Tokanga Taha kia Sīsū Kalaisi: Akoʻi fekauʻaki mo Sīsū Kalaisi ʻo Tatau Ai Pē pe Ko e Hā ʻOkú Ke Akoʻí

Fakamamafaʻi ʻa e sīpinga ʻa Sīsū Kalaisí.

Pōtoʻi Ngāué

Tokoniʻi ʻa e kau akó ke fakafehokotaki ʻa e meʻa ʻoku nau akó mo e founga hono fakahaaʻi ʻe Kalaisi ʻa e tefitoʻi moʻoní.

Fakamatalaʻi

ʻI hono tokoniʻi ʻa e kau akó ke hoko ʻa Sīsū Kalaisi ko e uho ʻo ʻenau akó, ʻe tokoni ia ke nau maʻu ha aʻusia fakaako fakataautaha mo mālohi ange. Ko e founga ʻe taha ʻe lava ke tau fakahoko ai ʻení ko hono tokoniʻi ʻa e kau akó ke fakafehokotaki ʻa e meʻa ʻoku nau akó ki he moʻui mo e sīpinga ʻa Sīsū Kalaisí. Te ke lava ʻo fai ʻeni ʻaki hono fakaʻaongaʻi ʻa e ngaahi fehuʻi fakafehokotaki ʻi he kotoa ʻo ha lēsoní. ʻOku tokoni ʻa e ngaahi fehuʻi ko ʻení ki he kau akó ke fakafehokotaki ʻa e moʻui mo e sīpinga ʻa Sīsū Kalaisí ki he

• ngaahi fakaikiiki ʻo ha talanoa mei he folofolá,

• ngaahi tefitoʻi moʻoni ʻi he folofolá, mo e

• ngaahi aʻusia ʻi heʻenau moʻuí.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Ko ha ngaahi sīpinga ʻeni ʻe niʻihi ʻo e founga te ke ala tokoniʻi ai ʻa e kau akó ke fakafehokotaki mo e moʻui mo e sīpinga ʻa Sīsū Kalaisí:

• Hili hono lau ha talanoa mei he folofolá mo aleaʻi ʻa e ngaahi fakaikiikí, te ke lava ʻo fehuʻi, “Ko e hā ʻa e meʻa ʻi he talanoá ni ʻokú ne fakamanatu atu ʻa e moʻui mo e sīpinga ʻa Sīsū Kalaisí?”

• Hili hono ʻiloʻi ha tefitoʻi moʻoní, te ke lava ʻo fehuʻi, “Ko e fē ʻi he folofolá naʻe fakatātaaʻi ai ʻe Sīsū ʻa e tefitoʻi moʻoni ko ʻení?”

• Hili hono vakaiʻi fakaʻauliliki ha tefitoʻi moʻoni, te ke lava ʻo fehuʻi, “Ko e fē ha taimi kuó ke mamata ai ki hono fakatātaaʻi ʻe Sīsū ʻa e tefitoʻi moʻoni ko ʻení ʻi hoʻo moʻuí pe maʻau?”

• ʻI hono aleaʻi hono fakaʻaongaʻi ʻo ha tefitoʻi moʻoní, te ke lava ʻo fehuʻi, “Ko e hā ha meʻa mei he sīpinga ʻa Sīsuú ʻokú ne tokoniʻi koe ke ke moʻui fakaʻaufuli ange ʻaki ʻa e tefitoʻi moʻoni ko ʻení?”

• Te ke lava foki ʻo fehuʻi, “ʻE tokoni fēfē hono moʻui ʻaki ʻa e tefitoʻi moʻoni ko ʻení ke ke muimui ki he sīpinga ʻa Sīsū Kalaisí pea hoko ʻo hangē ange ko Iá?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Fakaʻaongaʻi ha founga ʻe taha pe lahi ange ʻi he ngaahi akoako ko ʻení ke fakatupulaki hoʻo malava ke tokoniʻi ʻa e kau akó ke nau fakafehokotaki mo e moʻui mo e sīpinga ʻa Sīsū Kalaisí:

• Fakakaukau ki he tefitoʻi moʻoní: “Kapau te tau talangofua neongo ʻa e ngaahi faingataʻá, ʻe tokoniʻi leva kitautolu ʻe he ʻOtuá.” ʻI hoʻo teuteú, akoako fakafehokotaki ʻa e tefitoʻi moʻoni ko ʻení ki ha sīpinga ʻe taha pe ua ʻo e moʻui ʻa Sīsuú ʻi he folofolá.

