Fitsipiky ny fampianarana tahaka ny an’i Kristy: Tiavo ireo izay ampianarinao

Jereo amin’ny fomba hijeren’ Andriamanitra azy ireo ny mpianatra.

Fahaiza-manao

Halalino ireo hafatra farany avy amin’ny mpaminany mba hahatakarana ny fomba fahitan’ny Ray any An-danitra ny zatovo.

Mamaritra

Nampianatra ny Loholona Dale G. Renlund hoe: “Mba hanompoana ny hafa amim-pahombiazana, dia mila mijery azy ireo … amin’ny fijerin’ny Ray any An-danitra [isika]” (“Amin’ny fijerin’ Andriamanitra,” Liahona, nôv. 2015, 94). Lehilahy entanim-panahy hiteny ho an’ny Tompo ireo mpaminany velona. Rehefa mahatakatra ny zavatra ampianarin’ny mpaminany momba ny zatovo ankehitriny ianao, dia afaka mahita ireo mpianatrao amin’ny fomba fijerin’ Andriamanitra azy ireo sy mahafantatra kokoa ny fomba hanampiana azy ireo amin’ny fotoana rehetra. Fomba iray hanaovana izany ny fandalinana ombam-bavaka ireo hafatra avy amin’ny mpaminany mba hamantarana ny valin’ireo fanontaniana tahaka izao manaraka izao:

• Inona no ampianarin’ireo mpaminany sy apôstôly momba ny maha-izy-azin’ny zatovo?

• Inona no asain’ireo mpitarika ao amin’ny Fiangonana ataon’ny zatovo?

• Inona no ambaran’ireo mpaminany sy apôstôly momba ny fanantenana, ny faniriana, sy ny fahatsapana, ary ny zavatra andrasan’ny Tompo ho an’ireo zatovo?

Rehefa mandalina ny tenin’ireo mpaminany velona ianao mba hitady ny valin’ireo fanontaniana ireo na ny sasany amin’ireo fanontanianao manokana, dia hitombo ny fahatakaranao ny fomba fijerin’ Andriamanitra ny zatovo ao amin’ny Fiangonana. Rehefa mijery mazava kokoa ny mpianatra amin’ny fomba fijerin’ Andriamanitra ianao dia hotaomim-panahy hampianatra sy hifanerasera amin’ny zatovo amin’ny fomba tsara kokoa sy masina kokoa.

Lamina hakan-tahaka

• Vao hanomboka ny taona voalohany hampianarany institiota Rahavavy Antel. Alohan’ny hihaonany amin’ny mpianany dia mandalina ny lahatenin’ny Filoha Nelson hoe “Safidy ho an’ny mandrakizay” izy sady misaintsaina ilay fanontaniana hoe “Inona no tian’ny mpaminanin’ny Tompo ho takatro momba ireo zatovo izay ho ampianariko? Takany mazava kokoa ny fomba fijerin’ny Ray any An-danitra ireo mpianany rehefa mamaky ity manaraka ity izy: “Voalohany sy farany manan-danja dia zanak’ Andriamanitra ianao. Faharoa, amin’ny maha-mpikamban’ny Fiangonana anao dia zanaky ny fanekempihavanana ianao. Ary fahatelo, ianao dia mpanara-dia an’i Jesoa Kristy.”

• Nitebiteby Rahalahy Mueller satria toa tsy liana tamin’ny lesona ireo mpianatra tao amin’ny kilasin’ny seminera nampianariny. Mikatsaka fanampiana izy amin’ny alalan’ny fandalinana ireo lahateny tamin’ny fihaonamben’ny Fiangonana farany indrindra mba hitadiavana ny valin’ny fanontaniana hoe: “Inona no zarain’ireo mpitarika ao amin’ny Fiangonana mikasika ny fanantenana, ny faniriana, ny fahatsapana ary ny zavatra andrasan’ny Ray any An-danitra ho an’ireo zatovo?” Mihatsara ny fomba fahitany an’ireo mpianany rehefa mamaky ny tenin’ny Loholona Dieter F. Uchtdorf izy manao hoe: “Ry namako malala, mbola averiko indray, raha mijoro eto ny Mpamonjy androany, dia haneho ny fitiavany tsy manam-pahataperana ho anareo Izy, ny fahatokiany tanteraka anareo” (“I Jesoa Kristy no maha zatovo mahery,” Liahona, Nôv. 2022, 12).

Tsindrio eto raha hijery horonan-tsary maneho io lamina hakan-tahaka io.

Manazatra tena

• Mandalìna hafatra iray farany avy amin’ny mpaminany dia mitadiava hevi-baovao izay manampy anao hahatakatra ny fomba fahitan’ Andriamanitra ireo mpianatrao.

