Mamulong, Maminaw, ug Maghigugma
Epektibo ba mong makig-istorya sa inyong kapikas? Ang pagsabut niining tulo ka matang sa panag-istoryahanay makatabang ninyo sa paglig-on sa inyong relasyon.
Isip usa ka magtatambag sa kaminyoon ug pamilya, kanunay kong makig-istorya og mga magtiayon sa pagtabang kanila mabalik o malig-on ang ilang relasyon. Kausa, nakighimamat ko og babaye kinsa bag-ohay lang naminyo ngadto sa iyang bana, ug miingon nako nga sila adunay dakong problema sa komunikasyon. Human nako og istorya sa iyang bana, nakamatikod ko nga ang iyang bana tinuoray hanas nga mosulti—apan dili ngadto sa iyang asawa.
Akong nakat-unan sa katuigan nga ang maayong komunikasyon makaapekto sa kasingkasing ug hunahuna. Kon kita mas maayong makaistorya—nagpasabut nga mas klaro ug kompleto—kita makamugna og mas lawom nga koneksyon sa emosyon, makasulbad sa mga panagsumpaki, ug makalig-on sa atong relasyon sa kaminyoon. Ang mosunod mao ang pipila ka paagi nga atong mapalambo ang kalidad sa komunikasyon sa atong relasyon.
Moapil sa Makahuluganong Panag-istoryahanay
Si Dr. Douglas E. Brinley, usa ka miyembro sa Simbahan kinsa espesyalista sa kaminyoon ug pagkaginikanan, misulat sa tulo ka ang-ang sa komunikasyon sa mga relasyon: mabaw, personal, ug pag-abag [validation]. Aron makamugna og lawom nga kasuod tali sa bana ug asawa, kinahanglang balanse kining tulo.1
Mabaw nga Komunikasyon
Ang komunikasyon nga anaa sa mabaw nga ang-ang maghatag lang og impormasyon ug molikay sa pagsupak, ug kini wala kaayoy risgo. Tanang magtiayon mogahin og panahon niini nga ang-ang samtang sila nagsabut sa mga iskedyul, naghisgot sa panahon, o mokomentaryo sa presyo sa gas. Bisan tuod kini nga matang sa komunikasyon gikinahanglan, ang mga indibidwal dili gayud lawom nga nakakonekta ug nabugkos sa usag usa kon ang kadaghanan sa komunikasyon magpabilin niini nga ang-ang.
Ang mabaw nga komunikasyon makapugong sa lawom ug makahuluganong panag-istoryahanay. Kon ang magtiayon maglikay sa lawom nga mga isyu nga angay hisgutan, dili sila gayud makakat-on sa pagsulbad sa mga panagsumpaki o makakonektar sa usag usa. Ang magtiayon magkasuod samtang maghisgot sila sa mga butang nga importante—dili kadtong dili importante nila. Ako nakakita og daghang magtiayon sa akong trabaho kinsa naningkamot nga ipreserbar ilang relasyon pinaagi sa pagmintinar sa ilang komunikasyon sa mabaw nga ang-ang. Pinaagi sa paglikay sa “labi pang hinungdanong mga butang” (Mateo 23:23), sa tinuoray ilang gilaglag ang ilang kaminyoon.
Personal nga Komunikasyon
Atol sa personal nga komunikasyon, inyong ipakigbahin ang inyong mga interes, mga damgo, mainit nga pagbati, pagtuo, ug mga tumong. Kamo usab bukas sa pagpakigbahin sa inyong mga kahadlok ug kakulangan. Ang pagpakigsulti niini nga mga isyu sa Kristohanon nga paagi mao ang usa ka paagi nga ang magtiayon nagkonektar ug naglig-on sa relasyon. Si Elder Marvin J. Ashton (1915–1994) sa Korum sa Napulog Duha ka mga Apostoles, mitudlo, “Ang komunikasyon labaw pa kay sa pagpakigbahin sa mga pulong. Kini ang maalamong pagpakigbahin sa mga emosyon, pagbati, ug kabalaka. Kini ang hingpit nga pagpakigbahin sa kaugalingon.”2
Tingali anaa kamo niini nga ang-ang sa komunikasyon samtang kamo nag-date. Kini ang ang-ang diin ang mga lalaki ug babaye nagminahalay sa usag usa. Samtang kamo mopadayon sa pagpakigbahin kon unsa ang importante, kamo ug ang inyong kapikas mobati nga gidayeg, gigusto, gihatagan og bili, ug gikinahanglan. Samtang kamo nagkat-on sa pag-abag sa gipakigbahin sa inyong kapikas—nagpakita nga ang iyang gisulti importante nganha kaninyo—kamo molambo ngadto sa sunod nga ang-ang sa komunikasyon.
Pag-abag nga Komunikasyon
Ang bana ug asawa adunay ligdong nga responsibilidad sa paghigugma ug pag-amuma sa usag usa.3 Ang mga eksperto sa kaminyoon nga sila si Sandra Blakeslee ug Judith S. Wallerstein misulat: “Ang kaminyoon nga walay pag-amuma ug makaayong paghupay mabungkag tungod sa kakulang sa emosyon.”4 Ang komunikasyon nga nag-abag makapalig-on, makaayo, makaamuma, ug makadayeg. Niini nga ang-ang sa komunikasyon, atong ipahayag ang pagdayeg ug pasalamat niadtong atong gimahal. Hapit tanang relasyon molambo kon adunay maayong komunikasyon sa pag-abag.
