Serbisyo

Sa mga pahina 58–59 niini nga isyu si Carol F. McConkie, unang magtatambag sa kinatibuk-ang kapangulohan sa Young Women, nagpasabut nga ang serbisyo mao ang ebanghelyo ni Jesukristo nga makita sa lihok: “Kon kita moserbisyo sa uban, kita moapil sa buhat sa kaluwasan. Sama sa gitudlo ni Haring Benjamin, ‘Kon kamo anaa sa pagserbisyo sa inyong mga isigkatawo kamo anaa lamang sa pagserbisyo sa inyong Dios’ (Mosiah 2:17).” Ang mga sugyot sa ubos makatabang ninyo sa pagtudlo sa mga batan-on ug mga bata kabahin sa serbisyo ug ang tahas niini diha sa ebanghelyo ni Jesukristo.

Mga Sugyot sa Pagtudlo sa mga Batan-on

Ang video sa Mormon Messages for Youth “Extraordinary Gift” (online sa lds.org/go/E24service) naghisgot sa istorya sa batan-ong lalaki nga buta kinsa naggamit sa iyang mga talento sa pagpanalangin sa uban. Mahimo ninyong tan-awon ang video uban sa inyong pamilya ug maghisgot kabahin sa talagsaong mga gasa nga gihatag sa matag sakop sa pamilya. Sa unsang paagi kini nga mga gasa magamit sa pagserbisyo sa uban?
Sa Alang sa Kalig-on sa mga Kabatan-onan, atong mabasa, “Pipila sa labing importante nga serbisyo nga inyong mahatag mahitabo sulod sa inyong kaugalingong panimalay” (32). Uban sa inyong mga batan-on, hisguti ang kaimportante sa pagserbisyo diha sa panimalay. Unsa ang mga panalangin nga moabut kon ang mga sakop sa pamilya magserbisyo sa usag usa? Pagplano og paagi nga ang inyong mga batan-on makahimo og mas makahuluganong serbisyo diha sa panimalay.
“Sa kasagaran ang labing makahuluganon nga serbisyo mapadayag pinaagi sa yano, matag adlaw nga mga buhat sa kaayo” (Alang sa Kalig-on sa mga Kabatan-onan, 32). Dapita ang inyong mga batan-on sa pagmugna og kalihokan sa pagserbisyo nga naglangkob sa “matag adlaw nga mga buhat sa kaayo.” Hisguti kon sa unsang paagi ang serbisyo may kalabutan sa mga pakigsaad nga atong gihimo atol sa bunyag (tan-awa sa Mosiah 18:8–10).
Ikonsiderar ang pagdula og pangitaanay sa mga butang [scavenger hunt] kalabut sa kinatibuk-ang komperensya para sa family home evening diin ang mga sakop sa pamilya mogamit og mga timaan sa pagpangita sa mga pahayag kabahin sa serbisyo gikan sa labing bag-o nga kinatibuk-ang komperensya. Ipakigbahin ang inyong nakit-an ug hisguti kon sa unsang paagi kamo makasunod sa tambag nga gihatag sa atong mga lider.

Mga Sugyot sa Pagtudlo sa mga Bata

Tabangi ang inyong mga anak nga makasabut nga adunay mga oportunidad sa pagserbisyo bisan asa. Papangita og paagi ang mga sakop sa pamilya nga sila makaserbisyo atol sa ilang inadlaw-adlaw nga mga kalihokan, ug dayon magtigom ug maghisgut sa inyong mga kasinatian.
Ipakigbahin ang mga istorya mahitungod sa serbisyo gikan sa inyong family history, magasin sa Simbahan, o pakigpulong sa kinatibuk-ang komperensya. Basaha ang Mosiah 2:17 ug hisguti kon sa unsang paagi kita makaserbisyo sa Langitnong Amahan pinaagi sa pagserbisyo sa uban.
Ipa-drawing sa inyong mga anak ang mga paagi nga sila makaserbisyo sa uban. Pangutan-a sila kon unsay ilang mabuhat aron makaserbisyo sa ilang mga igsoon, mga higala, mga magtutudlo, o mga ginikanan.