Mampiditra fahalalana

• Manaova lisitra ahitana teny nambaran’ny mpaminany tamin’ny taona efa lasa izay manampy anao hahita ny zatovo amin’ny fomba fijerin’ny Ray any An-danitra.

Mifanakalo hevitra na misaintsaina

Inona no mety ho fiantraikan’ny fahitana ny zatovo amin’ny fomba fijerin’ Andriamanitra eo amin’ny fomba hitondranao azy ireo?

• Inona avy ireo teny nambaran’ny mpaminany izay nanampy anao hahita ny zatovo amin’ny fomba ahitan’ny Ray any An-danitra azy ireo, ary nanova inona teo aminao izany?

• Inona avy ireo fanontaniana hafa mety hosaintsaininao eo am-pandalinana ireo hafatra avy amin’ny mpaminany mba hanampy anao hahazo an-tsaina ny manjo ireo zatovon’ny Fiangonana?

Te hianatra misimisy kokoa ve ianao?

• Russell M. Nelson, “Safidy ho an’ny mandrakizay” (fampaherezam-panahy maneran-tany ho an’ny tanora, 15 mey 2022), ChurchofJesusChrist.org

• Dale G. Renlund, “Amin’ny fijerin’ Andriamanitra,” Liahona, nôv. 2015, 93–94

• Chad H Webb, “Solontenany” (Fampitana ny fivoriam-piofanana fanao isan-taona an’ny Seminera sy Institiota fianarana ny filazantsara, 21 jan. 2022), broadcasts.ChurchofJesusChrist.org

Fahaiza-manao

“Saino amin’ny fomba selestialy” ny momba ny mpianatrao mba hanampiana anao hahita azy ireo tahaka ny ahitan’ Andriamanitra azy ireo.

Mamaritra

Nanasa antsika ny Filoha Russell M. Nelson mba “[hisaina amin’ny fomba selestialy” amin’ny alalan’ny “fiheverana ny zava-panahy” (“Saino amin’ny fomba selestialy!,” Liahona, nôv. 2023, 117). Azonao ampiharina amin’ny mpianatrao izany, ary afaka manampy anao hahita azy ireo tahaka ny fahitan’ Andriamanitra azy ireo izany. Fomba iray ahafahana manao izany ny mieritreritra mpianatra iray fantatrao sy “[misaina] amin’ny fomba selestialy” amin’ny alalan’ny fanontaniana tena hoe: “Inona no fantatr’ Andriamanitra sy takany momba io mpianatra io?” Azo ampiharina io fahaiza-manao io isaky ny mifandray amin’ny mpianatra ianao na mieritreritra momba ny mpianatra.

Lamina hakan-tahaka

• Rehefa tapitra ny tontolo andro lava iray dia nody Rahalahy Smith. Nanontany azy momba ny tontolo androny ny vadiny, koa dia nieritreritra ny hizara toe-javatra iray niainany niaraka tamin’ny mpianatra iray izay tsy nifarana araka ny tokony ho izy izy. Avy eo izy dia mieritreritra ny fanasan’ny Filoha Nelson hoe “Saino amin’ny fomba selestialy” ary manontany tena hoe: “Inona no fantatr’ Andriamanitra sy takany momba io mpianatra io?” Nizara tamin’ny vadiny izy hoe: “Sahirana tamin’ny mpianatra iray aho androany maraina, saingy feno fankasitrahana aho satria fantatro fa nandefa ity zatovolahy ity tao amin’ny kilasinay ny Ray any An-danitra mba hahomby.”

Tsindrio eto raha hijery horonan-tsary maneho io lamina hakan-tahaka io.

Manazatra tena

• Mieritrereta mpianatra iray fantatrao dia “saino amin’ny fomba selestialy” ny momba azy. Inona no fantatr’ Andriamanitra sy takany momba io mpianatra io?

• Mieritrereta mpianatra iray hafa fantatrao dia “saino amin’ny fommba selestialy” ny momba azy. Inona no fantatr’ Andriamanitra sy takany momba io mpianatra io?

Mifanakalo hevitra na misaintsaina

• Inona no nianaranao tamin’ny alalan’ny fampiharana io fahaiza-manao io? Nahoana no zava-dehibe ny mahita ny mpianatra tahaka ny fahitan’ Andriamanitra azy ireo?

• Mety hiova toy ny ahoana ny traikefa amin’ny fianarana rehefa “[misaina] amin’ny fomba selestialy” tsy an-kiato momba ny mpianatrao ianao?

Mampiditra fahalalana

• Inona no mety hataonao mba hahatonga ny “fisainana amin’ny fomba selestialy” momba ny mpianatrao ho lasa fahazarana?

Te hianatra misimisy kokoa ve ianao?

• Russell M. Nelson, “Saino amin’ny fomba selestialy!Liahona, nôv. 2023, 117–120