Higugmaa Kadtong Imong Gitudloan

Pag-ampo alang kanila gamit ang ilang ngalan.

Kahanas: Pag-ampo ug pangutana kon sa unsa nga paagi ikaw makatabang sa imong mga estudyante ug mosunod sa mga pag-aghat gikan sa Espiritu Santo.

Pagpasabot

Ang makanunayon nga pag-ampo alang sa imong mga estudyante makatabang kanimo nga mas mobati sa gugma sa Dios alang kanila ug modugang sa imong tinguha sa paghatag og luwas, maabiabihon nga dapit diin sila makakat-on. Kini makatugot usab sa Langitnong Amahan sa pagtabang kanimo nga mas makasabot sa ilang mga kahimtang ug mga panginahanglan. Bisan og dili kita makapugos sa espirituhanon nga mga kasinatian o mga tubag sa mga pag-ampo, ang pag-ampo alang sa atong mga estudyante modapit sa giya sa Espiritu Santo ug makadugang sa atong kapasidad sa pagtabang kanila. Ang paglihok sa inspirasyon nga imong madawat makatabang kanimo sa pagpalambo sa kasinatian sa pagkat-on sa matag estudyante. Usa ka paagi nga ang mga magtutudlo makatinguha sa pagdugang og gugma alang sa ilang mga estudyante mao ang paghunahuna sa unsay ilang nahibaloan na mahitungod sa usa ka estudyante ug dayon mainampoon nga mamalandong ug mangutana kon unsaon nila nga mas makapakita og gugma ngadto niana nga estudyante. Samtang sila mag-ampo uban niini nga mga hunahuna, ang mga magtutudlo kinahanglan nga maninguha sa pag-ila ug paglihok sa mga pag-aghat sa Espiritu.

Modelo

Ang mosunod mao ang pipila ka ehemplo kon sa unsa nga paagi ikaw makaampo ug makapangutana kon unsaon sa pagtabang sa usa ka indibidwal nga estudyante ug mosunod sa mga pag-aghat sa Espiritu Santo:

• Nabantayan nimo nga si Juan bag-ohay lang nagpanuko nga moapil diha sa klase. Nangutana ka sa Langitnong Amahan kon unsaon nimo nga labing maayo nga makatabang kaniya. Nabati nimo nga kinahanglan nimo siyang istoryahon inig abot niya sa klase. Nabati nimo nga kinahanglan nimo siyang pangutan-on pa mahitungod sa iyang kasamtangan nga mga interes kay sa mangutana lang niya kon nganong bag-ohay lang wala na kaayo siya moapil. Nagplano ka nga makig-istorya kaniya sa dili pa ang klase ugma.

• Si Maria makanunayon nga nagpaambit sa iyang mga panabot ug pagpamatuod sa miaging pipila ka semana. Sa dili pa ang sunod nga klase, nangutana ka sa Langitnong Amahan kon unsaon nimo nga matabangan siya nga mopadayon sa pag-uswag. Nakahunahuna ka nga ipares siya sa pipila sa iyang mga kauban sa klase kinsa dili kaayo mopaambit o kinsa naglisod sa bukas nga pagpaambit kon unsa ang ilang gibati. Sa imong pagplano sa leksiyon para ugma, nagdugang ka og kahigayonan sa pagpaambit sa kauban sa klase.

Iklik dinhi aron makakita og bidyo niini nga modelo.

Pagpraktis

Gamita ang usa o dugang pa sa mosunod nga mga pagpraktis aron sa pagpalambo sa imong abilidad sa pag-ampo alang sa mga estudyante ug paglihok sa miresulta nga mga pag-aghat:

• Pagpili og estudyante nga imong gibati nga wala kaayoy daghang suod nga mga panaghigalaay diha sa klase. Pag-ampo kon unsaon nga labing maayo nga makatabang kaniya. Paghimo og plano sa paglihok sa mga impresyon nga imong madawat.

• Pagpili og estudyante kinsa sige og paambit diha sa klase. Pag-ampo alang kaniya ug mahitungod kon unsaon nga mapadayon ang pagpalambo sa kasinatian sa pagkat-on niana nga estudyante. Lihoka ang mga impresyon nga imong madawat.

• Pagpili og estudyante nga bag-ohay lang wala nimo makita diha sa klase. Pag-ampo alang kaniya, ug pangutan-a ang Ginoo kon unsaon nga labing maayo nga makakontak ug makatabang sa estudyante nga mobati nga gihigugma ug gikinahanglan. Paghimo og plano base sa mga impresyon nga imong madawat, paghukom kon kanus-a nimo malihok kana nga plano, ug sunda kini.

Hisgoti o Pamalandongi

Pamalandongi kon unsa ang imong nakat-onan gikan niini nga kasinatian. Tingali marekord nimo ang pipila niini nga mga hunahuna diha sa usa ka journal sa pagtuon. Ikonsiderar ang mosunod nga mga pangutana:

• Unsa nga mga paningkamot ang akong gihimo kaniadto aron mag-ampo alang sa akong mga estudyante?

• Unsa ang akong nakat-onan niini nga proseso nga makapalambo sa akong abilidad sa pag-ampo alang sa akong mga estudyante ug tabangan sila nga mapalambo ang ilang kasinatian sa pagkat-on?

• Unsa ang akong buhaton aron magpadayon sa paglambo?

Iapil

Paghimo og plano sa paglihok sa pag-ampo ug pangutana kon unsaon nimo nga makatabang sa imong mga estudyante ug sa pagsunod sa mga pag-aghat gikan sa Espiritu Santo. Mahimo nimong ikonsiderar ang mosunod nga gisugyot nga mga lakang samtang ikaw maghimo og plano sa paglihok:

• Pilia ug hatagi og pagtagad ang usa sa mga pagpraktis sa ibabaw.

• Tinoa kon unsaon nimo sa pag-apil niini.

• Pag-eskedyul og panahon sa pag-apil niini.

• Hangyoa ang Langitnong Amahan sa pagtabang kanimo.

Gusto pa og Dugang?

• Neil L. Andersen, “Classroom of Faith, Hope, and Charity” (gabii uban sa usa ka General Authority, Peb. 28, 2014), broadcasts.ChurchofJesusChrist.org

• Chad H. Webb, ““Labaw sa Tanang Butang”” (Tinuig nga sibya sa pagbansay sa Seminaries and Institutes of Religion, Hunyo 12, 2019), broadcasts.ChurchofJesusChrist.org

• “Higugmaa Kadtong Inyong Tudloan,” Pagtudlo Sumala sa Pamaagi sa Manluluwas (2016), 6