Pangita og angay nga mga paagi sa pagpahayag sa imong gugma.

Kahanas

Pagpadala og mensahe ngadto sa ginikanan sa estudyante mahitungod sa usa ka butang nga positibo nga imong namatikdan mahitungod sa ilang anak.

Ipasabot

Usa ka gamhanan nga paagi sa pagpahayag sa imong gugma alang sa usa ka estudyante mao ang pagpadala og usa ka positibo nga mensahe ngadto sa ginikinan o tigbantay mahitungod sa usa ka piho nga butang nga imong namatikdan mahitungod niana nga estudyante. Ang mensahe mahimong mas epektibo kon ikaw:

1. Mag-ampo alang sa giya mahitungod kon kinsa nga estudyante ang imong kinahanglan tutokan ug unsa ang imong kinahanglan nga ipakigbahin ngadto sa ginikanan o tigbantay.

2. Daklit nga ipaila ang imong kaugalingon sa pagsugod sa mensahe.

3. Kinasingkasing nga mopahayag og pasalamat alang sa kahigayon nga anaa ang estudyante sa klase.

4. Sa klaro ug yano nga paagi ipahayag ang usa ka butang nga positibo ug piho nga imong naobserbahan.

Samtang ikaw sa kinasingkasing ug mainampoon nga mopadayag og positibo nga mga obserbasyon ngadto sa mga ginikanan, ang estudyante mobati sa imong gugma sa gamhanan nga mga paagi.

Modelo

Si Brother Camargo nahigugma sa iyang mga estudyante ug tinuoray nga gustong mopadayag niana nga gugma sa tukma nga mga paagi. Nag-ampo siya aron mahibalo kon kinsa ang iyang mapaambitan og positibo nga mensahe ngadto sa usa ka ginikanan ug mibati nga nadasig sa pagsulat ngadto sa mga ginikanan ni Jackson. Nakamatikod siya nga wala gayod niya kinahanglana nga hangyoon si Jackson sa pagkuha sa iyang mga kasulatan ug nga si Jackson kanunay nga andam nga motabang. Si Brother Camargo nagpadala og usa ka email nga nag-ingon:

• Minahal nga Brother ug Sister DuVall,

• Ako si Brother Camargo, ug ako ang magtutudlo ni Jackson sa seminary. Mapasalamaton kaayo ko nga anaa siya sa akong klase. Gusto lang ko mopahibalo kaninyo nga kanunay nga gipagawas ni Jackson ang iyang mga kasulatan ug andam mga motabang sa bisan unsa nga akong gikinahanglan. Salamat sa tanan ninyong gihimo sa pagtabang sa pagsuporta kaniya.

• Matinuoron,

• Brother Camargo

Pagpraktis

Pagsulat og positibo nga mensahe ngadto sa usa ka ginikanan alang sa mosunod nga mga sitwasyon:

1. Si Susan ingon og nahimulag sa klase, ug gusto nimo nga ipahayag ang imong gugma ngadto kaniya. Samtang ikaw nag-ampo mahitungod niini, imong namatikdan nga boluntaryo niyang gitabangan ang usa ka estudyante kinsa nanglimbasog sa pagpangita og mga kasulatan.

2. Paghunahuna mahitungod sa usa sa imong mga estudyante kinsa makanunayon nga nagpalig-on sa imong klase. Mainampoon nga ikonsiderar ug sultihi ang estudyante og usa ka butang nga imong naobserbahan mahitungod kaniya.

Hisgoti o Pamalandongi

• Unsa kaha ang epekto niini sa indibidwal nga mga estudyante ug sa ilang relasyon ngadto sa Manluluwas sa paglabay sa panahon? Sa unsang paagi kini makaapekto sa pagkainteresado sa estudyante o sa pagbati sa pagkahisakop diha sa klase?

• Ikonsiderar ang usa ka panahon sa dihang ang pagpahayag sa gugma o pagpasalamat sa usa ka tawo nakapalig-on sa imong relasyon sa Manluluwas.

Iapil

• Pagsugod sa pagpili og usa o duha ka estudyante kada adlaw nga naaghat ka nga gamiton kini nga kahanas. Padayona kini hangtod mahimo kining natural ug hangtod nga idirekta sa Espiritu.

Gusto pa og dugang?

• Jean B. Bingham, “Pagtudlo sa Kamatuoran pinaagi sa Lenggwahe sa Gugma” (Seminaries and Institutes of Religion nga tinuig nga sibya sa pagbansay, Ene. 19, 2021), broadcasts.ChurchofJesusChrist.org