Tokanga Taha kia Sīsū Kalaisi: Akoʻi fekauʻaki mo Sīsū Kalaisi ʻo Tatau Ai Pē pe Ko e Hā ʻOkú Ke Akoʻí

Akoʻi fekauʻaki mo e ngaahi huafá, fatongiá, mo e ngaahi ʻulungaanga ʻo Sīsū Kalaisí.

Pōtoʻi Ngāué

Faʻu ha ngaahi fehuʻi fekumi ke tokoni ki he kau akó ke nau ʻiloʻi ʻa e ngaahi fatongia, ngaahi huafa, ngaahi fakataipe, mo e ngaahi ʻulungaanga ʻo Sīsū Kalaisí.

Fakamatalaʻi

ʻI heʻetau feinga ke tokoniʻi ʻa e kau akó ke nau fekumi kia Sīsū Kalaisi ʻi he folofolá, te nau lava ʻo ʻiloʻi mo ʻofa ʻiate Ia. Ko e founga ʻe taha ke faʻu ʻaki ha fehuʻi fekumi ʻoku tokoni ke ʻiloʻi ʻe he kau akó ha fatongia, huafa, fakataipe, pe ʻulungaanga ʻo Sīsū Kalaisí ko hono fakakau ʻeni ʻi hoʻo fehuʻí: (1) potufolofolá, (2) meʻa ʻokú ke loto ke fekumi ki ai ʻa e tokotaha akó (ngaahi fatongiá, huafá, fakataipé, pe ngaahi ʻulungaanga ʻo Sīsū Kalaisí), mo e (3) founga ʻe ʻiloʻi ai ʻe he kau akó ʻa e ngaahi meʻá ni ʻiate kinautolu peé. ʻOku totonu ke ʻohake ʻa e ngaahi fehuʻi ko ʻení kimuʻa peá ke toki ʻai ke lau ʻe he kau akó ʻa e potufolofolá koeʻuhí ke mateuteu ʻa e kau akó ke ʻiloʻi ʻa e meʻa te nau lava ʻo ako fekauʻaki mo Sīsū Kalaisí.

Ko e ngaahi sīpinga mo e ngaahi founga ngāue ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi sīpingá mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Toe vakaiʻi ʻa e ngaahi fehuʻi ko ʻení, pea fakatokangaʻi ʻa e founga ʻoku nau fakakau ai ʻa e potufolofolá, meʻa ʻe fekumi ki ai ʻa e kau akó, mo e founga ʻe ʻiloʻi ai ʻe he kau akó ʻiate kinautolu peé:

• ʻI hoʻo lau ʻa e talanoa ʻo e Samēlia leleí ʻi he Luke 10:25–37, ko e hā ha ngaahi ʻulungaanga fakalangi ʻo Sīsū Kalaisi ʻokú ke lava ʻo vakai ki ai?

• ʻI hoʻo ako ʻa e Tokāteline mo e Ngaahi Fuakava 29:1–8, kumi ha ngaahi huafa mo e fatongia kehekehe ʻe tolu ʻo Sīsū Kalaisi ʻokú ke ongoʻi ʻoku felāveʻi mo e meʻa ʻokú ke fiemaʻu ʻi he taimí ni ʻi hoʻo moʻuí.

• ʻI hoʻo lau ʻa e Ngāue 3:1–7, ko e hā ʻokú ke fakatokangaʻi fekauʻaki mo Pitá ʻoku fakamanatu atu ai kiate koe ʻa Sīsū Kalaisí?

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Lau ʻa e ngaahi veesi ko ʻení, pea tohiʻi ki he ngaahi veesi takitaha ha fehuʻi fekumi ʻoku tokoni ki he kau akó ke nau ʻiloʻi ʻa e ngaahi fatongia, huafa, ngaahi fakataipe, mo e ngaahi ʻulungaanga ʻo Sīsū Kalaisí.

• Sēnesi 45:3–5

• Tokāteline mo e Ngaahi Fuakava 45:7–9

• 1 Nīfai 3:1–7

Aleaʻi pe Fakalaulauloto

• Ko e hā naʻá ke ako mei he aʻusia ko ʻení fekauʻaki mo e hoko ko ha faiako anga faka-Kalaisí?

