Ang Atong Kahayag diha sa Kangitngit

Susan Wyman, Georgia, USA

Ang among pamilya bag-o lang nakasinati og grabeng kadaut sa sunog, ug kaming walo temporaryong nagpuyo sa tulo ka kwarto nga mobile home sa among atubangan nga nataran. Ang among pamilya nag-atubang og mga hagit ug panagsumpaki.

Ang akong bana dili aktibo sa Simbahan nianang higayuna. Ang among duha ka batan-ong mga lalaki mohimo og mga pagpili nga makapasubo. Sa samang higayon, nagserbisyo ko isip presidente sa Young Women sa among ward, ug pipila sa batan-ong mga babaye nanlimbasug sa grabeng mga tintasyon. Pipila sa ilang mga ginikanan nanlimbasug usab ug busa wala motabang sa ilang mga anak niining lisud nga panahon.

Nasayud ko nga kining batan-ong mga babaye nagkinahanglan og tabang nako sa pagbuntog sa ilang mga espirituhanong kalisud. Nasayud ko nga ang akong unom ka anak nagkinahanglan nako. Nasayud ko nga ang akong buotang bana nag-agad sa akong kalig-on. Apan ingon og puros kangitngit ang naglibut nako, ug mibati ko og kahaw-ang, kaluya, ug dili makahimo sa paggiya niining akong mga minahal ngadto sa kahilwasan.

Sa usa ka lawom nga gabii samtang akong gipakatulog ang among batang anak sa kahilom sa among temporaryong panimalay, naghunahuna ko niadtong nanginahanglan nako nga mahimong lig-on. Akong nabati ang malukupong kangitngit nga naglibut kanila. Sa akong kasubo kinasingkasing ko nga nag-ampo nga ang Langitnong Amahan mopakita kanako sa paagi sa pagtabang kanila bisan sa akong mga kakulangan. Siya mitubag diha-diha dayon ug mipakita kanako sa paagi.

Ingon og nakaplagan nako ang akong kaugalingon diha sa cultural hall sa among ward, nga walay bintana. Gabii na kaayo kadto, ug wala gani gamay nga kahayag. Dayon akong gidagkutan ang gamayng kandila para birthday. Ingon og gamay ra kaayo kini, apan ang gamayng kahayag paigo aron mawala ang kangitngit.

Mao kana ang tubag! Ang gibag-on sa kangitngit nga naglibut kanato dinhi sa kalibutan dili mahinungdanon. Ang kahayag mahangturon ug gamhanan gayud kaysa kangitngit (tan-awa sa 2 Mga Taga-Corinto 4:6; Mosiah 16:9; D&P 14:9). Kon kita magpabiling takus sa pagpakig-uban sa Espiritu Santo, ang atong mga kalag makapasanag og igong kahayag nga makapawala sa bisan unsa nga gibag-on sa kangitngit, ug ang uban moduol nianang kahayag nga anaa kanato.

Kini lang ang kinahanglan nakong masayran. Kining yano nga ideya nakapadasig nako sa milabayng 25 ka tuig uban sa kahibalo nga inubanan sa tabang sa Ginoo ug paggiya, kita makahimo—ug mahimo—nga Iyang gikinahanglan kanato nga himoon ug mamahimo niining mangitngit nga kalibutan.