Ang pag-abag nga komunikasyon magsugod sa paghatag og pagtagad sa unsay gisulti sa inyong kapikas ug naglakip sa pagpahayag og mga ideya ug mga hunahuna nga makapalig-on ug makaayo. Pangitaa ang maayong kinaiya sa inyong kapikas ug isulti kini kaniya. Kon ang inyong kapikas naglisud, kamo mahimong moabag niya pinaagi sa pagpaminaw ug sa paghupay. Mahimo kang mosulti, “Pasensya nga lisud kaayo ang imong adlaw; sultii ko og dugang sa nahitabo” o “Unsay akong mahimo aron mamaayo ang imong adlaw? Tingali makasulti ka, “Akong nakita nganong lisud kaayo ang imong adlaw, apan ako adunay pagsalig sa imong kahibalo ug paagi sa pagtrabaho. Nasayud ko nga imong masulbad ang problema.” Ang mga pamahayag sama niini nagpakita nga kamo adunay simpatiya alang sa kasakit sa inyong kapikas ug naghunahuna kaniya. Pinaagi sa pag-ila sa emosyon, kahadlok, hunahuna o kabalaka, sa inyong kapikas kamo nakigsulti nga nag-abag ug nagpasabut og pagdayeg, paghigugma, ug pagtahud.5
Pagbansay sa Art sa Pagpaminaw
Ang labing importante nga kahanas sa pagpakig-istorya mao ang epektibong pagpaminaw. Usa sa labing pagpakita og kamabination sa kaminyoon mao ang pag-focus gyud sa inyong kapikas ug maminaw kaniya—maminaw og maayo—dili igsapayan kon unsay gusto natong isulti. Ang buot nga madunggan nagpasabut nga gihigugma; gani, ang pagpaminaw usa sa labing taas nga porma sa pagtahud ug pag-abag. Pinaagi sa pagpaminaw, kita nag-ingon ngadto sa atong kapikas, “Ikaw importante kanako, gihigugma ko ikaw, ug ang imong gustong isulti importante.”
Sa kaminyoon ang tumong sa pagpaminaw dili aron makabaton og impormasyon apan aron sa pagsabut. Aron tinuoray nga makasabut sa inyong kapikas lantawa ang isyu sa paagi nga gilantaw kini sa inyong kapikas. Si Elder Russell M. Nelson sa Korum sa Napulog Duha ka mga Apostoles mitudlo nga ang mga bana ug mga asawa kinahanglang “magkat-on sa pagpaminaw, ug maminaw aron makat-on sa usag usa.”6 Ang epektibong pagpaminaw nagtabang kanato nga ibaliwala ang atong gusto ug garbo ug makakonektar og maayo sa atong kapikas.
Si Elder Joe J. Christensen, kanhi anaa sa Seventy, mitambag: “Paggahin og panahon sa pagpaminaw sa inyong kapikas; gani i-eskedyul kini kanunay. Pagpaminaw sa usag usa ug timbang-timbanga kon kumusta kamo isip kapikas.”7 Ang paggahin og panahon sa pag-istorya nga walay makabalda makatabang sa pagsulbad sa mga problema. Siguroa nga mahimong positibo, magmentinar og Kristohanon nga kinaiya, ug ayaw baldaha ang inyong kapikas kon siya nagsulti kaninyo.
Mga Pagpasabut sa Linihokan
Laing aspeto sa komunikasyon nga usahay mataligam-an mao ang dili berbal nga komunikasyon. Unsa ang inyong isulti ug sa unsang paagi kini ninyo isulti importante, ug mao usab ang kahulugan sa inyong linihokan [body language]. Tan-awon ba ninyo sa iyang mga mata ang inyong kapikas kon siya makig-istorya kaninyo? Iliraw ba ninyo ang inyong mga mata kon siya mosulti kaninyo nga siya naglisud sa trabaho? Ang ekspresyon sa inyong nawong nagpakita ba og interes ug pagkamatinud-anon, o kini nagpakita ba og kapuol ug pagka-irita? Ipahayag ba ninyo ang inyong gugma uban sa pisikal nga pagbati? Usahay ang gakus o pahiyom nagpahayag sa inyong gugma labaw pa sa mga pulong. Dili igsapayan ang matang sa panag-istoryahanay—kon kini ba kabahin sa pinakabag-ong mga artikulo sa mantalaan o ambisyon sa inyong kinabuhi—ang positibo nga linihokan nagpasabut og pag-abag ug naglig-on sa inyong relasyon.
Sunda ang Paagi sa Komunikasyon sa Manluluwas
Samtang kamo naghimo og makahuluganong panag-istoryahanay uban sa inyong kapikas, giyahi ang inyong mga lihok ug pulong pinaagi sa pagsunod sa ehemplo ni Jesukristo. Ang iyang pakig-istorya sa uban nagpakita og gugma, pag-amuma, ug kabalaka. Siya kalma nga mosulti ug lunsay ang paghigugma. Siya mipakita og kalooy ug mipasaylo. Siya naminaw pag-ayo ug nagpakita og gugmang putli. Sa samang paagi, kon gusto nato ang atong mga relasyon molambo, kita kinahanglan magkat-on sa pagsulti sa positibo nga paagi nga makapalig-on ug ikaayo niadtong naglibut kanato.
Kon ako makighimamat sa mga magtiayon, kanunay nako silang hangyoon sa pag-analisar sa ilang paagi sa panag-istoryahanay ug sa pagpalambo niini. Samtang ilang gamiton ang mga baruganan sa makahuluganong panag-istoryahanay sa ilang relasyon, akong nakita ang mga kausaban padulong sa mas maayong kaminyoon. Ang pagsabut sa inyong kapikas, pagmugna og palibut nga nag-ugmad og bukas nga komunikasyon ug ekspresyon ug pagpakita og paghambin ug pagdayeg mao ang mga yawe sa mas lig-on nga relasyon ug mas malipayong kaminyoon.
Ang tagsulat nagpuyo sa Utah, USA.