• Vakai ki ha palani ʻo e lēsoni ka hokó. Fili ha tefitoʻi moʻoni ʻokú ke palani ke tokoni ke ʻiloʻi ʻe he kau akó. Akoako hono hiki ha fehuʻi faingofua ʻe ua pe tolu ke tokoni ki he kau akó ke fakafehokotaki ʻa e tefitoʻi moʻoni ko iá ki he sīpinga ʻa Sīsū Kalaisí.

• Kumi ha feituʻu ʻi ha lēsoni palani hoko mai te ke tokanga taha ai ki hono fakaʻaongaʻí. Akoako hano hiki ha fakaafe ʻe ua pe tolu ʻe tokoni ki he kau akó ke nau fakakaukau ki he founga ʻe lava ke tokoniʻi ai kinautolu ʻe he sīpinga ʻa Sīsū Kalaisí ke fakaʻaongaʻi ha tefitoʻi moʻoní.

Aleaʻi pe Fakalaulauloto

Fakalaulauloto ki he meʻa kuó ke ako mei he aʻusia ko ʻení. Mahalo te ke lava ʻo hiki ha niʻihi ʻo e ngaahi fakakaukau ko ʻení ʻi ha tohinoa ako. Fakakaukau ki he ngaahi fehuʻi ko ʻení:

• Ko e hā kuó u fakahoko kimuʻa ke fakafehokotaki ai ʻa e meʻa ʻoku ako ʻe he kau akó ʻi he folofolá ki he moʻui mo e sīpinga ʻa Sīsū Kalaisí?

• Ko e hā kuó u ako mei he aʻusia ko ʻení ʻe lava ʻo fakatupulaki ai ʻeku malava ke tokoniʻi ʻa e kau akó ke fakahoko ʻa e ngaahi fakafehokotaki ko ʻení kia Sīsū Kalaisí?

• Ko e hā te u fakahoko ke hokohoko atu ʻeku fakalakalaká?

Fakakau

• Fakakau ʻa e meʻa kuó ke akoako fakahokó ke tokoni ki he kau akó ke fakafehokotaki ʻa e meʻa ʻoku nau akó kia Sīsū Kalaisi mo fakamamafaʻi ʻEne sīpingá. Lolotonga ʻo e uike hono hokó, fili ha tefitoʻi moʻoni ʻe taha ʻi he lēsoni takitaha te ke fakaʻaongaʻi ke tokoni ke fakafehokotaki ʻe he kau akó ʻa e meʻa ʻoku nau akó kia Sīsū Kalaisi mo ʻEne sīpingá.

Fie Ako Lahi Ange?

• Neil L. Andersen, “ʻOku Mau Lea ʻia Kalaisi,” Ensign pe Liahona, Nōvema 2020, 88–91

• Section 3.1, “Unit 3: Teach the One,” Inservice Leaders’ Resources

Pōtoʻi Ngāué

Fakaʻaongaʻi ha ngaahi fakatātā mo ha ngaahi vitiō ʻo Sīsū Kalaisi ke fakatātaaʻi ʻaki ha tefitoʻi moʻoni ʻo e ongoongoleleí.

