Mifatoha amin’i Jesoa Kristy: Mampianara momba an’i Jesoa Kristy na inona na inona ampianarinao

Antitrantero ny ohatra nasehon’i Jesoa Kristy.

Fahaiza-manao

Ampio ny mpianatra hampifandray ny zavatra ianaran’izy ireo amin’ny fomba anehoan’i Kristy ilay fitsipika.

Mamaritra

Ny fanampiana ny mpianatra hametraka an’i Jesoa Kristy ho ivon’ny fianaran’izy ireo dia hanampy azy ireo hanana traikefa amin’ny fianarana mahakasika ny tena manokana sy misy fiantraikany kokoa. Fomba iray ahafahantsika manao izany ny fanampiana ny mpianatra hampifandray ny zavatra ianarany amin’ny fiainana sy ny ohatra nasehon’i Jesoa Kristy. Azonao atao izany amin’ny alalan’ny fampiasana fanontaniana mampifandray mandritra ny lesona iray. Ireo lesona ireo dia manampy ny mpianatra hampifandray ny fiainana sy ny ohatra nasehon’i Jesoa Kristy amin’ny

• antsipirian-javatra amin’ny tantara iray ao amin’ny soratra masina,

• fitsipika ao amin’ny soratra masina, ary

• zavatra iainany eo amin’ny fiainany manokana.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

Ireto misy ohatra vitsivitsy amin’ny fomba ahafahanao manampy ny mpianatra hampifandray ny fiainana sy ny ohatra nasehon’i Jesoa Kristy:

• Rehefa avy mamaky tantara iray ao amin’ny soratra masina sy miresadresaka ny antsipirian-javatra ao anatin’izany dia afaka manontany ianao hoe: “Inona ato amin’ity tantara ity no mampahatsiahy anareo ny fiainana sy ny ohatra nasehon’i Jesoa Kristy?”

• Rehefa avy namantatra fitsipika iray dia afaka manontany ianao hoe: “Aiza ao amin’ny soratra masina no anehoan’i Jesoa io fitsipika io?”

• Rehefa avy namakafaka fitsipika iray dia afaka manontany ianao hoe: “Oviana ianareo no nahita an’i Jesoa naneho io fitsipika io teo amin’ny fiainanareo na ho anareo?”

• Rehefa mifanakalo hevitra momba ny fampiharana fitsipika iray dia afaka manontany ianao hoe: “Inona avy amin’ny ohatra nasehon’i Jesoa no manampy anareo hiaina feno kokoa io fitsipika io?”

• Afaka manontany koa ianao hoe: “Ahoana no hanampian’ny fiainana io fitsipika io anareo hanaraka ny ohatra nasehon’i Jesoa Kristy ary ho lasa tahaka Azy kokoa?”

Tsindrio eto raha hijery horonan-tsary maneho io lamina hakan-tahaka io.

Manazatra tena

Ampiasao ny iray na ny maromaro amin’ireto fanazaran-tena manaraka ireto mba hanatsarana ny fahaizanao manampy ny mpianatra hampifandray ny tenany amin’ny fiainana sy ny ohatra nasehon’i Jesoa Kristy:

• Diniho ilay fitsipika hoe: “Raha mankatò isika, na dia eo aza ny fitsapana, dia hanampy antsika Andriamanitra.” Mandritra ny fanomananao dia manaova fampiharana mampifandray io fitsipika io amin’ny ohatra iray na roa momba ny fiainan’i Jesoa ao amin’ny soratra masina.

• Jereo ny drafitry ny lesona iray vao hatao. Misafidiana fitsipika iray ka manaova drafitra hanampiana ny mpianatra hamantatra izany. Manaova fanazaran-tena manoratra fanontaniana tsotra miisa roa na telo mba hanampiana ny mpianatra hampifandray izany fitsipika izany amin’ny ohatra nasehon’i Jesoa Kristy.

• Mitadiava toerana ao anatina drafitra ho ana lesona iray manaraka izay hifantohanao amin’ny fampiharana. Manaova fanazaran-tena manoratra fanasana roa na telo izay manampy ny mpianatra handinika ny fomba ahafahan’ny ohatra nasehon’i Jesoa Kristy manampy azy ireo hampihatra fitsipika iray.

Mifanakalo hevitra na misaintsaina

Saintsaino ny zavatra nianaranao avy amin’io zavatra niainana io. Azonao atao tsara ny manoratra ny sasany amin’ireo eritreritra ireo ao amina diary fandalinana iray. Eritrereto ireto fanontaniana manaraka ireto:

• Inona no nataoko teo aloha mba hampifandraisana ny zavatra ianaran’ny mpianatra ao amin’ny soratra masina amin’ny fiainana sy ny ohatra nasehon’i Jesoa Kristy?

