Higugmaa Kadtong Imong Gitudloan

Paghimo og palibot diin ang tanan gitahod ug nahibalo nga ang ilang mga tampo gihatagan og bili.

Kahanas: Ipakita nga imong gihatagan og bili ang mga estudyante sa dili pa sila mokomentaryo o moisa sa ilang kamot aron mokomentaryo.

Pagpasabot

Kita makapakita og gugma alang sa atong mga tigkat-on pinaagi sa pakig-istorya ngadto nila nga kita mihatag og bili sa ilang mga tampo. Usahay kon ang mga estudyante mokomentaryo, kita ingon og dili interesado o tingali mabalda sa paghunahuna mahitungod sa unsay sunod natong isulti. Sayon ra ang paglingiw o magsugod sa pag-ukay sa atong mga kasulatan samtang kita maghunahuna kon unsaon sa pagtubag. Importante nga hinumdoman nga ang mga estudyante gusto nga mobati nga nadunggan, giila, ug nakita. Kita makatabang sa mga estudyante nga mobati niining paagiha pinaagi sa hingpit nga paghatag kanila og pagtagad samtang sila mopaambit og mga komentaryo. Usa ka paagi nga matuman kini mao ang pag-atubang kanila, motan-aw sa mata, ug mohatag og pagtagad kanila sa tibuok higayon sa ilang komentaryo. Laing paagi mao ang berbal nga pagpahayag nga ikaw mihatag og bili sa ilang gitampo bisan sa wala pa sila mokomentaryo. Kon ang usa ka estudyante mopataas sa ilang kamot, mahimo ka nga mosulti og sama niini, “Jordan, ganahan mi nga makadungog gikan nimo. Palihog sultihi kami unsa ang imong hunahuna,” o, “Thabo, mahinamon kami nga makat-on gikan nimo. Unsay gusto nimong itampo?” Kining yano nga mga aksiyon makadala ngadto sa mga tigkat-on nga ang ilang mga tampo gihatagan og bili ug mahinungdanon ngadto sa kasinatian sa pagkat-on.

Modelo

Bantayi ang linihokan niini nga magtutudlo samtang siya naminaw ngadto sa komentaryo sa estudyante. Siya nag-atubang ug nagtan-aw sa estudyante. Siya wala mohatag og pagtagad sa laing estudyante, sa mga kasulatan o sa bisan unsang butang. Aduna pa bay lain nimong makat-onan gikan niining hulagway mahitungod sa pakig-istorya ngadto sa mga estudyante nga sila gihatagan og bili?

Iklik dinhi aron makakita og bidyo niini nga modelo.

Pagpraktis

Niining semanaha, praktisa kini nga kahanas pinaagi sa paghatag og gibug-aton sa imong mga pakig-istorya uban sa mga tawo ug pakigsultihanay nga imong gihatagan og bili ang ilang mga tampo. Atubanga ang tawo ug motan-aw sa mata samtang ikaw makig-istorya kaniya. Tangtanga ang bisan unsang makabalda, ug hingpit nga mohatag og pagtagad sa indibidwal.

Hisgoti o Pamalandongi

• Unsa ang imong nakat-onan mahitungod sa kaimportante sa dili berbal ug berbal nga mga porma sa komunikasyon sa pagpahayag ngadto sa uban nga ikaw naghatag og bili kanila?

• Unsa ang pipila ka paagi nga imong mapahayag ngadto sa mga estudyante nga ikaw naghatag og bili sa ilang mga komentaryo?

• Paggahin og higayon ug hunahunaa sa makadaghan sa dihang ang Manluluwas mihatag og ehemplo niini nga kahanas.

Iapil

Atol sa imong sunod nga leksiyon, gamita kini nga kahanas pinaagi sa pag-atubang sa imong mga estudyante, ibutang ang imong mga kasulatan, ug motan-aw sa mga mata sa mga estudyante samtang sila mopaambit og mga komentaryo.

Gusto pa og Dugang?

• Gospel Topics, “Communication,” topics.ChurchofJesusChrist.org

• Mark Ogletree, “Speak, Listen, & Love,” Ensign, Peb. 2014, 14–17