Mensahe sa Visiting Teaching
Ang Balaan nga Misyon ni Jesukristo: Maayong Magbalantay
Tun-i sa mainampuong paagi kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Si Jesukristo, ang Maayong Magbalantay, mitudlo:
“Kinsa bang tawhana kaninyo, nga may usa ka gatus ka mga karnero, nga kon kawad-an siyag usa ka buok niini, dili mobiya sa kasiyaman ug siyam diha sa kaawaawan ug moadto sa pagpangita niadtong usa nga nawala, hangtud nga hikaplagan niya kini? …
“Sultihan ko kamo, nga … labi pang kalipay unya didto sa langit tungod sa usa ka makasasala nga magahinulsol” (Lucas 15:4, 7).
Samtang kita makasabut nga si Jesukristo mao ang Maayong Magbalantay, madugangan ang atong tinguha sa pagsunod sa Iyang ehemplo ug sa pagserbisyo niadtong nanginahanglan. Si Jesus miingon: “Ako mao ang maayong magbalantay sa mga karnero, ako nakaila sa mga ako, ug ang mga ako nakaila kanako. … Ug igahalad ko ang akong kinabuhi sa pagpakamatay alang sa mga karnero” (Juan 10:14–15). Tungod sa Pag-ula ni Kristo, walay usa kanato nga mawala nga dili makatultol sa pagpauli (tan-awa sa Lucas 15).
Si Presidente Thomas S. Monson miingon, “Responsibilidad nato ang pag-amuma sa panon … Hinaut ang matag usa kanato moalagad.”1
Gikan sa mga Kasulatan
Gikan sa Atong Kasaysayan
Si Elizabeth Ann Whitney, kinsa mitambong sa pinakaunang miting sa Relief Society, mihisgot kabahin sa iyang pagkakabig niadtong 1830: “Sa diha nga akong nadungog ang Ebanghelyo sigon sa gisangyaw sa mga Elder, nahibalo ako nga tingog kini sa Maayong Tigbalantay.”2 Si Elizabeth misunod sa tingog sa Maayong Magbalantay ug nabunyagan ug nakumpirmahan.
Kita usab makadungog sa tingog sa Maayong Magbalantay ug mopakigbahin sa Iyang mga pagtulun-an ngadto sa uban. Si Presidente Monson miingon, “Kita ang mga kamot sa Ginoo dinhi sa yuta, uban sa mando nga moserbisyo ug motabang sa Iyang mga anak.”3
Sama sa usa ka magbalantay nga mangita sa usa ka nahisalaag nga karnero, ang mga ginikanan maninguha sa pagpangita sa anak nga nahisalaag. Si Presidente James E. Faust (1920–2007), Ikaduhang Magtatambag sa Unang Kapangulohan, miingon: “Ngadto sa mga ginikanan nga nagbangutan kinsa matarung, makugihon, ug mainampoon sa pagtudlo sa ilang masinupakong mga anak, kami moingon kaninyo, ang Maayong Magbalantay nagtan-aw kanila. Nasayud ang Dios ug nakasabut sa inyong hilabihang kasubo. Adunay paglaum.”4