« លើកទឹកចិត្តសិស្សឲ្យចែកចាយសេចក្តីពិតដែលពួកគេកំពុងរៀន » ជំនាញអភិវឌ្ឍន៍គ្រូបង្រៀន ៖ អញ្ជើញឲ្យរៀនសូត្រដោយឧស្សាហ៍ព្យាយាម ( ឆ្នាំ២០២៣ )

« លើកទឹកចិត្តសិស្សឲ្យចែកចាយសេចក្តីពិតដែលពួកគេកំពុងរៀន » ជំនាញអភិវឌ្ឍន៍គ្រូបង្រៀន ៖ អញ្ជើញឲ្យរៀនសូត្រដោយឧស្សាហ៍ព្យាយាម

គោលការណ៍នៃការបង្រៀនដូចជាព្រះគ្រីស្ទ ៖ អញ្ជើញឲ្យរៀនសូត្រដោយឧស្សាហ៍ព្យាយាម

លើកទឹកចិត្តសិស្សឲ្យចែកចាយសេចក្តីពិតដែលពួកគេកំពុងរៀន ។

ជំនាញ

ជួយសិស្សឲ្យបង្កើត ឬចាប់ផ្តើមការសន្ទនាអំពីដំណឹងល្អ ។

កំណត់និយមន័យ

ព្រះអម្ចាស់បានត្រាស់បង្គាប់ពួកយុវវ័យ និងយុវមជ្ឈិមវ័យឲ្យជួយប្រមូលសាសន៍អ៊ីស្រាអែល ។ ការចែកចាយជំនឿ និងទីបន្ទាល់របស់ពួកគេជាមួយអ្នកដទៃនឹងអញ្ជើញឲ្យមានការរៀនសូត្របន្ថែម ហើយពង្រឹងការប្រែចិត្តជឿរបស់ពួកគេលើព្រះអង្គសង្គ្រោះ និងដំណឹងល្អរបស់ទ្រង់ ។ សិស្សមួយចំនួនមានការលំបាកក្នុងការដឹងអំពីរបៀបចាប់ផ្តើមការសន្ទនាអំពីដំណឹងល្អទាំងនេះ ។ សិស្សអាចចាប់ផ្តើមការសន្ទនាអំពីដំណឹងល្អជាមួយអ្នកដទៃបានតាមរយៈ ( ១ ) ការពិចារណាអំពីអ្វីដែលពួកគេកំពុងរៀនអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ( ២ ) ការពិចារណាអំពីបុគ្គលណាដែលនឹងទទួលបានប្រយោជន៍មកពីការពិភាក្សានេះ និង ( ៣ ) ការសម្រេចចិត្តអំពីរបៀបដែលពួកគេនឹងបំផុសគំនិតឲ្យមានការពិភាក្សាជាមួយបុគ្គលម្នាក់នោះ ។ ការណ៍នេះអាចសម្រេចបានតាមវិធីសាស្ត្រផ្សេងៗ ដូចជា ការបង្រៀនមេរៀន ចូរមកតាមខ្ញុំ ការដឹកនាំការពិភាក្សាក្នុងថ្នាក់ ការសរសេរកំណត់ចំណាំ ការផ្ញើសារតាមទូរសព្ទ ឬការចែកចាយអត្ថបទអំពីសាសនាចក្រ ។ គោលបំណងគឺមិនមែនដើម្បីចែកចាយជំនឿ ឬបទពិសោធន៍នោះទេ ផ្ទុយទៅវិញគឺដើម្បីចាប់ផ្តើមការសន្ទនាអំពីដំណឹងល្អ ។ ការធ្វើបែបនេះគឺជាការអញ្ជើញមនុស្សដទៃឲ្យសួរសំណួរ និងលើកទឹកចិត្តឲ្យមានការសន្ទនាបន្ថែមទៀតនាពេលអនាគត ។

ចំណាំ ៖ ប្រសិនបើអ្នកមានសិស្សដែលខ្លាចនឹងធ្វើកិច្ចការនេះ សូមពិចារណាអំពីរបៀបដែលអ្នកអាចជួយពួកគេឲ្យភ្ជាប់ទំនាក់ទំនងជាមួយព្រះយេស៊ូវ គ្រីស្ទ ។ ទ្រង់នឹងជួយពួកគេ នៅពេលពួកគេបើកមាត់របស់ពួកគេដើម្បីចែកចាយសេចក្តីពិតរបស់ទ្រង់ ។

