Paghimo og mga sitwasyon ug mga oportunidad alang sa mga tigkat-on nga matudloan pinaagi sa Espiritu Santo.

Kahanas

Paghimo og mga kinaugalingon nga pagtimbang-timbang sa estudyante mahitungod sa usa ka doktrina, kamatuoran, o baroganan.

Ipasabot

Ang pagtudlo pinaagi sa Espiritu naglakip sa pagtabang sa mga estudyante nga mokonsiderar sa ilang kaugalingon nga panglantaw, mga pagbati, ug mga kasinatian nga may kalabotan sa piho nga mga kamatuoran. Kining personal nga lawom nga paghinuktok ug pagtimbang-timbang makadapit sa Espiritu Santo sa pagtabang sa matag estudyante nga makakita sa mga butang “ingon nga sila gayod mao, ug … ingon nga … gayod mahimo unya” (Jacob 4:13) sa ilang mga kinabuhi. Ang epektibo nga mga pagtimbang-timbang sa kaugalingon motabang sa mga estudyante nga maghunahuna (1) sa ilang kaugalingon nga kasamtangang pagsabot sa usa ka piho nga kamatuoran, (2) nganong kini nga mga kamatuoran mahinungdanon alang sa ilang kaugalingon nga kinabuhi ug sitwasyon, ug (3) unsaon nga mas makasunod niini nga mga kamatuoran. Mahimo kang modapit niini nga pagtimbang-timbang sa kaugalingon sa bisan unsang higayon atol sa klase pinaagi sa nagkadaiyang pamaagi, lakip sa mga kalihokan sa pagsulat, mga pangutana nga pagahisgotan, ug mga imbitasyon sa paggamit sa doktrina ug mga baroganan.

Modelo

Aniay pipila ka ehemplo kon unsaon nimo nga makahimo og mga pagtimbang-timbang sa kaugalingon sa estudyante:

• Sa sinugdanan sa klase, ikaw makadapit sa mga estudyante nga daklit nga morekord diha sa usa ka journal sa ilang kasamtangang pagsabot sa balaod sa ikapulo.

• Sa kataposan sa klase, mahimo nimong dapiton ang mga estudyante sa pagpamalandong: “Sa unsa nga paagi ang imong pagsabot sa balaod sa ikapulo nausab sukad sa sinugdanan sa klase?”

• Human sa pag-ila og dungan sa nagkadaiyang mga baroganan gikan sa usa ka hut-ong sa kasulatan [scripture block], mahimo kang mangutana sa mga estudyante, “Unsaon ninyo paghan-ay kini nga mga baroganan sumala sa kaimportante diha sa inyong kinabuhi?”

• Atol sa usa ka panaghisgot sa klase, mahimo kang mohangyo sa mga estudyante nga maghunahuna mahitungod kon sa unsa nga paagi ang Pag-ula ni Jesukristo nakaapekto sa ilang kinabuhi hangtod niining higayona.

• Mahimo nimong dapiton ang mga estudyante sa paghunahuna mahitungod kon unsaon nila paggamit ang unsay ilang nakat-onan: “Ikonsiderar kon sa unsa nga paagi kamo sa kasamtangan naghunahuna kang ‘[Kristo] sa matag hunahuna’ (Doktrina ug mga Pakigsaad 6:36). Isulat unsay imong gibati nga sunod nga lakang alang kanimo sa pagpalambo sa imong relasyon ngadto Kaniya kabahin niini.”

Iklik dinhi aron makakita og bidyo niini nga modelo.

Pagpraktis

Gamita ang usa o dugang pa sa mosunod nga mga pagpraktis aron mapalambo ang imong abilidad sa paghimo og mga pagtimbang-timbang sa kaugalingon alang sa imong mga estudyante:

• Tan-awa ang usa ka umaabot nga plano sa leksiyon. Pagpili og doktrina nga giplano nimo nga tutokan. Pagpraktis sa pagsulat og duha o tulo ka yano nga mga pagtimbang-timbang sa kaugalingon nga magamit sa mga estudyante sa paghunahuna sa ilang kasamtangang pagsabot niini nga doktrina o sa unsa nga paagi ang ilang pagsabot nausab tungod sa unsay ilang nakat-onan.