• Inona no nianarako avy amin’io zavatra niainana io izay afaka manatsara ny fahaizako manampy ny mpianatra hanao ireo fampifandraisana amin’i Jesoa Kristy ireo?

• Inona no hataoko hivoarako hatrany?

Mampiditra fahalalana

• Ampidiro ny zavatra nanaovanao fanazaran-tena mba hanampiana ny mpianatra hampifandray ny zavatra ianarany amin’i Jesoa Kristy ary antitrantero ny ohatra nasehony. Mandritra ny herinandro manaraka dia misafidiana fitsipika iray ao amin’ny lesona tsirairay izay ho ampiasainao hanampiana ireo mpianatra hampifandray ny zavatra ianarany amin’i Jesoa Kristy sy ny ohatra nasehony.

Te hianatra misimisy kokoa ve ianao?

• (Neil L. Andersen, “Miresaka an’i Kristy isika,”Liahona, nôv. 2020, 88–91

Fahaiza-manao

Mampiasà sary sy horonan-tsary momba an’i Jesoa Kristy mba hanehoana fitsipiky ny filazantsara iray.

Mamaritra

Fomba iray anantitranterana ny ohatra nasehon’i Jesoa Kristy ny fampiasana haino vaky jery. Ohatra, rehefa hita ny fitsipiky ny filazantsara iray, dia afaka manasa ny mpianatra hijery ao amin’ny horonan-tsary sy sary ao amin’ny Médiathèque de l’Évangile ny mpampianatra ary mitady horonan-tsary na sary iray izay maneho ny maha ohatra iray amin’izany fitsipika izany an’i Jesoa Kristy. Ny fanasana dia ahitana ny toerana hijerena (Médiathèque de l’Évangile, ao an-dakilasy, Google, sns), ary ny zavatra tokony hotadiavina (sary na horonan-tsary maneho ny fomba nanehoan’i Jesoa Kristy ilay fitsipika). Ireo fanasana ireo dia afaka manampy ny mpianatra hifantoka amin’i Jesoa Kristy sy hanome fahafahana ny Fanahy Masina hijoro ho vavolombelona momba Azy.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

• Hita mandritra ny lesona iray izay ahitana ny Etera 12:27 ny fitsipiky ny fanetrentena. Manome ity fanasana manaraka ity Rahavavy Gomez: “Afaka mitady sary iray izay maneho ny fomba nanehoan’i Jesoa Kristy fanetrentena ve ianareo ao amin’ny Médiathèque de l’Évangile eo ambanin’ny Horonan-tsary sy sary,?”

• Rehefa mifantoka amin’ny fahasoavan’i Jesoa Kristy ny Rahalahy Santos dia manontany hoe: “Hitanao ve ny sarin’i Jesoa Kristy eo amin’ny findainao izay maneho ny fahasoavany rehefa nifanakalo hevitra androany isika?”

Tsindrio eto raha hijery horonan-tsary maneho io lamina hakan-tahaka io.

Manazatra tena

Manorata fanasana iray ho an’ny mpianatra mba hitady sary na horonan-tsary iray momba an’i Jesoa Kristy izay maneho ireto fitsipika manaraka ireto:

• Raha mivavaka mandrakariva isika dia hanamasina ny ezaka ataontsika Andriamanitra mba hitondra soa ho an’ny fanahintsika.

• Feno fangorahana ahy i Jesoa Kristy.

• Fotoana fohy ao amin’ny lesona manaraka izay ahafahanao manasa ny mpianatra hahita sary na horonan-tsary mikasika ny fomba nanehoan’i Jesoa Kristy ilay fitsipika.

Mifanakalo hevitra sy misaintsaina

• Inona no ianaranao rehefa mampihatra io fahaiza-manao io ianao?

• Inona avy ireo tombontsoa ho tonga amin’ny alalan’ny fanasana ny mpianatra hitady sary na horonan-tsary iray maneho an’i Jesoa Kristy izay maneho ilay fitsipika?

Mampiditra fahalalana

• Ahoana no hanohizanao ny fampidirana io fahaiza-manao io ao anatin’ny drafitry ny lesona manaraka?

Te hianatra misimisy kokoa ve ianao?

• 1 Nefia 11:7–33 (mba hanampiana azy hahatakatra ny asa nanirahana ny Mpamonjy dia naseho an’i Nefia ireo zava-nitranga teo amin’ny fiainan’ny Mpamonjy)