Fakamatalaʻi

Ko e founga ʻe taha ke fakamamafaʻi ʻaki ʻa e sīpinga ʻa Sīsū Kalaisí ko e mītiá. Hangē ko ʻení, hili hono ʻiloʻi ha tefitoʻi moʻoni ʻo e ongoongoleleí, ʻe lava ke fakaafeʻi ʻe he faiakó ʻa e kau akó ke nau vakai ki he Ngaahi Vitioó mo e Ngaahi Fakatātaá ʻo e Gospel Library pea kumi ha foʻi vitiō pe fakatātā ʻokú ne fakatātaaʻi ʻa e founga ʻoku hoko ai ʻa Sīsū Kalaisi ko ha sīpinga ʻo e tefitoʻi moʻoni ko iá. ʻOku kau ʻi he fakaafé ʻa e feituʻu ke kumi aí (Gospel Library, ʻi he loki akó, Google, mo e ngaahi meʻa peheé), mo e meʻa ke kumí (ko ha fakatātā pe vitiō ʻo e founga naʻe fakafōtunga ai ʻe Sīsū Kalaisi ʻa e tefitoʻi moʻoní). ʻE lava ke tokoni ʻa e ngaahi fakaafe ko ʻení ke nofotaha ʻa e kau akó ʻia Sīsū Kalaisi pea ʻoange ha ngaahi faingamālie ki he Laumālie Māʻoniʻoní ke fakamoʻoni kiate Ia.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• Lolotonga ha lēsoni ʻoku kau ai ʻa e ʻEta 12:27, ʻe aleaʻi ai ʻa e tefitoʻi moʻoni ʻo e loto-fakatōkilaló. ʻOku fai ʻe Sisitā Komesi ʻa e fakaafe ko ʻení: “ʻI he Gospel Library ʻi he Ngaahi Vitioó mo e Ngaahi Fakatātaá, te ke maʻu nai ha fakatātā ʻokú ne fakahaaʻi ʻa e founga ʻoku fakahaaʻi ai ʻe Sīsū Kalaisi ʻa e loto-fakatōkilaló?”

• ʻI he tokanga taha ʻa Brother Sanitosi ki he ʻaloʻofa ʻa Sīsū Kalaisí, ʻokú ne fehuʻi: “Te ke maʻu nai ha fakatātā ʻo Sīsū Kalaisi ʻi hoʻo telefoní ʻokú ne fakahaaʻi ʻEne ʻaloʻofá ʻo hangē ko ia kuo tau aleaʻi ʻi he ʻaho ní?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Hiki ha fakaafe ki he kau akó ke nau kumi ha fakatātā pe vitiō ʻo Sīsū Kalaisi ʻokú ne fakahaaʻi ʻa e ngaahi tefitoʻi moʻoni ko ʻení:

• Kapau te tau lotu maʻu pē, ʻe fakatapui ʻe he Tamai Hēvaní ʻetau ngāué ki he lelei ʻa hotau laumālié.

• ʻOku fonu ʻa Sīsū Kalaisi ʻi he manavaʻofa kiate au.

• Ko ha momeniti ʻi hoʻo lēsoni hokó te ke lava ʻo ʻai ke maʻu ʻe he kau akó ha fakatātā pe vitiō ʻo e founga ʻoku fakahaaʻi ai ʻe Sīsū Kalaisi ʻa e tefitoʻi moʻoní.

Aleaʻi pe Fakalaulauloto

• Ko e hā ʻokú ke ako ʻi hoʻo akoako fakahoko ʻa e taukei ko ʻení?

• Ko e hā ha ngaahi lelei ʻe maʻu ʻi hono ʻai ke maʻu ʻe he kau akó ha fakatātā pe vitiō ʻo Hono fakatātaaʻi ʻe Sīsū Kalaisi ʻa e tefitoʻi moʻoní?

Fakakau

• ʻE founga fēfē haʻo hokohoko atu hono fakakau ʻa e taukei ko ʻení ʻi he ngaahi palani lēsoni ʻi he kahaʻú?

Fie Ako Lahi Ange?

• 1 Nīfai 11:7–33 (ke tokoni kia Nīfai ke mahino kiate ia ʻa e misiona ʻo e Fakamoʻuí, naʻe fakahā kiate ia ha ngaahi ʻata mei he moʻui ʻa e Fakamoʻuí)