Tokanga Taha kia Sīsū Kalaisi: Akoʻi fekauʻaki mo Sīsū Kalaisi ʻo Tatau Ai Pē pe Ko e Hā ʻOkú Ke Akoʻí

Kumi ha ngaahi fakataipe ʻoku fakamoʻoni kia Sīsū Kalaisi.

Pōtoʻi Ngāué

ʻEke ha ngaahi fehuʻi ʻe tokoni ki he kau akó ke nau ako fekauʻaki mo Sīsū Kalaisi ʻo fakafou ʻi he ngaahi fakataipe ʻi he folofolá.

Fakamatalaʻi

ʻOku pehē ʻi he Ko e Faiako ʻi he Founga ʻa e Fakamoʻuí: Naʻe folofola ʻa e ʻEikí, “ʻKuo fakatupu mo ngaohi ʻa e ngaahi meʻa kotoa pē ke fakamoʻoniʻi auʼ (Mōsese 6:63; vakai foki ki he 2 Nīfai 11:4). ʻI heʻetau fakakaukau ki he moʻoni ko iá, te tau lava ʻo [tokoni ki he kau akó] ke nau mamata ki ha ngaahi fakataipe lahi ʻi he folofolá ʻoku fakamoʻoni ki he Fakamoʻuí. … Te ke lava foki ʻo maʻu ha ngaahi meʻa ʻoku faitatau mo e moʻui ʻa e Fakamoʻuí ʻi he moʻui ʻa e kau palōfitá mo e kau tangata mo e kau fafine faivelenga kehe ʻi he folofolá. ʻOku fakahaaʻi ʻe he fekumi ki he ngaahi fakataipé ʻa e ngaahi moʻoni fekauʻaki mo e Fakamoʻuí ʻi he ngaahi feituʻu naʻe ʻikai ke ke mei fakatokangaʻi” (peesi 7). Te tau lava ʻo tokoni ki he kau akó ke nau ako ke mamata kia Sīsū Kalaisi ʻaki hono ʻeke ha ngaahi fehuʻi te ne tokoniʻi kinautolu ke nau fakakaukau ki he founga ʻoku akoʻi, fakamoʻoniʻi, fakafehokotaki pe fakamanatu mai ai ʻe he kakaí, ngaahi feituʻú, ngaahi meʻa ʻoku hokó, pe ngaahi meʻa ʻi he folofolá kiate kitautolu fekauʻaki mo Iá. ʻE lava ke ʻeke ʻa e ngaahi fehuʻi ko ʻení kimuʻa pe hili hoʻo fakaafeʻi ʻa e kau akó ke nau laukongá. ʻE ala kau ʻa e ngaahi meʻá ni ʻi he ngaahi sīpinga ʻo e faʻahinga fehuʻi ko ʻení.

• Ko e hā ha ngaahi ʻulungaanga ʻo Sīsū Kalaisi ʻokú ke sio ki ai ʻi he ?

• ʻE lava fēfē ke fekauʻaki ʻa e ngaahi meʻa ʻi he ngaahi veesi ko ʻení mo Sīsū Kalaisí?

• ʻOku fakamoʻoni fēfē nai ʻa e talanoa ko ʻení kia Sīsū Kalaisí?

• Ko e hā ha ngaahi fakataipe ʻo Sīsū Kalaisi ʻokú ke lava ʻo sio ki ai ʻi he talanoa ko ʻení?

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

ʻI hono tataki ʻe he faiakó ʻa e kalasí ʻi he Sione 10, te ne ʻeke ʻa e ngaahi fehuʻi ko ʻení:

• Ko e hā ha ngaahi ʻulungaanga ʻo Sīsū Kalaisi ʻokú ke mamata ki ai ʻi he “matapā” ʻoku ʻuhinga ki ai ʻi he veesi 2?

• ʻOku fekauʻaki fēfē nai ʻa e “leʻo” ʻi he veesi 3 mo Sīsū Kalaisí?

• Ko e hā ha ngaahi fakataipe kehe ʻo Sīsū Kalaisi ʻokú ke lava ʻo sio ki ai ʻi he Sione 10?

Tokanga taha kia Sīsū Kalaisi - Ngaahi Fehuʻi ke Ako Fakafou ʻi he Ngaahi Fakataipé

Sio ki he founga ʻoku tokoniʻi ai ʻe he faiakó ni ʻa e kau akó ke nau ako fekauʻaki mo Sīsū Kalaisi ʻo fakafou ʻi he ngaahi fakataipe ʻi he folofolá.

Akoako 1

1. Ko e hā ha ngaahi fehuʻi te ke lava ʻo ʻeke ʻi he Ngāue 3:1–7 ʻe tokoni ki he kau akó ke nau vakai kia Sīsū Kalaisi ʻi he fakamatala ko ʻení?

2. ʻI hoʻo vakai ki he ngaahi konga folofola hoko mai ʻi he naunau fakalēsoní ʻi he uike ʻe ua ka hokó, ko e hā ha ngaahi fehuʻi te ke lava ʻo fai ʻe tokoni ki hoʻo kau akó ke nau vakai kia Sīsū Kalaisi?

Aleaʻi pe Fakalaulauloto

• Ko e hā ʻa e mahuʻinga ʻokú ke vakai ki ai ʻi hono fakaafeʻi ʻo e niʻihi kehé ke nau ako ke vakai kia Sīsū Kalaisi ʻi he ngaahi meʻa kotoa peé?

• Kuo tākiekina fēfē hoʻo moʻuí ʻe he vakai ki he Fakamoʻuí ʻi he folofolá?

Fakakau

• ʻI he lēsoni takitaha pea mo e hokohoko atú, fakakaukau ki he ngaahi fakataipe ʻo e Fakamoʻuí ʻoku maʻu ʻi he folofolá pea ʻeke ha ngaahi fehuʻi ke tokoni ki he kau akó ke nau ʻiloʻi kinautolu.

