Sa Pagpakig-date o Dili Pagpakig-date
Ang tagsulat nagpuyo sa Nevada, USA.
Paghulagway pinaagi ni Ben Simonsen
Sa akong eskwelahan daghang mga tawo dunay mga boyfriend ug girlfriend. Sa akong unang adlaw sa eskwelahan isip eight grader, nahimamat nako si Paul. Magkasinabut ra mi. Si Paul usa ka maayong higala.
Pagkasunod adlaw human sa klase gihangyo niya ako og date. Giingnan nako siya nga dili mahimo, ug siya nangutana kon ngano. Giingnan nako siya nga ako miyembro sa Ang Simbahan ni Jesukristo sa mga Santos sa Ulahing mga Adlaw ug nga dili angayng mag-date hangtud sa edad nga 16. Si Paul nangutana kon ngano, ug ako nakaamgo nga ako wala gayud makahibalo.
Nianang gabhiuna miuli ko ug namalandong sa pangutana ni Paul. Nagsiksik ko sa LDS.org ug mibasa sa akong mga kasulatan. Akong nakita ang usa ka kinutlo ni Presidente Gordon B. Hinckley (1910–2008): “Ang Ginoo naghimo nato nga madanihon sa usag usa alang sa importante nga katuyoan. Apan kining pagkamadanihon mahimong sama sa bomba gawas kon kini gikontrolar. … Tungod niini nga rason nga ang Simbahan nagtambag batok sa sayong pagpakig-date.”1
Gitan-aw usab nako sa Alang sa Kalig-on sa Kabatan-onan. Nag-ingon kini nga ang pagpakig-date “makatabang kini kaninyo sa pagkat-on ug pagpraktis sa sosyal nga mga kahanas, pagpalambo og panaghigalaay, paglingaw-lingaw sa tinarung nga paagi, ug sa katapusan makakita og mahangturong kauban.”2
Sa pagkasunod nga adlaw akong gipakita ni Paul ang booklet sa Alang sa Kalig-on sa Kabatan-onan. Ang ubang mga tawo nakakita ni Paul nga nagbasa niini, ug ang akong LDS nga mga higala mitabang nako sa pagtubag sa mga pangutana sa akong kauban sa klase’ Nalipay ko nga nakatubag sa pangutana ni Paul.
Alang sa Kalig-on sa Kabatan-onan nag-ingon nga ang pagpakig-date sa dili pa ang edad nga 16 ug paghimo og seryoso nga relasyon sa atong kabatan-onan mosangput sa imoralidad ug molimit sa gidaghanon sa mga tawo nga atong mahimamat. Ang akong inahan usab nagsulti nako nga kita kinahanglang dili makig-date sa dili pa ang 16 tungod kay kini makabalda sa atong pagtuon ug mga oportunidad nga importante sa kalampusan sa umaabut. Nakakita ko og mga higala nga nagmagul-anon tungod sa emosyonal nga panagbulag sa edad nga 13.
Nalipay ko nga nakahibalo alang sa akong kaugalingon kon nganong kita dili makig-date sa dili pa ang edad nga 16 ug nakahatag og tubag ni Paul nga wala makapasakit sa iyang mga pagbati. Nakabaton ko og maayong higala, ug nanghinaut ko nga mahimo kaming higala sa dugayng panahon. Mapasalamaton ko nga ang Ginoo mihatag nato og mga higala ug mga oportunidad sa pagpakig-date sa tukmang edad aron nga kitang tanan sa umaabut nga adlaw makakita og matinud-anong mahangturong mga kauban.