវស្វែងរក ( រូបភាព ឬវីដេអូអំពីរបៀបដែលព្រះយេស៊ូវគ្រីស្ទបានធ្វើជាគំរូនៃគោលការណ៍នេះ ) ។ ការអញ្ជើញទាំងនេះអាចជួយសិស្សឲ្យផ្តោតទៅលើព្រះយេស៊ូវគ្រីស្ទ និងផ្ដល់ឱកាសឲ្យព្រះវិញ្ញាណបរិសុទ្ធធ្វើជាទីបន្ទាល់អំពីទ្រង់ ។

គំរូ

ក្នុងអំឡុងមេរៀនដែលទាក់ទងនឹង អេធើរ ១២:២៧ យើងរកឃើញគោលការណ៍នៃការបន្ទាបខ្លួន ។ ស៊ីស្ទើរ ហ្គោមេស ផ្តល់ការអញ្ជើញដូចតទៅនេះ ៖ « នៅក្នុងបណ្ណាល័យដំណឹងល្អ នៅក្រោម វីដេអូ និងរូបភាព តើអ្នកនឹងរកឃើញរូបភាពដែលបង្ហាញអំពីរបៀបដែលព្រះយេស៊ូវគ្រីស្ទបង្ហាញអំពីភាពរាបសាដែរឬទេ ? »
នៅពេលដែលផ្ដោតទៅលើព្រះគុណរបស់ព្រះយេស៊ូវគ្រីស្ទ បងប្រុស សានតូស បានសួរថា ៖ « តើអ្នកនឹងរកឃើញរូបភាពរបស់ព្រះយេស៊ូវគ្រីស្ទនៅលើទូរសព្ទរបស់អ្នក ដែលបង្ហាញពីព្រះគុណរបស់ទ្រង់ ដូចដែលយើងបានពិភាក្សានៅថ្ងៃនេះដែរឬទេ ? »

សូមចុចនៅត្រង់នេះដើម្បីមើលវីដេអូអំពីគំរូនេះ ។

1:2

អនុវត្ត

សូមសរសេរការអញ្ជើញមួយឲ្យសិស្សស្វែងរករូបភាព ឬវីដេអូរបស់ព្រះយេស៊ូវគ្រីស្ទ ដែលជាគំរូនៃគោលការណ៍ខាងក្រោមនេះ ៖

ប្រសិនបើយើងអធិស្ឋានជានិច្ច នោះព្រះវរបិតាសួគ៌នឹងញែកការខិតខំរបស់យើងសម្រាប់សុខុមាលភាពនៃព្រលឹងរបស់យើង ។
ព្រះយេស៊ូវគ្រីស្ទពោរពេញដោយសេចក្ដីមេត្តាករុណាចំពោះខ្ញុំ ។
សូមចំណាយពេលមួយភ្លែតនៅក្នុងមេរៀនបន្ទាប់របស់អ្នក ដែលអ្នកអាចឲ្យសិស្សស្វែងរករូបភាព ឬវីដេអូអំពីរបៀបដែលព្រះយេស៊ូវគ្រីស្ទធ្វើជាគំរូនៃគោលការណ៍នោះ ។

ពិភាក្សា ឬជញ្ជឹងគិត

តើអ្នកកំពុងរៀនអ្វីខ្លះ នៅពេលអ្នកអនុវត្តជំនាញនេះ ?
តើនឹងបានអត្ថប្រយោជន៍អ្វីខ្លះ តាមរយៈការឲ្យសិស្សស្វែងរករូបភាព ឬវីដេអូអំពីព្រះយេស៊ូវគ្រីស្ទដែលធ្វើជាគំរូអំពីគោលការណ៍នេះ ?

រួមបញ្ចូល

តើអ្នកនឹងបន្តរួមបញ្ចូលជំនាញនេះនៅក្នុងផែនការមេរៀននាពេលអនាគតដោយរបៀបណា ?

តើចង់បានបន្ថែមទៀតទេ ?

នីហ្វៃទី១ ១១:៧–៣៣ ( ដើម្បីជួយលោកឲ្យយល់ពីបេសកកម្មរបស់ព្រះអង្គសង្គ្រោះ នោះដំណើរជីវិតរបស់ព្រះអង្គសង្គ្រោះត្រូវបានបើកបង្ហាញទៅកាន់នីហ្វៃ )