គំរូ និងការអនុវត្តខាងក្រោមនេះគឺជាឧទាហរណ៍ទូទៅ ។ ការបំពាក់បំប៉ននឹងកាន់តែមានប្រសិទ្ធភាព ប្រសិនបើគំរូ និងឱកាសអនុវត្តត្រូវបានផ្សារភ្ជាប់ទៅនឹងមេរៀនបន្ទាប់ដែលនឹងត្រូវបានបង្រៀននៅក្នុងកម្មវិធីសិក្សា ។

គំរូ

ពេលបញ្ចប់ថ្នាក់ សូមអញ្ជើញសិស្សអ្នកឲ្យពិចារណាពីបុគ្គលដែលពួកគេចង់ចែកចាយអ្វីមួយជាមួយ ។ សូមអញ្ជើញពួកគេឲ្យសរសេរសារខ្លី ឬផ្ញើសារដែលនឹងផ្តល់ឱកាសឲ្យពួកគេមានការសន្ទនាមួយអំពីដំណឹងល្អជាមួយបុគ្គលនោះ នៅពេលពួកគេជួបគ្នា ។ ឧទាហរណ៍ សិស្សអាចផ្ញើសារ ៖

« យើងនិយាយអំពីអ្វីមួយនៅថ្នាក់សិក្ខាសាលាដែលធ្វើឲ្យខ្ញុំគិតដល់ឯង ។ សូមរំឭកខ្ញុំឲ្យប្រាប់ឯងរឿងនេះផង ពេលជួបឯងលើកក្រោយ » ។
« អ្ហេ ខ្ញុំបានគិតអំពីសមត្ថភាពអភ័យទោសរបស់ព្រះអង្គសង្រ្គោះ ។ តើឯងអាចជួយខ្ញុំឲ្យគិតអំពីទ្រង់បានទេ ? បើអាច តើពេលណាល្អដើម្បីនិយាយគ្នា ? »

សូមចុចនៅត្រង់នេះដើម្បីមើលវីដេអូអំពីគំរូនេះ ។

អនុវត្ត

សូមលើកយកកថាខណ្ឌបីផ្សេងទៀតដែលអ្នកអាចប្រើជាឧទាហរណ៍ ដើម្បីជួយសិស្សឲ្យមើលឃើញអំពីរបៀបដើម្បីចាប់ផ្តើមការសន្ទនាអំពីដំណឹងល្អ ។

ពិភាក្សា ឬជញ្ជឹងគិត

តើអ្នកបានរៀនអ្វីខ្លះអំពីការជួយសិស្សឲ្យបង្កើត ឬចាប់ផ្តើមការសន្ទនាអំពីដំណឹងល្អ ?
តើការជួយសិស្សឲ្យចែកចាយជំនឿ និងទីបន្ទាល់របស់ពួកគេជាមួយគ្រួសាររបស់ពួកគេ ជួយឲ្យបទពិសោធន៍នៅថ្នាក់សិក្ខាសាលា ឬថ្នាក់វិទ្យាស្ថានរបស់ពួកគេក្លាយជាបទពិសោធន៍ដែលផ្តោតលើការសិក្សានៅឯគេហដ្ឋានយ៉ាងពិតប្រាកដដូចម្តេច ?

រួមបញ្ចូល

សូមចែកចាយជាមួយសិស្សនូវឧទាហរណ៍មួយចំនួនអំពីអ្វីដែលពួកគេអាចសរសេរ ដើម្បីចាប់ផ្តើមការសន្ទនាអំពីដំណឹងល្អ ហើយបន្ទាប់មកអនុវត្តចែកចាយការសន្ទនានោះនៅក្នុងថ្នាក់ ។ សូមឲ្យសិស្សផ្សេងទៀតជួយកែលម្អការសន្ទនាទាំងនោះ ។ សូមអញ្ជើញពួកគេឲ្យចាប់ផ្តើមការសន្ទនានោះ នៅពេលពួកគេត្រៀមខ្លួនរួចរាល់ ។

តើចង់បានបន្ថែមទៀតទេ ?

