« ថ្លែងទីបន្ទាល់ជារឿយៗ ហើយអញ្ជើញសិស្សឲ្យចែកចាយអារម្មណ៍ បទពិសោធន៍ និងទីបន្ទាល់របស់ពួកគេ » ជំនាញអភិវឌ្ឍន៍គ្រូបង្រៀន ៖ បង្រៀនដោយព្រះវិញ្ញាណ ( ឆ្នាំ២០២៣ )

« ថ្លែងទីបន្ទាល់ជារឿយៗ ហើយអញ្ជើញសិស្សឲ្យចែកចាយអារម្មណ៍ បទពិសោធន៍ និងទីបន្ទាល់របស់ពួកគេ » ជំនាញអភិវឌ្ឍន៍គ្រូបង្រៀន ៖ បង្រៀនដោយព្រះវិញ្ញាណ

គោលការណ៍នៃការបង្រៀនដូចជាព្រះគ្រីស្ទ ៖ បង្រៀនដោយព្រះវិញ្ញាណ

ថ្លែងទីបន្ទាល់ជារឿយៗ ហើយអញ្ជើញសិស្សឲ្យចែកចាយអារម្មណ៍ បទពិសោធន៍ និងទីបន្ទាល់របស់ពួកគេ ។

ជំនាញ

បង្កើតការបំផុសគំនិតនានាដែលជួយសិស្សឲ្យនិយាយចេញមកនូវអារម្មណ៍ បទពិសោធន៍ និងទីបន្ទាល់របស់ពួកគេ ។

កំណត់និយមន័យ

នៅពេលសិស្សចែកចាយអារម្មណ៍ បទពិសោធន៍ និងទីបន្ទាល់របស់ពួកគេ នោះព្រះវិញ្ញាណបរិសុទ្ធនឹងថ្លែងទីបន្ទាល់អំពីសេចក្តីពិតនៃអ្វីដែលពួកគេកំពុងថ្លែង ទាំងចូលទៅក្នុងគំនិត និងចិត្តរបស់ពួកគេផ្ទាល់ ព្រមទាំងទៅកាន់អ្នកដទៃផងដែរ ។ ការបំផុសគំនិតគឺជារបៀបមួយដើម្បីជួយពួកគេឲ្យចែកចាយ ។ ជាទូទៅការបំផុសគំនិតទាំងនេះរួមមានពីរផ្នែក ៖ ផ្នែកទីមួយអញ្ជើញសិស្សឲ្យពិចារណាអំពីអារម្មណ៍ បទពិសោធន៍ និងទីបន្ទាល់របស់ពួកគេ ហើយអាចភ្ជាប់ទៅនឹងឧបករណ៍បង្រៀនផ្សេងៗដូចជា រូបភាព សំណួរ វិភាគរឿង វីដេអូខ្លីៗ និងទំនុកតម្កើង ។ ផ្នែកទីពីរផ្តល់ឱកាសដល់សិស្សឲ្យចាប់ផ្តើមចែកចាយ ។ ការណ៍នេះអាចត្រូវបានធ្វើឡើងតាមរយៈការអញ្ជើញសិស្សឲ្យពិចារណាអំពីរបៀបដែលពួកគេនឹងបំពេញឃ្លាដែលមិនពេញលេញ ។ លក្ខណៈពិសេសចាំបាច់នៃការបំផុសគំនិតទាំងនេះគឺថា វាជួយសិស្សភ្ជាប់ទៅនឹងព្រះវិញ្ញាណបរិសុទ្ធ ដើម្បីជួយពួកគេឲ្យចាប់ផ្តើមគិតអំពីរបៀបមួយ ដើម្បីនិយាយចេញមកនូវអារម្មណ៍ បទពិសោធន៍ និងទីបន្ទាល់របស់ពួកគេ ។