• Pagpili og usa ka higayon diha sa usa ka umaabot nga leksiyon sa dihang giplano ang usa ka panaghisgot sa klase. Pagpraktis sa pagsulat og duha o tulo ka pangutana nga makatabang sa mga estudyante sa pagtimbang-timbang sa ilang kaugalingon nga panglantaw ug kasinatian nga may kalabotan ngadto sa usa ka baroganan nga pagailhon.

• Pangita og usa ka dapit diha sa usa ka umaabot nga leksiyon diin imong tutokan ang paggamit. Imbes nga dapiton lamang ang mga estudyante sa paggamit sa usa ka piho nga doktrina o baroganan, praktisa ang pagsulat og duha o tulo ka pagdapit nga motabang kanila sa pagtimbang-timbang sa ilang kasamtangang paggamit ug unsaon sa pagpadayon sa paglambo.

Hisgoti o Pamalandongi

Pamalandongi kon unsa ang imong nakat-onan gikan niini nga kasinatian. Tingali marekord nimo ang pipila niini nga mga hunahuna diha sa usa ka journal sa pagtuon. Ikonsiderar ang mosunod nga mga pangutana:

• Unsay akong nabuhat kaniadto sa pagtabang sa mga estudyante sa pagtimbang-timbang sa kaugalingon?

• Unsay akong nakat-onan niini nga kasinatian nga makapalambo sa akong abilidad sa pagtabang sa mga estudyante sa pagtimbang-timbang sa kaugalingon?

• Unsa ang akong buhaton aron magpadayon sa paglambo?

Iapil

• Alang sa matag plano sa leksiyon niini nga semana, gamit og usa ka lahi nga pagsukod sa kaugalingon aron matabangan ang mga estudyante nga makakat-on gikan sa Espiritu Santo. Paggahin og panahon sa pag-ila sa unsay imong nakat-onan gikan niini nga kasinatian, ug praktisa pag-usab diha sa imong pagpangandam ug sa imong mga klase. Padayon sa pagpraktis, pagkat-on, ug paghimong mas maayo sa imong mga paningkamot sa pagtabang nga mapalambo ang mga kasinatian sa imong mga estudyante ug sa pag-awhag nga magpadayon sa ilang pagtubo ug pag-uswag.

Gusto pa og Dugang?

• Jeffrey R. Holland, “Angels and Astonishment” (Sibya sa tinuig nga pagbansay sa Seminaries and Institutes of Religion, Hunyo 12, 2019), broadcasts.ChurchofJesusChrist.org

• “Pagdapit og Makugihon nga Pagkat-on,” Pagtudlo Sumala sa Pamaagi sa Manluluwas (2016), 29–30

• “Invite Diligent Learning [Pagdapit og Makugihon nga Pagkat-on]” (3:35) (bidyo), ChurchofJesusChrist.org

Kahanas

Paggamit og sagradong musika. Dapita ang mga estudyante sa pag-ila sa mga linya ug hugpong sa mga pulong diha sa sagradong musika nga mokonektar sa mga kamatuoran nga ilang nakat-onan.

Ipasabot

Ang Unang Kapangulohan nag-ingon, “Ang mga himno modapit sa Espiritu sa Ginoo, momugna og usa ka matinahuron nga pagbati, mohiusa kanato nga mga miyembro, ug mohatag og paagi aron kita makahalad og mga pagdayeg ngadto sa Ginoo” (Hymns, ix). Ang Sagradong musika mahimong magamit diha sa debosyonal sa pagsugod sa klase. Kini mahimo usab nga gamiton atol sa klase uban sa espesyal nga mga pasundayag sa estudyante, pinaagi sa pagkanta og dungan sa mga himno, o pinaagi sa hilom nga pagbasa pinaagi sa mga lireko sa usa ka awit. Sa higayon ang musika gigamit, ang mga magtutudlo makadapit sa mga estudyante sa pag-ila sa mga kamatuoran sa ebanghelyo ingon man mapalawman ang ilang pagsabot sa mga baroganan sa ebanghelyo. Kini mahimong matuman pinaagi sa pagdapit sa mga estudyante sa pag-ila sa mga pulong ug hugpong sa mga pulong diha sa usa ka awit nga nagtudlo kanila og dugang mahitungod sa Manluluwas ug sa mga kamatuoran nga gitudlo diha sa klase.