រ័សុល អិម ណិលសុន « How to Share the Gospel » New Era ខែកក្កដា ឆ្នាំ២០១១ ទំព័រ ៤៨
« Sharing the Gospel » នៅលើគេហទំព័រ ChurchofJesusChrist.org

ជំនាញ

រៀបចំការអញ្ជើញនានាដើម្បីឲ្យសិស្សចែកចាយជាមួយគ្នានូវអ្វីដែលពួកគេកំពុងរៀន ។

រូបភាព

យុវនារី និងយុវជនកំពុងសិក្សា

កំណត់និយមន័យ

ការអញ្ជើញដែលជួយសិស្សឲ្យចែកចាយនូវអ្វីដែលពួកគេរៀនគឺសាមញ្ញ ច្បាស់ និងជាក់លាក់ ។ ទាំងនោះគឺជាការណែនាំដែលជួយសិស្សឲ្យបង្រៀន ពន្យល់ ចែកចាយ សួរសំណួរ ឬធ្វើទីបន្ទាល់ចំពោះគ្នាទៅវិញទៅមក ។ ការអញ្ជើញទាំងនេះជាញឹកញាប់រួមបញ្ចូលនូវធាតុផ្សំដូចតទៅនេះ ៖

មូលហេតុដែលពួកគេចែកចាយ ។
អ្វីដែលត្រូវចែកចាយ ។
ពេលណា ហើយអ្នកណាដែលពួកគេនឹងចែកចាយជាមួយ ។

អ្នកប្រហែលជាត្រូវផ្តល់ពេលវេលាឲ្យសិស្សរៀបចំខ្លួនដើម្បីចែកចាយគំនិតរបស់ពួកគេ ។ ទាំងនេះអាចជាការអញ្ជើញដើម្បីចែកចាយជាមួយមនុស្សម្នាក់ជាក្រុមតូចៗ ឬជាមួយសិស្សក្នុងថ្នាក់ទាំងមូល ។ ការអញ្ជើញសិស្សឲ្យចែកចាយនូវអ្វីដែលពួកគេកំពុងរៀនជាមួយគ្នា គឺជាសកម្មភាពនៃសេចក្តីជំនឿ ដែលអនុញ្ញាតឲ្យព្រះវិញ្ញាណបរិសុទ្ធកែលម្អសិស្សទាំងអស់ដែលបានចូលរួមក្នុងការសន្ទនានោះ ។