គំរូ និងការអនុវត្តខាងក្រោមនេះគឺជាឧទាហរណ៍ទូទៅ ។ ការបំពាក់បំប៉ននឹងកាន់តែមានប្រសិទ្ធភាព ប្រសិនបើគំរូ និងឱកាសអនុវត្តត្រូវបានផ្សារភ្ជាប់ទៅនឹងមេរៀនបន្ទាប់ដែលនឹងត្រូវបានបង្រៀននៅក្នុងកម្មវិធីសិក្សា ។

គំរូ

រូបភាពគំរូ

អ្នកកំពុងបង្រៀន គោលលទ្ធិ និងសេចក្តីសញ្ញា ៤៥:១–៥ ហើយគោលការណ៍នៅក្នុងខគម្ពីរនេះគឺ « ព្រះយេស៊ូវគ្រីស្ទគឺជាអង្គគាំទ្ររបស់យើងជាមួយនឹងព្រះវរបិតា » ។ អ្នកបង្ហាញរូបភាពរបស់ព្រះយេស៊ូវគ្រីស្ទនេះ ហើយប្រើការបំផុសគំនិតថា « ប្រសិនបើខ្ញុំអាចទូលព្រះយេស៊ូវគ្រីស្ទនូវហេតុផលមួយពីមូលហេតុដែលខ្ញុំស្រឡាញ់ទ្រង់ នោះខ្ញុំនឹងចែកចាយថា … »

ទំនុកតម្កើងគំរូ

អ្នកកំពុងច្រៀងបទ « ខ្ញុំដឹងថាព្រះប្រោសលោះខ្ញុំនៅរស់ » ជាមួយគ្នាក្នុងថ្នាក់ទាំងមូល ។ អ្នកអញ្ជើញសិស្សឲ្យរកមើលវគ្គនានាដែលពួកគេចូលចិត្ត ដែលជួយពួកគេឲ្យបំពេញឃ្លានេះ ៖ « ខ្ញុំដឹងថា ព្រះយេស៊ូវគ្រីស្ទមានព្រះជន្មរស់នៅដើម្បី … »

សូមចុចនៅត្រង់នេះដើម្បីមើលវីដេអូអំពីគំរូនេះ ។

1:22

អនុវត្ត

សូមចំណាយពេលប្រាំនាទីបន្ទាប់ ហើយរកមើលរូបភាព ទំនុកតម្កើង ឬវីដេអូខ្លីៗអំពីព្រះយេស៊ូវគ្រីស្ទដែលភ្ជាប់ទៅនឹងគោលការណ៍ ឬគោលលទ្ធិមួយនៅក្នុងបណ្តុំវគ្គបទគម្ពីរបន្ទាប់ ។ សូមលើកឡើងពីការបំផុសគំនិតមួយដែលនឹងជួយសិស្សឲ្យគិតដោយយកចិត្តទុកដាក់ បន្ទាប់មកចែកចាយអារម្មណ៍ បទពិសោធន៍ ឬទីបន្ទាល់របស់ពួកគេអំពីព្រះយេស៊ូវគ្រីស្ទ ដែលទាក់ទងនឹងគោលការណ៍ ឬគោលលទ្ធិដែលបានជ្រើសរើសនេះ ។

ពិភាក្សា ឬជញ្ជឹងគិត

តើការផ្តល់ការបំផុសគំនិតមួយអាចជួយសិស្សឲ្យចែកចាយអារម្មណ៍ បទពិសោធន៍ និងទីបន្ទាល់របស់ពួកគេដោយរបៀបណា ?
តើអ្នកបានរៀនអ្វីខ្លះ អំពីការជួយសិស្សឲ្យទទួលអារម្មណ៍កាន់តែមានទំនុកចិត្តក្នុងការចែកចាយទីបន្ទាល់ និងអារម្មណ៍កាន់តែមានប្រកបដោយអត្ថន័យ ?

រួមបញ្ចូល

សូមបង្កើតការបំផុសគំនិតមួយសម្រាប់មេរៀននីមួយៗនៅសប្តាហ៍នេះ ដែលជួយសិស្សឲ្យចែកចាយអារម្មណ៍ បទពិសោធន៍ និងទីបន្ទាល់របស់ពួកគេ ។

តើចង់បានបន្ថែមទៀតទេ ?

