Teuteuʻi ‘o e Lēsoní

Taukei: Fakaʻaongaʻi ʻa e taumuʻa ʻo e lēsoní ʻi he naunau fakalēsoní ke fakafaingofuaʻi hoʻo teuteu lēsoní mo tataki hono fili ʻo e ngaahi aʻusia fakaakó maʻa hoʻo kau akó.

Ko e hā ʻeku ʻuluaki mahinó pe meʻa te u malavá? (Sivi):

Ko e fē ʻi he ngaahi meʻá ni ʻokú ne fakafofongaʻi lelei taha hoʻo aʻusia ʻi he taumuʻa ʻo e lēsoní ʻa ia ʻoku ʻomi ki he lēsoni takitaha ʻi he naunau fakalēsoni ʻa e seminelí?

1. ʻOku ʻikai ke u fakapapauʻi pe te u maʻu ia mei fē.

2. ʻOku ou ʻiloʻi ʻa e feituʻu ke maʻu ai iá ka ʻoku ʻikai ke u fakapapauʻi ʻa e founga ke fakaʻaongaʻi lelei ai ia ʻi heʻeku teuteú.

3. ʻOku ou fakaʻaongaʻi maʻu pē ia ke tokoniʻi au ʻi heʻeku teuteu lēsoní.

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Ko e taha ʻo e ngaahi founga lelei taha ke fakafaingofuaʻi ai hono teuteuʻi ʻo e lēsoní mo ʻoatu ha ngaahi aʻusia ʻoku fakatefito ʻia Kalaisi, fakatefito ʻi he folofolá, mo e ngaahi aʻusia ʻoku fakatefito ʻi he tokotaha akó maʻa hoʻo kau akó, ko hono fakaʻaongaʻi ʻa e taumuʻa ʻo e lēsoní ke tataki koe ʻi hoʻo teuteú. ʻE lava foki ke tokoni atu hono fakaʻaongaʻi ʻo e taumuʻa ʻo e lēsoní ke ke maʻu ha loto-falala lahi ange ʻi he ngaahi liliu ʻokú ke fai fekauʻaki mo e meʻa ke fakakau, fakafaingofuaʻi, pe ʻikai fakakau mei he naunau fakalēsoní. ʻOku kau ʻi he lēsoni takitaha ʻi he naunau fakalēsoni ʻa e seminelí ha taumuʻa ʻo e lēsoní. ʻOku maʻu ia ʻi he vakai fakalūkufua fakauiké mo e palakalafi ʻuluaki ʻo e lēsoni takitaha. ʻOku fakatefito ʻa e ngaahi taumuʻa ʻo e lēsoni ko ʻení ʻi hano ako fakalelei ʻo e konga folofolá pea tupulaki mei he ngaahi moʻoni ʻoku fakaʻilongaʻi mataʻāʻā ʻi he lēsoní. ʻI hoʻo ako ʻa e folofolá mo e naunau fakalēsoní, tokanga taha ki he taumuʻa ʻo e lēsoní ke ʻiloʻi ʻa e meʻa ʻe tokoni ke fakakakato ʻa e taumuʻa ko iá maʻa hoʻo kau akó. Ko ha founga ʻeni ʻe taha ke lava ʻo fakahoko ai ʻení:

• Kamata ʻaki hano lau ʻa e taumuʻa ʻo e lēsoní ʻa ia te ke akoʻí.

• Lau ʻa e lēsoni ʻi he naunau fakalēsoní ʻo manatuʻi ʻa e taumuʻa ʻo e lēsoní pea fakafuofuaʻi ʻa e tuʻunga ʻo hoʻo ongoʻi ʻe tokoni ʻa e ʻekitivitī takitaha ki hoʻo kau akó ke nau fakahoko ʻa e taumuʻa ko iá.