Fie ako lahi ange?

• ʻAlamā 30:44; Mōsese 6:63

• Chad H Webb, “ʻOku Mau Lea ʻia Kalaisi, ‘Oku Mau Fiefia ʻia Kalaisi” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2018), broadcasts.ChurchofJesusChrist.org.

Pōtoʻi Ngāué

Tokoni ke maʻu ʻe he kau akó ha aʻusia fakaeongo ʻi ha ngaahi meʻa fakafolofola ʻokú ne fakataipe ʻa Sīsū Kalaisí.

Fakamatalaʻi

ʻOku faʻa fakaʻaongaʻi ʻe he kau palōfitá mo e kau ʻaposetoló ha ngaahi fakataipe ke akoʻi fekauʻaki mo Sīsū Kalaisi mo ʻEne Fakaleleí. Naʻe fakaʻaongaʻi Tonu ʻe he Fakamoʻuí ha ngaahi fakaʻilonga ʻi Heʻene akonakí mo folofola, “Kuo fakatupu mo ngaohi ʻa e ngaahi meʻa kotoa pē ke fakamoʻoniʻi au” (Mōsese 6:63). Ko e founga ʻe taha ʻe lava ke tokoni ai ʻa e kau faiakó ke mahino lelei ange ki he kau akó ʻa e misiona mo e Fakalelei ʻa e Fakamoʻuí ʻo fakafou ʻi he ngaahi fakataipe fakafolofolá, ko hono fakaʻatā ʻa e kau akó ke nau maʻu ha aʻusia fakaeongo ʻi ha ngaahi meʻa. Ko e aʻusia fakaeongó ko e taimi ia ʻoku fakaafeʻi ai ʻa e kau akó ke nau ala, nanamu, fanongo, mamata, pe ʻahiʻahiʻi ha fakataipe ʻo ha meʻa kimuʻa, lolotonga, pe hili hono lau ha konga folofolá. ʻE lava ke fakaloloto heni ʻa e mahino ʻa e kau akó ki he fakataipé mo e meʻa te ne lava ʻo akoʻi fekauʻaki mo e Fakamoʻuí. ʻE lava ke tokoniʻi ʻe he kau faiakó ʻa e kau akó ke nau maʻu ha aʻusia fakaeongo ʻaki hono:

1. Fakamatalaʻi ʻa e meʻa mei he konga folofolá ʻokú ke loto ke aʻusia ʻe he kau akó.

2. Fakamatalaʻi ʻa e meʻa ʻe fai ʻe he kau akó ki he meʻa ko iá.

3. Fai ha fehuʻi ʻe tokoni ki he kau akó ke fakafehokotaki ʻa e fakataipé ki he Fakamoʻuí.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• ʻOku akoʻi ʻe Sisitā Sōnasi ʻa e Hilamani 5:12. ʻOkú ne ʻomi ha foʻi maka fōlahi feʻunga ke paasi holo ʻe he kau akó. Lolotonga ʻenau vakaiʻi ʻa e foʻi maká, ʻokú ne talaange ki he kau akó, “ʻI hoʻo puke ʻa e foʻi maká, fakalaulauloto ki he ʻuhinga ʻokú ke pehē naʻe fili ai ʻe Hilamani ha foʻi maka ke fakafehoanaki ki he Fakamoʻuí pea mo e fakavaʻe ʻoku totonu ke tau langa aí.”

• ʻOku ʻoange ʻe Brother Konisālesi ki he tokotaha ako takitaha ha kiʻi ipu vai pea fakaafeʻi ʻa e kau akó ke nau ako ʻa e Sione 4:10–14 lolotonga ʻenau fakakaukau ki he vaí. ʻOkú ne fehuʻi ki he kau akó, “Ko e hā ʻokú ke ʻilo fekauʻaki mo e vaí te ne ala fakatupu ke fakaʻaongaʻi ʻe he Fakamoʻuí ʻa e fakakaukau ko e ʻvai moʻuí’ ke akoʻi fekauʻaki mo Hono fatongia ʻi he palani ʻa e Tamai Hēvaní?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

ʻI he ngaahi konga folofola mo e ngaahi meʻa ko ʻení, hiki ʻa e founga te ke fakaʻaliʻali ai ʻa e meʻá, meʻa te ke ʻai ke fai ʻe he kau akó ki he meʻa ko iá, pea mo ha fehuʻi ʻe tokoni ki he kau akó ke fakafehokotaki ʻa e meʻa ko iá ki he Fakamoʻuí:

• ʻĪsaia 11:1: tokotoko, tefito, mo e vaʻa

• Tokāteline mo e Ngaahi Fuakava 25:12: hiva ʻa e kau māʻoniʻoní

• Sione 6:30–35: mā

• Ko ha meʻa mei ha lēsoni ʻi he kahaʻú

Aleaʻi pe Fakalaulauloto

• Ko e hā ʻokú ke ako mei hoʻo akoakó?

• ʻOku kehe fēfē hono ʻoange ki he kau akó ha aʻusia fakaeongó mo ha meʻa fakataipé mei he talanoa pē fekauʻaki mo e fakataipé?

Fakakau

• ʻI hoʻo teuteu ʻa e ngaahi lēsoní, kumi ha ngaahi faingamālie ke tokoniʻi ai ʻa e kau akó ke nau maʻu ha aʻusia fakaeongo ʻi ha meʻa ʻokú ne fakataipe ʻa Sīsū Kalaisi mei he konga folofolá.

Fie Ako Lahi Ange?

“Understanding Symbolism in the Scriptures,” Scripture Study Skills (2024), Gospel Library