Usa ka Minuto ug Tunga nga Nagpaulan

Jason Bosen, Utah, USA

Samtang nagdako, ako ang klase sa bata nga dili mo mabalaka. Aktibo ko sa Simbahan sa tibuok nakong kinabuhi. Nahimo kong presidente sa akong korum sa priesthood ug mga klase sa seminary. Motambong ko sa matag komperensya sa kabatan-onan, pagbiyahe sa templo, mga kalihokan sa Scouting, ug mga Mutual. Ako usab adunay pagpamatuod sa ebanghelyo. Apan sa dihang nasakop ko sa korum sa mga priest, naglisud ko, bisan tuod walay usa nakahibalo niini. Total, ako ang klase sa bata nga dili mo mabalaka.

Sa unang mga semana ug bulan sa akong korum balik-balik ra ang akong buhaton: motambong ko sa simbahan, Mutual, ug mga kalihokan sa Scouting. Sa akong kaugalingon, hinoon, naglisud ko. Wala nako mabati nga ako kabahin sa grupo o gusto sa ubang mga batan-on nga naa ko. Ganahan gyud nakong maapil nila.

Paglabay sa panahon, ako adunay mga pangutana ug mga pagduha-duha kon gusto ba nakong maapil sa korum. Apan nagpabilin ko nga aktibo, hilom nga nag-antus ug naglaum nga may usa ka butang o tawo nga motabang kanako nga mobati nga gihangup.

Ang akong amahan ug ako bag-o lang nahuman og ayo sa akong unang sakyanan, usa ka nindot nga 1967 Ford Mustang. Si Brother Stay, akong presidente sa Young Men, nangutana mahitungod niini matag karon ug unya. Naghunahuna ko nga ang iyang mga pangutana nagpakita sa iyang interes sa usa ka walay paglubad nga sakyanan—dili sa usa ka batan-ong lalaki.

Kining tanan nausab sa usa ka gabii nga nag-ulan human sa Mutual. Tungod sa kakusog sa ulan, gihatud ming tanan ni Brother Stay gikan sa simbahan padulong sa balay, ako ang katapusang gihatud. Sa dihang iyang nakita ang akong asul nga Mustang diha sa agianan, nangutana na usab siya kabahin niini. Akong siyang gihagad nga motan-aw sa makina nga dugay na nakong sige og ayo.

Wala kaayoy nahibaloan si Brother Stay kabahin sa mga sakyanan, ug siya may asawa ug batan-ong anak nga lalaki nga naghulat sa ilang panimalay. Apan mibarug siya sa ngitngit, nagpaulan, nagtan-aw sa hapit dili makita nga makina. Nianang higayuna nakaamgo ko nga wala siya mobuhat niadto para lang makakita og usa ka walay paglubad nga sakyanan—iya kining gibuhat tungod kay naghunahuna siya kanako.

Tungod nianang pagbarug og usa ka minuto ug tunga nga nagpaulan, akong nakaplagan ang akong gikinahanglan. Sa katapusan mibati ko nga gihangup. Ang akong hilom nga mga pag-ampo natubag.

Sukad niadto nakaadto nako sa templo, nakaalagad og misyon, nakagradwar sa kolehiyo, ug naningkamot sa pagtuman sa akong mga pakigsaad. Mahimong dili na kadto mahinumduman ni Brother Stay, apan dili gyud ko makalimot niini.

Kitang tanan may mga panlimbasug, apan kitang tanan makagahin og dugang usa ka minuto ug tunga matag adlaw sa pagpakita og gugma sa mga anak sa Dios. Kini mahimong makahimo og dakong kalainan—bisan ngadto sa klase sa tawo nga dili mo angay mabalaka.