« ដឹកនាំការពិភាក្សាប្រកបដោយការបំផុសគំនិត » ការបង្រៀនតាមរបៀបរបស់ព្រះអង្គសង្គ្រោះ ( ឆ្នាំ២០១៦ ) ទំព័រ ៣៣–៣៤
« Ideas for Virtual Learning and Teaching » នៅលើគេហទំព័រ ChurchofJesusChrist.org

ជំនាញ

ថ្លែងទីបន្ទាល់កាន់តែញឹកញាប់ និងមានឥទ្ធិពលជាងមុនអំពីព្រះយេស៊ូវគ្រីស្ទ ។

កំណត់និយមន័យ

អែលឌើរ នែល អិល អាន់ឌើរសិន បានអញ្ជើញគ្រូបង្រៀនប្រព័ន្ធអប់រំសាសនាចក្រ និងថ្នាក់ដឹកនាំឲ្យ « ថ្លែងទីបន្ទាល់កាន់តែញឹកញាប់ និងមានឥទ្ធិពលជាងមុនអំពីព្រះយេស៊ូវគ្រីស្ទ » ( « The Power of Jesus Christ and Pure Doctrine » [ សុន្ទរកថាទៅកាន់គ្រូបង្រៀនសាសនានៃប្រព័ន្ធអប់រំសាសនាចក្រ ថ្ងៃទី១១ ខែមិថុនា ឆ្នាំ២០២៣ ] បណ្ណាល័យដំណឹងល្អ ) ។ ឱកាសដើម្បីទទួលបានទីបន្ទាល់អាចកើតមានអំឡុងពេលម៉ោងរៀន នៅពេលសេចក្ដីពិតអំពីព្រះអង្គសង្រ្គោះត្រូវបានចែកចាយ មិនត្រឹមតែនៅដើម ឬចុងបញ្ចប់នៃថ្នាក់រៀនប៉ុណ្ណោះទេ ។ អ្នកអាចប្រើសំណួរដូចខាងក្រោមនេះ ដើម្បីជួយអ្នកឲ្យស្វែងរកទីបន្ទាល់សាមញ្ញ និងមានឥទ្ធិពលដែលអ្នកអាចចែកចាយបាន ៖

តើខ្ញុំដឹងអ្វីខ្លះដោយខ្លួនឯង អំពីអ្វីដែលបានបង្រៀនអំពីព្រះអង្គសង្រ្គោះ ?
តើខ្ញុំមានអារម្មណ៍យ៉ាងណាចំពោះព្រះចេស្តារបស់ព្រះយេស៊ូវគ្រីស្ទនៅក្នុងជីវិតរបស់ខ្ញុំ ?
តើវិធីសាមញ្ញ និងចេញពីដួងចិត្តអ្វីខ្លះ ដែលខ្ញុំអាចចែកចាយពីអ្វីដែលខ្ញុំដឹងអំពីព្រះយេស៊ូវគ្រីស្ទ ?

ការចែកចាយទីបន្ទាល់ដ៏សាមញ្ញ និងញឹកញាប់របស់អ្នកអំពីព្រះអង្គសង្គ្រោះ អាចបង្កើតបរិយាកាសមួយដែលសិស្សរបស់អ្នកមានអារម្មណ៍ស្រួលក្នុងការចែកចាយ ហើយអាចជួយពួកគេឲ្យមានអារម្មណ៍ថា ព្រះវិញ្ញាណបរិសុទ្ធកំពុងបញ្ជាក់ពីទីបន្ទាល់របស់អ្នកអំពីសេចក្ដីពិតនោះ ។

គំរូ

ក្នុងអំឡុងពេលមេរៀនមួយអំពីការប្រសូត្ររបស់ព្រះយេស៊ូវគ្រីស្ទ បងប្រុស ឈែនលើរ គិតអំពីអ្វីដែលគាត់ដឹងអំពីព្រះអង្គសង្គ្រោះ ហើយថាតើព្រះវរបិតារបស់គាត់ជានរណា រួចហើយនិយាយដោយសាមញ្ញថា « ព្រះយេស៊ូវគ្រីស្ទគឺជាព្រះរាជបុត្រានៃព្រះ » ។