Modelo

Sa ubos mao ang pipila ka mga ehemplo sa mga pangutana nga mahimo nimong ihangyo sa mga estudyante sa pagpamalandong samtang nagpaminaw o nagkanta sa usa ka awit:

Unsa ang imong paborito nga pulong o hugpong sa mga pulong niining himno? Unsa ang gitudlo niini diha kanimo mahitungod sa Langitnong Amahan ug ni Jesukristo?

• Bag-o lang natong nahisgotan ang baroganan diha sa Juan 15, Kita mopakita sa atong gugma alang ni Jesukristo pinaagi sa pagtuman sa Iyang mga sugo. Pangitaa ang usa ka linya diha sa usa ka himno nga nagtudlo kanimo og dugang pa mahitungod niini nga baroganan. Mahimo nimong ikonsiderar ang pagpangita sa “Gugma” diha sa mga “Hilisgotan” nga seksiyon sa hymnbook.

• Unsa ang gitudlo niini nga awit diha kaninyo mahitungod sa Langitnong Amahan ug ni Jesukristo?

• Sa unsang paagi nga kining awit makatabang kaninyo nga madugangan ang pagsabot ug pagpasalamatan ang mga kamatuoran nga atong nahisgotan diha sa klase?

• Kinsa ang inyong nailhan nga kinahanglan makadungog niining awit karon? Unsa nga mga kamatuoran nga gitudlo niining awit ang inyong gusto nga mahibaloan niini nga tawo?

Pagpraktis

• Paklia ngadto sa umaabot nga leksiyon diha sa kurikulom ug pag-ila og usa sa mga baroganan nga imong gitudlo. Pagpili og usa o duha ka mga pangutana gikan sa modelo sa ibabaw o maghimo og usa sa imong kaugalingon aron sa pagdapit sa mga estudyante aron makakonektar og usa ka himno ngadto sa baroganan.

Hisgoti o Pamalandongi

• Ikonsiderar unsa ang imong nahimo sa una aron maapil ang sagradong musika ngadto sa imong mga leksiyon. Unsa ka sagad ka mogamit og sagrado nga musika diha sa klase? Unsaon nimo sa paggamit niini sa makadaghan?

• Kanus-a ka nakabaton og makapatandog nga kasinatian gamit ang musika sa usa ka sitwasyon sa lawak klasehanan?

• Ikonsiderar kon sa unsang paagi ang pagpadayon sa pagpalambo sa imong paggamit sa sagradong musika diha sa klase mopanalangin sa imong mga estudyante. Unsa nga mga hunahuna ang misantop sa hunahuna?

Iapil

• Dapita ang usa ka estudyante nga mainampoon nga mopili og usa ka himno alang sa usa ka umaabot nga debosyonal nga mokonektar ngadto sa kamatuoran nga ilang gitudlo.

• Ikonsiderar ang uban nga mga paagi nga ikaw makagamit sa sagradong musika sa pagtudlo sa mga baroganan sa ebanghelyo.

Gusto pa og Dugang?

• Suhira ang Sacred Music nga app aron makita ang mga tinubdan nga mahimong gamiton diha sa klase. Ang pipila ka mga ehemplo mao ang mga Album sa Kabatan-onan, Face to Face Music, Musika gikan sa Kinatibuk-ang Komperensiya, ug Musika gikan sa Alang sa Kalig-on sa mga Kabatan-onan.

• Dallin H. Oaks, “Pagsimba pinaagi sa Musika,” , Nob. 1994, 9–12