• ʻE tokoni fēfē ʻeni ke nofotaha ange ʻetau kau akó mo e ngaahi fealēleaʻaki ʻi lokiakó ʻia Sīsū Kalaisí?

Fakakau

• ʻI hono fakaʻaongaʻi ʻo e meʻa naʻá ke ako ʻi he akoako fakahokó, fakakaukau ki he ngaahi tūkunga mo e ngaahi fiemaʻu hoʻo kau akó ʻi hoʻo akó ke teuteuʻi hoʻo ngaahi lēsoní ʻi he uike ní. ʻI ha potufolofola ʻe taha ʻi hoʻo lēsoní, hiki ha fehuʻi fekumi ʻe tokoni ke ʻilo ʻe he kau akó ʻa e ngaahi fatongia, huafa, fakataipe, mo e ngaahi ʻulungaanga ʻo Sīsū Kalaisí ke tokoni ke nau tokanga taha kiate Ia. Hiki ʻa e ngaahi fehuʻi ʻokú ke fakakaukau ki aí, pea kapau ʻoku ʻi ai haʻo taimi, akoako hono fakahoko ʻa e ngaahi fehuʻi ko iá ki ha taha kimuʻa peá ke toki ʻeke ia ʻi he kalasí. ʻE tokoni ʻeni ke ke fakaleleiʻi hoʻo fehuʻí kimuʻa peá ke fakaʻaongaʻi ia mo hoʻo kau akó.

Fie Ako Lahi Ange?

• Chad H Webb, “ʻOku Mau Lea ʻia Kalaisi, ‘Oku Mau Fiefia ʻia Kalaisi” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2018), broadcasts.ChurchofJesusChrist.org

Pōtoʻi Ngāué

Fai ha ngaahi fehuʻi te ne fakaʻatā ʻa e kau akó ke nau ʻiloʻi ʻa e ngaahi fatongia ʻe lava ke maʻu ʻe Sīsū Kalaisi ʻi heʻenau moʻuí.

Fakamatalaʻi

ʻE lava ke tokanga taha ʻa e kau faiakó kia Sīsū Kalaisi ʻaki hono fai ha ngaahi fehuʻi te ne fakaʻatā ʻa e kau akó ke nau ʻiloʻi ʻa e ngaahi fatongia te Ne lava ʻo maʻu ʻi heʻenau moʻuí. ʻE lava ke fakaʻaongaʻi e ngaahi fehuʻi ko ʻení ke fakaafeʻi ʻa e kau akó ke nau vakaiʻi ʻa e ngaahi fatongia ʻo Sīsū Kalaisí kimuʻa pe hili hono lau ha potufolofola pe lea ʻa e kau palōfitá. ʻOku totonu ke tataki ʻe he ngaahi fehuʻí ʻa e kau akó ki ha maʻuʻanga tokoni, fakaafeʻi kinautolu ke nau fekumi ki ha fatongia ʻe lava ke maʻu ʻe he Fakamoʻuí ʻi heʻenau moʻuí, pea tokoni ke nau fakalaulauloto ki he founga ʻe lava ke fakaʻaongaʻi ai ia kiate kinautolú. ʻI he taimi ʻoku fakaʻatā ai ʻe he kau faiakó ʻa e kau akó ke nau ʻiloʻi ʻa e fatongia ʻe lava ke fakahoko ʻe he Fakamoʻuí ʻi heʻenau moʻuí, ʻe tokoniʻi kinautolu ʻe he Laumālie Māʻoniʻoní ke nau ʻiloʻi ʻa e mahuʻinga ʻo Sīsū Kalaisí ʻi honau tūkunga lolotongá, pea te nau fiemaʻu ke fakaloloto ʻenau fengāueʻaki mo Iá ʻi heʻenau fehangahangai mo e ngaahi faingataʻa fakatāutahá.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Ko ha ngaahi sīpinga ʻeni ʻe niʻihi ʻo e ngaahi fehuʻi te ke lava ʻo fai ke fakaafeʻi ʻa e kau akó ke nau feinga ke ʻiloʻi ʻa e ngaahi fatongia ʻe lava ke maʻu ʻe Sīsū Kalaisi ʻi heʻenau moʻuí:

• Makatuʻunga ʻi he ngaahi talaʻofa ko ʻeni meia ʻEletā Kealoní, ko e hā ha fatongia ʻe lava ke maʻu ʻe Sīsū Kalaisi ʻi hoʻo moʻuí te ke lava ʻo maʻu ʻi he taimí ni?

• ʻE lava fēfē ke fakaʻaongaʻi ʻa e fatongia ʻo Sīsū Kalaisi ʻi he moʻui ʻa Nīfaí (1 Nīfai 7:16–18) kiate koe ʻi ho tūkunga lolotongá?

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Hiki ha fehuʻi ʻe tokoni ki he kau akó ke nau ʻiloʻi ʻa e ngaahi fatongia ʻe lava ke maʻu ʻe Sīsū Kalaisi ʻi heʻenau moʻuí ʻi he ngaahi tūkunga ko ʻení:

• ʻOku vahevahe ʻe ha tokotaha ako ʻa e potufolofola ko ʻení, “He ʻikai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhi ke u fakamoʻui ʻa kimoutolu?” (3 Nīfai 9:13).

• Te ke vahevahe ʻa e lea ko ʻeni meia Palesiteni Lāsolo M. Nalesoni: “ʻI heʻetau feinga ke moʻui ʻaki e ngaahi fono māʻolunga ange ʻa Sīsū Kalaisí, ʻe kamata leva ke liliu hotau lotó mo hotau natulá. ʻOku tokoniʻi kitautolu ʻe he Fakamoʻuí ke tau hao mei he mālohi ʻo e maama hingá ni ʻaki ʻEne tāpuakiʻi kitautolu ʻaki ha manavaʻofa, loto-fakatōkilalo, loto-foaki, angaʻofa, mapuleʻi kita, nonga, mo ha fiemālie lahi ange” (“Ikuʻi ʻa Māmani mo Maʻu ha Fiemālie,” Liahona, Nōvema 2022, 97).

• Ko ha sīpinga mei ha lēsoni ʻi he kahaʻú.

Aleaʻi pe Fakalaulauloto

• Ko e hā naʻá ke ako ʻi hoʻo akoako ʻa e ngaahi fehuʻi ko ʻení?

Fakakau

• Fakaʻaongaʻi ʻa e taukei ko ʻení ʻi he ngaahi lēsoni hoko ʻi he ngaahi uike siʻi ka hoko maí ʻaki haʻo fai ha ngaahi fehuʻi te ne fakaʻatā ʻa e kau akó ke nau vakai ki he ngaahi fatongia ʻe lava ke maʻu ʻe Sīsū Kalaisi ʻi heʻenau moʻuí. Tuku ha kiʻi taimi ke vahevahe ai mo hoʻo supavaisá ʻa e ngaahi ola ʻo hono fakaʻaongaʻi ʻo e taukei ko ʻení. Aleaʻi ha ngaahi founga ke fakatupulaki.

Fie Ako Lahi Ange?

• “Akoʻi fekauʻaki mo e Ngaahi Huaf, Ngaahi Fatongia, mo e Ngaahi ʻUlungaanga ʻo Sīsū Kalaisí,” ʻi he “ʻAkoʻi fekauʻaki mo Sīsū Kalaisi ʻo Tatau Ai Pē pe Ko e Hā ʻOkú Ke Akoʻí,” Ko e Faiako ʻi he Founga ʻa e Fakamoʻuí (2022), Gospel Library

• Chad H Webb, “ʻOku Mau Lea ʻia Kalaisi, ‘Oku Mau Fiefia ʻia Kalaisi” (fakamafola ako fakataʻu ʻa e Seminelí mo e ʻInisititiuti Fakalotú, 12 Sune, 2018), Gospel Library