ឃ្លាផ្សេងទៀតដែលត្រូវពិចារណា និងប្រើគឺ ៖

ខ្ញុំបានរៀនដោយខ្លួនឯងថា ព្រះយេស៊ូវគ្រីស្ទ …
ខ្ញុំដឹងថា ព្រះអង្គសង្គ្រោះ …
ខ្ញុំមានអារម្មណ៍ថា ព្រះចេស្តារបស់ព្រះអង្គសង្គ្រោះដើម្បី …នៅក្នុងជីវិតរបស់ខ្ញុំ នៅពេល …

សូមចុចនៅត្រង់នេះដើម្បីមើលវីដេអូអំពីគំរូនេះ ។

1:11

អនុវត្ត

សម្រាប់សេចក្ដីពិតនីមួយៗដូចខាងក្រោម សូមសរសេរទីបន្ទាល់ដ៏សាមញ្ញ និងមានឥទ្ធិពលមួយដែលអ្នកអាចចែកចាយបាន ។ អ្នកអាចប្រើសំណួរ ឬការបំផុសគំនិតមកពីនិយមន័យ និងគំរូខាងលើដើម្បីជួយអ្នក។

ព្រះយេស៊ូវគ្រីស្ទគឺជាពន្លឺនៃពិភពលោក ។
ព្រះយេស៊ូវគ្រីស្ទបានទទួលរងការឈឺចាប់ដើម្បីសង្រ្គោះខ្ញុំពីអំពើបាប និងសេចក្តីស្លាប់ ហើយដើម្បីជួយខ្ញុំឲ្យឆ្លងកាត់ឧបសគ្គនៃជីវិតរមែងស្លាប់នេះ ។
សេចក្ដីពិតដែលនឹងត្រូវបានបង្រៀននៅក្នុងមេរៀនបន្ទាប់របស់អ្នក ។

ពិភាក្សា ឬជញ្ជឹងគិត

តើអ្នកកំពុងរៀនអ្វីខ្លះ ពេលអ្នកអនុវត្តទីបន្ទាល់ដ៏សាមញ្ញ និងមានឥទ្ធិពលទាំងនេះអំពីព្រះយេស៊ូវគ្រីស្ទ ?
តើអ្នកអាចធ្វើអ្វីខ្លះដើម្បីធានាថា ការថ្លែងទីបន្ទាល់របស់អ្នកជាញឹកញាប់នៅតែស្មោះត្រង់ និងចេញពីចិត្ត ?

រួមបញ្ចូល

នៅពេលដែលអ្នករៀបចំ និងបង្រៀនមេរៀនរបស់អ្នក ឬបង្រៀនមេរៀននៅសប្តាហ៍ខាងមុខនេះ សូមស្វែងរកឱកាសដើម្បីថ្លែងទីបន្ទាល់អំពីព្រះយេស៊ូវគ្រីស្ទ ។ បន្ទាប់មក សូមចែកចាយទីបន្ទាល់ដ៏សាមញ្ញ និងស្មោះសររបស់អ្នកអំពីទ្រង់ ។

តើចង់បានបន្ថែមទៀតទេ ?

ហ្គែរី អ៊ី ស្ទីវ៉ែនសុន « ការថែទាំ និងការថ្លែងទីបន្ទាល់របស់បងប្អូន » លីអាហូណា ខែវិច្ឆិកា ឆ្នាំ២០២២ ទំព័រ ១១១–១១៤
« ចែកចាយទីបន្ទាល់របស់អ្នក » នៅក្នុង « ជួយមនុស្សឲ្យធ្វើ និងរក្សាការតាំងចិត្ត » ប្រកាសដំណឹងល្អរបស់យើង ( ឆ្នាំ២០១៩ ) ទំព័រ ២០១–២០២