• Hili hono lau ʻa e lēsoní, fakapapauʻi pe ko e fē ʻi he ngaahi ʻekitivitī ʻokú ke ongoʻi ʻe tokoni lelei taha ki hoʻo kau akó ke nau lavaʻi ʻa e taumuʻa ʻo e lēsoní. ʻAi ke fakamuʻomuʻa ʻa e ngaahi ʻekitivitī ko iá ki he meʻa ʻokú ke teuteú pea ʻe aʻusia ʻe he kau akó ʻi he kalasí.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻOku kamata teuteuʻi ʻe Sisitā Holo ʻa e lēsoni Tokāteline mo e Ngaahi Fuakava 1. ʻOkú ne kamata ʻaki hono lau ʻa e palakalafi ʻuluaki ʻo e lēsoní ʻo kumi ʻa e taumuʻá. ʻI he konga ki lalo ʻo e palakalafi ko iá, ʻokú ne vakai ai ʻoku pehē, “ʻE lava ke tokoni ʻa e lēsoni ko ʻení ke mahino ki he kau akó ʻa e ʻuhinga ʻoku ʻomi ai ʻe he ʻEikí ʻa e ngaahi fakatokangá ki he māmaní.” ʻI heʻene lau ʻa e Ngaahi ʻEkitivitī Ako ʻe Ala Fakahoko ki he lēsoní, ʻokú ne manatuʻi maʻu pē ʻa e taumuʻa ʻo e lēsoní mo fai ha ngaahi fili fekauʻaki mo e meʻa ke fakaʻaongaʻi, fakafaingofuaʻi, pe ʻikai fakakau mei he naunau fakalēsoní ʻi heʻene lēsoní. ʻI heʻene teuteú, ʻokú ne maʻu ai ha ngaahi konga ʻo e lēsoní ʻokú ne fiemaʻu ke fakapapauʻi ʻokú ne fakakau. Hangē ko ʻení, ko hono fakafuofuaʻi pē kitá, ko e puipuituʻa ʻo e Tokāteline mo e Ngaahi Fuakava 1, ko e ʻekitivitī ke tokoni ke ʻiloʻi ʻe he kau akó ʻa e moʻoni ʻoku fakaʻilongaʻi mataʻāʻaá, pea mo e ʻekitivitī fakaʻosi ʻoku fakahaaʻi ai ʻe he kau akó ʻa e meʻa ʻoku nau akó, ko e ngaahi ʻekitivitī kotoa ia ʻokú ne fiemaʻu ke fakakau aí. Ko e toenga ʻo e ngaahi konga ʻo e lēsoní ʻokú ne fakakaukau ke toʻo pe fakanounouʻi ʻo makatuʻunga ʻi he taimi ʻo e kalasí ʻokú ne maʻú.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

• ʻAlu ki he naunau fakalēsoní ki he lēsoni hoko ʻoku fiemaʻu ke ke teuteú.

• Feinga ke ʻiloʻi ʻa e taumuʻa ʻo e lēsoní ʻi he palakalafi ʻuluakí.

• Vakaiʻi fakavave ʻa e ngaahi ʻEkitivitī Ako ʻe Ala Fakahokó ʻo manatuʻi ʻa e taumuʻa ʻo e lēsoní mo fakafuofuaʻi ʻa e tuʻunga lelei ʻo hoʻo ongoʻi ʻe tokoni ʻa e ʻekitivitī takitaha ki hoʻo kau akó ke nau fakahoko ʻa e taumuʻa ko iá.

• Fakakaukauʻi pe ko e fē ʻi he ngaahi ʻekitivitī ʻokú ke ongoʻi ʻe tokoni lelei taha ki hoʻo kau akó ke nau lavaʻi ʻa e taumuʻa ko ʻení pea ʻe hoko ia ko e meʻa te ke fakamuʻomuʻá.

Fakalaulauloto pe aleaʻi:

• Ko e hā ʻokú ke ako fekauʻaki mo e mahuʻinga hono manatuʻi ʻa e taumuʻa ʻo e lēsoní ʻi hoʻo teuteu hoʻo lēsoní?

• ʻOkú ke pehē ko e hā ha ngaahi founga ʻe lava ke fakatupulaki ai ʻe hono manatuʻi maʻu pē ʻa e taumuʻa ʻo e lēsoní ʻa e aʻusia fakaakó ki hoʻo kau akó?

Ko e hā ʻa e founga mo e taimi te u fakahoko ai ʻení?

Kamata hoʻo teuteú ʻaki hono lau ʻa e taumuʻa ʻo e lēsoní ki he lēsoni takitaha ʻokú ke teuteuʻi ʻi he uike ka hoko maí. ʻI hoʻo lau ʻa e naunau fakalēsoní, manatuʻi maʻu pē ʻa e taumuʻa ʻo e lēsoní mo fakafuofuaʻi ʻa e tuʻunga ʻo hoʻo ongoʻi ʻe tokoni ʻa e ʻekitivitī takitaha ki hoʻo kau akó ke nau fakahoko ʻa e taumuʻa ko iá. Fakamuʻomuʻa ʻa e ngaahi ʻekitivitī ʻe lelei taha ke fai ʻe hoʻo kau akó.