Ang Akong Mensahe gikan sa Langitnong Amahan

Terumi Tuckett (uban ni Jill Campbell), Japan

Isip bag-ong minyo ug bag-ong miyembro sa Simbahan, mibalhin ko sa England uban sa akong bana. Bisan tuod nakakat-on ko og Iningles sa eskwelahan, ang akong bug-at nga tono sa Japanese nakapalisod nga masabtan ang akong Iningles, ug maglisud ko og sabut sa tono nga British.

Ang akong bana ug ako mga miyembro sa Simbahan, apan dili mi hingpit nga nakabig sa dihang nagminyo mi. Mouli mi kanunay inighuman sa miting sa sakrament imbis nga magpabilin sa simbahan alang sa ubang mga miting. Dili mi gustong modawat og calling sa Simbahan.

Usa ka adlaw, aron matabangan ko nga mas maapil sa mga kalihokan sa Simbahan, gitawag ko sa usa ka lider sa Relief Society ug mihangyo nga mopakigbahin ko og usa ka butang kabahin sa akong kaugalingon sa sunod nga miting sa Relief Society. Miuyon ko sa pag-apil, apan tungod sa akong limitado nga Iningles, wala ko makasabut nga magdala diay ko og pipila ka butang nga i-display.

Sa dihang miabut ko sa miting, diha-diha dayon nakaamgo ko kon unsay gilauman nga akong buhaton. Tulo ka lamesa ang giandam nga may mga hapin ug buwak. Usa ka dakong pahibalo mabasa, “Pakig-ila-ila sa mga Sister”. Usa sa mga lamesa gisulatan og “Sister Tuckett.” Apan wala koy ibutang sa akong lamesa. Naningkamot kong itago ang akong mga luha.

Nagguol ko matag higayon nga motambong ko og miting sa sakrament tungod kay dili ko makasabut sa hingpit unsa ang gipamulong. Kanunay kong naghunahuna, “Nganong naa ko dinhi?” Busa sa dihang miabut ko sa miting sa Relief Society ug nasayud sa akong sayop, mibati ko nga dili na gyud mosimba. Nanghinaut ko nga mawala, apan kinahanglan nakong sultian ang lider sa Relief Society nga dili ko andam.

“Kadali lang,” miingon ko. “Wala ko makasabut, ug wala koy ibutang sa akong lamesa.”

Siya mitan-aw nako uban sa pinakamabinationg ekspresyon ug miingon, “Walay problema—nalipay kong naa ka.” Dayon iya kong gigakos.

Nahupay ko, ug ang Espiritu midasig nako nga ang iyang gisulti usa ka mensahe gikan sa Langitnong Amahan—nga Siya nahigugma nako ug nalipay nga miadto ko. Dili ko kaayo kasabut og Iningles, apan ang Espiritu nakapahimo nako sa pagsabut sa iyang mensahe.

Tungod niini nga pagbati, ang akong determinasyon diha-diha dayon nausab. Miingon ko, “Kon gihigugma ko og maayo sa Langitnong Amahan ug gusto nga mosimba ko, ako ning buhaton, dili igsapayan kon unsa ni kalisud.”

Sukad niadto, ang akong bana ug ako mitambong sa matag miting sa Simbahan. Determinado usab ko sa pagkat-on sa Iningles. Hinay-hinay, mas nakasabut ko sa Iningles ug nakakat-on sa pagsulti niini.

Mapasalamaton ko sa sister kinsa midala sa mensahe gikan sa Langitnong Amahan niadtong mahinungdanon nga punto sa akong kinabuhi. Karon, 15 ka tuig na ang milabay, nagserbisyo ko sa kapangulohan sa Relief Society sa district nga Iningles ang pinulongan sa Japan ug nakadawat og pagbansay pinaagi sa Simbahan nga mahimong tighubad.