Pangandam kanunay sa pagtubag sa espirituhanong mga pag-aghat mahitungod sa mga panginahanglan sa mga tigkat-on.

Kahanas

Pangutana aron masukod ang pagkat-on sa dili pa mopadayon sa leksiyon.

Ipasabot

Ang Pagtudlo Sumala sa Pamaagi sa Manluluwas nagdapit kanato sa pagpamalandong sa mosunod nga pangutana: “Kadto bang inyong gitudloan nahibalo nga kamo mas interesado sa ilang pagkat-on kay sa paghuman sa usa ka leksiyon?” Ang mga magtutudlo makapakita nga interesado sila sa pagkat-on sa mga estudyante pinaagi sa pagpangutana og makapatin-aw nga mga pangutana sa dili pa mopadayon ngadto sa sunod nga bahin sa usa ka leksiyon. Sa pagbuhat niini, ang magtutudlo mogahin og usa ka minuto human ang usa ka baroganan, hilisgotan, o pangutana gihisgotan aron mangutana aron maklaro unsay nasabtan sa mga estudyante. Mga ehemplo niini nga mga pangutana naglakip sa:

• Unsay inyong nakat-onan?

• Unsa pay inyong mga pangutana mahitungod sa unsay atong gikat-onan?

• Aduna pa bay bisan unsa nga inyong gihunahuna?

• Aduna bay bisan unsa niini nga makalibog o dili klaro?

Kini nga mga pangutana mosukod sa pagkat-on ug pagsabot sa mga estudyante ug kinahanglan nga dili ipangutana sa paagi nga tingali makapaulaw kanila. Ang mga tubag niini nga mga pangutana modapit sa Espiritu Santo sa pagtabang sa usa ka magtutudlo sa pag-ila kon unsaon sa pagtubag sa mga panginahanglan sa mga estudyante.

Modelo

• Human sa usa ka panaghisgotan bahin sa hugot nga pagtuo, si Sister Robinson mihunong ug nangutana: “Sa dili pa kita mopadayon ngadto sa sunod nga hut-ong sa kasulatan, aduna pa bay bisan unsa nga inyong gihunahuna mahitungod sa hugot nga pagtuo?”

• Human sa pagtuon sa mga kasulatan mahitungod sa Ikaduhang Pag-anhi, si Brother Moon nangutana, “Unsaon nimo paghulagway sa unsay imong nakat-onan mahitungod sa Ikaduhang Pag-anhi?”

Pagpraktis

1. Unsa nga mga pangutana ang mahimo nimong ipangutana aron sa pagsukod sa pagsabot sa mga estudyante human sa usa ka panaghisgotan mahitungod sa pagpadayag diha sa Doktrina ug mga Pakigsaad 8:2–3?

2. Tan-awa ang usa ka umaabot nga leksiyon diha sa kurikulum. Pagsulat og pipila ka pangutana nga mahimo nimong ipangutana aron sa pagsukod sa pagsabot sa mga estudyante bahin sa usa ka hilisgotan sa dili pa mopadayon.

Hisgoti o Pamalandongi

• Sa unsang paagi kini nga mga matang sa mga pangutana makatabang kanimo nga mahimong andam sa pagtubag sa espirituhanon nga mga pag-aghat mahitungod sa mga panginahanglan sa imong mga estudyante?

Iapil

• Sa mosunod nga duha ka semana, sulayi ang pagpangutana aron sa pagsukod sa pagkat-on sa mga estudyante sa dili pa mopadayon ngadto sa sunod nga hilisgotan diha sa leksiyon. Bantayi ang mga tubag sa mga estudyante ug ang mga pag-aghat sa Espiritu Santo samtang iapil nimo kini nga kahanas diha sa kasinatian sa lawak klasehanan.

Gusto pa og Dugang?

• “Usa ka Gabii uban ni Elder David A. Bednar” (Usa ka gabii uban sa usa ka General Authority, Peb. 7, 2020), ChurchofJesusChrist.org