គំរូ

នេះគឺជាឧទាហរណ៍មួយចំនួននៃអ្វីដែលវាអាចមើលទៅដូចជាក្នុងថ្នាក់រៀន ៖

« សូមអរគុណសម្រាប់ការចំណាយពេលខ្លះក្នុងការអាន នីហ្វៃទី៣ ១១:១០–១៥ ។ ខ្ញុំចង់ផ្តល់ឱកាសឲ្យប្អូនៗចែកចាយនូវអ្វីដែលប្អូនៗបានរៀនអំពីព្រះយេស៊ូវគ្រីស្ទ ហើយថាហេតុអ្វីបានជាវាសំខាន់ចំពោះប្អូនៗ ។ តើប្អូនៗងាកទៅរកនរណាម្នាក់ដែលប្អូនកំពុងអង្គុយក្បែរ ហើយប្តូរវេនគ្នាចែកចាយអ្វីដែលប្អូនបានរៀនអំពីព្រះយេស៊ូវគ្រីស្ទនៅក្នុងខគម្ពីរទាំងនេះបានដែរឬទេ និងហេតុអ្វីវាសំខាន់ចំពោះប្អូន ? »
« សូមចំណាយពេលមួយនាទីទៀត ដើម្បីសរសេរនូវអ្វីដែលប្អូនៗបានរៀនពីបទពិសោធន៍របស់ពេត្រុសជាមួយព្រះយេស៊ូវគ្រីស្ទនៅក្នុង ម៉ាថាយ ១៤:២២–៣៣ ។ ខ្ញុំដឹងថា ប្អូនម្នាក់ៗមាននូវអ្វីមួយដែលមានតម្លៃដើម្បីចែកចាយ ។ តើប្អូនណានឹងស្ម័គ្រចិត្តដើម្បីចាប់ផ្តើមចែកចាយនូវអ្វីមួយ ដែលប្អូនកំពុងរៀនមកពីបទពិសោធន៍របស់ពេត្រុសជាមួយព្រះយេស៊ូវគ្រីស្ទ ? »
« បន្តិចទៀតនេះ យើងនឹងផ្លាស់ប្តូរទៅជាក្រុមតូចៗដើម្បីពិភាក្សានូវអ្វីដែលប្អូនៗកំពុងរៀនអំពីការបង្កើនសេចក្ដីជំនឿលើព្រះយេស៊ូវគ្រីស្ទ ។ [ សូមឲ្យពេលសិស្សមួយនាទី ហើយបន្ទាប់មកផ្តល់ផ្នែកបន្ទាប់នៃការអញ្ជើញ ។ ] សូមប្អូនរៀបចំខ្លួនបំបែកគ្នាជាក្រុមដែលមានគ្នាបី ឬបួននាក់បានទេ ? [ ឬនៅក្នុងថ្នាក់ធំជាង អ្នកអាចដាក់ពួកគេជាក្រុមៗបាន ។ ] នៅពេលប្អូនចូលទៅក្នុងក្រុមរបស់ប្អូន សូមប្ដូរវេនគ្នាចែកចាយបទពិសោធន៍មួយ ដែលវាបានពង្រឹងដល់សេចក្ដីជំនឿរបស់ប្អូនលើព្រះយេស៊ូវគ្រីស្ទ » ។

សូមចុចនៅត្រង់នេះដើម្បីមើលវីដេអូអំពីគំរូនេះ ។

អនុវត្ត

សូមក្រឡេកមើលផែនការមេរៀនថ្មីបំផុតរបស់អ្នក ហើយរៀបចំការអញ្ជើញសម្រាប់សិស្សរបស់អ្នកឲ្យចែកចាយនូវអ្វីមួយដែលពួកគេបានរៀននៅក្នុងក្រុមដែលមានគ្នាពីរ ឬបីនាក់ ។
សូមក្រឡេកមើលបណ្ដុំបទគម្ពីរនៅក្នុងកម្មវិធីសិក្សាដែលអ្នកនឹងបង្រៀននាពេលអនាគត ។ សូមរៀបចំការអញ្ជើញមួយដែលអនុញ្ញាតឲ្យសិស្សចែកចាយបទពិសោធន៍ ឬទីបន្ទាល់ផ្ទាល់ខ្លួនជាមួយអ្នកផ្សេងដែលពួកគេកំពុងអង្គុយជិត ។

រួមបញ្ចូល

នៅពេលអ្នករៀបចំមេរៀនក្នុងរយៈពេលពីរបីសប្តាហ៍ខាងមុខទៀត ត្រូវប្រាកដថាអ្នកបញ្ចូលយ៉ាងហោចណាស់ឱកាសមួយនៅក្នុងមេរៀននីមួយៗ ដើម្បីឲ្យសិស្សចែកចាយអ្វីដែលពួកគេកំពុងរៀនជាមួយគ្នា មិនថាមួយទល់មួយ ឬជាក្រុមតូចៗនោះទេ ។

ពិភាក្សា ឬជញ្ជឹងគិត

តើការចូលរួមរបស់សិស្សនឹងមានភាពខុសគ្នាអ្វីខ្លះ ?
តើអ្នកបានឃើញអត្ថប្រយោជន៍ខ្លះៗមកពីការចែកចាយជាមួយគ្នារបស់សិស្សដោយរបៀបណា?

តើចង់បានបន្ថែមទៀតទេ ?

« ជំនួបជាមួយនឹងអែលឌើរ ដេវីឌ អេ បែដណា » ( ជំនួបជាមួយនឹងអ្នកមានសិទ្ធិអំណាចទូទៅ ថ្ងៃទី៧ ខែកុម្ភៈ ឆ្នាំ២០២០ ) នៅលើគេហទំព័រ ChurchofJesusChrist.org
គោលលទ្ធិ និងសេចក្ដីសញ្ញា ៨៨:១២២